Yehova Watukwasha Kwijidin Mashakamin ni Kwikal ni Musangar Chikalap Nchik Ndond Twading

Mukadivar Kassholm ni mukajend aya ku shikol ya Galad mu muvu wa 1979 ni mu mivu kushalijan ayituma kusadin mu jingand mud Iran, Île Maurice, Myanmar, Uganda ni mu Zaïre. Ku shikol ya Galad ayinkisha chiyul kud mulej Jack Redford, chayikwasha kwitiy kuswimp kwawonsu ni kwikal ni musangar chikalap nchik ndond yayitumangau. El akurumburilany.

Mats, tuleja bil mutapu wajingunina uyakin.

Mats: Tatuku wading ushich mwi ngand ya Polony pa chirung cha Njit ja Kaad ja pa Mangand Mawonsu; mu Egliz Katolik mwading rubabek nakash. Pakwez, walondang chisu chawonsu anch “nij anch relijon wakin udaku pa mangand ap!” Mu kusut kwa chisu, najingunina anch yom yalondangay yading yakin. Nalanda mabuku mavud mading masadidinau kal mulong wa kutang. Buku umwing wading wa ble, ading amufundin anch La vérité qui conduit à la vie éternelle. Mutu wa mulong winou wapwita kamu nkeu jam, chawiy namutanga buku winou mwawonsu mu uchuku umwing dichuku namulanda. Pinapwisha kumutang, namana anch najingunin kal uyakin!

Kusambish mwi Ngond wa 4 muvu wa 1972, natanga mabuku mavud ma Atuman a Yehova ni natana yakul yivud ku yipul niyipulang piur pa Bibil. Niyova kamu mud mwin kwisak wisambidinau mu chilakej cha Yesu walandisha yom yend yawonsu mulong wa kuland usang wa usey wabudikinay. Nalikap mupak wam wa kuya ku iniversite ni kwikal dokter chakwel nitwish kuland “usang” wa uyakin natana. (Mat. 13:45, 46) Ambatisha machuku ma ngond 10 Ngond wa 12, muvu wa 1972.

Muvu walondulap, anvaj am ni mwancham ikuny niyau itiya uyakin ni ayibatisha. Mwi Ngond wa 7 muvu wa 1973, nasambisha mudimu wa chisu chawonsu. Pakach pa ayibol akweta mushiku a mu chikumangen chetu pading Ann-Catrin nambaz umwing uswila mu spiritu ni ukweta mushiku. Twakatijana nend ni twatijana mu muvu wa 1975. Twasutisha mivu yinying mu Strömsund, mwi ngand ya Swed. Musumb winou wading uwamp ni mwading antu avud akatina kwilej Bibil.

Ann-Catrin: Tatuku wileja uyakin padingay piswimp ni kupwish shikol ya iniversite mu musumb wa Stockholm. Chisu chinicha nading nawanyish kal lel angond asatu, pakwez wansenda mulong wa kuya nend ku yikumangan ni mu mudimu wa kulejan. Maku kadingap kakatina ni wasala usu wa kumekesh anch Atuman a Yehova ad akamakasu. Pakwez katwishap, chawiy mu kusut kwa chisu niyend amubatisha. Ambatisha pinading ni mivu 13, ni pinawanyisha mivu 16 nasambisha mudimu wa uchibol. Kupwa kwa kusadin mu musumb wa Umeå, kwi ndond kwading maswir nakash ma in kulejan a Want, nikala chibol wa pakampwil.

Kupwa kwa kwatijan ni Mats, twasangara kuyikwash antu avud kwilej uyakin. Pakach pau pading Maivor, changadim walikap mudimu wafanyina kumukwash kwikal ni nfalang jivud mulong wa kumusadin Yehova pamwing ni mwancham mband. Waya ku shikol ya Galad mu muvu wa 1984 ni katat asadin mud amishoner mwi ngand ya Ekwater.

Yom ik yakukwashanya kwijidin mashakamin ni kulam musangar mu yisend yen ya umishoner?

Mats: Atulejang yisu yivud kuswimp yisend. Pakwez chom chatukwashang kwitiy kuswimp chading usu twasalang mulong wa kumwimburij Yesu, pakampwil mwikadil wend wa kwikepish. (Kol. 2:6, 7) Chilakej, pa ndond pa kuchingej anch akadivar nau anambaz asal yom mutapu twading twijidina etu, twasalang usu wa kwilej mutapu wasalangau awiy yom. Twakata kwilej mutapu wau wa kutong ni yaku yau. Kusutin kumwimburij Yesu, chatuswapela kwijidin ni kwikal ni musangar mu yisend yetu.​—Kus. 1:2, 3.

Ann-Catrin: Mulong wa kupam kupwa kwa kuutumburil, mutond ukweting kuswir kwa chirungul ni chimunyik cha muten. Yehova wading “muten” wetu. (Kus. 84:11; TMK.) Watwinkisha akadivar nau anambaz a mu spiritu akweta rukat ni musangar. Chilakej, mu chikumangen chetu chikemp mu musumb wa Tehran, mwi ngand ya Iran, akadivar nau anambaz ading in kwakan ni in kupan. Chinech chatuvurisha mwikadil wa kwakan wadingau nich antu amwing alejenau mu Bibil. Twova ja kushal mu Iran, pakwez mwi Ngond wa 7 muvu wa 1980, mudimu wa Atuman a Yehova awimika ni atwinkisha asaa 48 mulong wa kubudik mwi ngand. Atutuma kand mu Afrik, mwi ngand ya Zaïre (yijikena katat mud Congo).

Panijika kamu anch atutum kal mu Afrik, nadila. Yom natesha piur pa annak ni mayej yangovisha wom. Pakwez arund aad a piswimp ading asadidinamu kal mu chisu chilemp atuleja anch: “Kand kal uyanganganyap mu Afrik! Pakishany mulong wa kuman—ukukatanyamu.” Yawiy kamu yom yasadika! Akadivar nau anambaz akwet rukat ni musangar. Pitwafanyina kudokal mu Zaïre kupwa kwa mivu musamban pakangeshau mudimu wetu, nasipa nakash mulong namulembilang Yehova anch: “Tulika kwetu amboku tushakam mu Afrik.”

Yiyukish ik wasangaredinanya mu kusut kwa mivu?

Mats: Tukutwish kujimbul urund uwamp nau amishoner a mu jingand kushalijan. Chikwau kand, mu yisend yetu yimwing twikala ni musangar udokiling ku kutakel malejan ma Bibil mavud—yisu yimwing twatakelang pa muntu malejan ma Bibil piswimp 20! Rukat ni muchim wa kwakan wa akadivar nau anambaz a mu Afrik yatupukuna niyau nakash. Chisu twendinang yikumangen mu Tanzani, arund avud atumekeshina muchim wa kwakan “kusut ni pa mitapu yadingau nich.” Twalalang mu motak ni akadivar atulejang kuutek piswimp ni yikumbu yau. (2 Ko. 8:3) Chom chading cha usey pakampwil kud etu chid chisu twatazukang anch jinsang ja dichuku. Kwinsuden kwa dichuku dawonsu, am ni Ann-Catrin twashakamang mulong wa kwisambin piur pa yom yasadikang pa dichuku ni kumujikitish Yehova mulong wa ukwash wend.

Ann-Catrin: Kud am, musangar ujim wading wa kushakam pamwing ni akadivar nau anambaz a pa mangand mawonsu. Twileja mazu makwau—mud Persan, Franse, Luganda, ni Swahili—ni twileja yaku ya antu a jindond kushalijan. Twakwasha mu mudimu wa kuyifumb in kwilej asu, twikala nau arund akin ni twasala nau ‘chikij ku chikij’ mu mudimu wa Nzamb.​—Sof. 3:9.

Twasangera kand yitang kushalijan ya Yehova. Chisu chawonsu twitiyang chisend chisu chatwinkishangau mu mudimu wa Yehova, twiyovang anch twendin pamwing ni Yehova mud ntakel wetu. Watufundisha yom twading twakad mutapu wa kutwish kwilej ayinetu.

Yikokujol ik warishanya nich ni mutapu ik wayipandakananya?

Mats: Mu mivu yivud twayela mayej kushalijan, mud malariya. Ni Ann-Catrin amubarila tupamp tuvud. Twiyakamisha kand piur pa anvaj etu apamina kal. Tujikitishin dijuku detu mulong ayibangina anvaj etu chakwel etu tudandamena kuwanyish chisend chetu. Ayilama nawamp anvaj etu nich kushimpish muchim, nich musangar ni rukat. (1 Tm. 5:4) Chikalap nchik usu twasala mulong wa kuyikwash anvaj etu, twading nau kulemp, ni yisu yivud twiyovang anch chading chitin kuyikwash tupamp tuvud.

Ann-Catrin: Mu muvu wa 1983, pitwading tusadidina mu Zaïre, tupamp tuvud nayela mayej makash ma kolera. Dokter wamuleja Mats anch: “Mutwalany mwi ngand yindj mulong wa kumwok!” Dichuku dalondulaku, twakandama avion umwing kusu wadingaku mulong wa kuya mwi ngand ya Swed.

Mats: Twadila nakash mulong twatonga anch tukusalap kand mudimu wetu wa umishoner. Pakwez chinyim ni yom yalonday dokter, Ann-Catrin wayerika. Kupwa kwa muvu umwing twachirika kand mu Zaïre, kapamp kinika atutuma mu chikumangen chikemp cha dizu da Swahili mu Lubumbashi.

Ann-Catrin: Pitwading mu Lubumbashi, nimisha pakwez mwan wafila mwinvumu. Ap anch twadingap tusotina kuval mwan, ninana nakash mulong mwanetu wafa. Pakwez pa chirung chinicha, Yehova watwinkisha chipan chitwatonginap kwikal nich. Twasambisha kutakel malejan ma Bibil mavud nakash kusutamu pakur. Mu angond akemp, chikumangen chading ni in kulejan 35 ashika 70, ni in kukumangan ading 40 ashika 220. Twipana nakash mu mudimu wa kulejan, ni Yehova wayukisha usu wetu chawiy chasala anch twiyova nawamp. Yisu yivud, tudandamedin kutongin ni kwisambin piur pa mwanetu mukatish wafa. Tuchingedin nich impu kuman mutapu ukutwishay Yehova kwok kusansan kwawonsu mu Paradis.

Mats: Mu chisu kanang, Ann-Catrin waziya nakash. Ankwata mayej ma kanser wa mu mwingong, wading wapamin kal nakash ni chading chitin kwiyokish nakash. Pakwez nlel nid nawamp, ni Ann-Catrin utwishin kusal yom yawonsu.

Twashikena kujingunin anch kadap kusu etu twading turishina ni milong yiney. Kupwa kwa kuyijip antu avud kwi njit jasadika mu Rwanda mu muvu wa 1994, twayendina akadivar nau anambaz ading arefije mu kompony. Pitwamana ritiy rau, kujijaman kwau, ni muchim wau wa kupan ap anch ading ni mashakamin makash, twileja anch Yehova ukwet usu wa kuyipandish antu end chikalap nchik yikokujol yirishinau nich.​—Kus. 55:23.

Ann-Catrin: Twarisha ni chikokujol chikwau chisu twaya kukumangan ku musambu wa kupwa kwa kutung kwa mutiy wa ngand ya Uganda mu muvu wa 2007. Kupwa kwa program, twafanyina kuya mu musumb wa Nairobi, mwi ngand ya Kenya pamwing ni amishoner ni akadivar asadinang ku Betel, uvud wa antu 25. Pitwashika piswimp ni kwandam mu Kenya, motak umwing wezina mutambu windj ni wabuba motak wetu. Shofer ni arunetu akwau atan afa kapamp kamwing; nambaz umwing niyend wafa kupwa kwa kusal machuku makemp mu opital. Tuchingedin nich impu mulong wa kutanijan kand ni arunetu inay!​—Job 14:13-15.

Disuden nayerika. Pakwez am, Mats ni antu akwau twadandamena kuziy nakash mulong wa aksidang wasadika. Ku mutambu wam, kuziy kwinoku kwashikenang uchuku, nakashimwokang ni niyovang mud muntu uyedina mayej ma rudung. Novang wom nakash. Pakwez malembil ni kutang maverse mamwing matukasikeshina, yatukwasha kujijaman. Twatambula kand ukwash wa dokter. Katat twiyovilaku nawamp ni tukat kumulembil Yehova chakwel atukwash kuyongoj antu akwau arishina ni chikokujol chinech.

Piwada urumburilanya mutapu wakukwashanyau kurish ni yikokujol yen walondangany anch Yehova wakusendanya “mud may ma uyisu.” Yom ik ukimbinanya kulond?

Mats: Mazu minam madokil ku chishimu cha Swahili chilondina anch “Tumebebwa kama mayai mabichi,” ap anch “atusendin mud may ma uyisu.” Mud mutapu ukatay muntu kusend may ma uyisu nawamp nakash chakwel kangal mabarok, Yehova watukwasha nich rukat mu yisend yetu yawonsu. Yisu yawonsu twading ni yom tuswirikedina ni yisu yikwau twading ni yivud kusutamu yom twading tuswirikedina. Mutapu umwing twiyova anch Yehova utukatin ni utukwashin wading kusutin ranaken ratumekeshinau kud Chisak Chitakedila.

Ann-Catrin: El nikulejany chilakej chimwing chimekeshina mutapu watukwashay Yehova nich rukat. Dichuku dimwing antazuka ku telefon ni anleja anch tatuku wading uyedin nakash mu Swed. Mats wad wayerikal lel malariya. Twadingap ni mutapu wa kufutin avion mulong wa kuya kumutal tatuku, chawiy twakwata mupak wa kulandish motak wetu. Kupwa atutazuka kand tupamp twaad; cha kusambish, atutazuka kud ambay a uruw ading ija mulong turishina nich ni ading akatin kumufutin muntu umwing mulong wa weny. Cha kaad, atutazuka kud nambaz umwing wapamina kal wading walamina kal nfalang jend mu mushet wading ufundinay anch: “Mulong wa kumukwash muntu uda mu maswir.” Mu aminit akemp kwau, Yehova watukwasha kufutin avion!​—Heb. 13:6.

Yom ik wilejinanya mu mivu 50 wasutishinanya mu mudimu wa chisu chawonsu?

Ann-Catrin: Am nilejin anch, usu wetu ud wa ‘kudandamen kwikuchik ni kulam ruchingej.’ Anch twamuchingejin Yehova, tukumushil chisu cha kurish pa ndond yetu. (Isay 30:15; 2 Jnsg. 20:15, 17) Kusutin kumusadin Yehova nich usu wetu wawonsu mu yisend yetu, twatambwil yiyukish yivud twading twakad mutapu wa kutambul.

Mats: Dilejan da usey nakash nileja did da kumuchingejin Yehova ni kuman mutapu ukwinkwashay. (Kus. 37:5) Wankwashin yisu yawonsu mud mwakanay. Ni udandamedin kutukwash mu chisend chetu chisu ku Betel wa mu Myanmar.

Tuchingejin anch ansand nau ayangadim avud akatina kusal yom yivud mu mudimu wa Yehova akwimenap niyau rukat rend rishinshamena mud ratumekeshidinay kal etu. Tukwet kashinsh anch chikwikal mwamu anch alikidin anch Yehova ayikwash kwijidin mashakamin masu ni kwikal ni musangar chikalap nchik ndond yiyituminau.