Malejan Matufundishau mu Mwom Wetu Wawonsu kud Mulej Wetu Mujim

CHILAKEJ CHATUSHILAU ANVAJETU

Mu kusut kwa chisu, mu muvu wa 1950, anvajam adokala mu Itali mulong wa kuya mu Kindersley, mu musumb wa Saskachewan, mu Kanada. Kupwa kwa chisu chikemp, asambisha kwilej uyakin, ni uyakin winou wikala kamu wa usey nakash mu mwom wetu. Nivurikin anch pinading mwanikanch nasutishang chisu chilemp mu mudimu wa kulejan ni dijuku dam, chawiy yisu yimwing nikat kuswimbul anch “nasambisha mudimu wa uchibol nkwash” pinading ni mivu chinan!

Anvajam ading atuzweny; pakwez asha chilakej chiwamp cha kwipan kumusadin Yehova. Chilakej, mu muvu wa 1963 alandisha yom yau yivud yading yikwetau mulong wa kwikal ni nfalang ja kuya ku chitentam cha pa mangand mawonsu chasadikina mu Pasadena, mu musumb wa Kaliforni, mu U.S.A. Mu muvu wa 1972, twabuukina ku chintamp cha akilometre 1000 ku ul wa Trey, mu musumb wa Kolombi Britanik, mu Kanada, mulong wa kukwash mu mudimu wa kulejan kud antu alondang dizu da Itali. Tatuku wasalang mudimu wa kukorop ni kurijek yom ku magazeng. Amukaninisha ku midimu, pakwez walika mulong wa kwikal ni chisu cha kwipan nakash mu mijikit ya mu spiritu.

Nikwet musangar nakash mulong wa chilakej chiwamp chanshilau am pamwing ni anamakwam asatu kud anvajam. Chilakej chau kwawiy kufumb kwa kusambish natambula mu mudimu wa Yehova. Anfundisha chom navurika mu mwom wam wawonsu; chilondina anch: Ang nakimb cha kusambish Want, Yehova ukwimbangin.​—Mat. 6:33.

KUPIM KAPAMP KA KUSAMBISH MUDIMU WA CHISU CHAWONSU

Mu muvu wa 1980, namwata Debbie, nambaz muwamp nakash wading ukweta mipak ya mu spiritu. Twading tukatin kusal mudimu wa chisu chawonsu, chawiy angond asatu kupwa kwa kwatijan, Debbie wasambisha kusal mudimu wa uchibol. Pitwawanyisha muvu umwing mu uruw wetu, twabuukina mu kachikumangen kakemp mwading maswir, niyam nasambisha kusal mudimu wa uchibol.

Mu kusut kwa chisu twaziya ni twova ja kubuuk. Cha kusambish twambamba bil ni kalam wa munyingumuku. Watuleja nich rukat pakwez kand nich win kashinsh anch: “Yen ayinen ukasikeshinanya yom. Ushinshikidinany nakash pa yikokujol urishinanya nich. Pakwez anch washinshikinany pa yom yiwamp, ukuyimanany.” Chawiy kamu chiyul twading tuswirikedina. (Ks. 141:5) Chawiy twasadina chiyul chinech kapamp kamwing ni twajingunina anch komb kwading yom yiwamp yivud. Antu avud mu chikumangen ading akatin kusal yom yivud mulong wa Yehova, kuwejinaku ansand ni antu amwing ading akweta ambay a uruw akad kwikal atuman. Dined dading dilejan da usey kud etu. Twileja kushinshikin pa yom yiwamp ni kumuchingel Yehova chakwel atukwash kujijamen yikokujol twading turishina nich. (Mik. 7:7) Twachirishirila musangar wetu, ni yom yawapa.

Alej atufundisha ku shikol ya kusambish ya ayibol asadina mu jingand jikwau. Patulejau yipich, yikokujol, ni yiyukish yatanau mu mudimu wau pasadinangau mu jingand jindj, akasikesha mupak wetu wa kusal mud amishoner. Chawiy twamana anch niyetu tukutwish kusal mudimu winou.

Mulong wa kuwanyish mupak wetu, mu muvu wa 1984 twabuukina mu Kebek, ndond yading yilondinau Franse, mu akilometre 4000, kulemp ni musumb wa Kolombi Britanik. Kwinikwa twafanyina kwilej yaku yisu ni dizu disu. Chikokujol chikwau chading anch twadingap ni nfalang jivud. Yisu yimwing twadangang kwetu mbatat twasutirilang kwangul mu chir cha muntu. Debbie wijika mitapu kushalijan ya kwisuk mbatat! Chikalap nchik yikokujol, twalama musangar wetu, ni twadandamena kujijaman. Kudandakanamu kand, twading nich kashinsh anch Yehova wading utubangidin.​—Ks. 64:10.

Dichuku dimwing atutazuka ku telefon pakad kuchingejin. Atuleja kuya kusadin ku Betel mu Kanada. Ap anch twasangara mulong atutazuka kuya ku Betel, twaziyaku, mulong twading twizwishin kal formiler wa kuya ku shikol ya Galad. Pakwez twitiya kusadin ku Betel. Pitwashika ku Betel, twamwipula Mukadivar Kenneth Little, wa mu Komite wa Mutiy anch: “Chikwikal nchik anch atutazuk ku Galad?” Watwakula anch: “Tukushinshikin mulong winou anch akutazukan.”

Mu kusutu kwa rubing rimwing, am ni Debbie atutazuka kuya ku shikol ya Galad. Chawiy twafanyina kukwat mupak. Mukadivar Little watuleja anch: “Chikalap nchik mupak ukukwatanya, mu machuku makemp ukutwishany kutong anch wakwatinany mupak windj. Chidap cha usey kulamat ku mupak umwing, Yehova ukutwish kuyukish mipak yawonsu.” Twatonda kuya ku Galad; mu kusut kwa mivu twamana uyakin wa chiyul chatwinkishay mukadivar Little. Yisu yivud twasadinang chiyul chend mulong wa kuyikwash antu adinga akweta kuswir kwa kutond yisend ik yafanyinau kuwanyish mu dirijek da Yehova.

MWOM WETU MU MUDIMU WA UMISHONER

Twading ni musangar nakash wa kwikal pakach pa in kwilej 24 a mu shikol ya 83 ya Galad. Shikol yiney yasadika ku Brooklyn, mu musumb wa New York, mwi Ngond wa 4, 1987. Mukadivar Ulysses Glass ni Jack Redford awiy alej etu adinga antakel. Angond atan asuta mau nakash, ni atwinkisha maplom machuku ma ngond 6 Ngond wa 9, 1987. Atutuma kusadin mu Hayiti, pamwing ni John ni Marie Goode.

Mwi ngand yiney katumangapamu amishoner kudosh kwayopatinau amishoner akwau mu muvu wa 1962. Kupwa kwa mbing jisatu, twasambisha kusadin mu Hayiti, kulemp mu mikandu, mu kachikumangen kakemp kading nau in kulejan 35. Twading ansand akad ukaliweny, ni twading ayinetu mu chikumbu cha amishoner. Antu a ndond yiniya ading atuzweny nakash, ni avud kadingap kija kutang. Mu machuku ma kwinsambishin mu mudimu wetu wa umishoner, twarisha ni yikokujol mud, kwoshol yom mu jinjil, rinkind mukash, njit ja an a ngand ni kanrumbangesh ka kuwish guvernema.

Twileja yom yivud kusutin akadivar nau anambaz a mu Hayiti, ading atakamena ni akweta musangar. Avud pakach pau arishang ni yikokujol yivud, pakwez ading amukatin Yehova ni mudimu wend. Nambaz umwing mwadamufu kadingap kija kutang; pakwez wading ulamin maverse 150 mu mutu. Yom yasadikang dichuku dawonsu yakasikesha mushiku wetu wa kudandamen kulejan uruu wa Want nich kashinsh anch wawiy ukupwisha milong ya antu. Chotwovishang musangar nakash pa kuman mutapu in kwilej a Bibil etu a kusambish washikenangau kusal mud ayibol a rawonsu, ayibol a pakampwil, ni amakurump.

Chisu twading mu Hayiti, natanijana ni Trevor, nsand mishoner mwin Mormor. Yisu yivud twambambangaku nend piur pa Bibil. Mu kusut kwa mivu natambula mukand wend pakad kuchingejin. Wanfundina anch: “Akwimbatish ku chitentam chikwezap ech! Nikimbin kuchirik mu Hayiti kusal mud chibol wa pakampwil mwi ndond nasalang mud mishoner wa in Mormor.” Wasala mwamu mu mivu yivud, pamwing ni mukajend.

MU EROP​—KUPWA MU AFRIK

Atutuma kusadin ku mutambu umwing wa Erop ni kwinikwa mudimu wa kulejan uruu wa Want kaukangeshangap yisu yivud. Mu muvu wa 1992 twashika mu musumb wa Ljubljana, mwi ngand ya Sloveni, piswimp ni kwi ndond kwapaminau anvajam kurutu kwa kubuukin mwi ngand ya Itali. Njit jading jidandamedin kupandakan mu jindond ja ngand ya Yugoslavi wa pakur. Mutiy wa Viyen, mwi ngand ya Otrish, pamwing ni mabiro mading mu musumb wa Zagreb, mwi ngand ya Krowasi, ni mu musumb wa Belgrade, mwi ngand ya Serbi, yawiy yatakelang mudimu wa kulejan mu jindond jinija. Nlel ngand ni ngand yikwet Betel wau.

Chading chitufanyidin kand kwijidin mashakamin masu ni dizu disu. Ayinau alondang anch: “Jezik je težek,” charumburik anch “dizu dikasiken.” Chakin kamu, dizu dading dikasiken! Twasangera nakash kushinshaman kwa akadivar nau anambaz itiyang pakad kwidjidjek kuswimp kwin kwawonsu kwasadikang mu dirijek ni twamana mutapu wayiyukishangay Yehova. Kapamp kakwau kand, twamanang mutapu wawapishangay Yehova yom nich rukat ni pa chisu chiwanyidina. Mivu twasala mu Sloveni yakasikesha malejan makur twading twilejina kal ni yatufundisha kand malejan masu.

Mwom wetu wadandamena kuswimp. Mu muvu wa 2000 atutuma mwi ngand ya Côte d’Ivoire, mu Afrik wa Kurand. Kupwa mwi Ngond wa 11, 2002 atutuma mwi ngand ya Sierra Leone, mulong wa njit ja an a ngand. Mu kusut kwa mivu 11, njit jinej japwa. Ni chading chikasiken kudokal mwi ngand ya Côte d’Ivoire kapamp kamwing. Pakwez, malejan twileja matukwasha kulam musangar wetu.

Twashinshikina pa antu avud ading akatina kwilej uyakin ni akadivar nau anambaz netu akatish ading ajijamedina kal njit mu mivu yivud. Kadingap ni yom yivud ya ku mujimbu, pakwez ading in kupan. Nambaz umwing wamwinkisha Debbie masun ma kudjal. Debbie wakimba kulik, pakwez nambaz wamukasikesha kutambul, wamuleja anch: “Pa chisu cha njit, akadivar a mu jingand jikwau atukwasha. Katat niyetu tufanyidin kukwash.” Niyetu twitekina mupak wa kwimburij chilakej chau.

Dinsuden twachirika mwi ngand ya Côte d’Ivoire, pakwez milong ya politik yaletang kand kanrumbangesh. Mwi Ngond wa 11, 2004, twadokala mwi ngand, mu elikopter, muntu ni muntu wading kwend ni sakosh umwing. Twalala pansh mu chibeng cha amasalay in Franse. Dichuku dambakenap atutwala mwi ngand ya Swis. Pitwashika ku mutiy, mapep ma uchuku, akadivar a mu Komite wa Mutiy ni akadivar a ku Shikol ya Diyiy da Mudimu nau akajau atwaka ni musangar ni atubwikata nakash. Atwinka yakuda yiswan ni mashokola ma mwi ngand ya Swis. Twiyova anch atukatin kamu nakash.

Atutuma kusadin mwi ngand ya Gana mu chisu chikemp, kupwa twachirika mwi ngand ya Côte d’Ivoire kupwa kwa njit ja an a ngand. Mikadil yiwamp ya akadivar yatukwasha kujijamen kushemunok ni kusanger yisend yatwinkangau mu chisu chikemp. Twading twij anch mu dirijek da Yehova muding rukat, pakwez twading ni kashinsh anch yafanyinap kushiken chisu chawonsu. Chikalap nchik yikokujol twarisha nich yisu yivud, yamekana anch wading mutapu wa kutufumb.

MU MOYEN-ORIENT

Mu muvu wa 2006 twatambula mukand udokila ku biro mujim wa pa mangand mawonsu, atuleja anch atutum kal mu Moyen-Orient. Kwinikwa kand twafanyina kurish ni yikokujol yikwau yisu: Kwilej mazu masu, ni kwijidin mashakamin masu. Twafanyina kwilej yom yivud nakash mwinimwa, mulong mwading milong yivud nakash ya politik ni ya relijon. Twakata mazu kushalijan twatana mu yikumangen ni kuman anch tukutwish kwikal mu uumwing anch twalondul umutakel wa Yehova. Akadivar nau anambaz atusangaresha nakash, mulong avud pakach pau ading ajijamedin rupompat ridokila kud antu a mu dijuku, ambay nau a shikol, ambay nau a mudimu, ni amutej nau.

Mu muvu wa 2012 twaya ku chitentam cha pakampwil chasadika mu musumb wa Tel Aviv, mwi ngand ya Isarel. Ku chitentam chinicha kading kapamp ka kusambish kuyiman antu a Nzamb a ndond yiniya kukumangan avud mwamu kudosh kamu pa Pantekot 33 C.C. Chid chinship tukata kuvurik nakash!

Mu mivu yiney yawonsu, atutuma kwendin mwi ngand mwading mukangeshinau mudimu wetu. Twasendang mikand yetu yimwing, twayipanang mu mudimu wa kulejan, ni kukumangan kand ku yitentam ya munyingumuku. Jindond jivud atushinshikinang kud amasalay akweta mat, pakwez twiyovang anch tud mu diking chisu twendang kwa manang pamwing nau in kulejan akwau.

KUCHIRIK MU AFRIK

Mu muvu wa 2013 twatambula chisend cha mutapu ukwau—kusadin ku mutiy wa Congo Kinshasa, ngand yijim yikweta yitang yiwamp pakwez yirishina kand nakash ni milong ya uzwendj ni jinjit. Kapamp ka kusambish twalonda anch: “Twij mu Afrik, tukutwish kuya.” Pakwez twading ni yom yivud ya kwilej, pakampwil chisu twendanganang mu jinjil jakad kuwap ni jakad yilal. Kwading yom yiwamp yivud twafanyina kushinshikin, akadivar ading ajijamen ni akwet musangar chikalap nchik milong ya kuburen nfalang. Ading akatin mudimu wa kulejan, ni asalang usu wa kuya ku yikumangan ni ku yitentam. Twimenap ayinetu anch mudimu wa Want wading uyil kamu kurutu mulong wa ukwash wa Yehova ni yiyukish yend. Mudimu wetu wa chisu chawonsu mwi ngand ya Congo watufundisha malejan mavud ni twikala ni arund avud ada mud dijuku detu.

Kwinsuden kwa muvu wa 2017, atwinkisha kand chisend chikwau mwi ngand ya Afrik wa Kurul. Winou wading mutiy ujim pa mitiy yawonsu twasadina, ni yisend yetu ku Betel yading yisu kud etu. Kwading kand yom yivud twafanyina kwilej, pakwez malejan twileja pakur matukwash. Tuyikatin akadivar nau anambaz avud ajijamena kal kudosh mivu 20, 30, 40, ap kusut. Chisangareshin kuman dijuku da Betel dikat kusal mu uumwing chikalap nchik kushalijan kwa ulombu wa chikit ap yaku. Chiswakel kuman anch Yehova ukat kuyiyukish antwend mu chisambu, mulong akat kudjal wuntu usu ni kusadin mbil ja Bibil.

Mu mivu yivud, am ni Debbie twatambula yisend yisangareshina, twijidina mashakamin masu, ni kwilej mazu masu. Yisu yivud chadingap chiswapela, pakwez twamanang rukat rishinshamena ra Yehova kusutin dirijek dend ni kusutin akadivar nau anambaz a pa mangand mawonsu. (Ks. 144:2) Yom yivud twileja mu mudimu wa chisu chawonsu yitukwashin kwikal atushalapol a Yehova awamp.

Nikwatin nich usey yom yanfundishau anvajam, ukwash wa mukajam mukatish Debbie, ni yilakej yiwamp yida mu dijuku detu da mu spiritu da akadivar nau anambaz a pa mangand mawonsu. Am ni mukajam anch twatongin piur pa mutapu ukwikala mwom wetu mu machuku ma kurutu, tukwatin mupak wa kudandamen kwilej malejan matufundishinau kud Mulej wetu Mujim.