Musangar wakad kutongin ni malejan madiokila mu kumusadin Yehova

Anvajam abuka mu Estoni pa chirung cha Njit ja Kaad ja pa Mangand mawonsu, ni aya mu Alemany, mwi ngand navadikina. Chading pa chisu chading chirijekinau mulong wa kushemunikin mu Kanada. Twashakama cha kusambish piswimp ni Ottawa, mu Kanada, twading mu kapalakany kakemp mwadinga kand kulalang anzol. Twading atuzwendj nakash, pakwez twadiangang may pamanch.

Dichuku dimwing, Atuman a Yehova amutangina maku Kujingunik 21:3, 4. Yom yateshay yamupukuna nakash ni wasambisha kudil. Mbut ja uyakin japama mudiau awiy, chawiy tatuku ni maku aya kurutu pakad kulab ni ashikena kutambul dibatish.

Anvajam kadingap kija dizu dia English nakash, pakwez akwata uyakin nich usey nakash. Diampos diawonsu, ap kupwa kwa kusal mudimu uchuku win wawonsu ku sosiyete wa mayal matazukinau anch nickel mu Sudbury, mu Ontario, tatuku wansendang am ni mwancham mband Sylvia mulong wa kuya nend mu mudimu wa kulejan. Rubing rawonsu twilejang Chinong cha Kalam mu dijuku. Maku ni tatuku ankwasha kumukat Nzamb. Chinech chambachika kwipan kud Yehova mu muvu wa 1956, chisu nadinga ni mivu dikum. Rukat rau rikash mulong wa Yehova rankasikesha kudandamen kumusadin mu mwom wam wawonsu.

Kupwa kwa kutambul diplom, nashadisha mushiku wa kumusadin Yehova. Natonga anch, anch nikal chibol nikutwishap kwikal ni nfalang jivud mulong wa kuwanyish chitongijok cham cha kwendanganang mu jingand kushalijan. Namana mudimu ku radio wa kwindond twading, ni yam natekang mizik, nakata mudimu winou. Pakwez nasalang mudimu winou urel, chawiy nakanganyang kukumangan ni nabombakanang nau antu ading akad kumukat Nzamb. Disudien, kom kam kafumbinau kud Bibil kambachika kuswimp.

Nabukina mu Ontario. Kwinikwa namanijana ni Ray Norman, mpanyend Lesli, ni ayibol akwau. Awonsu ambangina nakash. Pinamana musangar wadingau nich, chinech chambachika kushinshikiril mipak yam. Ankasikesha kusal mudimu wa uchibol, chawiy nasambisha mudimu winou mwi Ngond wa 9, 1966. Nading ni musangar nakash, ni mashakamin mam mamekana anch mawap kal. Pakwez kwading yom yafanyina kusadik ni yafanyina kuswimp mwom wam pakad kuchingejin.

ANCH YEHOVA WAKWIT KUSAL CHOM KANANG, SAL USU WA KUCHISAL

Pinading nichidia ku shikol nizwisha formiler mulong wa kuya ku Betel wading mu Toronto, mu Kanada. Mu kusut kwa chisu, pinading chibol, antazuka kuya kusadin ku Betel mu mivu yinying. Pakwez nading nimukatin Lesli nakash, ni nova wom anch, anch nitiy kuya, nikez kamumanap kand. Kupwa kwa kulembil nakash ni mu chisu chilemp, nitiya kuya ku Betel, pakwez nova ushon nakash pa kuya kumuladik Lesli.

Ku Betel, nasadina ku departema utadina milong ya kutut masun ni kupwa mud sekreter. Mu kusut kwa chisu chikemp, Lesli wikala chibol wa pakampwil mu Gatino, mu Quebec. Niyipulang yisu yivud yom yading yisadinay ni anch nakwata kamu mupak uwamp. Kupwa kwashikena kand chom chiwamp nakash nading nakad kutongin mu mwom wam. Ray, mpanyend a Lesli, amutazuka ku Betel. Ni twasambisha kulal nend mu kapalakany kamwing! Chinech chankwasha kuchirish kand urund nend Lesli. Twatijana nend kupwa kwa kusutish mivu yinying mu chisend cham, mu machuku 27, Ngond wa 2, 1971.

Am ni Lesli atutuma kukwash chikumangen cha dizu dia Français mu Quebec. Kupwa kwa mivu yikemp, nakashimuka antazuk mulong wa kuya kusal mud kalam wa munyingumuku pinading ni mivu 28. Niyova anch nichid nsand ni nikwetap ukaliweny wa kusal mud kalam wa munyingumuku, pakwez mazu madia mu Jeremiy 1:7, 8 mankasikesha. Lesli wasala ma aksidan ni motak ni chading chimukasikedining kulal. Chawiy twatonga anch chikutwish kutukasiken kuwanyish mudimu wa munyingumuku. Pakwez Lesli walonda anch, “Anch Yehova watwit kusal chom kanang, chid cha usey kupakish kuchisal” Twitiyija chisend chinech ni twasangera kuchisal mu mivu 17.

Nading nikwatiken nakash pinading kalam wa munyingumuku, chawiy nadingap ni chisu chivud cha kusutish ni Lesli. Nileja dilejan dikwau. Diakajikamu dimwing pamanch, rupwambu radila . Kwadingap muntu ap umwing, ching kusu kachitung mwadinga nap, mabuj, fromaj, mikat, mulond wa maar, yilaud, ni mukand wakad dijin pading pafundinau anch: “Musenda mukajey ni yangany mu kwipuwangej.” Diading dichuku diwamp ni kwading kwachang kal nawamp. Pakwez namuleja Lesli anch nikwet madiskur ma kurijek, chawiy nikuyap. Wantesha pakwez wanenganana. Pinashakama, kom kam kasambisha kwinfish nich. Natongijokina pa Efes 5:25, 28. Mudia mazu ma Yehova mankasikesha kushinshikin pa maswir ma mukajam, Kupwa kwa kulembil, namuleja Lesli anch: “Ez tuya,” wasangara nakash. Twaya kwindond yimwing yiwamp, ku chikum cha kawit, ni twasutisha dichuku diwamp nakash pamwing. Ni kupwa narijeka madiskur mam mawonsu.

Mudimu wetu wa munyingumuku wading usangareshina nakash, kudiokal mu Kolombi Britanik kushik mu Terre-Neuve. Maswir mam ma kwendangan mawanyina. Nading nikatin kand kuya ku Shikol ya Galad pakwez nadingap nikatin kwikal mishoner mwi ngand yindj. Chading chimeken mud amishoner ading antu apakampwil, chawiy niyova anch niwanyidinap. Ku mutambu umwing, nading novil wom wa kwintum mu jingand ja Afrik, kwindond kwadinga ma mayej ni jinjit. Nading nisangaredin kwindond nading nishicha.

PAKAD KUCHINGEJIN, ATUTUMA MU ESTONI NI MU JINGAND JIDIA PISWIMP NI KARUNG WA BALTIK

Mu muvu 1992 Atuman a Yehova afanyina kusambishiril kulejan patok mu jingand jimwing jikala yid ya Union soviétique. Chawiy akadivar atwipula anch tukutwish kubuukin mu Estoni mulong wa kwikal amishoner. Twashimoka nakash, pakwez twalembila piur pa mulong winou. Kapamp kakwau kand, twatonga anch, ‘Anch Yehova utwitin kusal chom kanang, tufanyidin kusal usu wa kuchisal.’ Twitiya, ni nalonda anch: ‘Yee, tuyilap mu Afrik.’

Twasambisha kapamp kamwing kwilej dizu dia mu Estoni. Kupwa kwa kusal angond aad mwi ngand, atwita kusal mudimu wa munyingumuku. Twafanyina kwendin yikumangen piswimp 46 ni yisak mu jingand jisatu jidia piswimp ni karung wa Baltik ni mu Kaliningrad, mu Risi. Chinech chatwita kwilej mazu mud dizu dia Leton, dia Litwan, ni Ris. Chading chikokujol chikash. Arund asanger nakash usu twading tusadina, ni atukwasha. Mu muvu wa 1999, Ateka biro wa mutiy mu Estoni, ni antonda kusadin ku mutiy pamwing ni Toomas Edur, Lembit Reile, ni Tommi Kauko.

Twijikijana nau atuman avud atwalau mu Siberi. Ap anch ayimeshap nchik mar mu rukan ni kuyauril pamwing ni majuku mau, kalamap ujim ni rukuny. Alama musangar wau ni mushiku mu mudimu wa kulejan. Chinech chatukwasha kuman anch tukutwish kujijaman ni kulam musangar chikalap nchik yikokujol yikutwisha kushiken.

Twasala mudimu ukash mu mivu yivud ni twadingap nich yisu yivud ya kwiswedish, chawiy Lesli wasambisha kuziy nakash. Twajinguninap kapamp kamwing anch chading mulong wading ukwet mayej makata kuletish kuziy matazukinau anch fibromyalgia. Chawiy twatonga ja kuchirik mu Kanada. Chisu chatutazukau ku shikol ya antu asadidina ku mutiy mu Paterson, mu New-York, U.S.A., nidjidjeka anch tukutwishap kuya. Pakwez, kupwa kwa kulembil nakash, twitiya. Yehova wayukisha mupak wetu. Amwoka Lesli pitwading tuchidia ku shikol yiney. Chawiy, twasambishirila kand kusal mudimu wetu nawamp mud mu chaku.

CHOM CHIKWAU CHAKAD KUCHINGEJIN​—KUYA MU CONTINENT MUKWAU

Dichuku dimwing urel, mu muvu wa 2008, kupwa kwa kuchirik mu Estoni, antazuka ku telefon kud akadivar a ku biro mujim wa pa mangand mawonsu ni angipula anch twafanyina kwitiy kuya kusadin mu Congo. Nakashimuka nakash, pakampwil mulong nading nikatin kwakul dichuku diambakedinap. Kwinsambishin, namulejapamu Lesli mulong nading nij anch kakutwishap kulal uchuku winiwa. Pakwez yama chad nakanganya kulal. Nalembila piur pa mulong wa kuya mu Afrik.

Mu kwacha, namulejamu Lesli, chawiy twatonga anch: “Yehova ndiy utwitina kuya mu Afrik. Mutapu ik tukutwisha kwijik anch tukutwishap kusal ni kusanger mudimu mu Afrik anch tupakishinap?” Chawiy kupwa kwa kusal mivu 16 mu Estoni, twaya mu Congo, Kinshasa. Ku biro wa mutiy kwading yisalamb yiwamp ni yading ndond ya chisambu. Pakach pa yom ya kusambish yandjikay Lesli mu kapalakany ketu, pading kart walamay kudiokal mu Kanada. Ading apafundin anch: “Sanger ndond udia.” Kupwa kwa kutanijan nau akadivar, kutakel malejan ma Bibil, ni kuman musangar udiokila mu mudimu wa umishoner, musangar wetu wa kwipan mu mudimu wa Yehova wapandakana. Mu kusut kwa chisu, twikala ni dilau dia kwendin mitiy yikwau 13 ya mu jingand ja Afrik. Mwamu twikala ni mutapu wa kwijik antu kushalijan. Wom wam wapwa, ni twamujikitisha Yehova mulong watutuma kusadin mu Afrik.

Mu Congo, atwinkisha yakudia yivud, mud amesh, yom natonga anch tukutwishap kudia. Pakwez patwamanang mutapu uyisangaredinau akadivar, yatwovisha maku, ni pitwayipima, twayikata niyetu.

Twayangang kupan ukwash wa mu spiritu ni wa ku mujimbu kud akadivar a kwingangel ya ngand, kwindond kwadinga yisak ya antombwij arishikishang antu mu mal ni kuyisal amband nau an nayimp. Akadivar avud kadingap ni yom yivud ya ku mujimbu. Pakwez, ruchingej rau rikash mu divumbuk, rukat rau mulong wa Yehova, ni kushinshaman kwau ku dirijek diend yampukuna nakash. Chilakej chau chatubachika kutongijokin piur pa mayingishin tumusadidina Yehova ni kukasikesh ritiy retu mudiay ndiy. Akadivar amwing ashadisha yikumbu ni yir yau. Chinech chanvurisha anch tukutwish kushadish pakad kulab yom ya ku mujimbu ni anch urund wetu ni Nzamb chawiy chom chidia cha usey nakash. Chikalap nchik yikokujol yikash yarishangau nich, akadivar kinanolangap nakash. Mwikadil wau watukwasha kurish nich kutakaman milong yetu ni mayej.

CHISEND CHISU MU AZIY

Kwikala kand chom chikwau twading twakad kutongin. Atuleja kubuukin ku mutiy wa Hong Kong. Twading kandikal tutonginangap anch tukwez kabukin mu Aziy! Pakwez mulong Yehova wading ututakedin mu yisend yikwau, twitiya kuya. Mu 2013, nich mansoj ku mes, twitiya kuyisha arund netu akatish ni Afrik ndond yiwamp nakash, pakad kwijik ya kurutu.

Kubuukin mu Hong Kong, kwading kuswimp kujim nakash mulong ud musumb ushiching antu avud nakash adiokila mu jingand kushalijan. Chatukasikena kand kwilej dizu dindj. Pakwez akadivar atwaka nich musangar nakash, ni twasangera ya kudia ya ngand yau. Mudimu wading uyil mau nakash, pakwez pa chisu chawiy chimwing, usey mwi ngand ni wa yikumbu wading uyil mu kukandam nakash. Chawiy Chisak Chitakedila chakwata mupak wa kulandish yikumbu yivud ya biro wa mutiy. Kusut kwa machuku makemp, mu muvu wa 2015, twabukina mu Corée du Sud, ni twadandamena kusadin kwinikwa. Kwinikwa twarisha kand ni chikokujol cha kwilej dizu, pakwez twading twij anch, ap anch twading kand kal twijik kudilond nawamp, akadivar nau anambaz atukasikesha kusutin kutulej anch tusadin usu wa kulond dizu dia mu Corée.

MALEJAN TWILEJA

Chiswapelingap kwikal nau arund asu, pakwez chatuswapela kuta urund kusutin kwikal ni chaku cha kuyitazukang antu kwez kututal, chatuswapela kuyijik antu mu chisu chikemp. Twamana anch akadivar ad kwau mutapu umwing ap anch ashalijadin ni anch Yehova watutanga ni mutapu wa kuyazuril antu akwau muchim ni kwikal akatinau kud arund avud.​—2 Kor. 6:11.

Twamana kand usey wa kuyiman antu akwau mud muyimenau kud Yehova ni wa kwikal nich kashinsh anch Yehova utukatin ni ukat kututakel mu mwom wetu. Chisu chawonsu twovang kuziy ni kwiyipul anch chakin kamu akadivar nau anambaz atukatin, twatangirilang mikand yatutuminangau kud arund netu. Twamana chakin kamu mutapu wakulay Yehova ku malembil metu, mutapu watwinkishay kashinsh anch utukatin, ni mutapu watukasikeshay.

Mu mivu yivud, am ni Lesli twijika usey wa kusutish chisu pamwing, chikalap nchik mutapu tukwatakena. Twashikena kand kwijik anch chid cha usey kusip anch twakangany kulond nawamp chom kanang, pakampwil chisu twilejina dizu. Ni uchuku wawonsu twasalang usu wa kutongin pa chom chiwamp tukutwisha kumujikitishin Yehova.

Mu uyakin, niyovang anch nikez katwishap kwikal mishoner ap kubuukin mwi ngand yindj. Pakwez, nikala ni musangar udiokiling ku kwijik anch tukutwish kusal chom chin chawonsu nich ukwash wa Yehova. Navurika kapamp kamwing mazu ma muprofet Jeremiy malondina anch: “[Yehova], ey wandimba.” (Jer. 20:7) Chakin kamu, watwinkisha yom yivud yisangareshina ni yiyukish yitwading twakad kuchingejin, wawanyisha kand maswir mam ma kwendangan nich avion. Twendangana mu jindond jivud nafanyina kukangany kutongin pinading mwanikanch, kwendin mitiy mu ma continent matan. Nikwet kand musangar nakash mulong Lesli wipana mu kwinkwash mu yisend yam yiney yawonsu.

Tukat kusal usu wa kuvurik chisu chawonsu anch twasala chom chin chawonsu mulong twading tumukatin Yehova. Yiyukish tusangaredina nlel yitulejin mutapu tukusangera mwom wa chikupu chisu Yehova chikuyinkishay antu yom yiwanyidina mulong wa “[kuyikutish] awonsu akweta mwom.”​—Kus. 145:16.