Ov, Uding Wa Kusambish Kuyilimish Akwen?
“Ulimishijanany muntu ni mukwau.”—ROME 12:10.
1. Yom ik yakad kwikal ya chilik chimwing ku yikunku yivud ya mangand?
MU YIKUNKU yimwing ya ngand, chiding chishankur mulong wa ansand kumekeshang kalimish kudiau amakurump mudi kwasang manungun nich kalimish anch adi nau pamwing. Mu kusalang mwamu, akat kumekesh kamu anch kayisutinamwap amakurump. Mu yisak mudi yiney, amening kand anch kuding kuburen kalimish anch mwan ukat kulond ni mukurump chad ndiy wamwomb nyim. Pa chinech kalimish kamekedin mu yaku kushalijan, kumekesh kalimish mudi kinak katuvurishin Chijil cha Moses. Chilondina anch: “Mutumbukilany muntu ipal ukweta jinvu. Mulimishany muntu ipal.” (Lev. 19:32) Cha ushon, mu jindond jivud chimeken kamu anch antu kakuyilimishangap kwau akwau. Pa chinech, komb kuburen kalimish kumeken kwawonsu.
2. Dizu dia Nzamb ditulejin kumulimish nany?
2 Dizu dia Nzamb ditekin usey upandakena mulong wa kumekesh kalimish. Ditulejin anch mulimisha Yehova nend Yesu. (Yoh. 5:23) Atwitin kand tumekesha kuyilimish in yidi yetu ya dijuku ni anamakwetu in kwitiyij ni adia pol pa chikumangen. (Rome 12:10; Efes 6:1, 2; 1 Pita 2:17) Mu jinjil ik jimwing tukumekeshina anch tumulimishin Yehova? Mutapu ik tukumekesha kalimish, ap kalimish kakurikina, kudi akadivar netu ni anambaz in Kristu? El tushinshikina yom yiney ni yipul yimwing.
Kumulimish Yehova ni Dijin Diend
3. Njil ik yimwing ya usey ya kumulimishin Yehova?
3 Njil yimwing ya usey ya kumulimish Yehova yidi ya kumekeshang kalimish kakurikina mulong wa dijin diend. Kupwa kwa yiney yawonsu, etu tudi “antu . . . mulong wa dijin diend.” (Mid. 15:14) Yimeken kamu anch kadi kalimish kusend dijin dia Nzamb wa dikand, Yehova. Muprofet Mike walonda anch: “Antu a michid yawonsu akat kuziyil ni kwifukwil akish au ayinau. Pakwez etu tukez kamuziyil ni kumwifukwil [Yehova, NW] Nzamb wetu chikupu ni chikupu.” (Mike 4:5) ‘Tukuziyil ku dijin dia Yehova’ mu kwikasikesh kushakam dichuku diawonsu mwi njil yimekeshina anch tusendin dijin diend. Mudi Paul wayivurisha in Kristu a ku Rome, anch anch walikany kushakam kukwatijan nich rusangu ruwamp tulejena, dijin dia Nzamb ‘akudisal,’ ni kakutwishap kudilimish.—Rome 2:21-24.
4. Mutapu ik tumenap dilau dia kulejan uman wa Yehova?
4 Tukutwish kand kumulimish Yehova mu kusalang mudimu wetu wa kulejan. Pakur, Yehova wita muchid wa an a Isarel kwikal atuman end, pakwez akanganya kuwanish mudimu winou. (Isay 43:1-12) Amutombukina Yehova ni amwomba nyim ni “amupaka Utumbila wa Isarel.” (Kus. 78:40, 41) Pa chinech, muchid winou washadisha kamu ranaken ra Yehova chipandakena. Niyetu nlel unou, chidi cha musangar mulong wa kwikal ni dilau dia kulejan uman wa Yehova ni kulejan dijin diend. Tusadil mwamu mulong tumukatil ni kwilej mulong wa dijin diend ditumba. Yom ik yikutwisha kutukangesh kulejan patwija uyakin mulong wa Tatukwetu udia mwiur ni jintong jend? Twiyovil mudi mwiyovay mupostol Paul palonday anch: “Kufanyin kulel padi am; anch kinilejilip katumb kawamp riyind kudi am.”—1 Kor. 9:16.
5. Mutapu ik kumekesh ritiy mudiay Yehova muyimekeshining kamu anch tumulimishin?
5 Mwin kuseng David walonda anch: “Awiy ija dijin diey akukungamen padi Ey [Yehova, NW], mulong Ey kiukulikip awiy akata kukusot.” (Kus. 9:10) Anch twamwijik kamu Yehova nawamp ni kumekesh yirumburishina dijin diend tukumuchingejin kamu ndiy mudi mwasalau kand atushalapol ashinshamena a pakur. Kwikalang nich ruchingej ni ritiy mudiay Yehova yidi kand njil yikwau ya kumumekeshin kalimish. Ijik mutapu Dizu dia Nzamb disadina kubombakesh kumuchingejin Yehova ni kumulimish. Chisu Isarel wa pakur chakanganyay kumuchingejin, Yehova wamwipula Moses anch: ‘Ov, chisu ik chikez kulikau antu inay kwinkis, ap chisu ik chikez kwingitiyijau am mulong wa yijingidij yawonsu yinasala mukach mwau?’ (Kuch. 14:11) Kubwambwil kwamekana kamu. Anch twatek kamu ruchingej mudiay Yehova chakwel atukinga ni kutukwash kujijamen yoziu, tukumekesh kamu anch tumulimishin.
6. Yik yikutubachika kumekesh kalimish kakurikina mulong wa Yehova?
6 Yesu walejana anch kumulimish Yehova kufanyidin kudiokal kamu ku muchim. Palonday mulong wa ay adinga ni kwifukwilang kwa makasu, Yesu walondang mazu ma Yehova anch: “Antu ang akat kwinlimish ni milamu yau, pakwez michim yau yidi kulemp ni yamam.” (Mat. 15:8) Kalimish kakin mulong wa Yehova kadiokiling kamu ku rukat rakin. (1 Yoh. 5:3) Ni tufanyidin kulam mu manangu kushilamu kwa Yehova kulondila anch: “Nikez kuyilimish antu alimishininga.”—1 Sam. 2:30, NW.
In Kutakel Afanyidin Kumekesh Kalimish Kudi Akwau
7. (a) Mulong wak akadivar akweting yisend afanyidin kumekesh kalimish kudi akwau akweta kand yisend? (b) Mutapu ik wamekeshay Paul kalimish mulong wa anamakwend in kwitiyij?
7 Mupostol Paul wayileja anamakwend in kwitiyij: “Ulimishijanany muntu ni mukwau.” (Rome 12:10) Akadivar akweting yisend mu chikumangen afanyidin kumekesh chilakej cha kwikal—“akusambish” (NW)—mu kumekeshang kalimish kudi ay akweta kand yisend. Pa yom mudi yiney, ay akweta yisend ya usey afanyidin kulondul chilakej chashay Paul. (Tang 1 Tesalonika 2:7, 8.) Akadivar adinga ku yikumangan yendilay Paul ijika anch kayitap kusal chom chakadiay ndiy amwinend kusal. Paul wamekesha kalimish mulong wa anamakwend in kwitiyij, ni watambula kand kalimish kau. Palonday Paul anch: “Chawiy nakwilembilany, ikalany in kwingilikej am,” tukwet kashinsh anch avud amwimburijining mulong wa chilakej chend chiwamp.—1 Kor. 4:16.
8. (a) Njil ik yimwing ya usey yamekeshinay Yesu kalimish mulong wa in kwilej end? (b) Mutapu ik atulam nlel unou mukumekeshau chilakej cha Yesu kudi akwau?
8 Njil yifanyidinau akadivar kumekeshin kalimish mulong wa ay akweta yisend yidi ya kuyinkang mayingishin mulong wa kwit kwitilau ni mulong wa ukwash ukatau kutambul. Mu kusalang mwamu, akat kumwimburij Yesu. Chilikej, payilejay in kwilej kulembil mulong wa in mudimu avud chakwel ayituma mu chir, Yesu wayirumburila mulong wak chidia mwamu. Walonda anch: “Yir yivudil, pakwez in kwangul akepil. Chawiy ulembilany Mwant wa yir chakwel ayituma in kwangul mu yir.” (Mat. 9:37, 38) Chilik kand chimwing, chisu chayilejay in kwilej end anch “lamany,” wayinkisha kand diyingishin. Wayilej anch: “Mulong kiwijanyip pa dichuku dikwezay Mwant wen.” (Mat. 24:42) Chisu ni chisu, Yesu wayilejanga in kwilej end chidiap mulong wa yom yifanyidinau kusal pakwez mulong wak afanyidin kuyisal. Mu chinech, wayimekeshinang kalimish. Chilikej chiwamp mudi ik mulong wa atulam in Kristu padiau antu akwau!
Kulimish Chikumangen cha Yehova ni Kutakel Kwend
9. Nany tukulimisha pa chisu tumekeshina kalimish mulong wa chikumangen cha win Kristu cha ngand ya kabuj? Rumburil.
9 Kumulimish Yehova, tuswiridin kand kulimish chikumangen cha in Kristu a ngand ya kabuj, ni ay achitakedina. Anch twashinshikin chiyul cha Mifund chidiokila kudi chisak cha kashalapol ushishamena, tukumekesh kamu kalimish mulong wa dirijek dia Yehova. Mu mivu chitot ya kusambish, mu chikumangen cha win Kristu, mupostol Yohan wamana maswir ma kulond mulong wa ay amekeshanga kuburen kalimish mulong wa antu atekangau. (Tang 3 Yohan 9-11.) Mazu ma Yohan mamekeshin anch aburenanga kalimish chidiap kusu mulong wa atulam pakwez kand mulong wa mafundish mend ni kutakel kwend. Cha musangar, in Kristu avud kakatap kusal mwamu. Chisu chadingay mupostol mwom, chisak cha akadivar chawonsu chamekesanga kalimish kakurikina mulong wa antu atekangau kutakel.—Filip. 2:12.
10, 11. Rumburil kusutil mu Mifund mulong wak amwing ayinkin yisend ya kutakel mu chikumangen cha win Kristu.
10 Amwing akat kutong anch kudiosh kamu kwayilejinay Yesu in kwilej end anch “en awonsu udiany akadivar,” amening anch kwikiling kwau jindond ja wintakel mu chikumangen cha win Kristu. (Mat. 23:8) Pakwez, Mifund ya chin Hebereu ni ya chin Grek yikwet yilikej yivud mulong wa antu asadilanga wintakel wayinkay Nzamb. Nsangu ja angak a pakur, anzwij, ni ant pakach pa amakurump a an a in Hebereu aletang kashinsh ka wintakel wayinkau kudi Yehova mulong wa antu atekangay. Chisu chalikangau antu kuziyin mu kumekesh kalimish kudi antu atekangau, Yehova wayipupanga.—2 Ant. 1:2-17; 2:19, 23, 24, NW.
11 Chawiy kand chimwing, mu mivu chitot ya kusambish in Kristu ijika wintakel wa apostol. (Mid. 2:42) Chilikej, Paul wapana kutakel kudi akadivar nend. (1 Kor. 16:1; 1 Tes. 4:2) Pa chinech, waziyila kamu ni kwipan kudi ay amutakelang. (Mid. 15:22; Gal. 2:9, 10) Komb, Paul wadinga nich kuman kuwamp kwa wintakel mu chikumangen cha win Kristu.
12. Misu malejan maad tukutwisha kwilejin ku yilikej ya mu Bibil payitadina wintakel?
12 Dilejan tukwileja dikwet yom yaad. Cha kusambish, Mifund yilondil mulong wa “kashalapol ushinshamena ni kubabal” kusutil kudi Chisak Chitakedina mulong wa kutek antu ikala ni yisend, ni antu amwing ayitekin chakwel ayitakela antu akwau atekinau. (Mat. 24:45-47; 1 Pita 5:1-3) Cha kaad, etu awonsu, ni antu atekinau, tufanyidin kuyilimish ay atutakedina. Yom ik yimwing tukusadina chakwel tumekesha kalimish kudi ay atekinau mulong wa kutakel mu chikumangen cha ngand ya kabuj cha win Kristu?
Kumekesh Kalimish Mulong wa Atulam in Kwendangan
13. Mutapu ik tukumekesha kalimish mu chirung cha katat kudi antu atakedila chikumangen cha win Kristu?
13 Paul walonda anch: “Tukat kunilembilany akadivar, uyilimishany akata kusal mudimu pakach pen, ni adia piur pen mu Mwant akata kukukandany; uyitumbishany nakash mu rukat mulong wa mudimu wau. Ikalany ni chisambu pakach pen ayinen.” (1 Tes. 5:12, 13) Atulam in kwendangan afanyidin kuyichindin pakach pa “akata kusal mudimu.” Pa chinech, komb tufanyidin “[t]uyitumbishany nakash.” Njil yimwing tukutwisha kusal mwamu yidi ya kwitiyijang yiyul yau nich muchim umwing ni dikasikesh diau. Anch kalam watwinkish chiyul chidiokila ku chisak cha kashalapol, “chiyul chidiokila mwiur” chikutubachik chakwel “[t]witudish.”—Yak. 3:17.
14. Mu mutapu ik mumekeshining chikumangen kalimish kakin mulong wa atulam in kwendangan, ni yibudikin ik yimekeningaku?
14 Mutapu ik, tukusalap anch twad tukimbin kusal yom mwi njil ey chad yashalijan ni yitwadia tufanyidina kusal? Kumekesh kalimish yitin chisu ni tufanyidin kulik yitongijok ya kulond anch, “Tufanyidinap kusal yom mu mutapu ou” ap kand, “Tukutwish twayisadin ndond yiny pakwez mu chikumangen chetu bwat.” Pakwez, tufanyidin kuziyil. Kulam mu manangu anch chikumangen chidi cha Yehova ni Yesu udi Mutu wach yikutukwash kusal mwamu. Anch wintakel wa kalam mwin kwendangan autambul nich musangar ni chikumangen chalondul, yimekeshining kamu kalimish ka kashinsh. Mupostol Paul wayileja akadivar nend a ku Korint mulong wa kuziyil kwau kwa kalimish kwamekeshangau mulong wa kutakel kwayinkishau kudi mukurump wayendinanga, Titus. (2 Kor. 7:13-16) Nlel, tufanyidin kwijik chilik chimwing mulong wa mushiku utusadediling ku ukwash tutambwilinga kudi atulam in kwendangan uletining musangar ujim nakash utumening mu mudimu wetu wa kulejan.—Tang 2 Korint 13:11.
“Limishany Antu Awonsu”
15. Mu jinjil ik tukutwisha kumekeshin kalimish mulong wa anamakwetu in kwitiy?
15 Paul wafunda anch: “Kangal wamupup mukurump, pakwez mulembijeka mudi tatuku; salany kudi ansand mudi anamakwey, amband amakurump mudi amaku, ayangadim mudi anambaz.” (1 Tim. 5:1-3) Mwawiy, Dizu dia Nzamb ditulejin kumulimish muntu win mwawonsu mu chikumangen cha win Kristu. Mutapu ik ukusalapu anch kudi antu ushalijadina nau pakach pamwing ni akadivar ney ap anambaz ney? Kudi yom yikukukangesha kuyimekeshin anamakwey in Kristu kalimish? Ap ukutwish kurijek manangu mey chakwel wijika mikadil ya muspiritu yidia mulong wa atushalapol a Nzamb? Ay akweta wintakel pinrau afanyidin kulam kalimish mulong wa akadivar nau—kangal wikalany “mudi ant piur pau . . . amikoku.” (1 Pita 5:3) Chakin kamu, chikumangen cha win Kristu, chimekeshin rukat rakin ridia pakach pa antu, tukwet kamu yom yivud ya kumekeshin kalimish kudi umwing ni mukwau.—Tang Yohan 13:34, 35.
16, 17. (a) Mulong wak chidi cha usey kumekesh kalimish chidip mulong wa ay tulejina pakwez kand ni kudi in kutupompat? (b) Mutapu ik tukata ‘kuyilimish antu awonsu’?
16 Mwawiy, tufanyidinap kwimik kalimish ketu ching kusu kwau mulong wa ay tudia nau mu chikumangen cha win Kristu. Paul wayifundina in Kristu a machuku minam anch: “Pachidia muten tuyisadilany antu awonsu nawamp.” (Gal. 6:10) Anch twakwat mipak ya mbil tufanyidina kusadil yikutwish kulet matat anch mukwetu tusadina nend mudimu pamwing ap murund wa shikol anch ukat kutusadin nich chisum. Mu yisu mudi yiney, tuswirikedin kuvurik mazu malondila anch: “Kangal wend wiswidiosh amwiney mulong wa in kusal yom yiyimp.” (Kus. 37:1) Kusadin chiyul chinech yikutukwash kumekesh kalimish ap kudi antu atupompatina. Chawiy kand chimwing, patukata kwiyandjik mu mudimu wa patok, kwiman kwetu kwa kwikepish ayinetu kukutwish kwatukwash kwakul kudi mwawonsu “nich kwitudish ni kalimish.” (1 Pita 3:15) Ap kand mwikadil wetu tukweta ni kudjal kwetu yikutwish yamekesh kamu kalimish kudi muntu tulejina.
17 Pa chinech, anch twashakam kamu ni akwetu in kwitiyij ap ay adia pol pa chikumangen tuswiridin kusadil kubabesh oku kulondila anch: “Limishany antu awonsu. Katany divar. Mwovany Nzamb wom. Mulimishany mwant wa ngand.”—1 Pita 2:17.
Ov Ukutwish Kurumburil?
Mutapu ik tukutwisha kumekesh kalimish kawanyidina mulong wa:
• Yehova?
• Amakurump a chikumangen ni atulam in kwendangan?
• Antu in awonsu mu chikumangen?
• Ay tukata kulej?
[Chipich chidia pa paj wa 23]
Mu mivu chitot ya kusambish in Kristu ayilimishanga antu atekangau kudi chisak chitakedila
[Chipich chidia pa paj wa 24]
Amakurump mu mangand mawonsu ayilimishining atulam in kwendangan, atekilingau kudi Chisak Chitakedila