Mutapu Ukutwisha Chikumangen Kumekesh Chitongijok cha Yehova Piur pa Antu Asadina Yitil Yikash

1. Yom ik yikatinay Yehova mulong wa antu awonsu?

YEHOVA wayitanga antu nich want ipau. Muntu ni muntu ukat kusadin chipan chinech chisu chawonsu chikwatinay mipak. Mupak wa usey nakash ukutwishay muntu win mwawonsu kukwat ud mupak wa kwipan amwinend kud Yehova ni kwikal mu dijuku da in kumwifukwil End. Yehova ukatin anch muntu ni muntu asala mwamu. Mulong wak? Mulong uyikatin antu ni usotin uwamp wau. Ukatin anch asanger urund pamwing ni ndiy ni ashakam chikupu.​—Kuv. 30:19, 20; Gal. 6:7, 8.

2. Mutapu ik ukatay Yehova kwiyov piur pa muntu usadina chitil chikash wakad kukarumuk? (1 Yohan 2:1)

² Pakwez, Yehova kakatap kumushindin muntu chakwel amusadin. Ukat kumulik muntu ni muntu akwata mupak wa yom yikusalay. Chad chikwikal nchik anch mwin Kristu wabatishinau kal wajip chijil cha Nzamb, wasal chitil chikash? Anch walik kukarumuk, akumudosh mu chikumangen. (1 Kor. 5:13) Pakwez chikalap nchik mwamu, Yehova ukat kuchingej anch muntu wasalang chitil ukuchirik kud Ndiy. Chakin kamu, dawiy diyingishin dasala anch apana chakupesh cha difut​—chakwel kwikal mutapu wa kuyilikishin akayitil akarumukina. (Tang 1 Yohan 2:1.) Yehova, Nzamb wetu wa rukat, uyikasikeshin antu asadina kal yitil yikash kukarumuk.​—Zak. 1:3; Rom 2:4; Jak. 4:8.

3. Yom ik tukwisambina mu mutu wa mulong winou?

³ Yehova ukatin anch twikal ni chitongijok mud chendendiy piur pa antu asadina yitil yikash. Mutu wa mulong winou ukwisambin mutapu tukutwisha kusal mwamu. Piutangina mutu wa mulong winou, shinshikin (1) mutapu wapwishau mulong utadina chitil chikash mu chikumangen cha Korint cha mu mivu chitot ya kusambish, (2) umutakel wapanay kambuy Paul pakarumukay muntu wasala chitil chikash, ni (3) yom yimekeshina rusang riner ra mu Bibil piur pa mutapu ukatay Yehova kwiyov piur pa in Kristu akata kusal yitil yikash.

MUTAPU WAPWISHAU MULONG UTADINA CHITIL CHIKASH MU MIVU CHITOT YA KUSAMBISH

4. Yom ik yashikena mu chikumangen cha Korint cha mu mivu chitot ya kusambish? (1 Korint 5:1, 2)

⁴ Tang 1 Korint 5:1, 2. Mu weny wend wa kasatu wa umishoner, Paul watesha rusang rumwing rikash ra yom yasadika mu chikumangen chading chichida chisu mu Korint. Mukadivar umwing mu chikumangen chinech walala ni mband wa tatukwend. Chom chinech chading chiyimp nakash ni chading chom ‘chakad kwikal ap pakach pa antu a michid’! Chikumangen chimenap kwau pa kudiul chisal chinech, pakwez chatonga anch chiyipinap kwau. Pamwing ap antu amwing atonga anch chikumangen chimekeshin mutapu uday Yehova mwin riy piur pa antu akad kuwanyin. Pakwez Yehova kakatap kusanger yisal yiyimp pakach pa antwend. Mulong wa chisal chiyimp mud chinech, ikundj wasala yom yiney wading ukat kuyipish kalimish ka chikumangen. Ni anch washala mu chikumangen, in Kristu akwau afanyina kwibomb nend afanyina kusambish kumwimburij. Chawiy, Paul wayileja antu a mu chikumangen kusal yom ik?

5. Paul wayileja antu a mu chikumangen kusal yom ik, ni chinech chirumburikin ik? (1 Korint 5:13) (Tal kand chipich.)

⁵ Tang 1 Korint 5:13. Yehova wamupepila Paul kufund mukand wading upanina umutakel wa kumudosh mu chikumangen muntu walika kukarumuk ku chitil chend. Mutapu ik wafanyinau in Kristu ashinshamena kumuman muntu winou? Paul wayileja “kulik kudandamen kwibomb” nend. Chinech chading chirumburikin ik? Paul warumburila anch mbil yiney yirumburikin kand ‘kulik ap kuda ni muntu wa mutapu winou.’ (1 Kor. 5:11) Anch wada pamwing ni muntu, chikukuswapel kusutish nend chisu chivud pamwing. Choviken kamu patok anch mazu ma Paul mading marumburikin anch chikumangen chifanyidinap kwimbomb pamwing ni muntu winou. Kusal mwamu kwafanyina kuchidij chikumangen ku chibachikin chiyimp cha muntu winou. (1 Kor. 5:5-7) Chikwau kand, kwipuk kwibomb ni muntu winou kwafanyina kumukwash kujingunin chilik chamurumbukidinay Yehova, ni wafanyina kwov usany ni kusal usu wa kukarumuk.

6. Mukand wa Paul wikala ni usu ik pa chikumangen ni pad muntu wasala chitil?

⁶ Kupwa kwa kutumin chikumangen cha Korint mukand, Paul wasambisha kwiyipul anch chikumangen chikusanger mukand ap bwat. Pakwez Titus wamuleja Paul chom chimwing chamusangaresha nakash. Chikumangen chasangera mukand wa Paul. (2 Kor. 7:6, 7) Chasadina umutakel wadingamu. Chikwau kand, angond alondulaku kupwa kwa Paul kutum mukand wend, muntu wasala chitil wakarumuka! Waswimpa mwikadil ni yaku yend, ni wasambisha kusadin mbil jitentamina ja Yehova. (2 Kor. 7:8-11) Chad chom ik chikwau chalonday Paul anch chikumangen chisala?

MUTAPU WADING UFANYIDINA ANTU A MU CHIKUMANGEN KUMUMAN MUNTU WAKARUMUKA

7. Kumudosh muntu wasala chitil chikash mu chikumangen kwading ni chibudikin ik chiwamp? (2 Korint 2:5-8)

⁷ Tang 2 Korint 2:5-8. Paul walonda anch ‘dipup damupupinau kud antu avud dimuwanyidin ikundj winou.’ Mu kulond kukwau, kupup kwawanyisha chitongijok chamupupinau muntu winou. Chitongijok ik? Mulong wa kumushikij ku kukarumuk.​—Heb. 12:11.

8. Paul wayileja antu a mu chikumangen kusal kand yom ik?

⁸ Kupwa, Paul wapana umutakel ku chikumangen wa: “Kumulikishin ni kumwongoj” mukadivar wapumbuka, ni ‘kumwinkish kashinsh chakwel iyova anch amukatin.’ Umen anch Paul wading ukatin anch chikumangen chisal yom yivud kusutamu kwau kwimen pa kumuchirish muntu wasala chitil pakach pa antu a Yehova. Paul wading ukatin anch amwinkisha muntu wakarumuka kashinsh kusutin mazu mau ni yisal yau anch amulikishidin chakin kamu ni amukatin. Mwamu afanyina chad kumekesh patok anch ading amwakin muntu winou wachirika mu chikumangen.

9. Mulong wak chafanyina kuyikasiken antu amwing kumulikishin muntu wakarumuka?

⁹ Ov, chayikasikena antu amwing mu chikumangen kumwak muntu wakarumuka ku yitil yend ni wachirishau mu chikumangen? Rusang ritulejinap mwamu, pakwez mulong wak tukutwisha kulond mwamu? Mulong yisal yend yaletisha kanvundangesh mu chikumangen chawonsu, ni pamwing ap chayikwatisha antu amwing usany. Antu akwau afanyina kwiyov anch chitentaminap kwau kumwak muntu mud winou nich chirungul, mulong akwau asalang usu nakash wa kulimish mbil jishitwila ja Nzamb. (Ilakej ni Luka 15:28-30.) Pakwez, mulong wak chading cha usey anch chikumangen chimekesh rukat rakin kud mukadivar winou wachirishau?

10-11. Yom ik yafanyina kushiken anch amakurump alika kumulikishin muntu wakarumuka ku yitil yend?

¹⁰ Tongin yom yafanyina kushiken anch amakurump alika kwitiy anch muntu wakarumuka chakin achirik mu chikumangen, ap yafanyina kushiken anch kupwa kwa kuchirik, chikumangen chalika kumumekeshin rukat. Muntu winou wafanyina kwiyov nayimp nakash mulong ‘ushon [wafanyina] kumupandaken.’ Wafanyina kwiyov anch kakezap kand kikal chid cha chikumangen. Wafanyina kand kulikap usu wading usadinay mulong wa kuchirish urund wend ni Nzamb.

¹¹ Chipandakena kuyip, anch akadivar ni anambaz akwau mu chikumangen alika kumulikishin muntu wakarumuka, afanyina kutek urund wau ni Yehova mu ubaj. Mulong wak? Mulong afanyina kulik kumwimburij Yehova ukata kuyilikishin antu akata kukarumuk ku yitil yau. Pakwez, afanyina kumwimburij Satan, ukweta chisum ni wakad kuyovilang antu riy. Chawiy, afanyina kwikal yamu yikutwishay Djabul kusadin mulong wa kuyishesh antu mu spiritu.​—2 Kor. 2:10, 11; Efes 4:27.

12. Mutapu ik ukutwisha chikumangen kumwimburij Yehova?

¹² Chad mutapu ik wafanyina chikumangen cha Korint kumwimburij Yehova, kulik Satan? Kusutin kuyilikishin antu akarumukina ku yitil yau mud mukatay kusal Yehova. Shinshikin yom yalondau in kufund Bibil amwing piur pa Yehova. David walonda anch Yehova “ud muwamp, ukat kulikishin.” (Kus. 86:5) Mike wafunda anch: “Kwikil [nzamb] udia mudi ey. Ey ukat kulikishin yitil ya antwey.” (Mike 7:18) Ni Isay walonda anch: “Chifanyidin antu ayimp akarumun yaku yau, akarumun kand yitongijok yau. Chifanyidin awiy akarumuk, eza kudi [Yehova] Nzamb wetu. Ndiy udi mwin riy, ukuyilikishin swa.”​—Isay 55:7.

13. Mulong wak chading chiwamp kumuchirish mu chikumangen muntu wakarumuka ku yitil yend? (Tal mushet “Chisu ik Chamuchirishau mu Chikumangen Ikundj Wasala Chitil mu Korint?”)

¹³ Mulong wa kumwimburij Yehova, chikumangen cha Korint chafanyina kumwak muntu wakarumuka ku yitil yend ni kumwinkish kashinsh anch amukatin. Kusutin kulondul umutakel wa Paul wa kumwak muntu wakarumuka ku yitil yend, chikumangen chamekesha “[kuziyin] mu yom yawonsu.” (2 Kor. 2:9) Ap anch muntu winou amwopata mu chikumangen mu angond akemp kusu, chinech chamukwasha kukarumuk. Chawiy kwadingap diyingishin da kulab kumuchirish mu chikumangen.

MUTAPU TUKUTWISHA KWIMBURIJ KUTENTAM NI RIY RA YEHOVA

14-15. Yom ik twilejina kal ku mutapu wapwishau mulong mu Korint wa pakur? (2 Pita 3:9) (Tal kand chipich.)

¹⁴ Rusang rilejena mutapu wapwishau mulong mu Korint wa pakur arifunda mu Bibil mulong wa “kutufundish nich.” (Rom 15:4) Kusutin rusang riner, twilejin anch Yehova kakatap kudiul yitil yikash pakach pa antwend. Antu amwing akutwish kutong anch mulong Yehova ud mwin riy, ukutwish kumulik muntu usadina chitil pakad kukarumuk kushal mu chikumangen, pakwez kiwawiyap mutapu ukatay Yehova kumekesh riy rend. Chakin Yehova ud mwin riy, pakwez kadap mwin kudiul yom yiyimp; ap mwin kupipej mbil jend piur pa yom yiwamp ni yiyimp. (Jud 4) Chawiy kusal mwamu kukwikalap kumekesh riy ap pakemp, mulong kukuyitek antu awonsu ada mu chikumangen mu ubaj.​—Jnsw. 13:20; 1 Kor. 15:33.

¹⁵ Pakwez, twilejin anch Yehova kakatinap anch muntu ap umwing asheshika. Ukatin kuyipandish pa chisu chawonsu chikata kumekan mutapu wa kusal mwamu. Ukat kumekesh riy kud antu akata kuswimp michim yau ni akatina kurijek urund wau ni ndiy. (Ezek. 33:11; tang 2 Pita 3:9.) Chawiy, chisu chakarumukay ikundj wa mu Korint ni kuswimp yaku yend, Yehova wamusadina Paul mulong wa kuyirumburil antu a mu chikumangen anch ikundj winou chading chifanyidin kumulikishin ni kumwak mu chikumangen.

16. Mutapu ik wiyovila piur pa mutapu wapwishau mulong mu Korint wa pakur?

¹⁶ Kushinshikin mutapu wapwishau mulong wa chitil chikash mu Korint wa pakur kwatukwash kal kuman mutapu ukatay Yehova kumekesh rukat ni kutentam kwend. (Kus. 33:5) Ov, chinech chikubachikinap kumushiman Yehova chipandakena? Tumujikitishin Yehova nakash mulong wa riy rend, mulong etu awonsu tud akayitil ni tukwet kuswir kwa dilikishin dend. Muntu ni muntu pakach petu ukwet diyingishin da kumujikitish Yehova mulong wa difut dasala anch kwikala mutapu wa kutulikishin. Chitwongojin mud ik pa kwijik anch Yehova uyikatin chakin kamu antwend ni ukatin uwamp wau!

17. Yom ik tukwisambina mu mutu wa mulong ulondwilaku ou?

¹⁷ Chad, chid nchik piur pa antu akata kusal yitil yikash nlel? Mutapu ik ukutwishau amakurump a chikumangen kumekesh chitongijok cha Yehova cha kumukwash muntu wasalang chitil chakwel akarumuk? Mutapu ik ufanyidina chikumangen kusal anch amakurump akwat mupak wa kumudosh ap wa kumuchirish muntu mu chikumangen? Yipul yiney akuyakul mu mutu wa mulong ulondwilaku ou.