Mutapu Ukutwishau Amakurump Kuyikwash Antu Adoshinau Kal mu Chikumangen

1-2. (a) Mutapu ik ukatay kwiyov Yehova piur pa antu akata kusal yitil yikash ni alik kwau kukarumuk? (b) Yom ik yisotinay Yehova anch antu akata kusal yitil asal?

YEHOVA kadap Nzamb ukata kubwik mes pa yom yiyimp, ukisin chitil. (Kus. 5:4-6) Ukat kutwit kuziyin kwi mbij jend jitentamina, jatekay mu Dizu dend Bibil. Chid chakin anch Yehova kakatap kuyit antu akad kuwanyin kusal yom mu mutapu uwanyidina. (Kus. 130:3, 4) Pakwez chisu chawiy chimwing, kakatap kubwik mes pa yisal ya ‘amakundj akad kumulimish Nzamb, akwatina ranaken rijim ra Nzamb wetu mud diyingishin da kwikal nich mwikadil uyimp ni wa mukomu.’ (Jud 4) Chawiy, Bibil ulondin piur pa “kuyishesh antu amubwambwidila” Nzamb kwi njit ja Armagedon.​—2 Pita 3:7; Kuj. 16:16.

² Pakwez, Yehova kasotinap anch muntu ap umwing asheshika. Mud mutapu twamena mu mitu ya milong yasambedina, Bibil ulejen patok anch “usotil antu awonsu kukarumuk kudiokal ku yitil yau.” (2 Pita 3:9) Amakurump in Kristu akat kumwimburij Yehova pasadinau usu nich kushimpish muchim mulong wa kuyikwash antu asala yitil kuswimp mwikadil wau ni kwitapil kand dilau da Yehova. Pakwez, kadap antu awonsu akata kusal yitil akata kwitiy kusal mwamu. (Isay 6:9) Amwing akat kudandamen kusal yom yiyimp chikalap nchik usu ukatau kusal amakurump tupamp ni tupamp mulong wa kuyikwash kukarumuk. Yom ik yifanyidinau amakurump kusal anch yom mud yiney yashiken?

‘MUDOSHANY MUNTU MUYIMP MUKACH MWEN’

3. (a) Yom ik yilejenay Bibil yifanyidina kuyisal antu asadina yitil akad kukarumuk? (b) Anch muntu walik kukarumuk, mulong wak tukutwisha kulond anch wakwat kal amwinend mupak wa kumudosh mu chikumangen?

³ Anch muntu wasalang chitil walik kukarumuk, amakurump kakwetap chom chikwau cha kusal, afanyidin kulondul umutakel tutanina mu 1 Korint 5:13 ulondina anch: ‘Mudoshany muntu muyimp mukach mwen.’ Muntu wasalang chitil wij nawamp anch ang walik kukarumuk akumudosh mu chikumangen. Chawiy, chid mud ndiy amwinend wakwatang mupak chakwel amuteka pol pa chikumangen. Wangwil yom yakunangay amwinend. (Gal. 6:7) Mulong wak tukutwisha kulond mwamu? Mulong walikang kukarumuk chikalap nchik usu wasalangau amakurump wa kumukwash tupamp ni tupamp chakwel ashikena ku kukarumuk. (2 Ant 17:12-15) Yisal yend yamekeshin kal anch watondin kal kulik kuziyin kwi mbil ja Yehova.​—Kuv. 30:19, 20.

4. Mulong wak ukatau kwijikish chikumangen anch amudosh muntu wasalang chitil ulikina kukarumuk mu chikumangen?

⁴ Anch muntu wasalang chitil wakad kukarumuk amudosh mu chikumangen, akwijikish chikumangen anch muntu winou kadap kand Kaman wa Yehova.a Chitongijok cha chijikish chinech chidap cha kumukwatish muntu wasalang chitil usany. Pakwez, akat kusal mwamu chakwel chikumangen chiziyin mbil yida mu Bibil yilondina anch “kangal wadandamenany kwibomb” ni muntu winou ni “ufanyidinanyap ap kuda ni muntu wa mutapu winou.” (1 Kor. 5:9-11) Kud mayingishin mawamp masadina anch Yehova apana mbil yiney. Kambuy Paul wafunda anch: “Chivish chikemp chikat kututwish mutand wawonsu.” (1 Kor. 5:6) Antu asadina yitil akad kukarumuk akutwish kuziyish mupak wa antu asadina usu wa kushakam kukwatijan ni mbil jitentamina ja Yehova.​—Jnsw. 13:20; 1 Kor. 15:33.

5. Mutapu ik tufanyidina kumuman muntu wadoshinau kal mu chikumangen, ni mulong wak?

⁵ Chad, mutapu ik tufanyidina kumuman mbay netu wadoshinau mu chikumangen? Ap anch tukutwishap kwibomb nend, tufanyidin kumuman mud mukoku washadikina kal, kadap mud mukoku wajiyina kal. Mukoku wapumbukina kal mu chisak ukutwish kuchirik. Vurik anch mukoku washadikina kal wipana amwinend kud Yehova. Cha ushon, kashichap kukwatijan ni kwipan kwend pa chisu chashadikinay kal, ni chinech chikat kumutek mu ubaj. (Ezek. 18:31) Chikalap nchik mwamu, mulong Yehova udandamedin kumekesh ranaken rend, tukwet ruchingej anch dichuku dimwing muntu winou ukuchirik. Mutapu ik ukutwishau amakurump kumekesh anch akwet ruchingej riner pantaliken ni muntu wasala chitil wadoshinau kal mu chikumangen?

MUTAPU UKATAU AMAKURUMP KUYIKWASH ANTU ADOSHINAU KAL MU CHIKUMANGEN

6. Yom ik yikatau amakurump kusal mulong wa kumukwash muntu wadoshinau kal mu chikumangen?

⁶ Ov, muntu wadoshinau kal mu chikumangen amudjibwil kal ni kumulik anch amwinend akimb mutapu wa kuchirik kud Yehova? Bwat kamu! Pakatau kumulej muntu wasalang chitil wakad kukarumuk anch akumudosh mu chikumangen, komite wa amakurump ukumurumburil nzau jikutwishay kusal chakwel achirik mu chikumangen. Pakwez amakurump kakwimenap kusu pinap. Yisu yivud, akat kumulej muntu wasadina chitil anch akusanger kumuman kand kupwa kwa angond akemp mulong wa kuman anch waswimpin yisal yend. Anch muntu wasadina chitil witiy kutanijan kand nau, nich rukat amakurump akumukasikesh kukarumuk ni kuchirik. Ap anch kandikal akarumun muchim wend pa chisu chinech, amakurump akusal kand usu wa kutanijan nend mu machuku ma kurutu.

7. Mutapu ik ukatau amakurump kumekesh ranaken ra Yehova chisu chimukwashinau muntu wadoshinau kal mu chikumangen? (Jeremiy 3:12)

⁷ Amakurump akat kwikasikesh kumekesh ranaken ra Yehova chisu chimukwashinau muntu wadoshinau kal mu chikumangen. Chilakej, Yehova kachingelap anch antwend amubwambwila mu Isarel wa pakur akarumuka chakwel ndiy asal chad usu wa kuyikwash. Pakwez, wasala rizau ra kusambish mulong wa kuyikwash, ap kurutu amekesh chijingidij cha kukarumuk. Mud twamanang mu mutu wa mulong wa kaad mu Chinong chinech, Yehova wamekesha mutapu uda ranaken rend kusutin kumulej muprofet Ozey kumuchirish mukajend, ap anch wading uchidandamedin kusal chitil. (Ozey 3:1; Mal. 3:7) Mulong wa kumwimburij Yehova, amakurump in Kristu akat kusot chakin kamu anch muntu wasadina chitil achirik, ni kakatap kusal yom yikutwisha kusal anch chimukasiken kusal mwamu.​—Tang Jeremiy 3:12.

8. Mutapu ik utukwashina chishimu cha Yesu cha mwan washadika kwov kurumburik nawamp kwa ranaken ni riy ra Yehova? (Luka 15:7)

⁸ Vurik chishimu cha Yesu cha mwan washadika, chatwisambidina mu mutu wa mulong wa kaad. Tatuku pamumanay mwanend ukat kuchirik ku chikumbu, “waya mau, wamubwikat mwanend, wamulangwisha nich kususu ku kan.” (Luka 15:20) Umen anch tatuku kachingelap anch mwanend ita dilikishin. Pakwez, ndiy wasala rizau ra kusambish, mud mukutwishay nvaj mwawonsu ukweta rukat kusal. Amakurump akat kusal usu wa kumekesh mwikadil wa mutapu umwing pantaliken ni antu ashadikina kal. Akatin anch mukoku washadikina kal ‘achirik ku chikumbu.’ (Luka 15:22-24, 32) Kuding musangar mwiur anch muntu wasala chitil wachirik, ni kuding kand musangar pa divu!​—Tang Luka 15:7.

9. Yehova uyikasikeshin antu asala yitil kusal yom ik?

⁹ Kwiur oku twamanang anch Yehova kakatap kubwik ku mes pa yitil ya antu akad kukarumuk ni kuyilik anch adandamen kushal mu chikumangen. Pakwez, kakatap kuyomb nyim antu akata kusal yitil yikash. Ukatin anch achirik. Mutapu ukatay Yehova kwiyov pantaliken ni antu asala yitil akata kukarumuk akulejen mu Ozey 14:4: ‘Nikez kwok kuburen kushinshaman kwau. Nikez kayikat kwa kwisotin, mulong ujim wam kiudap kand pad awiy.’ Mulong amakurump ij mutapu wiyovilingay Yehova, akat kukimb kachijingidij kawonsu kamekeshina anch muntu wasambish ka kuswimp. Ni mazu minam mafanyidin kuyinkish antu awonsu amulika Yehova kashinsh anch uyikatin ni ukatin anch achirik.

10-11. Mutapu ik ukutwishau amakurump kusal usu wa kuyikwash antu adoshau kal mu chikumangen kudosh pakur?

¹⁰ Chad chid nchik piur pa antu adoshau mu chikumangen pakur, pamwing ap pasutin kal mivu yivud? Antu mud inay alikap kal pamwing ap yisal yau ya chitil yayidoshinau mu chikumangen. Yisu yimwing, akutwish ap kuvuramen diyingishin dayidoshinau mu chikumangen. Chikalap nchik kulep kwa chisu chasutishinay kal muntu pol pa chikumangen, amakurump akusal usu wa kuyikimb ni kuya kuyital antu inay. Payilau kuyital, akutwish ap kulembil nau ni kuyikasikesh nich rukat kuchirik mu chikumangen. Chakin kamu, anch muntu wading pol pa chikumangen mu mivu yivud, pakad kwidjidjek, waziyin kal nakash mu spiritu. Chawiy, anch walond anch ukatin kuchirik mu chikumangen, amakurump afanyidin kurijek chakwel kwikal muntu ufanyidina kwilej nend Bibil, ap anch kandikal amuchirish mu chikumangen. Chikalap nchik mwamu, amakurump awiy kusu akweta mbil ya kurijek mulong wa kutan antu akutwisha kwilej ni antu inay.

¹¹ Mulong wa kwimburij ranaken ra Yehova, amakurump afanyidin kusal usu wa kuyikimb ni kuyikwash antu avud kwijik anch chis chid chawash mulong wa kuchirik. Anch muntu wasala chitil wamekesh anch ukarumukin ni waswimp mwikadil wend, akutwish kumuchirish pakad kulab.​—2 Kor. 2:6-8.

12. (a) Mu yisu ik yifanyidinau amakurump kubabal nakash? (b) Mulong wak tufanyidinap kutong anch chitwishidikinap kud antu amwing asala yitil kuyovil riy kud Yehova? (Tal kand mazu ma kwinshin.)

¹² Yisu yimwing, chiyitin amakurump kubabal nakash kurutu kwa kumuchirish muntu. Chilakej, anch muntu wayipisha mwan mukemp, wading mwin kupumbuk, ap warijeka chakwel ajipa uruw ni mbay nend, amakurump afanyidin kwikal nich kashinsh anch wakarumukin kal kamu chakin. (Mal. 2:14; 2 Tim. 3:6) Afanyidin kuchidij amikoku. Pakwez, tufanyidin kwijik anch Yehova ukutwish kumwitiy muntu win mwawonsu wasala chitil umekeshina kukarumuk kwakin ni walikinap kal mwikadil wend uyimp chakwel achirik. Chawiy, ap anch amakurump asotin kwikal ni kashinsh anch muntu wasala uyimp wa mutapu winou ukarumukin chakin, kafanyidinap kutong anch muntu mud winou kakutwishap kumwovil riy kud Yehova.b​—1 Pita 2:10.

YOM YIKUTWISHA CHIKUMANGEN KUSAL

13. Kushalijan ik kuda pakach pa mutapu tumumena muntu wapupinau kud amakurump ni muntu wadoshinau mu chikumangen?

¹³ Mud mutwisambinang mu mutu wa mulong wasambelang, yisu yimwing akat kwijikish anch muntu kanang amupupin. Anch chashiken mwamu, tukutwish kudandamen kwibomb ni muntu winou, mulong twij anch wakarumukin ni walikinap mwikadil wend uyimp. (1 Tim. 5:20) Ukushal mu chikumangen ni ukwet kuswir kwa kumukasikesh kud akadivar ni anambaz chakwel adandamen kusal yom yiwamp. (Heb. 10:24, 25) Pakwez, kud kushalijan ni muntu wadoshinau mu chikumangen. Tukat kuziyin mbil yilondina anch “kangal wadandamenany kwibomb” ni muntu winou ni “ufanyidinanyap ap kuda ni muntu wa mutapu winou.”​—1 Kor. 5:11.

14. Mutapu ik ukutwishau in Kristu kusadin kom kau kafumbinau kud Bibil pantaliken ni muntu wadoshinau kal mu chikumangen? (Tal kand chipich.)

¹⁴ Ov, yom twamana kal yimekeshin anch tufanyidin kumudiwul rawonsu muntu wadoshinau kal mu chikumangen? Bwat. Chid chakin anch tufanyidinap kwibomb nend. Pakwez in Kristu akutwish kusadin kom kau kafumbinau kud Bibil mulong wa kukwat mupak anch akumutazuk muntu wadoshinau kal mu chikumangen chakwel eza ku yikumangan—pamwing ap mwanamakwau ku mujimbu ap ud muntu wadinga nau piswimp kurutu kwa kumudosh mu chikumangen. Chad chikwikal nchik anch wakumangan? Pakur, twamwinkishangap muntu wa mutapu winou moy. Pakwez, pa mulong winou kand, mwin Kristu mwawonsu ufanyidin kusadin kom kend kafumbinau kud Bibil. Amwing akutwish kuman anch akutwish kwau kumwinkish muntu mud winou moy ap kumwezishaku ku chikumangan. Ap mwamu, tufanyidinap kwambamb chisu chilemp ni muntu winou ap kusutish nend chisu mu kusal yom yikwau.

15. Antu a mutapu ik isambidinau mu 2 Yohan 9-11? (Tal kand mushet “Ov, Yohan ni Paul Ading Isambidin Chitil cha Mutapu Umwing?”)

¹⁵ Antu amwing akutwish kwiyipul anch, ‘Ov, Bibil ulondin anch mwin Kristu umwinkishina muntu wa mutapu winou moy unungin chikas ku yisal yend yiyimp?’ (Tang 2 Yohan 9-11.) Maverse mada kwiur ni kwinshin kwa 2 Yohan 9-11 mamekeshin anch umutakel winou wisambidin piur pa in kupumbuk ni antu ayikasikeshina akwau kusal yom yiyimp. (Kuj. 2:20) Chawiy, anch muntu ukasikeshin mafundish ma in kupumbuk ap yisal yikwau yiyimp, amakurump kafanyidinap kuya kumutal. Pakwez, tukutwish kwikal nich ruchingej anch dichuku dimwing ukutwish kuchirish manang. Chawiy, tufanyidinap kumwinkish muntu wa mutapu winou moy ap kumutazuk ku chikumangan, kwij anch wez wakarumuk.

IMBURIJ RANAKEN NI RIY RA YEHOVA

16-17. (a) Yom ik yikatinay Yehova anch antu asadina yitil asala? (Ezekiel 18:32) (b) Mutapu ik ukutwishau amakurump kumekesh anch ad ambay a mudimu a Yehova chisu chisadinau usu wa kuyikwash antu asadina yitil?

¹⁶ Yom ik twileja kal mu mitu ya milong yitan yida mu Chinong chinech? Yehova kakatinap anch muntu ap umwing asheshik! (Tang Ezekiel 18:32.) Ukatin anch antu asadina yitil achakul ni ndiy. (2 Kor. 5:20) Dawiy diyingishin dasalang anch Yehova ayibabesh antwend apumbukang tupamp ni tupamp chakwel akarumuka ni kuchirik kud ndiy. Amakurump a chikumangen akwet dilau da kwikal ambay a mudimu a Yehova chisu chisadinau usu wa kuyikwash antu akata kusal yitil chakwel akarumuka.​—Rom 2:4; 1 Kor. 3:9.

¹⁷ Tongin musangar ukata kwikal mwiur anch antu akarumuk ku yitil yau! Tatukwetu wa mwiur Yehova ukat kusangar nakash chisu chawonsu chikatay mukoku wend washadika kuchirik mu chikumangen. Rukat retu mulong wa Yehova ridandamen kukul patutongijokidina pa ranaken rend rijim ni riy rend.​—Luka 1:78.