Tulamany Chisambu ni Kwishitul kwa Chikumangen

MUVU ni muvu tunan twa antu tukat kwez ku chikumbu chishitwila cha difukwil dia Yehova, mulong wa kuwanyish uprofet wa Bibil. (Mike 4:1, 2) Musangar mud ik tukweta wa kuyak mu ‘chikumangen cha Nzamb’! (Mid. 20:28) Akat kusanger kumusadin Yehova pamwing niyetu ni kusanger kand mashakamin mishitwila ni ma chisambu madia mu paradis wetu wa mu spiritu. Spiritu utumbila ni yiyul ya manangu yidia mu Dizu dia Nzamb yikat kutukwash kulam chisambu ni kwishitul kwa chikumangen.—Kus. 119:105; Zak. 4:6.

² Anch twasadin mbil ya Bibil, tukat kwikal ni ‘wuntu usu.’ (Kol. 3:10) Tukatap kulik anch milong yikemp yikemp ap kupwitijan yitwaurila. Anch twaman yom mu mutapu uyimenay Yehova, tukupandakan yibachikin ya kwaurik ya mangand ni tukusal mu uumwing ni akadivar nau anambaz a pa mangand mawonsu.—Mid. 10:34, 35.

³ Pakwez, chisu ni chisu, kukat kushiken milong yikata kuyipish chisambu ni uumwing wa chikumangen. Mulong wak? Nakash nakash, chiding mulong wa kulik kusadin yiyul ya Bibil. Tudandamedin kurish ni mwikadil wetu wa kuburen kuwanyin. Kwikil muntu ap umwing pakach petu wakad chitil. (1 Yoh. 1:10) Muntu ukutwish kusal yom yikutwisha kuyipish mwikadil uwamp wa chikumangen ap kwijondish mwikadil wa mu spiritu wa chikumangen. Tukutwish kumurumbukin mukadivar ap nambaz kusutil kulond ni kusal yom pakad kutong. (Rom 3:23) Yisu mudi yiney, yom ik tufanyidina kusal chakwel tupwisha milong yiney?

⁴ Yehova ukat kushinshikin nich rukat yom yiney. Mu Dizu diend mudi yiyul yifanyidina kusadin anch kwashiken milong. Amakurump atufung akweta rukat akat kupan ukwash uwanyidina kudi muntu ni muntu. Kusadin yiyul ya Bibil kutukwashin kwikal ni urund uwamp nau antu akwau ni kwikal itiyinau kudi Yehova. Anch atupup ap atuyul mulong wa chom chiyimp twasadina, tufanyidin kwikal ni kashinsh anch dipup udi mutapu umekeshinay Tatukwetu wa mwiur anch utukatin.—Jinsw. 3:11, 12; Heb. 12:6.

MUTAPU WA KUPWISH KUPWITIJAN

⁵ Yisu yimwing, yikutwish kushiken anch akadivar ap anambaz a mu chikumangen apwitijana. Chifanyidin kupwish milong yiney nich rukat ra ukadivar pakad kulab. (Efes 4:26; Fil. 2:2-4; Kol. 3:12-14) Anch mulong kanang wakimb kuyipish urund wey ni mukadivar ap nambaz wa mu chikumangen, ukutwish kuman anch chidi cha usey kusadin chiyul cha kambuy Pita chilondina anch ‘ikalany nich rukat ripandakena umwing ni mukwau, mulong rukat rikat kubwik miril ya yitil.’ (1 Pita 4:8) Bibil ulondin anch: ‘Etu awonsu tukat kurumbuk tupamp tuvud.’ (Jak. 3:2) Kuyisadin antu akwau mudi mutukatina anch atusadina niyetu kukutwish kusal anch tuyilikishina ni tuvuramena kurumbuk kwau.—Mat. 6:14, 15; 7:12.

⁶ Anch wajingunin anch muntu kanang wovang kal kuyip mulong wa yom wasalang ap walondang, ufanyidin kuya kusal nend chisambu pakad kulab. Ufanyidin kand kwijik anch urund wey ni Yehova ukutwish niwawiy kuyip. Yesu wayiyula in kwilejend anch: ‘Anch ukatin kupan yakupesh yey kudi Nzamb pa chintamb, kwinikwa anch wavurik anch mwanamakwam mu ritiy ukwet mulong ni yamam, shang yakupesh yey pa chintamb. Yang swa, ukachakulany nend mwanamakwey wa mu ritiy, chad uchirik lel ni kupan yakupesh yey kudi Nzamb.’ (Mat. 5:23, 24) Pamwing ap mwanamakwey kakuteshangap nawamp. Anch chidi mwamu, ambamb nend. Anch akadivar ni anambaz adia mu chikumangen akat kwovijan nawamp, yawiy yikutwisha kukwash ovijana nawamp ni apwisha milong yikata kushiken mulong wa kuburen kuwanyin.

KUPAN YIYUL YIWAMP YIMEDINA PA BIBIL

⁷ Yisu yimwing, atulam akat kuman anch chiding cha usey kumuyul muntu chakwel arijeka mutapu wend wa kutong. Chiswapelingap kusal mwamu. Kambuy Paul wayifundina in Kristu a ku Galatia anch: ‘Akadivar, anch muntu umwing wa pakach pen warumbuk kurutu ijika mwamu, en ukwetanya mikadil yiwamp ya mu spiritu salany usu wa kumukwash nich muchim wa kwitudish.’—Gal. 6:1.

⁸ Kusutil ku mudimu wa ukafung, atulam akat kuchidij chikumangen ku yom yivud yikutwisha kulet ubaj wa mu spiritu ni kukangesh milong yikash yikutwisha kushiken. Amakurump asadining usu wa kuwanyish yisend yau mu chilik chiwanyidina mudi mwalonday Yehova kusutil Isay anch: “Umwing ni umwing wau ukez kikal mudi chibwik cha kukangesh rinkind, ni ndond ya kujingam mulong wa ruvul wa rinkind mukash. Awiy akez kikal kand mudi tuwit twa mem tudia mwi mpay yakad mem, akwikal kand mudi urel wa diyal dijim mwi ngand yakad yom.”—Isay 32:2.

KUYITEK IN KANVUNDANGESH CHIJINGIDIJ

⁹ Kambuy Paul wayibabesha antu amwing afanyina kwikal ni chibachikin chiyimp mu chikumangen pafunday anch: ‘Anamakwetu, tukwitinany anch . . . aurikany nau anamakwetu in Kristu awonsu akweta kanvundangesh, akad kulondul malejan mitwakulejanya.’ Wovikesha patok mazu minam palonday kand anch: ‘Anch muntu umwing wa pakach pen walik kuziyil ku mazu ma mukand wetu winou, mutekany muntu winou chijingidij, chad aurikany nend chakwel ova usany. Kangal wamulamany mudi mukankuny, bwat, pakwez mubabeshany mudi mwanamakwen mwin Kristu.’—2 Tes. 3:6, 14, 15.

¹⁰ Yisu yimwing, muntu kakutwishap kwikal ni chaku cha kusal yitil yikash yikutwisha kumushikij ku kumwopat mu chikumangen, pakwez ukutwish kumekesh mwikadil umwing wa kupipej mbil jikata kuyitakel in Kristu. Ukutwish kumekesh pamwing ap mikadil mudi ya usweral, kunyinyit ap kulik kwinang. Ukutwish kwikal ukat “kwichik pa milong ya antu akwau.” (2 Tes. 3:11) Ap ukutwish kudimban mulong atambula chom chikimbinay ap ukweting chaku cha kwipuwangej ni yom yijondila. Chaku chinech cha kanvundangesh chikutwish kuyipish mwikadil wa chikumangen, ni chikutwish kupalangan pakemp pakemp kudi in Kristu akwau.

¹¹ Amakurump akutwish chakusambish kusal usu wa kumukwash muntu mwin kulet kanvundangesh ni yiyul ya Bibil. Pakwez anch udandamedin kudiul yiyul ya Bibil kupwa kwa kumwinkish yiyul tupamp tuvud, amakurump akutwish kukwat mupak wa kusal diskur mulong wa kubabesh antu a mu chikumangen pa mulong winou. Kurutu kwa kusal diskur dined dia kubabesh nich, amakurump akusadil nkeu mulong wa kwijik anch mulong winou udi ujim ni anch uyirumbangeshin antu akwau. Mwin kusal diskur ukulet yiyul yiwanyidina piur pa mwikadil uletina kanvundangesh, pakwez kakujimbulap dijin dia muntu uletina kanvundangesh. Mwamu, antu ija mulong winou wisambidinau mu diskur akusal usu wa kukepish urund ni muntu winou ap anch akudandamen kusal nend pamwing yom ya mu spiritu, ni ‘kumubabesh mudi mwanamakwetu mwin Kristu.’

¹² Tukutwish kuchingejin anch kushinshaman kwa antu a mu chikumangen kukutwish kumukwash mwin kulet kanvundangesh kwov usany wa yom yisadinay ni kumubachik chakwel aswimp mwikadil wend. Anch muntu winou wamekesh patok anch walikin kal mwikadil wend wa kanvundangesh, chidiap cha usey kand kumuman mudi muntu utekinau chijingidij.

MUTAPU WA KUPWISH KURUMBUK KUJIM

¹³ Kulikishin kurumbuk kwa akadivar netu kurumburikinap anch tubwikin mes pa yisal yiyimp ap twitiyij kurumbuk kwau. Kurumbuk kwawonsu kudiap ching mulong wa kuburen kuwanyin twaswana; ni chidiap chiwamp kubwik mes pa kurumbuk kukutwisha kushiken kwikal kurumbuk kujim. (Lev. 19:17; Kus. 141:5) Chijil cha mansuk chalejana anch yitil yimwing yijimbin kusutamu yikwau, ni chidi kamu mwamu mu chikumangen cha win Kristu.—1 Yoh. 5:16, 17.

¹⁴ Yesu walejana yom yifanyidina kusal mulong wa kupwish milong yijim yikutwisha kushiken pakach pa in Kristu. Tal yom yalonday yifanyidina kulondul: ‘Anch mukadivar ney wasal chitil, [1] yang kudi ndiy, umulej kurumbuk kwend. Pakwez londilany ku ujindj, en antu aad. Anch wakutesh, divar dien dia mu ritiy diachirik kal kand. Pakwez anch ndiy kakuteshinap, [2] sendap muntu umwing ap aad uya nau, mulong ukutwish kumufund ching anch ukwet atuman aad ap asatu. Chad anch kayiteshinap awiy, [3] lejanany yom yiney ku chikumangen. Chad anch kateshinap chikumangen, mumana mudi muntu wa mangand ap mudi mwin kulambwish yitad.’—Mat. 18:15-17.

¹⁵ Kusutin chilakej chapanay Yesu chidia mu Mateu 18:23-35, chimeken anch yitil yimwing yidia mu Mateu 18:15-17 yikutwish kwikal milong ya nfalang ap ya mapit, mudi kulik kufut dibaz ap kudimban mulong wa kusend chom chayen. Kurumbuk kukutwish kand kwikal kulond makasu mulong wa kuyipish kalimish ka muntu.

¹⁶ Anch ukwet uman anch muntu umwing mu chikumangen wakurumbukidin mu mutapu winou, kangal kuya kapamp kamwing kuyilej amakurump mulong wa kukupwishin mulong winou. Mudi mwalejanay Yesu, ambamb chakusambish ni muntu wakurumbukinang. Sal usu wa kupwish mulong winou ayinen pakad kwandjikamu antu akwau. Vurik anch Yesu kalondap anch ‘yang kwey kapamp kamwing mulong wa kumulej kurumbuk kwend.’ Pakwez, anch muntu kitiyidinap kurumbuk kwend ni kitinap dilikishin, chidi chiwamp kumuchirikin kand kapamp kakwau. Anch mulong ukutwish kupwa mu mutapu winou, muntu warumbukang ukusangar mulong walejanangap kudi antu akwau kurumbuk kwend ni wayipishangap kalimish kend mu chikumangen. Mwamu “divar dien dia mu ritiy diachirik kal kand.”

¹⁷ Anch muntu warumbukang witiyin kurumbuk kwend, wit dilikishin ni wasal usu wa kurijek kurumbuk kwend, chidiap cha usey kuya kulemp ni mulong winou. Ap anch chitil chading chijim, kurumbuk kwa mutapu winou akutwish kukupwish kudi antu aad inay.

¹⁸ Anch utwishinap kuchirish ukadivar wen pa kumulej kurumbuk kwend pakach pa “en antu aad,” mwamu ukutwish kusal mudi mwalonday Yesu anch “sendap muntu umwing ap aad uya nau,” ni ambamb kand ni mukadivar ney. Antu ukusendau afanyidin niyau kusal usu wa kwikal ni chitongijok cha kuchirish ukadivar wen. Nakash nakash, afanyidin kwikal antu ija mulong winou nawamp, pakwez anch kijap kwau mulong winou, ukutwish kutondap muntu umwing ap aad chakwel ikalap chisu wambambinanya. Afanyidin kwikal antu akweta ukaliweny wa kupwish mulong mudi winou ni kuman anch kudi chakin kamu kurumbuk. Amakurump atazukinau mulong wa kwikal atuman a mulong kezinap mu dijin dia chikumangen, mulong chisak cha amakurump chayitumangap kamu mulong wa kupwish mulong winou.

¹⁹ Anch kupwa kwa kusal usu nakash mulong upwilap kwau (wambambinany ayinen kupwa watazukap muntu umwing ap aad) ni anch umen anch chikasiken kubwik mes pa mulong, ufanyidin chad kuyilej atulam a chikumangen mulong winou. Vurik anch chom cha usey nakash kudi amakurump chidi mulong wa kulam chisambu ni kwishitul kwa chikumangen. Kupwa kwa kuyilej amakurump, ufanyidin kusha mulong winou mu makas mau ni kumuchingejin Yehova. Kangal walikidil mwikadil wa muntu ap umwing ukupwakesha ap ukukepishina musangar wey mu mudimu wa Yehova.—Kus. 119:165.

²⁰ Atufung a chikumangen akusal usu wa kushinshikin mulong winou. Anch chamekan patok anch muntu wakurumbukidin nakash ni kitinap kwend dilikishin ni kasadinap kwend usu wa kurijek kurumbuk kwasadinay mu chilik chisikena ni chiwamp, chikutwish kwikal chiwamp kudi komite wa atulam amwopata muntu winou mu chikumangen. Kusal mwamu, kuchidijin amikoku ni kulamin kwishitul kwa chikumangen.—Mat. 18:17.

MUTAPU WA KUPWISH YITIL YIJIM

²¹ Kurumbuk kumwing kujim mudi masandj, makaj, utun, masaal, kupumbwok, kwifukwil akish ni yitil yikwau yijim ya mutapu winou, yitinap kuyilikishin ching kudi muntu umwing warumbukinangau. (1 Kor. 6:9, 10; Gal. 5:19-21) Mulong kwishitul kwa mu spiritu kwa chikumangen kudi mu ubaj, yitil ya mutapu winou chifanyidin kuyitwal ni kuyipwish kudi amakurump. (1 Kor. 5:6; Jak. 5:14, 15) In Kristu amwing akutwish kwambamb nau amakurump mulong wa kuyilej yitil yau ap yom yikwau yijau piur pa uyimp wasadinau antu akwau. (Lev. 5:1; Jak. 5:16) Chikalap nchik mutapu ukutwishau amakurump kutambul rusangu piur pa chitil chasadinay mwin Kristu wabatishinau kal, amakurump aad akusal usu wa kwijik uyakin wa mulong winou pakad kulab. Anch ajingunin anch rusangu rayilejinau ridi rakin ni anch kudi uman umekeshina anch mwin Kristu wasadin chitil chijim, chisak cha amakurump chikutond amakurump asatu akusala komite wa dirumburish mulong wa kupwish mulong winou.

²² Amakurump akat kusal usu nakash wa kubangin amikoku mulong wa kuyichidij ku yom yawonsu yikutwisha kuyishesh mu spiritu. Akat kusadin kand Dizu dia Nzamb ni ukaliweny mulong wa kumupup muntu mwawonsu usadina chitil ni kumukwash ikala kand ni urund uwamp ni Yehova. (Jud 21-23) Chinech chikwatijadin ni mbil jamwinkau Timote kudi kambuy Paul, wafunda anch: ‘Am nikat kukukand patok kurutu kwa Nzamb ni kwa Kristu Yesu, ukeza kurumburish aom ni afu, . . . Yipupa, yikanda, yikasikesha nich kushimpish kwa muchim kwawonsu ni ukaliweny wa kufundish.’ (2 Tim. 4:1, 2) Chikutwish kwit chisu chivud mulong wa kusal mwamu, pakwez yidi pakach pa mudimu ujim usadinau amakurump. Chikumangen chikat kusanger usu usadinau amakurump ni akat kuman anch awanyidin kutambul ‘kalimish tupamp twaad.’—1 Tim. 5:17.

²³ Yisu yawonsu anch chamekan anch mwin Kristu wasalang chitil chijim, chom cha kusambish kudi amakurump chidi mulong wa kumukwash muntu winou ikala kand ni urund uwamp ni Nzamb. Anch wamekesh anch ukarumukin chakin ni witiyin ukwash wa amakurump, akumupup mu ujindj ap kurutu kwa antu aletang uman wadia umuteshidinau mu komite wa dirumburish, kupup kwinoku kukumukwash ni kusal anch antu akwau ova wom wa kusal chitil. (2 Sam. 12:13; 1 Tim. 5:20) Chisu chawonsu anch amupup muntu, akutwish kumukangesh kusal yom kanang. Mwamu chikutwish kumukwash muntu wasadina chitil chakwel endila kand “mu jinjil jitentamina” machuku ma kurutu. (Heb. 12:13) Yijidik yiney akuyidiosh pa chisu kanang anch muntu wamekesh anch uyil kurutu mu spiritu nawamp.

KWIJIKISH DIPUP

²⁴ Anch komite wa dirumburish waman anch muntu warumbukin chakin, pakwez mulong winou awij kudi antu a pol ni a mu chikumangen ni anch chitin anch akadivar ni anambaz amubabela muntu winou, akutwish kwijikish mu wiswimp ku Chikumangan Mudimu ni Mashakamin. Akutwish kwijikish anch: “[Dijin dia muntu] amupupang.” Kurutu kwa kupan chijikish chinech ku chikumangen, ntakel wa chisak cha amakurump ufanyidin kwitiy anch asala mwamu.

ANCH MUPAK UDI WA KUMWOPAT MUNTU

²⁵ Yisu yimwing, muntu ukutwish wijididin kal kusal yitil ni amakurump asadin usu wa kumukwash pakwez ulikin kwend. Pamwing ap chisu chimurumburishinau muntu mu komite wa dirumburish, amakurump kamenap kamu “yom yiwamp ya kumekesh kukarumuk.” (Mid. 26:20) Chad chifanyidin kusal ik? Anch chidi mwamu, chifanyidin kumwopat mu chikumangen mwin kusal chitil winou ulikina kukarumuk, mulong alika kwibomb kand nau antu ishitwila a Yehova. Kusal mwamu kukudiosh mu chikumangen chibachikin chiyimp cha mwin kusal chitil, ni kukukwash chakwel chikumangen chikala ni mwikadil uwamp ni chishitwila mu spiritu ni chikal ni kalimish. (Kuv. 21:20, 21; 22:23, 24) Chisu chateshay kambuy Paul piur pa mwikadil wa usany wa muntu wa mu chikumangen cha Korint, wayiyula amakurump anch ‘mupanany muntu winou mu makas ma Satan . . . , mulong wa kupandish spiritu [wa chikumangen].’ (1 Kor. 5:5, 11-13) Paul wafunda kand piur pa in Kristu amwing opatau mu mivu chitot ya kusambish mulong wa kubwambwil uyakin.—1 Tim. 1:20.

²⁶ Anch chashiken anch chifanyidin kumwopat mwin Kristu ulikina kukarumuk, komite wa dirumburish ufanyidin kumwijikish mupak winou ni kumurumburil patok mayingishin ma Bibil mamopatinau kal. Kupwa kwa kumwijikish piur pa mupak winou, komite wa dirumburish ufanyidin kumulej anch, anch umen anch kamurumburishangap nawamp ni ukatin anch amurumburisha kand kapamp kakwau, ufanyidin kusal mwamu kusutin ku kufund mukand ulejena patok mulong wak ukwet kuswir kwa kumurumburish kapamp kakwau. Kudiosh dichuku dikumulejau mupak wakwatangau ku komite mulong wa kumwopat, ukwikal ni machuku sambwad mulong wa kufund mukand anch utongin kusal mwamu. Anch atambul mukand wend, chisak cha amakurump chikwambamb ni kalam wa munyingumuku, ukutonda amakurump awanyidina mulong wa kusal komite mukwau ukushinshikina mulong winou. Amakurump inay akusal usu wa kusal dirumburish diakaad rubing rilondwilaku kupwa kwa kutambul mukand. Anch kudi dirumburish diakaad, kukwikalap chijikish cha kumwopat muntu winou. Mu chisu chinicha, mwin Kristu winou ukweta mulong kakwakulap ap kusal malembil ku yikumangan ni kakwikalap ni yisend mu chikumangen.

²⁷ Ditenchik dia kusal dirumburish diakaad udi mutapu wa kumekesh ranaken kudi muntu ufila ni mulong ni kumukwashin chakwel arumburila kand mulong wend. Chad anch mwin Kristu wasadina chitil winou walik kwend kwez ku dirumburish diakaad, akulejan ku chikumangen chijikish cha kumwopat kupwa kwa kusal usu mu chilik chisikena mulong wa kwambamb nend.

²⁸ Anch mwin kusal chitil kakatinap kusal dirumburish diakaad, komite wa dirumburish ufanyidin kumurumburil usey wa kukarumuk ni yom yifanyidinau kusal mulong wa kumuchirish mu chisu kanang. Amakurump akusal mwamu mulong wa kumukwash ni ranaken ni kuchingejin anch muntu winou ukuswimp mwikadil wend ni mu kusut kwa chisu ukutwish kuchirik mu dirijek dia Yehova.—2 Kor. 2:6, 7.

CHIJIKISH CHA KUMWOPAT MUNTU

²⁹ Anch chifanyidin kumwopat mwin kusal chitil wakad kukarumuk mu chikumangen, akupan chijikish mu wiswimp mu chikumangen anch: “[Dijin dia muntu] kadiap kand Kaman wa Yehova.” Chitinap kurumburil yom yivud. Chijikish chinech chikuyikwash akadivar ni anambaz ashinshamena a mu chikumangen chakwel kangal abombakana kand ni muntu winou. (1 Kor. 5:11) Kurutu kwa kupan chijikish chinech ku chikumangen, ntakel wa chisak cha amakurump ufanyidin kwitiy anch asala mwamu.

KWIYAURIL KWA KWIKATIN

³⁰ Dizu ‘kwiyauril kwa kwikatin’ akat kudisadin piur pa mupak ukwatinay muntu wabatishinau kal utunina kwikal mwin Kristu ni kakatinap kand anch ijikana ni amumana mudi Kaman wa Yehova. Ap ukutwish kutun ndond yend mu chikumangen cha win Kristu mulong wa yisal yend, mudi kwimbomb ni ditenchik kanang disadina yom yakad kukwatijan ni mafundish ma Bibil ni yikurumburishay Yehova Nzamb.—Isay 2:4; Kuj. 19:17-21.

³¹ Piur pa antu atuna ritiy rau ra win Kristu mu chirung chend, kambuy Yohan wafunda anch: “Antu inay adiokala mu chisak chetu, pakwez kadingap kwau mu umwing ni yetwetu. Anch awiy ading mu umwing ni yetwetu, ing adandamedin kand pamwing ni yetwetu.”—1 Yoh. 2:19.

³² Anch muntu wiyauril kwa kwikatin, mwikadil wend ku mes ma Yehova ushalijadin nakash ni wa mwin Kristu walikina kal kusal mudimu wa kulejan. Muntu ukutwish kushiken kulik kusal mudimu wa kulejan mulong wa kukangany kwilej chisu chawonsu Dizu dia Nzamb. Ap pamwing chidi mulong wa milong yend ap rupompat ap washadishin mushiku wend wa kumusadin Yehova. Amakurump ap antu akwau a mu chikumangen akutwish kudandamen kumukwash mu spiritu mwin Kristu walikina kal kusal mudimu wa kulejan.—Rom 15:1; 1 Tes. 5:14; Heb. 12:12.

³³ Pakwez, anch mwin Kristu watond kwiyauril amwinend, akwijikish mu wiswimp ku chikumangen anch: “[Dijin dia muntu] kadiap kand Kaman wa Yehova.” Muntu winou chifanyidin kumuman mudi muntu wopatinau kal. Kurutu kwa kupan chijikish chinech ku chikumangen, ntakel wa chisak cha amakurump ufanyidin kwitiy anch asala mwamu.

KUMUCHIRISH MUNTU

³⁴ Muntu wopatau ap wiyaurila amwinend ni chikumangen akutwish kumuchirish anch wamekesh patok anch wakarumukin ni wamekesh mu chisu kanang anch walikin kal kusal yitil. Umekeshin kamu anch uswiridin kuchirish kand urund uwamp ni Yehova. Amakurump akulik anch kusuta bil chisu kanang, pamwing ap angond avud, muvu umwing ap ni kusut, kukwatijan ni mwikadil—chakwel muntu wopatinau kal amekesha anch kukarumuk kwend kudi kwakin. Anch chisak cha amakurump chatambul mukand ufundinay muntu mulong wa kumuchirish, komite wa dirumburish wamurumburisha kapamp ka kusambish ndiy ukwisamba ni muntu winou, anch chitwishikin. Komite winou ukushinshikin uman wa “yom yiwamp ya kumekesh kukarumuk” kwa muntu winou ni ukukwat mupak wa kumuchirish chisu chinicha ap bwat.—Mid. 26:20.

³⁵ Anch muntu witina kumuchirish amwopatina mu chikumangen chikwau, komite wa dirumburish wa chikumangen chidiay katat ukwambamb ni muntu winou ni kushinshikin mukand wend wa kwit anch amuchirisha. Pakwez, komite wa dirumburish wa chikumangen chidiay ukwisamb ni chisak cha amakurump a chikumangen chamwopatinau muntu winou, ni kuyijikish yom yimenau. Makomite maad minam makusal mu kovijan mulong wa kwikal nich kashinsh anch ij yom yawonsu mulong wa kukwat mupak umwing. Pakwez, komite wa dirumburish wa chikumangen chamurumburishinau kapamp ka kusambish ndiy ukukwata mupak wa kumuchirish. Anch amakurump amwing a mu komite wa chikumangen chamurumburishinau kapamp ka kusambish kadiap kand mu chikumangen ap kadiap kand amakurump, akutond amakurump a mu chikumangen chinech mulong wa kuyiswinkan.

CHIJIKISH MULONG WA KUMUCHIRISH MUNTU

³⁶ Anch komite wa dirumburish ukwet kashinsh anch muntu wopatau wakarumukin kamu chakin ni chifanyidin kumuchirish, akwijikish ku chikumangen chamwopatinau anch amuchirish kal. Anch muntu winou udi katat mu chikumangen chikwau, akwijikish kand mu chikumangen chinicha. Akutwish kulond mu winswimp anch: “[Dijin dia muntu] amuchirish kal kwikal Kaman wa Yehova.” Kurutu kwa kupan chijikish chinech ku chikumangen, ntakel wa chisak cha amakurump ufanyidin kwitiy anch asala mwamu.

ANCH MWAN MUKEMP WABATISHINAU KAL WASAL CHITIL CHIJIM

³⁷ Anch mwan mukemp wabatishinau kal wasal chitil chijim, chifanyidin kuyilejamu amakurump. Anch amakurump arumburishin yitil yijim ya an akemp, chidi cha usey anvajau abatishinau kal ikalap. Anvaj afanyidin kusal mu kovijan ni komite wa dirumburish, kafanyidinap kusal yom mulong wa kumwiyepish mwanau ku dipup kanang. Mudi mukatau kusal ni amakurump asadina yitil, komite wa dirumburish ukusal usu wa kumupup ni kumukand mwin kurumbuk. Pakwez, anch mwan winou kamekeshinap kukarumuk, chifanyidin kumwopat.

ANCH MWIN KULEJAN WAKAD KUTAMBULDIBATISH WASAL CHITIL CHIJIM

³⁸ Yom ik yifanyidina kusal anch mwin kulejan wakad kal kutambul dibatish wasal chitil chijim? Mulong kand kal atambul dibatish, kakuyopatap kamu mu chikumangen. Pakwez, pamwing ap kateshinap nawamp mbil ja Bibil, yiyul yiwamp yikutwish kumukwash chakwel endila kand “mu jinjil jitentamina.” —Heb. 12:13.

³⁹ Anch mwin kulejan wakad kal kutambul dibatish walik kwend kukarumuk kupwa kwa kwambamb ni kumukwash kudi amakurump aad, chidi cha usey kwijikish ku chikumangen. Akulond mu wiswimp anch: “[Dijin dia muntu] kadiap kand mwin kulejan wakad kutambul dibatish.” Chikumangen chikuman chad mwin kusal chitil winou mudi muntu wa mangand. Ap anch kamwopatinap mwin kurumbuk winou, in Kristu afanyidin kusadin chiyul cha kulik kwimbomb nend. (1 Kor. 15:33) Chikumangen chikutambulap kand rapor wend wa mudimu wa kulejan.

⁴⁰ Mu kusut kwa chisu, muntu wakad kal kutambul dibatish (mukurump ap mwan mukemp) walikishau kusal mudimu wa kulejan ukutwish kwit chakwel ikala kand mwin kulejan. Anch chidi mwamu, amakurump aad akwambamb nend mulong wa kuman anch uyil kurutu mu spiritu. Anch muntu uwanyishin yom yitinau, akwijikish mu wiswimp anch: “[Dijin dia muntu] wikal kal kand mwin kulejan wakad kutambul dibatish.”

YEHOVA UKAT KUYUKISH DIFUKWIL DIA CHISAMBU NI DISHITWILA

⁴¹ Antu awonsu ibombina nlel ni chikumangen akutwish kusanger yiyukish ya mu spiritu yiyinkishinau antu a Yehova. Tukwet yakudia yivud ya mu spiritu ni mem mawamp ma uyakin. Tudi kand mu diking dia Yehova kusutil ditenchik diend dia uteokras ditakedilau kudi Kristu. (Kus. 23; Isay 32:1, 2) Kwikal mu paradis wa mu spiritu mu machuku minam mansudiel ma kanrumbangesh kusadin anch twiyova anch tudi mu diking.

⁴² Anch twalam chisambu ni kwishitul kwa chikumangen, tukusal anch chitokish chetu cha uyakin wa Want chidandamena kumunyik. (Mat. 5:16; Jak. 3:18) Ku yiyukish ya Nzamb, tukwikal ni musangar wa kuman antu avud nakash ashikedina kumwijik Yehova ni kwibomb pamwing niyetu mulong wa kusal rusot rend.