Kuziyin Mbil ya Uteokras Kukat Kulet Yiyukish

KUMUZIYIN Nzamb udia Mukaleng mwin mangand mawonsu, kudi kwa usey anch tukimbin kwikal arijekinau mulong wa kusal rusot ra Yehova. Twij nawamp anch Mwanend ndiy udia mutu wa chikumangen cha win Kristu ni tulimishin mbil ya wintakel mu mitapu kushalijan ya mwom wetu. Muntu ni muntu ukat kutaninamu anch waziyin mbil yiney ya uteokras.

² Chitongijok cha kuziyin ku ulabu chandama mu muchid wa antu kudiosh kamu mu chir cha Eden. Chinech chimeken mwamu kusutin mbil japanay Nzamb jidia mu Disambishil 1:28 ni 2:16, 17. Yitang yikwau yawonsu yafanyina kuyiziyin antu, ni Adam ni Ev afanyina niyau kuziyin ku rusot ni ulabu wa Nzamb. Kuziyin ku ulabu wa Nzamb kwafanyina kulet chisambu ni kutenchik yom nawamp. Kupwa, mbil ya wintakel ayilejana kand mu 1 Korint 11:3. Kambuy Paul wafunda anch: ‘Pakwez nikatin wijikany anch mutu wa muntu wawonsu ndiy Kristu; ni mutu wa mband ndiy ikundj; ni mutu wa Kristu ndiy Nzamb.’ Chinech chimekeshin anch mu kutenchik kwa yom, antu awonsu akwet muntu ufanyidinau kuziyin, kudioshaku ching Yehova.

³ Antu avud nlel kijap ni kaziyidinap mbil ja wintakel. Mulong wak? Milong yasambishina mu Eden chisu chatondau anvajetu kwa kwikatin kulik kuziyin ku ulabu wa Nzamb. (Dis. 3:4, 5) Pakwez, kashikenap kwikal ni want ipau wakimbau. Chawiy, ayitakela chad kudi chitang chiyimp cha mu spiritu, Satan Djabul. Wintombwij winou wayaurila antu ni Nzamb. (Kol. 1:21) Mudi chibudikin, antu avud nlel adi mu ulabu wa muyimp.—1 Yoh. 5:19.

⁴ Kusutin ku kwilej uyakin wa Dizu dia Nzamb ni kuusadin, tukat kushiken ku kwidiosh ku chibachikin cha Satan. Mulong tudi Atuman ipanina ni abatishinau kal, tukat kumwitiy Yehova mudi Mukaleng wa mwom wetu. Tukwet chitongijok mudi cha Mwant David, witiyija anch Yehova udi “piur pa yom yawonsu.” (1 Jsng. 29:11) Inge, twitiyin nich kwikepish anch: ‘Ijikany anch Yehova ndiy Nzamb! Ndiy kwend watutanganya, niyetu tudi aend, tudi amikoku a madil mend.’ (Kus. 100:3) Twij anch Yehova udi mujim ni tufanyidin kumuziyin kamu nakash, mulong ndiy watanga yom yawonsu. (Kuj. 4:11) Mulong tudi atushalapol a Nzamb wakin, tumulondwil Yesu Kristu, watushila chilakej chiwanyidina cha kumuziyil Nzamb.

⁵ Yom ik yilejay Yesu kusutin mar mamanay pa divu? Hebereu 5:8 wakwil anch: ‘Anch wadingap nchik Mwan ndiy wileja kuziyil pamanay mar.’ Mwaning, Yesu wadandamena kumuziyin nich kushinshaman Tatukwend wa mwiur, ap chisu charishay ni rupompat. Chikwau kand, Yesu kasalap chom ap chimwing ku rusot rend. Kalondap yom yendendiy amwinend ni kakimbap uyaj wendendiy amwinend. (Yoh. 5:19, 30; 6:38; 7:16-18) Pasalay mudimu wend wa kulejan, wasangera kusal rusot ra Tatukwend, ap anch kusal mwamu kwamuletina rupompat ni kuzengol. (Yoh. 15:20) Chakin kamu, Yesu wamuziyina Nzamb. Yesu ‘wikepisha amwinend’ ni waziyila djat ni ku ‘rufu ra ku mutond wa mar.’ Kuziyin kwend kwinoku kudi Yehova kwaleta yiyukish yivud, mudi dipandish dia chikupu mulong wa antu awonsu, kwamuzambwisha piur ni kwamuletina Tatukwend uyaj.—Fil. 2:5-11; Heb. 5:9.

MITAPU KUSHALIJAN YA KUZIYIN MBIL YA UTEOKRAS

⁶ Anch twamuziyin Nzamb pa kusal rusot rend, tukat kwiyep yakamish yivud ni milong yikata kuyishiken antu alikina kuziyin ku ukaleng wa Yehova. Mukankuny netu, Djabul ukat kusal usu nakash wa kutudia. Tukukamunik mu makas ma muyimp winou anch twamubwambwil ndiy ni twaziyin kwa kwikepish ni kwa kwikatin ku mes ma Yehova.—Mat. 6:10, 13; 1 Pita 5:6-9.

⁷ Mu chikumangen cha win Kristu, twitiyin ulabu wa Yesu ni wintakel wamwinkishay ‘kashalapol ushinshamena ni kubabal.’ Chinech chitukwashin kwikal ni chitongijok chiwamp ni mwikadil uwamp umwing ni mukwau. Kumuziyin Nzamb mu chikumangen kukutubachik kuziyin Dizu diend mu mitapu yawonsu ya difukwil dietu. Kuziyin kwinoku kutadin kand mudimu wetu wa kulejan, kukumangan ni kwakul ku yikumangan, mutapu wa kuyikwash amakurump ni kulimish mipak ya dirijek.—Mat. 24:45-47; 28:19, 20; Heb. 10:24, 25; 13:7, 17.

⁸ Kuziyin kwetu kudi Nzamb kukat kulet chisambu, diking ni kutenchik kuwamp kwa yom mu chikumangen cha win Kristu. Mikadil ya Yehova yikat kumekan kusutin antu end amuziyidina. (1 Kor. 14:33, 40) Yom twimedina ni mes metu mu dirijek dia Yehova yitubachikin kwikal ni yovil mudi ya Mwant David. Kupwa kwa kushinshikin kushalijan kudia pakach pa atushalapol a Yehova ni antu ayimp, David walonda ni musangar anch: ‘Ayuk kwau antu amukweta Yehova kwikal Nzamb wau!’—Kus. 144:15.

⁹ Mu ditenchik dia uruw ni mu dijuku, ‘mutu wa mband ndiy ikundj.’ Chawiy kand amakundj afanyidin kumuziyin Kristu, chad mutu wa Kristu udi Nzamb. (1 Kor. 11:3) Amband afanyidin kuyiziyin anfumwau ni an afanyidin kuyiziyin anvajau. (Efes 5:22-24; 6:1) Kukat kwikal chisambu anch muntu ni muntu mu dijuku walimish mbil ya umutu.

¹⁰ Ikundj ufanyidin kusadin ulabu kwa rukat, mudi mwasalay Kristu. (Efes 5:25-29) Anch wasadin nawamp ulabu wend ni walik kudiul chisend chend, mukajend ni anend akusanger kumuziyin ndiy. Mband ukwet chisend cha kwikal nkwash. (Dis. 2:18) Anch mband wamukwash nich kushimpish muchim ni wamulimish nfumwend, ukwikal ni dilau dia nfumwend ni ukupan uyaj kudi Nzamb. (1 Pita 3:1-4) Anch amakundj ni amband alimish mbil ya Bibil, akuyishil anau chilakej chiwamp cha kumuziyin Nzamb.

¹¹ Kumuziyin Nzamb kukat kutukwash kand kuyiziyin “in kutakel,” ni ‘ayitekin kulondwish jindond jau ku usu wa Nzamb.’ (Rom 13:1-7) Mulong adi an a ngand alimishina mbil, in Kristu akat kufut yitad ni kupan ‘yom ya Kaisar kudi Kaisar, ni yom ya Nzamb kudi Nzamb.’ (Mat. 22:21) Anch twalimish ni kuziyin kudi antu atakedina mu yom yawonsu yakad kupwitijan ni yijil yitentamina ya Yehova, tukutwish kusal usu wawonsu chakwel tusala mudimu wa kulejan.—Mar. 13:10; Mid. 5:29.

¹² Tufanyidin kulimish mbil ya uteokras mu mashakamin mawonsu ma mwom. Nich mes ma ritiy, tumen dichuku dikumuziyinau Yehova Nzamb kudi antu awonsu. (1 Kor. 15:27, 28) Yiyukish mud ik yikwikalau nich antu itiyijina nich musangar ukaleng wa Yehova ni akudandamena kumuziyin chikupu!