Mulong Wak Kumwopat Muntu Chidi Kumekesh Rukat

JULIAN walonda anch, “Pijikishau anch mwanam ikundj amwopat kal, namana anch mwom wam washik kal kwinsudiel. Wading mwanam wa kusambish, ni twading nend mu urund ukash; twasalang nend pamwing yom yivud nakash. Wading nsand ukweta yisal yiwamp nakash, ni kapamp kamwing kamu wasambisha kusal yom yiyimp. Mukajam wasambisha kudil chisu chawonsu, ni nakanganya mutapu wa kumwongoj. Twadandamena kwiyipul anch kudi yom kanang ya winvaj twakanganya kuwanyish.”

Ov, mutapu ik chitwishikina kulond anch: kumwopat mwin Kristu chidi kumekesh rukat anch kukat kuletishang runeng mwamu? Chom ik chilondinay Bibil piur pa kukwat mupak ukash mudi winou? Ni chom ik chikata kumushikij muntu ku kumwopat?

YOM YAAD YIKATA KUMUSHIKIJ MUNTU KU KUMWOPAT

Kudi yom yaad​—yikwatijadina—​yikutwisha kumushikij Kaman wa Yehova ku kumwopat. Chakusambish, anch Kaman wabatishau kal wasal chitil chijim. Chakaad, anch walik kukarumuk kudiokal ku yitil yend.

Ap anch Yehova katwitinap kwikal awanyidina, ukwet yany yishitwila yitinay anch atushalapol end awanyisha. Chilakej, Yehova ulondin nakash anch twipuka kusal yitil yijim ap yikash mudi masandj, kwifukwil akish, wij, wimbwitan, kujipan, ni ulaj [yipong ni nkau].​—1 Kor. 6:9, 10; Kuj. 21:8.

Ov, umenap anch yany yishitwila ya Yehova yidi ya manangu ni yidiaku mulong wa kutulam? Nany ukukisa kushakam pamwing ni antu akweta chisambu, ni antu a kuchingejin? Tukutwish kutan antu mudi inay pakach pa anamakwetu akadivar ni anambaz a muspiritu, akata kusanger kushilamu twasala chisu twipana kudi Nzamb mulong wa kushakam kukwatijan ni yany yend yidia mu Bibil.

Pakwez chikwikal nchik anch mwin Kristu wabatishau kal wasal chitil chijim mulong wa kuburen kuwanyin? Atushalapol ashinshamena a Yehova a pasak asala yitil mudi yiney, pakwez Nzamb kayilikap rawonsu. Mwant David udi chilakej chijikena. David wasala chitil cha masandj ni cha kujipan; pakwez, muprofet Natan wamuleja anch: “[Yehova wakulikishin, NWT] kal chitil chey.”​—2 Sam. 12:13.

Nzamb wamulikishina David chitil chend mulong wakarumuka chakin kamu kudiokal ku yitil. (Kus. 32:1-5) Chilik chimwing, kashalapol wa Yehova nlel akutwish kumwopat ching anch walik kukarumuk kudiokal ku yitil yend ap anch wadandamen kusal yom yiyimp. (Mid. 3:19; 26:20) Anch muntu kamekeshinap kukarumuk kwa kashinsh kudi amakurump asadina komite wa dirumburish, amakurump inay afanyidin kumwopat muntu winou.

Kwinsambishil, tukutwish kuman anch mupak wa kumwopat mbwambol winou udi ukash ap uburedina manangu, pakampwil anch tukwet urund wa piswimp ni muntu winou. Pakwez, Dizu dia Yehova ditwinkishin mayingish makin chakwel twitiya anch mupak winou udi wa rukat.

USEY WA KUMWOPAT MUNTU

Yesu walonda anch “manangu . . . makat kumekan anch madi makin ku yisalijok yau.” (Mat. 11:19) Mupak wa manangu wa kumwopat mbwambwol ulikina kukarumuk kudiokal ku yitil yend ukweting yibudikin yiwamp. Tushinshikinany yom yisatu:

Kuyopat ambwambwol kukat kutumbish dijin dia Yehova. Mulong tukwet dijin dia Yehova, mwikadil wetu ukweting chakin kamu usu pa dijin diend. (Isay 43:10) Ching mudi mukutwisha yisal ya mwan kusal anch ayilimisha ap ayipipeja anvajend, chilik chimwing, yitongijok yikwetau antu akwau pantaliken ni Yehova yimedin pa yom yiwamp ap yiyimp yimenau pakach pa Atuman a Yehova. Dijin diwamp dia Nzamb akudilimish ching anch antu adikweta alimish yany yishitwila ya Yehova mu mwom wau. Mwikadil winou ufaniken ni wading machuku ma Ezekiel chisu chasadikishau dijin dia Yehova masaal kudi in Yuda.​—Ezek. 36:19-23.

Tukusadikish dijin ditumbila dia Nzamb masaal anch twasal yom yiyimp. Kambuy Pita upanin chiyul chinech kudi in Kristu palondinay anch: “Ikalany mudi an amuziyidila Nzamb, kangal walondulany maku mayimp ma mujimbu, mudi muwadinganya pakur, piwadinganya kand kal wijikany yom ya Nzamb. Mudi mudiay wakutazukanya utumbil, niyen ikalany atumbila mu yaku yen yawonsu. Mulong afundil mu Mukand wa Nzamb anch: ‘Ikalany antu atumbila, mulong am nidi utumbila.’” (1 Pita 1:14-16) Kwishitul ap kwikal ni mwikadil uwamp kukat kupan katumb ku dijin dia Nzamb.

Anch Kaman wa Yehova wasal yom yiyimp, arund ni anamakwend akushiken ching ku kwijik. Kumwopat muntu chidi chisal chimekeshina anch Yehova ukwet antu ishitwila ni alamatina ku umutakel wa Bibil mulong wa kwikal atumbila. Pezay ngendj kapamp ka kusambish kukumangan ku Chot cha Want cha mu Suisse, walonda anch niyam nikimbin kwikal muntu wa mu chikumangen chen. Mpanyend ading amwopata kal mulong wasala masandj. Walonda anch nikimbin kwandam mu dirijek dined mulong “dikubwikangap mes pa mikadil yiyimp.”

Kumwopat muntu kukat kulam kwishitul kwa chikumangen cha win Kristu. Kambuy Paul wayibabesha in Korint ku ubaj wa kubwik mes pa antu asadina yitil adinga nau mu chikumangen. Wafanikesha mwikadil wa antu ayimp ni chivish ukata kututwish wung wa kusamp. Walonda anch “Mwon ukemp [chivish] ukat kutekau mu wung wa kusamp ukat kututwish dibot diawonsu.” Wayiyula kand anch: “Mwopatany muntu muyimp mukach mwen.”​—1 Kor. 5:6, 11-13.

Chimeken anch, “muntu muyimp” ujimbwilau kudi Paul wasala masandj. Ni antu akwau a mu chikumangen asambisha kulond piur pa mwikadil wend. (1 Kor. 5:1, 2) Anch amakurump adiwul chitil chijim chinech, in Kristu akwau akutwish niyawiy kwimburij chaku chiyimp mudi chinech kulondwish mashakamin mayimp ma ndond yishichau. Kudiwul yitil yijim kukat kuyikasikesh antu kulik kulimish yany ya Nzamb. (Mul. 8:11) Chikwau kand, akayitil alikina kukarumuk akutwish kwikal mudi “madj mamwamu makad kunakish ruval” ni akushesh ritiy ra antu akwau mu chikumangen.​—Jud 4, 12.

Kwopatan kukutwish kumukwash mbwambwol kwikal ni chitongijok chiwamp. Yesu walonda piur pa mwan nsand wadiokala ku chikumbu cha tatukwend ni washesha dipit diend ku yom yiyimp. Mwan washadika winou wileja mu mutapu ukash anch kushakam kulemp ni chikumbu cha tatukwend kwading kwakad usey ni kuyimp nakash. Kupwa, mwan wikala ni chitongijok chiwamp, wakarumuka, ni wakwata mupak wa kuchirik kwol kwau. (Luka 15:11-24) Yom yilondinay Yesu piur pa tatuku wa rukat wasangara mulong wa mutapu wachirishay mwanend manangu kutukwashin kwijik yovil ya Yehova. Nzamb utwinkin kashinsh anch “Kinikat kusangarap kuman mukayitil kufa. Nisotil ndiy alika yitil yend chakwel apanda.”​—Ezek. 33:11.

Chilik chimwing, antu opatinau kal, akad kwikal kand mu chikumangen cha win Kristu, akad kwikal mu uumwing ni anamakwau adia Atuman, akutwish kushiken ku kwijik yom yashadishinau kal. Yibudikin yiyimp ya yitil yau, kuvurik machuku ma musangar padingau kusanger urund uwamp nend Yehova ni antu end, kukutwish kwayishikij kukutongin pa mwikadil wau.

Rukat ni kushinshaman yidi ya usey mulong wa kutan yibudikin yiwamp. Nfund a kuseng David walonda anch “Mwin kutentam anch wambul, chikwimbabesh ni kwingink manangu, anch ankand chikala mudi many pa mutu wam.” (Kus. 141:5) Chilakej: Tong bil anch mwin kwendangan mu masuku mu chishipu waziy chisu cha mashik. Wasambish kuwumidin ni kuzal mashik, ni wov tul. Anch walal tul mu mashik mwinimwa, ukufa. Anch akimb kumukwash, mwin kumukwash winou ukutwish pamwing ap kumubulol chakwel alanka. Kumubulol kwinoku kukutwish kwamuswan, pakwez chidi mulong wa kupandish mwom wend. Chilik chimwing, David wading wij anch wading ukwet kuswir kwa yiyul yikash yidiokila kudi muntu utentamina mulong wa uwamp wend.

Yisu yivud, kumwopat muntu kukat kumwinkang dipup dimuwanyidina. Kwinyim kwa mivu mudi dikum, mwan ikundj wa Julian walondangau kwinsambishil, watokisha mwom wend, wachirika mu chikumangen, nlel udi mukurump mu chikumangen. Nsand winou ulondin anch “Kwingopat kwanteka mpal ni mpal ni yibudikin ya mwikadil wam. Chading chifanyidin kwimpup mu mutapu winou.”​—Heb. 12:7-11.

MUTAPU UWAMP WA KUYIMEKESHIN ANTU UPOTAU KAL RUKAT

Chakin, kumwopat muntu kuletining mar ma muspiritu, pakwez mar minam mafanyidinap kudandamen. Muntu ni muntu pakach petu ufanyidin kusal usu chakwel anch muntu wopatau kal achirika mu chikumangen.

Amakurump akweta chisend cha kukwat mupak wa kwijikish piur pa kumwopat muntu, afanyidin kusal usu wa kumekesh rukat ra Yehova. Chisu chimulejinau muntu piur pa mupak ukwatinau, akumurumburil nawamp patok yifanyidinay kusal mulong wa kuchirik kand mu chikumangen. Mulong wa kuyivurish antu opatinau kal mutapu ukutwishau kumuchirikin Yehova, amakurump akutwish pa chisu, kuya kuyital antu amekena anch aswimpin mikadil yau.a

Antu a mu dijuku akutwish kumekesh rukat mulong wa chikumangen ni wa mukayitil pa kulimish mupak wa kwopatan. Julian ulondin anch, “Wading ching mwanam, pakwez mashakamin mend mateka mwimbu pakach pend niyetwetu.”

Antu awonsu mu chikumangen akutwish kumekesh rukat ra kulimish mupak pa kwipuk kwambamb ni kuya kumutal muntu wopatinau kal. (1 Kor. 5:11; 2 Yoh. 10, 11) Mwamu akat kukasikesh mupak wa kupup kwa Yehova wakwatinau amakurump. Chikwau kand, afanyidin kumekesh rukat nakash ni ukwash kudi antu a mu dijuku dia muntu wopatinau, anenganena nakash, chakwel alika kutong anch niyawiy ayopatin mu chikumangen cha win Kristu.​—Rom 12:13, 15.

Julian upwishin kulond ni mazu madia anch “Kumwopat muntu didi ditenchik dia usey, ditenchik dined ditukwashin kushakam kukwatijan ni yany ya Yehova. Mu machuku ma kurutu, chikalap nchik runeng, mupak wa kwopatan uletining yibudikin yiwamp. Anch nadiwula mwikadil winou uyimp wa mwanam, mwanam kelap kwend kuchirik.”