Mutukutwisha Kumuman Muntu Wopatinau mu Chikumangen

Kwikiling chom chiletininga runeng nakash mudi kumwopat mwan makwetu wa kumujimbu ap murund netu mukatish mu chikumangen mulong wa kulik kwit dilikishin piur pa chitil chend. Pitushinshikidininga chilondiningay Bibil piur pa muntu winou wopatinau, tumekeshining mutumukatininga Nzamb nakash ni mutapu tushinshamena ku ditenchik diend.a Tushinshikinany yipul yimwing yilankininga piur pa mulong winou.

Ov, mutapu ik tufanyidina kumuman muntu wopatinau mu chikumangen? Bibil ulondin anch: “Kangal wovijanany nend muntu utazukinau mukadivar udia mwin masandj, ap ukwet ris, ap ukata kwifukwil akish, ap ukata kusaalan masaal, ap udia mwin kukwachik maar, ap mwij. Kangal wovijanany nend ap kusu kudia nend muntu wa mutapu winou.” (1 Korint 5:11, NWT) Bibil wisambidin kand piur pa muntu mwawonsu “ukupumbuka wakad kudandamen mu malejan ma Kristu” anch: “Kangal wamwakany mu chikumbu chen, ap kumulangwish. Muntu mwawonsu ukumwaka muntu wa mutapu winou, wibomb kal nend mu midimu yiyimp.” (2 Yohan 9-11) Tufanyidinap kwinung ni muntu wopatinau mu chikumangen ni kwisamb nend milong ya muspiritu. Chinong cha Kalam cha pa Mwinses 15, 1981, pa paj wa 23, mu Français chilondin anch: “Kumulangwish muntu kusu, rawiy rizau ra kusambish rikutwisha kuyishikij antu ku kwambamb ap pamwingap ku kuta urund. Ov, tukutwish kwitiyij kusal rizau riner ra kusambish ni muntu wopatinau mu chikumangen?”

Ov, Chidi kamu cha usey kwipuk muntu wopatinau mu chikumangen? Mwaning, tufanyidin kusal mwamu mulong wa yiyingish yivud. Diyingish dia kusambish, pitusadininga mwamu tumekeshining kushinshaman kwetu kudiay Nzamb ni ku Dizu diend. Tumusadidiningap Yehova kusu ching pa chisu chipipela bwat pakwez kand ni chisu turishininga nich yikokujol yikash. Rukat tumukatininga Nzamb ritubacikining kusadil yany yend yawonsu nich kashinsh anch ndiy utentamen, mwin rukat, ni yany yend yituletidining musangar ujim. (Isay 48:17; 1 Yohan 5:3) Diyingish diakaad, kwimik urund nend muntu wakad kwit dilikishin udi mutapu wa kwichidij anyinetu pamwing ni antu adia mu chikumangen ni kupan ukwash ku katumb kawamp ka chikumangen. (1 Korint 5:6, 7) Diyingish diakasatu, kusadil yany ya mu Bibil piur pa muntu wopatinau mu chikumangen kukutwish kwikal mutapu wa kumukwash. Pitwitiyijininga kusadil mupak wakwatau kudi amakurump amurumburisha muntu mwinou, chikutwish kupukun kom kend chikalap nchik kulik kwend kwitiyij ukwash wamukwashau nich. Pakumanay anch antu amukatina nakash amwipukin kwikal kand nend mu urund, chikutwish kumukwash ‘kutongin’ pa chitil chend chijim ni kusal jinzau jifanyidina kusal chakwel achirika kudiay Yehova.​—Luka 15:17.

Ov, chom ik chifanyidina kusal anch opat chid cha mu dijuku dietu mu chikumangen? Chisu mudi chinech chiding chisu chikasikeninga nakash kudi in mu dijuku ni chikutwish kutukasiken kuziyil kwi mbil ja Yehova mulong wa rukat ra chivadik ridinga pakach petu ni chid chinech. Chad mutapu ik tukutwisha kuman chid chinech chopatilau? Tukutwishap kwisambin yom yawonsu piur pa mulong winou mu buku ou bwat, pakwez tukushinshikin ching kusu milong yaad.

Yisu yimwing, chid cha mu dijuku chopatinau chishiching kwa anvaj ach. Pakwez, kwovijan kwa chivadik kukupwangap, chawiy lel, chidi chinech chikutwish kudandamen kusal yom yawonsu yisadiningau kudi yid yawonsu ya mu dijuku dined. Mulong ndiy wasadin chitil chijim, chid chinech chapwishin urund wa muspiritu ni yid yawonsu ya mu dijuku. Chawiy, yidi ya mu dijuku yimulamatina Nzamb yikutwishap kand kusal yom ya muspiritu pamwing nend mulong wa kumwifukwil Nzamb bwat. Chilakej, anch muntu wopatinau wandam mu difukwil dia mu dijuku, kafanyidinap kwakul ku yipul ap kulondamu dizu. Anch uchid mwan kanch, anvaj akwet chisend cha kumufundish ni kumupup. Kupwa, anvaj amukatina mwanau akutwish kwilej nend Bibil.b​—Jinswir 6:20-22; 29:17.

Pamwingap, mwan makwetu wopatinau mu chikumangen kashichingap netu ku chikumbu bwat. Ap anch tukutwish kutanijan nend yisu yimwing mulong wa kwisamb milong ya dijuku, tufanyidin kukepish tupamp tuvud twa kumanijan nend. Yid ya mu dijuku yashadila mu chikumangen yifanyidinap kukimb tumilong tuvud tuvud chakwel amanang chisu cha kwambamb ni chidi chinech bwat. Paziyidinau ku yany ya mu Bibil, amukwashin muntu winou wasadila chitil chijim chakwel itiyija dipup diamupupinau.c​—Hebereu 12:11.