Kumekesh Kushinshaman kwa Ukristu pa Chisu Chimwopatinau Mwanamakwetu mu Chikumangen
1. Mwikadil ik ukutwisha kutek kushinshaman kwa mwin Kristu mu choziu?
1 Wanamaku pakach pa yid ya dijuku ukutwish kwikal nich usu nakash. Chinech chikat kulet choziu pad mwin Kristu anch mbay wa uruu, mwan, nvaj, ap mwanamaku mukwau wa piswimp nakash amwopat kal ap anch wiyauril amwinend kudiokal ku chikumangen. (Mat. 10:37) Ov mutapu ik ufanyidinau in Kristu ashinshamena kumusadil mwanamaku mud mwinou? Ov padi kushalijan mu mutapu wa kumusadil anch muntu mwinou ushich mu chikumbu chen? Chakusambish, tushinshikinany yilondina Baibel pa mulong winou, yany ya kusadil kud antu opatinau ni antu iyaurila ayinau.
2. Kwambatan nich Baibel, mutapu ik ukutwishau in Kristu kuyisadil antu opatinau kal mu chikumangen?
2 Mutapu wa Kuyisadil Antu Opatinau Kal: Dizu dia Nzamb diyitin in Kristu kulik urund nend muntu wopatinau kal mu chikumangen: “Kangal wovijanany nend muntu ukata kulond anch: Nidi mwanamakwey mwin Kristu, anch ndiy udi mwin usund, ap ukwet ris, ap ukat kwifukwil akish, ap ukat kusaalan masaal, ap udi mwin kukwachik maar, ap mwij, ap kusu kudia nend muntu wa mutapu winou. . . . Mwopatany muntu muyimp mukach mwen.” (1 Kor. 5:11, 13) Mazu ma Yesu madia mu Mateu 18:17 misambidin ni mawiy pa mulong wawiy umwing: ‘Muchinda [muntu wopatinau kal] mud mwin mangand ap mud mwin kulambwish yitad.’ Antu amutesha Yesu ading ij nawamp anch Ayuda a pa chirung chinicha kadingap ni kuyiman akamichid mud anamakwau ni adinga ni kuyipuk in kulambwish yitad mud antu ijondila akad kwitiyik mu chisak. Komb Yesu wadinga ni kuyifundish in kwilejend kulik kwinung mu urund pamwing ni antu opatinau kal.—Tal Tour de Garde wa Kachirikin 15, 1981, paj 18-20.
3, 4. Urund wa mutapu ik ujidikinau kwikal nich pamwing ni muntu wopatinau kal ap wiyaurila amwinend?
3 Chinech chirumburikin anch in Kristu ashinshamena kakutwishap kwikal nich urund wa muspiritu ni muntu ap umwing wopatinau kal mu chikumangen. Pakwez chitin kand yom yivud. Dizu dia Nzamb dilondil anch tufanyidinap “ap kusu kudia nend muntu wa mutapu winou.” (1 Kor. 5:11) Chawiy lel, niyetu tufanyidin kwipuk urund ni muntu wopatinau kal. Chinech chidi cha kusadin ap mu kwikal nend ku musambu, masengan ma ndundu, ap kuya nend mu chiku ap kushakam ni kusambish kudia nend pamwing chikala ku chikumbu ap ku restoran.
4 Ov, chidi mutapu ik piur pa kwambamb ni muntu wopatinau kal? Ap anch Baibel kisambidinap piur pa mwikadil win wawonsu ukutwisha kushiken, 2 Yohan 10 utukwashin kwikal nich chitongijok cha Yehova piur pa milong yiney: “Chawiy anch muntu wez kudi en wakad kukuletilany malejan minam, kangal wamwakany mu chikumbu chen, ap kumulangwish.” Tour de Garde wa Kachirikin 15, 1981, paj 25 wapana yirumburil pa mulong winou anch: “Kulond kusu anch ‘moyany’ kud muntu kukutwish kwikal rizau ra kusambish rikata kutwal ku misamb ap kand kushikij ku urund. Ov tusotin kusal rizau riner ra kusambish pamwing ni muntu wopatinau kal?”
5. Chom ik chikatay kushadish muntu, anch amwopat?
5 Chakin kamu, chidi kamu mud muchilondila nimero wa Tour de Garde winou pa paj 31 anch: “Chifanyidin kwijik anch mwin Kristu ukata kwipan ku chitil djat ni kushiken ku kumwopat ukat kushadish yom yivud: kwitapil dilau dia Nzamb, ndond yend mu chikumangen cha musangar cha in Kristu, urund uwamp wa akadivar ni urund ujim wadingay nich kurutu pamwing ni yid ya dijuku diend adia in Kristu.”
6. Ov mwin Kristu amwitin kukatul urund win wawonsu ni mwanamakwend ushichingay nend mu chikumbu chimwing anch amwopat mu chikumangen? Rumburil.
6 Anch Ushichany Nend mu Chikumbu Chimwing: Ov chinech chirumburikin anch in Kristu ashichinga mu chikumbu chimwing ni chid cha dijuku chopatinau kal akwipuk kwisamb nend, kudia nend, ni kwikal nend mu urund chisu chisadilau mijikit yau ya pichuku-pichuku? Tour de Garde wa Ndol 15, 1991, pa mazu mafundinau kwishin kwa paj 22, malondil anch: “Anch mu dijuku dia mwin Kristu mudi mwanamakwau wopatau kal, muntu mwinou ukudandamen kusadil pamwing nau, mu milong ni midimu ya pichuku-pichuku ya mu chikumbu.” Chawiy lel, yid ya dijuku yikutwish kukwat chiyul anch chiswiridinap kumwauril pa rend chisu cha kudia ap cha kusal mijikit ya pichuku-pichuku. Pakwez, chifanyidinap kumekan kud in kutal anch yom yawonsu yisadikin kwau chilik chimwing mud pichadinga kurutu kwa kumwopat.
7. Mutapu ik ukutwisha kuswimp urund wa muspiritu mukach mwa dijuku mudia muntu wopatinau kal?
7 Pakwez, Tour de Garde wa Kachirikin 15, 1981, paj 28, ulejen patok piur pa muntu wopatinau kal ap wiyaurila amwinend anch: “Urund wawonsu wa muspiritu wadingay nich pa kusambish wakatuk kal. Chinech chidi chakin kand ap anch kud anamakwend, pamwing ni anamakwend a mu dijiku dia piswimp nakash. . . . Chinech chikez kurumburik kukarumuk mu urund wa muspiritu wadingau nich mu chikumbu. Chilikej, anch amwopat ikundj, mukajend ni anend kakez kwikalap ni musangar anch ndiy utakedila dilejan dia Baibel dia dijuku ap kutakel kutang kwa Baibel ni kulembil. Anch ndiy usotil kulembil, mud pa chisu cha kudia, ukwet mbil ya kusal mwamu ching kusu kwolikwend. Pakwez yid yikwau ya dijuku yikutwish kulembil mu michim yau ayinau kud Nzamb. (Jinsw. 28:9; Kus. 119:145, 146) Chikwikal nchik anch muntu wopatinau kal udia mu chikumbu usotil kwikalap chisu chikata dijuku kutang Baibel pamwing ap chisu cha dilejan dia Baibel? Akwau akutwish kumwitiyij ikalap chakwel atesha pakwez kakezap kupakish kuyifundish ap kupan yirumburil ya yitongijok yend piur pa milong ya relijon.”
8. Chisend ik chikwetau anvaj in Kristu pantaliken nend mwan mukemp ushicha ku chikumbu chau wopatinau kal mu chikumangen?
8 Anch mwan ushichinga mu chikumbu amwopat kal, anvaj in Kristu akwet chisend cha kumufundish. Tour de Garde wa Kalang 15, 1988, paj 20, ulondil anch: “Mud kamu chidandamedinau kumwinkish yakudia, maswin, ni ndond ya kushakam, afanyidin kand kumufundish ni kumupup kwambatan nich Dizu dia Nzamb. (Jinswir 6:20-22; 29:17) Anvaj in rukat akutwish kutenchik chakwel kwikal nich dilejan dia Baibel dia ku chikumbu pamwing nend, ap anch amwopata kal. Pamwing ap ukez kutaninamu ukwash uvud kusutin dilejan anch ilej nend pa rend. Ap awiy akutwish kukwat mupak wa kumwit kudandamen kwikal nau pamwing mu ditenchik dia dilejan dia dijuku.”—Tal kand Tour de Garde wa Mwinkind 1, 2001, paj 16-17.
9. Mu chisik ik mwin Kristu chifanyidinay kwambamb ni mwanamakwend wopatinau kal mu chikumangen ushicha pol pa chikumbu chend?
9 Anamakwetu Opatau Kal Akad Kushakamang Netu mu Chikumbu Chimwing: Tour de Garde wa Ndol 15, 1988, paj 28, ulondil anch: “Mwikadil ushalijadin anch muntu wopatinau ap wiyaurila amwinend udi mwanamakwetu ushicha pol pa dijuku dietu ni pa chikumbu chetu.” “Chitwishikin anch chikala chikasikena kusankanijan ap pakemp ni mwanamakwetu winou. Ap anch kwading milong kanang mu dijuku yitina kumanijan, kufanyidin kwikal kwa chisu chikemp,” kwambatan nich mbil ya Nzamb “kangal wovijanany nend muntu” ufishinau nich mwin kusal yitil ulikina kukarumuk. (1 Kor. 5:11) In Kristu ashinshamena afanyidin kusal usu wa kwiyep urund wakad kufanyin ni mwanamakwetu mud mwinou, ata kusalang nend nakash midimu ya kwisak mu chilik chipandikena.—Tal kand Tour de Garde wa Kachirikin 15, 1981, paj 29-30.
10, 11. Chom ik chifanyidinay mwin Kristu kushinshikin kurutu kwa kumwit mwanamakwend wopatinau kal kusokin ku chikumbu chau?
10 Tour de Garde upwitidin manangu metu pa mulong ukwau ukutwisha kulank: “Chikwikal mutapu ik anch chid cha dijuku dia piswimp, chilikej mud mwan ap nvaj wakad kushakamang netu mu chikumbu chimwing, amwopat mu chikumangen ni katat usotin asokina mu dijuku dietu? Dijuku difanyidin kukwat mupak piur pa yifanyidinau kusal kwambatan nich mwikadil. Chilikej, muntu mwinou wopatau kal uyedin ap katwishinap kuwanyish yisakin yend mulong wa mayingishin kanang ma kuburen kwa nfalang ap ma ku mujimbu. Pa chinech an in Kristu akwet chisend cha Mifund ni cha ngikadil cha kumukwash. (1 Tim. 5:8) . . . Yikusalau yengamidin pa yom yivud mud maswir ma kashinsh ma nvaj, mwikadil wend wa manangu ni usey umenay nich mutu wa chikumbu kuwap kwa muspiritu kwa chikumbu chend.”—Tour de Garde wa Kachirikin 15, 1981, paj 28-29.
11 Anch udi mwan, mutu wa mulong wawiy umwing udandamedin anch: “Yisu yimwing anvaj in Kristu itiya kuchirik ku chikumbu mu chisu kanang kwa mwanau wopatinau kal mu chikumangen uyedila ku mujimbu ap mu yovil. Pakwez mu mulong ni mulong anvaj afanyidin kushinshikin mikadil ya mwanau. Ov mwan mwinou wopatinau kal ushiching pol pa dijuku, ni katwishinap katat kuwanyish maswir mend? Ap anch usotil bil kuchirik ku chikumbu mulong wa kwikal nich mwom uswapela? Mwikadil ik wa manangu ukwetay ni yitongijok ik yikwetay? Ov ukez kwikal ‘chivish’ mu chikumbu?—Gal. 5:9.”
12. Ov ukwash ik ukweta ditenchik dia kwopatan mu chikumangen?
12 Yiyukish ya Kwikal Ashinshamena kud Yehova: Kusadil pamwing ni ditenchik dia Mifund dia kuyopat ni kwiyep in kusal uyimp akata kulik kukarumuk kudi kwa ukwash. Kukat kulam kwishitul kwa chikumangen ni kutumekesh kwikal ashalijadina mud in kuchidij yany ya ngikadil ya piur ya Baibel. (1 Pita 1:14-16) Kukat kutuchidij ku usu wa kutwijondish. (Gal. 5:7-9) Kukat kumwinkish kand mwin kusal uyimp ndond ya kutambul ukwash uvud mulong wa kupup kwatambulay, chom chikutwisha kumukwash kusongish “kutentam ni chisambu.”—Heb. 12:11.
13. Kurijek kwa mutapu ik kwasala dijuku dimwing, ni chibudikin ik chikalaku?
13 Kupwa kwa kutesh diskur ku chikumangan cha munyimuku, mukadivar umwing nsand ni mpanyend ajingunina anch akwet kuswir kwa kurijek mutapu wadingau ni kumusadil makwau, wopatau pasutin kal mivu musamban. Kapamp kamwing kupwa kwa chikumangan, nsangarum wamutazuka makwend, ni kupwa kwa kumumekeshin rukat rau, wamurumburila anch awiy kakutwishap kand kwisamb nend ap pakemp ching anch kudi mulong wa swa-swa. Kupwa kwa chisu chikemp, makwend wasambisha kukumangan ni amuchirisha kand mu chikumangan. Ni nfumwend kand, wakad kwitiyij wasambisha kwilej ni pa chisu chifanyidina watambula dibabatish.
14. Mulong wak tufanyidina kulondul nich kushinshaman ditenchik dia kwopatan mu chikumangen?
14 Kulondul nich kushishaman ditenchik dia kwopatan didia mu Mifund kumekeshin rukat retu mulong wa Yehova ni kukat kupan chakul kud muntu ukata Kumusaalang. (Jinsw. 27:11) Chawiy lel, tukwikal nich kashinsh ka kutambul yiyukish ya Yehova. Mwant David wafunda piur pa Yehova anch: “Mulong wa nkand jend kinikezap kujiyep. Kud muntu ushinshamena ukez kusal nich kushinshaman.”—2 Sam. 22:23, 26, NW.
[Caption on page 1]
[Study Questions]