Mukata Nzamb Ukukatina

“Ukamukata [Yehova] Nzamb wey nich muchim wey wawonsu nich mupim wey wawonsu, nich manangu mey mawonsu.”—MATEU 22:37.

1, 2. Yom ik yavuvurisha chipul piur pa chijil chipandakena usey?

CHIPUL chinech chimeken mudi chadinga ni kuvuvurish ntad nakash pakach pa Afaris a pa chirung cha Yesu. Mu yijil yawonsu 600 ni kusut ya mu Chijil cha Moses, chijil ik chimwing chadinga chipandikenamu yikwau usey? Ov, chadinga chijil cha yakupesh? Chakin, yakupesh adinga ni kuyisal mulong wa kutambul dilikishin dia yitil ni mulong wa kumujikitish Nzamb. Ov, chijil chipandakena usey chadinga chijil cha kutwalan ku mukand? Chijil chinech ni chawiy chadinga cha usey, mulong mukand wadinga chijingidij cha manswik masukay Yehova ni Aburaham.—Disambishil 17:9-13.

² Ku mutambu ukwau, Ayuda in kulam yijil atonga anch mulong chijil chin chawonsu chapanay Nzamb chadinga ni usey— ap anch yijil yimwing yading yimeken mudi yikwet usey ukemp—awiy atonga anch chading chiyipin kutakej chijil ap kusu chimwing piur pa yijil yikwau. Afaris akwata mupak wa kumutent Yesu pa kan nich chipul chinech chivuvurishina ntad. Pamwing ap ndiy wela kulond chom chimwing chikutwisha kuyipish ukinakin wend. Umwing wa Afaris waya wamutan Yesu, wamwipul anch: “Ov, dilejan ik dipandakenamu malejan mawonsu kujimb?”—Mateu 22:34-36.

3. Yom ik yalonday Yesu anch chawiy chijil chipandakena?

³ Chakul chapanay Yesu chikwet kamu usey nakash kudi etu nlel. Mu kwakul kwend, ndiy walejana mu wiswimp yifanyidina kwikal pichuku-pichuku ni yikeza kwikal yom ya usey mu difukwil diakin. Chajimbulay Kuvurik Yijil 6:5, Yesu walonda anch: “‘Ukamukata [Yehova] Nzamb wey nich muchim wey wawonsu, nich mupim wey wawonsu, nich manangu mey mawonsu.’ Chinech chawiy chijil chipandakena ni cha kusambish.” Ap anch Mufaris wipula kusu chijil chimwing, Yesu wamuleja kand chikwau. Wajimbula chijil chidia mu In Levi 19:18, walond anch: “Ni cha kaad chifanikenaku nich chawiy ech: ‘Ukamukata mukwen mudi ey amwiney.’” Kupwa Yesu walejana anch pa yijil yiney yaad pawiy pakudikidinau difukwil diawonsu dishitwila. Mulong wa kumukangesh kupakij kuyitek pa dipang kulondwish nich usey uyikweta mu kuyisikej nich yijil yikwau, Yesu wapwisha nich kulond anch: “Pa yijil yiney yaad pawiy pakudikinau yijil yawonsu ni mazu ma aprofet.” (Mateu 22:37-40) Mu mutu wa mulong winou, tukwisambin chijil chipandakena pa yijil yiney yaad. Mulong wak tufanyidina kumukat Nzamb? Mutapu ik tukata kumekesh anch tumukatin Yehova? Ni mutapu ik tukutwisha kukudish rukat riner? Chidi cha usey kwijik yakul ku yipul yiney mulong tumusangaresha Yehova, tufanyidin kumukat nich muchim wetu wawonsu, nich mupim wetu wawonsu, ni manangu metu mawonsu.  

Usey wa Rukat

4, 5. (a) Mulong wak Mufaris kashimokap mulong wa yom yalonday Yesu? (b) Yom ik yidia ya usey nakash kudi Nzamb kupandakanamu yakupesh ni milambu?

⁴ Chimeken anch Mufaris wamwipula Yesu kinanap ap kushimok mutapu wamwakulau kudi Yesu. Ndiy wading wij anch kumukat Nzamb chading chom chimwing cha usey mu difukwil diakin, ap anch antu avud akangany kuchimekesh. Mu masinagog, adinga ni chaku cha kutang ni kuchirikin malembil ma Ayuda matazukinau anch Shema, ap malembil ma kumekesh ritiy, ni mu malembil minam mwadinga Kuvurik Yijil 6:4-9, mufund wajimbulay Yesu. Kukwatijan nich rusangu rifanikena nich ridia mu mukand wa Mako, Mufaris wamwela Yesu anch: “Chakin kamu Mulej, yiwalonda [kal] walond kal kamu nawamp anch, ‘Ndiy udi umwing; kwikil kand mukwau ching ndiy’; ni kumukat ndiy ni muchim wawonsu, ni manangu mawonsu, ni usu wawonsu, ni kumukat mukwau mudi amwinend, chawiy kupandakenumu kwau yakupesh ya kwosh ni mulambu.”—Mako 12:32, 33.

⁵ Chakin, ap anch Chijil chadinga ni kwit milambu ni yakupesh ya kwosh, yidia ya usey kudi Nzamb udi muchim wa rukat wa atushalapol end. Muswesu ulambwilau kudi Nzamb mulong wa kumekesh rukat ni kwipan wading ni usey nakash kudi ndiy kupandakanamu tunan twa amakwal a mikoku alambwilau nich muchim uyimp. (Mike 6:6-8) Vurik rusangu ra mwadiamufu kazwendj wamanay Yesu mu tempel ku Yerusalem. Yikunku yaad ya makut yatekay mu chipau yadingap yifanyidina kuland nich ap muswesu umwing. Pakwez, mulambu winou, wapanay nich muchim wend wawonsu mulong umukatin Yehova, warumburika yivud kudi ndiy kupandakanamu milambu yidioshinau mu miril ya mapit yapanau ampich. (Mako 12:41-44) Chikasikeshin mudi ik kwijik anch Yehova umening nich usey tukutwisha etu awonsu kumekesh yikalap nchik mikadil yetu—rukat retu!

6. Yom ik yafunday Paul piur pa usey wa rukat?

⁶ Chamekeshay usey wa rukat mu difukwil diakin, kambuy Paul wafunda anch: “Anch nalond mu jindim ja antu ni angel, pakwez anch kinikwetip rukat, nidi kusu mudi rubemb ap mudi chilond chikata kudjim chamwamu. Anch nikwet kupan kwa kulejan dizu dia Nzamb, ni kwijik ujindj wawonsu ni ronganyin rawonsu; ni anch nikwet ritiy ra kuyishemunin mikandu, pakwez anch kinikwetip rukat nidi mudi muntu wamwamu. Ni anch namwang yiwamp yam yawonsu kuyidish atuzwendj, ni anch napan mujimbu wam kwikal yakupesh ya kwosh, pakwez anch kinikwetip rukat, chinech kichikwinsakiship chom.” (1 Korint 13:1-3) Chidi patok anch, rukat ridi ra usey anch tusotin anch difukwil dietu dimusangaresha Nzamb. Pakwez, mutapu ik tukata kumekesh anch tumukatin Yehova?

Mutapu Tukata Kumekesh Anch Tumukatin Yehova

7, 8. Mutapu ik tukutwisha kumekesh anch tumukatin Yehova?

⁷ Antu avud itiyijin anch rukat chidi chovil chimwing chitwakad etu kutwish kuyikel; antu alondining ya kukatijan ni muntu wa mujimbu ukwau. Pakwez, rukat rakin ridiap kusu chom chimwing tukata kwov. Rijiken ni kudingurikin ku yisalijok, chidiap ku yovil ya muchim. Bibil wisambidin rukat mudi “njil yipandakenamu kuwap” ni mudi chom chimwing ‘tulondwila.’ (1 Korint 12:31; 14:1) In Kristu ayikasikeshin kukat, chidiap kusu “mu mazu ap mu jindim, pakwez ching mu midimu ni yakin.”—1 Yohan 3:18.

⁸ Kumukat Nzamb kutubachikin kusal yom yimusangareshina ni kulondin ni kukwat nich makas maad ukaleng wend, mu mazu ni mu yisal. Rukat riner rikat kutubachik kwipuk kukat mangand ni yom yidiamu. (1 Yohan 2:15, 16) Antu amukatina Nzamb akisining yom yiyimp. (Kuseng 97:10) Kumukat Nzamb kwitin kand kumukat mukwetu, chom tukwisambina mu mutu wa mulong ulondwilaku. Chikwau kand, kumukat Nzamb kwitin anch tumuziyila. Bibil ulondin anch: “Mulong rukat ra Nzamb rawiy er, chakwel tukulam yijidik yend.”—1 Yohan 5:3.

9. Mutapu ik wamekeshay Yesu anch umukatin Nzamb?

⁹ Yesu wamekesha mu mutapu uwanyidina chirumburikina kumukat Nzamb. Rukat ramubachika kudiokal mwiur kwez ni kushakam panap pansh mudi muntu. Rukat ramubachika kumutumbish Tatukwend kusutil ku yom yasalay ni kufundish. Rukat ramubachika kwikal ‘mwin kuziyil djat kamu ku rufu.’ (Filipoi 2:8) Kuziyil kwinoku—mulad wa kumekesh rukat rend—kwayifungwila antu ashinshamena njil ya kwikal itiyikina kurutu kwa Nzamb. Paul wafunda anch: “Mulong wa kubwambul kwa muntu umwing [Adam] kwayandjikisha avud kwikal in yitil, chawiy kand ni kuziyil kwa muntu umwing [Kristu Yesu] kukez kayitentamish avud.”—Rome 5:19.

10. Ov, mulong wak kumukat Nzamb kwitin kuziyil?

¹⁰ Mudi Yesu, tukat kumekesh anch tumukatin Nzamb kusutil ku kumuziyil. Kambuy wakatay Yesu nakash, Yohan wafunda anch: “Mulong rukat ra Nzamb rawiy er, chakwel tukulam yijidik yend.” (1 Yohan 5:3) Antu amukatina chakin Yehova akimbining umutakel wend. Chijau anch kakutwishap kutakel nawamp mwom wau ayinau, akat kuchingejin manangu ma Nzamb ni kuziyil ku umutakel wend wa rukat. (Yeremiy 10:23) Adi mudi antu adinga ni muchim wa kutesh a mu Berey wa pasak itiyija uruu wa Nzamb ‘nich mushiku nakash,’ asota kamu nakash kusal rusot ra Nzamb. (Midimu 17:11) Ashinshikina kamu nawamp Mukand wa Nzamb mulong wa kutesh sens rusot ra Nzamb, chom chela kuyikwash kumekesh rukat rau mu yisal ya kuziyil.

11. Kumukat Nzamb nich muchim wetu wawonsu, manangu metu mawonsu, mupim wetu wawonsu, ni usu wetu wawonsu kurumburikin ik?

¹¹ Mudi mwalonday Yesu, kumukat Nzamb kwitin muchim wetu wawonsu, manangu metu mawonsu, mupim wetu wawonsu, ni usu wetu wawonsu. (Mako 12:30) Rukat mudi riner ridiokiling mu muchim—mudia yitongijok yetu, kusot kwetu, ni yitongijok yin kamu ya mukach—ni tusotin kamu nakash kumusangaresh Yehova. Tumukatining kand Yehova nich manangu metu. Kwipan kwetu kudiap kwa wimputames; twashikedin ku kumwijik Yehova—ngikadil yend, yijidik yend, ni ntong jend. Tukat kusadil mupim wetu, muntu wetu mwawonsu ni mwom tukweta, mulong wa kumusadil ni kumushiman Nzamb. Ni tukat kusadil usu wetu mulong wa kumusadil.

Mulong wak Tufanyidina Kumukat Yehova?

12. Mulong wak Nzamb utwitin anch tumukata?

¹² Diyingish dimwing ditufanyidina kumukatin Yehova didi anch ndiy utwitin tumekesh ngikadil yend. Nzamb ndiy musul ni chilakej chipandakena cha rukat. Kambuy Yohan wafunda nich ukwash wa spiritu wa Nzamb anch: “Nzamb udi rukat.” (1 Yohan 4:8) Antu ayitanga mu chifu cha Nzamb; atutanga mulong wa kukat. Chakin, ukaleng wa Yehova wengamidin pa rukat. Usotin kusu antu akata kumusadil mulong amukatin ni asotin mutapu wend wa kuyikel utentamina. Chakin kamu, rukat ridi ra usey chakwel kwikal chisambu ni chovu mu yawonsu yatangay.

13. (a) Mulong wak wayileja in Isarel anch: “Ukamukata [Yehova] Nzamb wey”? (b) Mulong wak choviken anch Yehova atwita anch tumukata?

¹³ Diyingish dikwau dia kumukatin Yehova didi anch tumujikitishin mulong wa yom yatusadilay kal. Vurik yayilejau Ayuda kudi Yesu anch: “Ukamukata [Yehova] Nzamb wey.” Kadingap ni kuyit kumukat Nzamb umwing udia kulemp ni wakad kwijikan. Ading afanyidin kumukat Nzamb wayimekeshina rukat. Yehova wadinga Nzamb wau. Ndiy Nzamb wayidiosha mu Idjibit ni kuyitwal mwi Ngand ya Kushilamu, Ndiy wayilama, ndiy wayikwasha, ni kuyikat, Ndiy kand wayipupa nich rukat. Nlel unou, Yehova udi Nzamb wetu, ndiy wapana Mwanend kwikal difut chakwel tutwisha kwikal nich mwom wa chikupu. Choviken patok anch Yehova atwita tumukata ndiy! Rukat retu chidi chakul ku rukat rend; atwitin kumukat Nzamb utukatina. Rukat retu ridi mulong wa Muntu “wasambisha kutukat etu.”—1 Yohan 4:19.

14. Rukat ra Yehova rifaniken nchik ni ra nvaj mwin rukat?

¹⁴ Rukat ra Yehova mulong wa mangand ridi mudi ra nvaj mwin rukat uyikatina anend. Ap anch adi antu akad kuwanyin, anvaj akweta rukat asadining mudimu nich mushiku mu yirung ya mivu mulong wa kulam anau, ipanining nakash mulong wa kuwanyish maswir ma ku mujimbu ni yom yikwau. Anvaj afundishining, akasikeshining, akwashining, ni kuyipup anau mulong asotin anch anau ikala nich musangar ni aya kurutu. Yom ik yikatau kuchingejin anvaj kudi anau? Asotining anch anau ayikata ni kulam ku muchim yom yikatau kuyilej mulong wa kuwap kwau. Ov, chovikenap anch Tatukwetu uwanyidina udia mwiur achingejina anch tumekesha rukat nich kujikitish mulong wa yawonsu yatusadinay kal?

Tukudishany Rukat Mulong wa Nzamb

15. Rizau ik ra kusambish tufanyidina kusal mu kukudish rukat retu mulong wa Nzamb?

¹⁵ Kand kal tumumanangap Nzamb ap kusu kutesh dizu diend. (Yohan 1:18) Pakwez, utwitin kuta nend urund wa rukat. (Yakob 4:8) Mutapu ik tukutwisha kuta nend urund? Rizau ra kusambish tufanyidina kusal chakwel kumukat muntu kanang chidi bil kumwijik muntu win; chikasiken kumukat muntu utwakad etu kwijik. Yehova uletin Dizu diend, Bibil, chakwel anch tukutwish kwilej piur pend. Chawiy lel chitukasikeshinay Yehova, kusutil ku dirijek diend, kutang Bibil pichuku-pichuku. Bibil ndiy utufundishina piur pa Nzamb, ngikadil yend, untu wend, ni mutapu wend wa kuyisadil antu mu tunan twa mivu. Anch twatongin pa jinsangu jidia mu Bibil, kujikitish kwetu ni rukat retu mulong wendendiy rikez kujimb.—Rome 15:4.

16. Kutongin pa mudimu wa Yesu kukudishin nchik rukat retu mulong wa Nzamb?

¹⁶ Mutapu umwing wa usey mutukutwisha kukudishin rukat retu mulong wa Yehova udi kutongin pa mwom ni mudimu wa Yesu. Mwaning, Yesu wamekesha kamu ngikadil ya Tatukwend mu mutapu umwing uwanyidina mu chilik cha kulond anch: “Wanmena kal am wamumen kal Tatuku.” (Yohan 14:9) Ov, riy ramekeshay Yesu pamusangulay mwan kapokal wa mwadiamufu rikupukwinap ku muchim? (Luka 7:11-15) Ov, chisangareshinap kwijik anch ndiy—Mwan a Nzamb ni muntu upandakena kujimb weza kwikalaku—woyisha nich kwikepish yidjatil ya in kwilej end? (Yohan 13:3-5) Ov, chinech chikubachikinap kwijik anch ap anch Yesu wadinga muntu mujim ni mwin manangu nakash kuyipandakanamu antu awonsu, ndiy wadinga piswimp ni antu awonsu, ap anikanch? (Mako 10:13, 14) Anch twatongin nich muchim wa kujikitish yom yiney, tukat kwikal mudi in Kristu afundinau kudi Pita anch: “Wakad kumumanany [Yesu] ni mes men en wamukatany.” (1 Pita 1:8) Anch rukat retu mulong wa Yesu rakul, rukat retu mulong wa Yehova ni rawiy rikukul.

17, 18. Kutongin pa yom ik yimekeshina rukat ra Yehova kukutwisha kukudish rukat retu mulong wend?

¹⁷ Mutapu ukwau tukutwisha kukudish rukat retu mulong wa Nzamb udi wa kutongin pa yom yivud yasalay chakwel anch tusangera mwom—yitang ya ufun, yom yivud yitadila kudia, urund wa rukat nau arund awamp, ni yom yikwau yivud yitwinkina musangar ni mazang. (Midimu 14:17) Anch twilej yivud piur pa Nzamb, tukwikal kand nich mayingish mavud ma kumujikitish mulong wa kuwap ni kupan kwend kupandakena. Tonginap bil yom yawonsu yakusadilay kal Yehova. Ov, umenap anch ndiy ufanyidin kamu rukat retu?

¹⁸ Pakach pa yom yivud yitwinkinay Nzamb padi dilau dia kumusejin mu malembil chisu chawonsu, chitwija anch ‘Mwin kutesh kulembil’ ukat kututesh. (Kuseng 65:2) Yehova wamwinkisha Mwanend mukatish ulabu wa kuyikel ni wa kurumburish. Pakwez, kayinkishap antu akwau, ap Mwanend, ulabu wa kutesh malembil. Uteshining amwinend malembil metu. Kutubangin kwa rukat kutubangidinay Yehova, kutupwitidin piswimp ni ndiy.

19. Kushilamu ik kwa Yehova kutupwitidina kudi ndiy?

¹⁹ Kushinshikin pa yom yiyitudikidinay antu mulong wa machuku ma kurutu, yitupwitidin kand piswimp ni Yehova. Ndiy ukat kushilamu anch ukupwish mayej, runeng, ni rufu. (Kuburik 21:3, 4) Anch antu ayishikij ku kuwanyin, kwikil muntu ap umwing ukeza kunenganan, kuziy, ap mar. Nzal, uzwendj, ni njit yikez kwikalakwap kand. (Kuseng 46:9; 72:16) Divu dikez kwikal paradis. (Luka 23:43) Yehova ukez kulet yiyukish yiney, chidiap mulong ufanyidin kusal mwamu, pakwez mulong utukatin.

20. Yom ik yalonday Moses piur pa usey wa kumukat Yehova?

²⁰ Chawiy lel, kudi mayingish ma usu ma kumukatin Nzamb wetu ni ma kukudishin rukat riner. Ov, ukudandamen kukudish rukat rey mulong wa Nzamb, ni kwitiyij anch atakela mwom wey? Yey ufanyidina kutond. Moses wijika yiyukish ya kukudish ni kulam rukat mulong wa Yehova. Wayileja in Isarel a pasak anch: “Tondany mwom chakwel en ni a majuku men makeza kwez, wez upandany, mu kumukat [Yehova] Nzamb wen, ni mu kuziyil dizu diend, ni kulamatil kudi ndiy. Mwinomu mwawiy mudia mom wen, ni kuvul kwa machuku men mwi ngand yachipay [Yehova] kuyinkish angaken, Aburaham, ni Isak, ni Jakob.”—Kuvurik Yijil 30:19, 20.

Ov, Uvurikin?

• Mulong wak chidia cha usey anch tumukata Yehova?

• Mutapu ik tukutwisha kumekesh anch tumukatina Nzamb?

• Mayingish ik tukweta ma kumukat Yehova?

• Mutapu ik tukutwisha kukudish rukat mulong wa Nzamb?

[Chipich chidia pa paj wa 18]

Yehova umening chakin nich usey yitukutwisha etu awonsu kumekesh—rukat retu

[Chipich chidia pa paj wa 21]

“Wanmena kal am wamumen kal Tatuku.”—Yohan 14:9