Chirumburikina Kumukat Mukwetu
“Ukamukata mukwen mudi ey amwiney.”—MATEU 22:39.
1. Mutapu ik tukata kumekesh anch tumukatin Nzamb?
YOM IK yisotinay Yehova kudi antu amwifukwidila? Yesu waleta chakul ku chipul chinech mu mazu mamwing makemp ni makweta usey. Ndiy walonda anch, chijil chipandakena kujimb chidi kumukat Yehova nich muchim wetu wawonsu, nich mupim wetu wawonsu, nich manangu metu mawonsu ni usu wetu wawonsu. (Mateu 22:37; Mako 12:30) Mudi mutapu twamanang mu mutu wa mulong watakelang, kumukat Nzamb kwitin kumuziyil ni kulam yijidik yend mulong wa rukat ritukatinay etu. Kudi antu amukatina Nzamb, kusal rusot rend chidiap chisend chilimina; pakwez kukat kuyiletin musangar.—Kuseng 40:8; 1 Yohan 5:2, 3.
2, 3. Mulong wak tufanyidina kushinshikin chijil cha rukat mulong wa mukwetu, ni yipul ik yibudikidinaku?
2 Chijil cha kaad chipandakena kujimb, Yesu walonda anch, chifaniken ni cha kusambish: “Ukamukata mukwen mudi ey amwiney.” (Mateu 22:39) Tukushinshikin katat chijil chinech, ni tuwapidil kuchishinshikin. Chirung tushicha chijiken mulong wa choy, mulad uyimp wa rukat. Pisambinay nich ukwash wa spiritu wa Nzamb piur pa “machuku ma kwisudiel,” kambuy Paul wafunda anch antu kakezap kukatijan, pakwez akez kwikat ayinau, akez kukat nfalang, ni masengan. Avud akez kwikal “in kukis kuwap,” ap mudi mukarumwinau mu Bibil umwing anch, “akez kuburen rukat mulong wa majuku mau.” (2 Timoteu 3:1-4) Yesu Kristu wasambela kulond anch: “Avud . . . akez kupanijan muntu ni mukwau ni kukisijan. . . . Rukat ra avud rikez kutalal zong.”—Mateu 24:10, 12.
3 Pakwez, Yesu kalondap anch rukat ra muntu mwin mwawonsu rikez kutalal zong. Kuding antu ni kukez kwikal pichuku-pichuku antu akata kumekesh mulad wa rukat risotinay Yehova ni rimufanyidina. Antu amukatina chakin Yehova akez kwikasikesh kuyiman antu akwau mudi muyimenay Nzamb. Pakwez, nany mukwetu mwin tufanyidina kukat? Mutapu ik tufanyidina kumekesh anch tumukatin mukwetu? Bibil ukutwish kutukwash kwakul ku yipul yiney ya usey.
Mukwetu Mwin Nany?
4. Kukwatijan nich In Levi shapitre wa 19, anany afanyidinau kukat kudi Ayuda?
4 Pamulejay Mufaris anch chijil cha kaad chipandakena kujimb chadinga kumukat mukwau muntu mudi amwinend, Yesu wading ni kwisambin chijil chijikena chayinkau in Isarel. Chidi chijil chifundinau mu In Levi 19:18. Mu shapitre ndiy winou umwing, ayileja Ayuda anch afanyidin kuyiman antu akwau akad kwikal in Isarel mudi amutej nau. Verse wa 33 ulondil anch: “Mulong mweny ushicha ni yenen ukez kwikal kudi en mudi mwin ngand. Ukez kumukatany mudi ayinen, mulong ni yen wadingany aeny mwi ngand ya Idjibit. Am nidi Yehova Nzamb wen.” Chawiy lel, ap antu akad kwikal Ayuda, nakash kamu in kwilej a michid yikwau, adinga ni kuyisadil nich rukat.
5. Mutapu ik wateshau Ayuda kurumburik kwa rukat ra mukwau?
5 Pakwez, amakurump a Ayuda a pa chirung cha Yesu, adinga ni kutong mutapu windjing. Amakurump amwing a Ayuda afundishanga anch mazu “murund” ni “mukwen” madi ma kusadil kusu kudi Ayuda. Chading chifanyidin kuyikis antu akad kwikal Ayuda. Alej inay adinga ni kutong anch antu amwifukwidila Nzamb afanyidin kuyikis antu akad kumwifukwil. Mukand umwing ulondil anch: “Mu mwikadil wa mutapu winou, chading chikasiken kupwish rukis. Ading ni kukasikeshin nakash rukis.”
6. Yom ik yaad yafundishay Yesu pisambinay rukat ra mukwetu?
6 Mu Mafundish mend ma pa Mukandu, Yesu wisambina mulong winou, walejana nany ufanyidinau kukat. Ndiy walond anch: “En akulejanya kal anch: ‘Mukata ukukatila ey, mukisa ukukisina ey.’ Pakwez katat nakulejany kal anch, yikatany akankuny nen, yilembidilany akata kukuzengolany en. Mwamu ukez kwikalany an a Tatukwen udia mwiur. Mulong ndiy ukat kupan muten watangay kuyimunyikin antu ayimp ni antu awamp kwakad kasolikany. Ukat kunakish kand ruvul kunakin kudi antu in kusal nawamp ni in kusal nayimp.” (Mateu 5:43-45) Yesu wafundisha pinap yom yaad. Cha kusambish, Yehova udi mwin kupan ni muntu muwamp kudi antu awamp ni kudi antu ayimp. Cha kaad, tufanyidin kulondul chilakej cha Nzamb.
7. Dilejan ik twilejidina ku chishimu cha mutej mwin Samaria?
7 Dichuku dikwau, mulej wa yijil umwing wamwipula Yesu anch: “Mukwetu mwin nany?” Yesu wamwakula mu kushimunin chishimu chishimunina mwin Samaria watana muntu, mwin Yuda, wabulau kudi aij, amutambul yom yend yawonsu. Ap anch Ayuda kadingap ni kwovijan nau in Samaria, mwin Samaria wamukasa pa yitat yamutapolau, wamutwal ku chikumbu cha kulal aeny, kwinikwa kwawiy kwamulaminau. Dilejan ik twilejidinaku? Rukat tumukatina mukwetu rifanyidinap kusu kwimen padi antu a muchid wa kwolikwetu, a muchid wetu, ap a relijon wetu.—Luka 10:25, 29, 30, 33-37.
Chirumburikina Kumukat Mukwetu
8. Yom ik yilondila In Levi shapitre wa 19 piur pa mutapu ufanyidina kumekesh rukat?
8 Kumukat mukwetu, mudi kumukat Nzamb, yidiap kusu yovil; pakwez kwitin yisal. Chidi cha ukwash kushinshikin yafundinau chijil chidia mu In Levi shapitre wa 19, chijil chiyikasikeshina antu a Nzamb kumukat mukwau mudi ayinau. Tutangin mu chijil anch in Isarel ayileja kuyishil atuzwendj ni aeny mbil ya kupupurol ya kwangul. Kwadingap wij, makasu, ap kulond makasu kudi muntu ni mukwau. Mu milong ya kurumburish in Isarel kadingap kafanyidina kumekesh kasolikany. Ap anch ading afanyidin kumukand muntu pichadinga chiswirikena, ayileja kamu patok anch: “Kangal wez wamutekil mwanamakwey rukuny mu muchim wey.” Yijil yiney ni yikwau yivud ayiteka mu wiswimp mu mazu malondwila am: “Ukez kumukat mukwen mudi ey amwiney.”—In Levi 19:9-11, 15, 17, 18.
9. Mulong wak Yehova wayileja in Isarel kushal iyaurila ni michid yikwau?
9 Ap anch in Isarel afanyina kuyikat antu akwau, awiy ading afanyidin kand kwiyauril ni antu adinga ni kwifukwil anzamb a makasu. Yehova wayibabesha piur pa ubaj ni yibudikin yiyimp ya urund uyimp. Chilakej, piur pa michid yading yifanyidinau kwopat kudi in Isarel, Yehova walonda anch: “Kangal wez watijanany nau, kangal wez watishany anen amband kudi anau amakundj, ap anen amakundj kangal ez ayat anau amband. Chamwamu awiy akez kuyipumbul anen amakundj kulik kwinlondul am chakwel asadil akish au. Chad Yehova ukez kukwovilany en ujim, wakusheshany kamu swa.”—Kuvurik Yijil 7:3, 4.
10. Ov, anany tufanyidina kand kubabel?
10 Chawiy chimwing, in Kristu alikining kuta urund nau antu akutwisha kuziyish ritiy rau. (1 Korint 15:33) Atubabeshin anch: “Kangal wabombakanany nau antu akad ritiy,” antu akad kwikal mu chikumangen cha Ukristu. (2 Korint 6:14, MM) Chikwau kand, ayiyudil in Kristu kwatijan “mu Mwant.” (1 Korint 7:39) Pakwez, tufanyidinap ap pakemp kuyikis antu akad kuta urund ni Yehova mudi etu. Kristu wayambata akayitil, ni avud adinga ni kusal pasak yom yiyimp akarumuna mwom wau ni ichakwisha kudi Nzamb.—Rome 5:8; 1 Korint 6:9-11.
11. Wisu mutapu upandakena kuwap wa kumekesh anch tuyikatin antu akad kumusadil Yehova, ni mulong wak?
11 Chakwel kumekesh anch tuyikatin antu akad kumusadil Nzamb, kwikil njil yipandakena kuwap mudi kumwimburij Yehova amwinend. Ap anch Nzamb ukisining uyimp, ndiy ukat kumekesh uwamp kudi antu awonsu, wayinkish lel mutapu wa kulik jinjil jau jiyimp ni kutambul mwom wa chikupu. (Ezekiel 18:23) Yehova ‘usotil antu awonsu kukarumuk kudiokal ku yitil yau.’ (2 Pita 3:9) Ndiy usotil anch “antu awonsu apanda ni kwijik uyakin.” (1 Timoteu 2:4) Chawiy chayituminay Yesu in kwilej end kuya ni kulejan ni kufundish ni ‘kuyikadish antu a michid awonsu in kwilej.’ (Mateu 28:19, 20) Mu kusal mudimu wetu, tukat kumekesh anch tumukatin Nzamb ni mukwetu, mwaning, ap akankuny netu!
Kuyikat Akadivar Netu in Kristu
12. Yom ik yafunday kambuy Yohan piur pa kuyikat akadivar netu?
12 Kambuy Paul wafunda anch: “Chawiy lel pachidia muten tuyisadilany antu awonsu nawamp, tupandikesh kuyisadil in ritiy retu nawamp.” (Galatia 6:10) Etu in Kristu, tufanyidin kuyikat anamakwetu in ritiy—akadivar nau anambaz mu spiritu. Rukat riner rikwet usey ik? Pisambinay mulong winou ujim, kambuy Yohan wafunda anch: “Mwawonsu ukumukisa mwanamakwend udi kayaj mpongarik . . . Anch muntu walond anch, Am nimukatil Nzamb, umukisil mwanamakwend, ndiy udi mukamakasu; mulong ndiy wakad kumukat mwanamakwend umenayiku ni mes, kakutwiship kumukat Nzamb wakad kumanay ku mes.” (1 Yohan 3:15; 4:20) Mazu minam madi mazu makash. Yesu Kristu wasadila mazu “kayaj mpongarik” ni “mukamakasu” padiay Satan Djabul. (Yohan 8:44) Tusotinap ap pakemp anch eza asadila mazu minam padi etu!
13. Mutapu ik tukutwisha kumekesh anch tuyikatin ambay netu mu ritiy?
13 In Kristu akin ‘ayilejin kal kudi Nzamb kukatijan umwing ni mukwau.’ (1 Tesalonika 4:9) Tufanyidinap kukatijan “mu mazu kusu ap mu jindim, pakwez ching mu midimu ni yakin.” (1 Yohan 3:18) Rukat retu rifanyidin rikal “rakad kubabek.” (Rome 12:9) Rukat rikat kutubachik kwikal adimukina, kwikal ni riy, kulikishin, ni kushimpish muchim, kulik kwikal ni mukau, kulik kwibaz, kulik kwishimek, ap kwitong. (1 Korint 13:4, 5; Efesus 4:32) Rukat rikat kutubachik ‘kukwashijan muntu ni mukwau.’ (Galatia 5:13) Yesu wayileja in kwilej end kukatijan umwing ni mukwau mudi mwayikatay. (Yohan 13:34) Chawiy lel mwin Kristu ufanyidin kusot ap kupan mwom wend mulong wa kuyambat ambay nend mu ritiy pichifanyidina.
14. Mutapu ik tukutwisha kumekesh rukat mu dijuku?
14 Rukat rifanyidin kand kumekan cha kusambish mu dijuku dia Ukristu pakampwil pakach pa ikundj ni mukajend. Urund wa mu uruw udi wa piswimp nakash, ni Paul walonda anch: “Chawiy mwamu amakundj ni yau ayikata akajau mudi mijimbu yau ayinau.” Walonda kand anch: “Mwawonsu umukatila mukajend ndiy wikatil amwinend.” (Efesus 5:28) Tumen anch Paul uchirikidin chiyul chinech mu maverse matan malondwila. Ikundj umukatina mukajend kakezap kuyimburij in Isarel a pa chirung cha Malakiy ajipa kushilamu kwau nau akajau. (Malakiy 2:14) Ukez kumukat mukajend. Ukez kumukat mudi Kristu chakatay chikumangen. Rukat rikez kumubachik kand ngachik kumulimish nfumwend.—Efesus 5:25, 29-33.
15. Rukat ra akadivar ramanau rayibachikin antu amwing kulond ik ni kusal ik?
15 Choviken patok anch, mulad winou wa rukat chidi chijingidij cha in Kristu akin. Yesu walonda anch: “Ku chinech kwawiy kukwijikinau antu awonsu anch en udiany in kwilej amam anch wakatijanany.” (Yohan 13:35) Kukatijan kwetu muntu ni mukwau kukat kuyipwitin antu kudi Nzamb tukatina ni utumekeshina. Chilakej, tutambwil kudiokal ku Mozambique rapor unou piur pa dijuku dimwing dia Atuman. “Kand kal tumanap chom mudi chinech. Pa muten wa urel, rinkind mukash wasambisha kutut kupwa kwasambisha kunak ruval umwing mujim wa mayal. Rinkind winou mukash wasenda musong wa chikumbu, ni malat. Akadivar netu adinga mu yikumangen ya piswimp chateshau eza ni atukwasha kutungiril chikumbu, amutej netu ashimoka alond anch: ‘Relijon wen udi muwamp nakash. Kand kal tutambulangap ukwash mudi winou ku chikumbu chetu cha kulembil.’ Twaburila Bibil ni kuyilej Yohan 13:34, 35. Amutej netu avud ilejin katat Bibil.”
Kuyikat Antu
16. Kushalijan ik kudia pakach pa kukat chisak cha antu ni kuyikat antu?
16 Chikasikenap kuyikat amutej netu awonsu, mudi chisak. Pakwez, kuyikat antu kukasikening. Chilakej, rukat ra antu amwing riyikatinau nich amutej nau rikat kwimenang kusu pa kuyinkish yom ya ku mujimbu kusutil ku yirijek kanang ya kupan ukwash. Chakin, chiswapel kamu nakash kulond anch tumukatin mukwetu kupandakanamu kumukat mbay netu a mudimu wakad kutubangin, muntu wa muchim uyimp udia piswimp netu, ap murund waturumbukina.
17, 18. Mutapu ik wamekeshay Yesu anch uyikatin antu, ni yom ik yamubachika kusal mwamu?
17 Mu mulong winou wa kuyikat antu, tuwilejidin kudiay Yesu, muntu wamekesha mutapu uwanyidina ngikadil ya Nzamb. Ap anch weza panap pansh mulong wa kudiosh chitil mu mangand, ndiy wayikata antu—mband uyedina, mwin musong wa mak, ni mwan. (Mateu 9:20-22; Mako 1:40-42; 7:26, 29, 30; Yohan 1:29) Chawiy chimwing, tukat kumekesh anch tumukatin mukwetu mu mutapu tukata kushakam nau antu tukata kusankan dichuku ni dichuku.
18 Pakwez, tufanyidinap kuvuramen anch kumukat mukwetu akukasidin ku kumukat Nzamb. Ap anch Yesu wayikwasha atuzwendj, wayerila ayej, ni kuyidish antu adinga ni nzal, rutong rend mu kusal yom yawonsu yiney ni kuyifundish antu radinga ra kuyikwash antu kuchakwish ni Yehova. (2 Korint 5:19) Yesu wasala yom yawonsu mulong wa uyaj wa Nzamb, kavuramenap ap pakemp anch wadinga ntimesh wa Nzamb wamukata. (1 Korint 10:31) Niyetu anch twalondul chilakej cha Yesu, tukutwish kumekesh rukat rakin ra mukwetu ni pa chisu chawiy chimwing kushal iyaurila ku mangand ma antu ayimp.
Mutapu ik Tukumukata Mukwetu Mudi Ayinetu?
19, 20. Kumukat mukwetu mudi ayinetu kurumburikin ik?
19 Yesu walonda anch: “Ukamukata mukwen mudi ey amwiney.” Choviken anch twibangina ayinetu ni kwilamin kalimish ketu. Anch kimwawiyap chading, ing chijil chinech chelangap kurumburik chom. Kwikat kwinoku kudiap kwa kubombakesh nich rukat ra kwitongin risambidinau kudi Paul mu 2 Timoteu 3:2. Pakwez, kadi kalimish kisikena kilamidinay muntu. Mwin kwilej umwing wa milong ya Bibil warumburila anch rukat riner “ridi rukat risikena rikatinay, ridiap ra kulond anch ‘Nidi mujim’ ap ‘Nidi mukemp.’”
20 Kuyikat antu akwau mudi mutwikatina ayinetu kurumburikin anch kuyiman antu akwau mutapu tusotina anch atumana ni kuyisadil antu akwau mutapu tusotina anch atusadila. Yesu walonda anch: “Chawiy yom yawonsu yiwovilany ing antu akusadilangany en, ni yen yisadilany kand mwamu awiy.” (Mateu 7:12) Tal anch Yesu kalondap anch tufanyidin kutongin bil yatusalau kudi akwetu pasak ni kuyisadil mutapu watusalau. Pakwez, tufanyidin kutongin mutapu tusotila anch atusadila ni kusal kwambatan nich. Tal kand anch, Yesu kimikinap kusu mazu mend kudi arund netu ap akadivar netu. Ndiy wasadila dizu “antu,” pamwing ap mulong wa kumekesh anch tufanyidin kuyisadil antu awonsu, muntu mwin mwawonsu tukusankana mutapu winou.
21. Anch twayikat antu akwau, yom ik tumekeshina?
21 Kumukat mukwetu kukez kutuking ku kusal yom yiyimp. Kambuy Paul wafunda anch: “Mulong yijidik yiney: ‘Kangal wasotan, Kangal wajipan, Kangal wiy, Kangal wov ris,’ ni anch kudi kand yijidik yikwau, yawonsu ayibombakeshidil pamwing mu dizu ed anch: ‘Ukamukata mukwen mudi ey amwiney.’ Rukat kirukusalangip nayimp kudi mukwau.” (Rome 13:9, 10) Rukat rikez kutubachik kukimb mutapu wa kuyisadin antu akwau yom yiwamp. Anch twayikat akwetu antu, tukat kumekesh anch tumukatin kand wamutanga muntu mu chifu chend, Yehova Nzamb.—Disambishil 1:26.
Mutapu ik Ukwakula?
• Nany tufanyidina kukat, ni mulong wak?
• Mutapu ik tukutwisha kumekesh anch tuyikatin antu akad kumusadil Yehova?
• Bibil urumburil nchik piur rukat tufanyidina kwikal nich mulong wa akadivar netu?
• Kumukat mukwetu mudi ayinetu kurumburikin ik?
[Chipich chidia pa paj wa 24]
“Mukwetu mwin nany?”
[Chipich chidia pa paj wa 27]
Yesu wayikata antu