Ov, Ukez “[Kw]endilany Ku spiritu”?
“Endilany ku [s]piritu, kangal kulondulanyip maku ma mujimbu.”—GALATIA 5:16.
1. Ov, mutapu ik ukupwa wom wa kumusadin chitil spiritu?
KUDI mutapu wa kupwish wom wa kumusadin chitil spiritu utumbila. Chitwishikin ku kusal yalonday Paul anch: “Endilany ku [s]piritu, kangal kulondulanyip maku ma mujimbu.” (Galatia 5:16.) Anch twalikidil spiritu wa Nzamb atutakela, maku mayimp ma mujimbu makezap kutupandakan.—Rom 8:2-10.
2, 3. Anch twendil mu spiritu, ukwikal ni usu ik mu mwom wetu?
2 ‘Pitwendidina ku spiritu,’ usu wa kusadish wa Nzamb ukez kutubachik tumuziyila Yehova. Tukumekesh ngikadil ya Wi-Nzamb mu mudimu wetu wa kulejan, mu chikumangen, ku chikumbu, ni kwi ndond yin yawonsu yitukutwisha kwikal. Dibuj dia spiritu dikez kumekan patok mu mashakamin metu ni mbay netu a uruw, an etu, ambay netu akaritiy, ni antu akwau.
3 Kwikal aom “mu mupim mudi mudiay Nzamb” kukat kututwishish kulik chitil. (1 Pita 4:1-6) Anch spiritu ututakedil, tukezap chakin kamu kusal chitil chakad kulikishin. Mu jinjil ik jikwau jiwamp mukeza kwikal nich spiritu usu mu mwom wetu anch twadandamen kwendil mu spiritu?
Ikalany Piswimp ni Nzamb ni Kristu
4, 5. Ov, mutapu ik kwendil ku spiritu kukwet usu pa yitongijok yetu piur pa Yesu?
4 Mulong tukat kwendil ku spiritu utumbila, tukutwish kwikal nich urund wa piswimp ni Nzamb ni Mwanend. Pafunday piur pa yipan ya mu spiritu, Paul wayileja ambay nend akaritiy a mu Korint anch: “Nakwijikishany [in kwifukwil akish a pasak] chakwel pikil muntu ulondilang mu [s]piritu wa Nzamb ukutwish kumushing Yesu; ni pikil muntu ukutwish kulond anch, Yesu ndiy Mwant, ching walondil mu [s]piritu [u]tumbila.” (1 Korint 12:1-3) Usu wawonsu ukata kuyibachik antu amushinga Yesu udiokil kudi Satan Djabul. Mudi in Kristu endidila ku spiritu utumbila, pa chinech, tukwet kashinsh anch Yehova wamuvumbula Yesu ni kumutek piur pa yitang yawonsu. (Filip 2:5-11) Twitiyijin mu difut dia yakupesh ya Kristu ni tumwitiyijin Yesu mudi mwant watekau piur petu kudi Nzamb.
5 Antu amwing alondanga anch adi in Kristu mu mivu chitot ya kusambish ya mu Chirung Chetu kitiyap anch Yesu weza mu mujimbu wa mbij. (2 Yohan 7-11) Kwitiyij chitongijok chinech cha makasu kwayisala antu amwing alika malejan makin piur pa Yesu, Mesia. (Marko 1:9-11; Yohan 1:1, 14) Kwendil ku spiritu utumbila kutukwashin kwipuk kuwil mu kupumbwok kwinoku. Pakwez, ching anch twacha ku mes mu spiritu chawiy lel tukutwish kudandamen kutambul ranaken ridimukina ra Yehova ni “kwendil mu yakin.” (3 Yohan 3, 4) Chawiy lel, tukwatany amboku mupak wa kulik kupumbwok kwawonsu chakwel tulama urund wa piswimp ni Tatukwetu wa mwiur.
6. Ov, spiritu wa Nzamb usongishining ngikadil ik mudi antu endidila ku spiritu?
6 Paul wajimbula kwifukwil akish kwa kupumbwok ni kwaurok pamwing nich “[midimu] ya mbij” mudi kusotan ni kwend masandj. Pakwez warumburila anch: “Awiy adia a Kristu Yesu ayipampil kal mbij nich ris ni maku mau. Anch twashakamin mu [s]piritu, lik twendil kand mu [s]piritu.” (Galatia 5:19-21, 24, 25) Ov, spiritu wa Nzamb usongishining ngikadil ik mudi antu ashakamina ni kwendil ku spiritu? Paul wafunda anch dibuj dia spiritu didi: “rukat, musangar, chisambu, kushimpish muchim, kudimuk, kuwap, kujijaman, kwitudish, kwishitul.” (Galatia 5:22, 23) Katat tushinshikinany amboku mikadil yiney ya dibuj dia spiritu.
Katijanany “Muntu ni Mukwau”
7. Rukat chom ik, ni yisu mikadil yau yimwing?
7 Rukat—umwing wa mikadil ya dibuj dia spiritu—Riyiling yisu yivud pamwing nich yovil yikash ya rukat ni muchim wa kuyibangin antu akwau, pamwing nich urund wa piswimp ni antu akwau. Bibil ulondin anch: “Nzamb udi rukat” mulong udi mu chitangil chakin kamu mwikadil winou. Rukat rijim ra Nzamb ni ra Mwanend rayikatau antu rimekedin mu difut dia yakupesh ya Yesu Kristu. (1 Yohan 4:8; Yohan 3:16; 15:13; Rom 5:8) Chitudia in kwilej a Yesu, twijiken kusutil ku rukat tukatijadina muntu ni mukwau. (Yohan 13:34, 35) Chakin kamu, atwinkishin mbil ya “kukatijan muntu ni mukwau.” (1 Yohan 3:23) Kupwa Paul walonda anch rukat rikat kushimpish muchim, ni ridimukin. Kirikwetingap mukau, kirikat kufunyip arinau, kirikat kwisadilangip yom ya ukwash arinau, kirikat kwisotilingip yom yau irinau. Kirikusulangip muchim ni kirikatap kumulaminang muntu kuyip. Kirikat kusangarap mu yom yipengamina, pakwez rikat kusangar mu uyakin. Rukat rikat kusend yom yawonsu, rikat kwitiy kwau yom yawonsu, rikat kuchingej kwau yom yawonsu, rikat kujamish mu yom yawonsu. Chikwau kand, kirikukanganyangip.—1 Korint 13:4-8.
8. Ov, mulong wak tufanyidin kuyikat ambay netu in kumwifukwil Yehova?
8 Anch twalikidil spiritu wa Nzamb akudisha rukat mudi etu, ngikadil yiney yikez kumekan mu urund wetu pamwing ni Nzamb ni mutej netu. (Mateu 22:37-39) Kambuy Yohan wafunda anch: “Wawonsu wakad kukatan ushich mu rufu. Wawonsu ukumukisa mwanamakwend udi kayaj mpongarik; ni yen wijany kal anch kwikil kayaj mpongarik ukweting mwom wa chikupu mwi ndiy.” (1 Yohan 3:14, 15) Kayaj mpongarik wela kupandishin mwom wend mu musumb umwing wa kwikangin ching anch kadingap nich rukuny nend muntu wajipay. (Kuvurik Yijil 19:4, 11-13) Anch atutakedin kudi spiritu utumbila, tukez kumukat Nzamb, ambay netu in kwifukwil, ni antu akwau.
“Musangar wa [Yehova] Wawiy Usu Wen”
9, 10. Musangar chom ik, ni mayingishin ik mamwing mitukweta ma kutusangaresh?
9 Musangar udi mwikadil wa mazang majim nakash. Yehova udi ‘Nzamb wa musangar’ (1 Timote 1:11; Kuseng 104:31) Mwan usangaredin kusal rusot ra Tatukwend. (Kuseng 40:8; Hebreu 10:7-9) Kupwa “musangar wa [ Yehova] wawiy usu” wetu.—Nehemi 8:10.
10 Musangar wa Nzamb utwinkishining mazang makash pitukata kusal rusot rend ap anch tudi mu mar, tunenganen, ap anch atuzengodil. “Ronganyin ra Nzamb” ritwinkishin musangar mudi ik! (Jinswir 2:1-5) Urund wetu ni Nzamb usangareshina wimedin pa ronganyin rakin ni ritiy mudiay ndiy ni mu difut dia yakupesh ya Yesu. (1 Yohan 2:1, 2) Kwikal mu chisak chimwing chakin kusu cha ukadivar wa pa mangand mawonsu udi musul ukwau wa musangar. (Sofoniy 3:9; Hagai 2:7) Ruchingej retu ra Want ni chisend chijim cha kulejan rusangu ruwamp yitusangareshin. (Mateu 6:9, 10; 24:14) Ruchingej ra mwom wa chikupu rikat ni rawiy kutusangaresh nakash. (Yohan 17:3) Chitukweta ruchingej riner ramushena, tufanyidinany kwizul “nich musangar.”—Kuvurik Yijil 16:15.
Ikalany mu Chisambu ni in Kushimpish Muchim
11, 12. (a) Mutapu ik ukutwisha kurumburil chisambu? (b) Chisambu cha Nzamb chikwet usu ik padi etu?
11 Chisambu—mwikadil ukwau wa dibuj dia spiritu—udi mwikadil wa kushakam zoong pakad yakamish. Tatukwetu wa mwiur udi Nzamb wa chisambu, ni atwinkishin kashinsh anch: Yehova ukuyiyukish “antwend ni chisambu.” (Kuseng 29:11; 1 Korint 14:33) Yesu wayileja in kwilej end anch: “Nakushilany kal chisambu, nikwinkishinany chisambu” cham. (Yohan 14:27, MM) Mutapu ik chisambu chinech chela kuyikwash in kwilej end?
12 Chisambu chayinkishay Yesu in kwilej end chatudisha michim yau ni manangu ni chayipwisha wom. Ikala nich chisambu pakampwil patambulau spiritu utumbila wayikanau. (Yohan 14:26) Ku usu wa spiritu ni mudi chakul cha malembil metu nlel unou, tukwet “chisambu cha Nzamb,” chitudishin michim ni manangu metu. (Filip 4:6, 7) Chikwau kand, spiritu wa Yehova utukwashin kushakam zoong ni mu chisambu ni ambay netu akaritiy ni antu akwau.—Rom 12:18; 1 Tesalonik 5:13.
13, 14. Kushimpish muchim chom ik, ni mulong wak tufanyidin kukumekesh?
13 Kushimpish muchim kuyiling pamwing nich chisambu, kudi kujijaman kwetu mu kushimpish muchim patusarumwinau ap pa kuchingej kuyimp anch mwikadil ukuwap. Nzamb udi mwin kushimpish muchim. (Rom 9:22-24) Yesu niyend wamekesha ngikadil yiney. Tukutwish kutaninamu anch twamwilakej, mulong Paul wafunda anch: “Angovila riy chakwel Yesu Kristu amekesha kushimpish muchim wend pakusambish mu am, chakwel am nikwikal chilik kudi antu awonsu akumwitiyija, akutambul kupand kwa chikupu.”—1 Timote 1:16.
14 Ngikadil ya kushimpish muchim yikat kutukwash kujijaman pakatau antu akwau kutwel ap kutusal yom yiyimp. Paul wayikasikesha ambay nend in Kristu anch: “Shimpishany michim kudi antu awonsu.” (1 Tesalonik 5:14) Etu awonsu tudi akad kuwanyin ni tukat kurumbuk, chakin kamu tusotining anch antu atushimpishina muchim, pitukata kuyirumbukin. El, tusalany amboku usu wa “kushimpish muchim ni musangar.”—Kolosay 1:9-12.
Mekeshany Kudimuk ni Kuwap
15. Rumburil kudimuk, ni let yilakej ya kudimuk.
15 Tumekeshining kudimuk anch twayibangin antu akwau ku mazu mawamp, ma ukwash ni ku yisal yetu. Yehova udi muwamp, ni mwanend mwamu mudingay. (Rom 2:4; 2 Korint 10:1) Atushalapol a Nzamb ni a Kristu afanyidin kumekesh kudimuk. (Mika 6:8; Kolosay 3:12) Ap antu amwing akad kwikal arund a piswimp a Nzamb amekesha “riy ruvud kamu.” (Midimu 27:3; 28:2) Kupwa, tukutwish chakin kamu kumekesh kudimuk anch ‘twadandamen kwendil ku spiritu.’
16. Mikadil ik yimwing yikutwisha kutubachik kumekesh kudimuk?
16 Tukutwish kumekesh kudimuk ap anch tuyingin kwov ujim mulong wa mazu mayimp ma muntu kampand ap mulong wa yisal yakad kalimish. Paul walonda anch: “Anch ukwov ujim kangal wasal chitil; kangal muten wandam ni ujim wey; ap kangal wamushil Satan ndond. Ikalany antu adimukina kudi muntu ni mukwau, likishijadinany mudi chikat kunilikishilau en kudi Nzamb mu Kristu.” (Efes 4:26, 27, 32) Chifanyidin pakampwil kuyidimukin antu arishina nich yoziu. Mwawiy, mukurump mwin Kristu kakutwishap kumekesh kudimuk anch wakangany kupan chiyul chimedina pa Bibil mulong wa kwipuk kumusansesh muntu ku muchim patok mulong anch chamwamu ukulik njil ya “yom yawonsu yiwamp, yitentamina ni yakin.”—Efes 5:9.
17, 18. Mutapu ik urumburilau kuwap, ni ngikadil yiney yikwet usu ik mu mwom wetu?
17 Kuwap kudi ngikadil ya kwikal muntu muwamp, ya chaku chiwamp nakash, ap ngikadil ya kwikal muntu muwamp. Nzamb udi muwamp nakash. (Kuseng 25:8; Zakariy 9:17) Yesu udi muntu muwamp, ni ukwet ngikadil yiwamp nakash. Chikalap nchik mwamu kitiyijap amutazuka anch “muwamp” mudi chijiken pamutazukau anch “Mulej muwamp.” (Marko 10:17, 18) Walika mulong kudi ndiy, Nzamb ndiy muwamp upandakenamu.
18 Chitil chitwaswana chikangeshin ngikadil yetu ya kusal yom yiwamp. (Rom 5:12) Pakwez, tukutwish kumekesh ngikadil yiney anch twamulembil Nzamb chakwel ‘atuleja kuwap.’ (Kuseng 119:66) Paul wayileja ambay akaritiy a mu Rom anch: “Anamakwam, ni yam amwinam nitiyil anch en wizwilany ni kuwap, izulany ni ronganyin rawonsu.” (Rom 15:14) Kalam mwin Kristu ufanyidin kwikal mwin “kukat yom yiwamp.” (Titus 1:7, 8, MM) Anch spiritu wa Nzamb ututakedil, tukez kwijikan mulong wa kuwap, ni Yehova ukez ‘kutuvurik mulong wa yom yiwamp yitwasala.’—Nehemi 5:19; 13:31.
“Ritiy Rakad Kubabek”
19. Ritiy chom ik, kwambatan ni Hebreu 11:1.
19 Ritiy—ni rawiy ridi chibar cha dibuj dia spiritu—“ritiy rawiy kushinshik kwa yom ya ruchingej, ni kwitiyil kwa yom yakad kumekan ku mes.” (Hebreu 11:1) Anch tukwet ritiy, tukwikal nich kashinsh anch chom chawonsu chakanay Yehova chakin chikusadik. Uman wa yom ya kashinsh yakad kumekan udi ukash mu chilik chakwel anch ritiy ridi uman wa patok. Mulong kwikalaku kwa yom yatangau kutulejin patok anch kudi Sakatang. Ritiy ra mutapu winou rawiy tufanyidina kumekesh anch twadandamen kwendil ku spiritu.
20. ‘Chitil ik chikutupwakesha ni kutuziyish,’ ni mutapu ik tukutwisha kuchipuk ni kwipuk midimu ya mbij?
20 Kuburen ritiy chidi ‘chitil chikutupwakesha kutuziyish.’ (Hebreu 12:1) Tufanyidin kwikamen pa spiritu wa Nzamb chakwel twipuka midimu ya mbij, kusot kupit, ni malejan ma makasu makata kushesh ritiy. (Kolosay 2:8; 1 Timote 6:9, 10; 2 Timote 4:3-5) Spiritu wa Nzamb usongishin ritiy mu atushalapol a Yehova a katat mudi radingau nich atuman a pa chirung cha kurutu kwa Ukristu ni antu akwau isambinau mu Bibil. (Hebreu 11:2-40) Ni “ritiy [retu] rakad kubabek” rikutwish kukasikesh ritiy ra antu akwau.—1 Timote 1:5; Hebreu 13:7.
Mekeshany Kwitudish ni Kwilam
21, 22. Kwitudish akurumburil mutapu ik ni mulong wak tufanyidina kwitudish?
21 Kwitudish chidi chaku chiwamp, udi mwikadil witudishina. Kwitudish kudi pakach pa ngikadil ya Nzamb. Tuchij mulong Yesu, wading muntu umwing witudishina, ni wamekesha mu mutapu uwanyidina untu wa Yehova. (Mateu 11:28-30; Yohan 1:18; 5:19) Chad lel, chom ik chitwitinau etu atushalapol a Nzamb?
22 Chitudia in Kristu, tufanyidin ‘kwitudish kudi antu awonsu.’ (Titus 3:2) Twitudishining mu mudimu wetu wa kulejan. Antu awanyishina yitinau ya mu spiritu ayikasikeshin kumuchirish mwin Kristu washadikina “mu muchim wa kwitudish.” (Galatia 6:1) Etu awonsu tukutwish kukwash chakwel kwikal uumwing wa Ukristu ni chisambu kusutil ku kumekesh “kwikepish kwawonsu ni kwitudish.” (Efes 4:1-3) Tukutwish kumekesh kwitudish anch twadandamen kwendil ku spiritu ni kwilam.
23, 24. Kwilam chom ik, ni kutukwashining nchik?
23 Kwilam kutukwashin kushinshikin nawamp yitongijok yetu, kulond kwetu, ni yisal yetu. Yehova ‘kayakulap antwend’ pasheshau Yerusalem kudi in Babilon. (Isay 42:14) Mwanend ‘watushila chilakej’ cha kwilam padingay mu mar. Kambuy Paul wayiyula ambay nend in Kristu ‘awejina ku ronganyin rau kwilam ayinau.’—1 Pita 2:21-23; 2 Pita 1:5-8.
24 Amakurump in Kristu afanyidin kwilam. (Titus 1:7, 8) Chakin kamu, awonsu atakedilau nich spiritu utumbila akwilam chawiy lel akutwish kwiyep masandj, masal, ap chom chawonsu chikutwisha kushikij ku kuburen kwitiyik kudi Yehova. Anch twalikidil spiritu wa Nzamb amekesha kwilam mudi etu, kukez kumekan kudi antu akwau mu kulond kwetu kuwamp ni mu yisal yetu.
Dandamenany Kwendil ku Spiritu
25, 26. Kwendil ku spiritu kukwet usu ik pa urund wetu wa katat ni ruchingej retu ra kurutu?
25 Anch twadandamen kwendil ku spiritu, tukwikal in kulejan Want akweta mushiku. (Mudimu 18:24-26) Tukwikal arund asangareshina, ni pakampwil antu ipanina kudi Nzamb akez kusanger urund wetu. Mudi antu atakedilau kudi spiritu utumbila, tukez kand kwikal misul wa dikasikesh dia mu spiritu kudi ambay netu amwifukwidila Yehova ni kuyikwash endila ku spiritu. (Filip 2:1-4) Oku, mwamu musotilau kwikal in Kristu awonsu?
26 Mu mangand minam matakedinau kudi Satan, chiswapelap kwend ku spiritu. (1 Yohan 5:19) Chikalap nchik mwamu, mamiliyon ma antu akat kwendil nlel unou ku spiritu. Anch twamukumangen Yehova ni muchim wetu wawonsu, tukez kasanger mwom katat ni tukutwish kudandamen kwendil chikupu ni chikupu mu jinjil jitentamina ja Mwin kupan spiritu utumbila ukweta rukat.—Kuseng 128:1; Jinswir 3:5, 6.
Ov, Ukwakula Nchik?
• “Kwendil ku spiritu” kukwet usu ik pa urund wetu ni Nzamb ni Mwanend?
• Ngikadil ik yidia dibuj dia spiritu utumbila?
• Jisu jinjil jimwing jitufanyidina kumekeshin dibuj dia spiritu wa Nzamb?
• Kwendil ku spiritu kukwet usu ik pa mwom wetu wa katat ni pa ruchingej retu ra kurutu?
[Chipich chidia pa paj wa 13]
Mekeshany kudimuk kusutil mazu ni yisal yiwamp