Yipul ya in Kutang

Ov, mikadil yisambidinau mu mukand wa Galatia 5:22, 23 yawiy kusu kwau yikunku ya ‘dibuj dia spiritu’?

Maverse minam majimbwil kwau mikadil chidivu ya win Kristu: ‘Dibuj dia spiritu didi rukat, musangar, chisambu, kushimpish muchim, kudimuk, kuwap, ritiy, kwitudish, ni kwilam.’ Pakwez, tufanyidinap kutong anch yawiy kwau yiney mikadil yiwamp yikutwishay spiritu wa Nzamb kutukwash kukudish.

Mulong wak? Mulong kurutu kambuy Paul ajimbula dibuj dia spiritu, wafunda anch: “Yisalijok ya wuntu . . . yidi usund, ni kwimik dis, ni upwepu ni kwifukwil akish, ni ulaj, ni rukuny, ni matend, ni mukau, ni ujim, ni ris, ni kwaurok, ni kupompatijan, ni kukisan, ni kukwachik maruvu, ni kwipep, ni yom yikwau yiyimp mudi yiney.” (Gal. 5:19-21) Chawiy kwading yom yikwau yafanyinay kujimbul Paul yidia pakach pa “yisalijok ya wuntu,” mudi yisambidinau mu Kolosay 3:5. Chilik chimwing, kupwa kwa kujimbul mikadil yiwamp chidivu, walonda anch: ‘Kwikil chijil pa yom mudi yiney.’ Chawiy Paul kajimbulap mikadil yawonsu yiwamp tukutwisha kukudish kusutil ukwash wa spiritu utumbila.

Chinech chimeken patok anch twafanikesh dibuj dia spiritu nich yom yafunday Paul ku chikumangen cha Efes anch: ‘Dibuj dia kutok dikat kulet kuwap kwa mitapu yawonsu, ni kutentam, ni uyakin.’ (Efes 5:8, 9) Mwaning, ‘kuwap,’ pamwing ni kutentam ni uyakin chidi chikunku cha ‘dibuj dia kutok,’ pakwez chidi kand chikunku cha ‘dibuj dia spiritu.’

Chilik chimwing, Paul wamukasikesha Timote “[kusurab] kutentam, ni mwom wa kumulondul Nzamb, ni ritiy, ni rukat, ni [kujijaman, ni kwitudish]”​—mikadil yiwamp musamban. (1 Tim. 6:11) Mikadil yisatu pakach pa mikadil yiney (ritiy, rukat, ni kwitudish) yawiy kusu yijimbwilau mu yikunku ya ‘dibuj dia spiritu.’ Chawiy, Timote wafanyina kand kwikal ni kuswir kwa ukwash wa spiritu mulong wa kukudish mikadil yikwau yijimbwilau mudi: kutentam, mwom wa kumulondul Nzamb, ni kujijaman.​—Ilakej ni Kolosay 3:12; 2 Pita 1:5-7.

Chawiy, chidiap anch Galatia 5:22, 23 ujimbwil mikadil yawonsu ya win Kristu tufanyidina kukudish. Spiritu wa Nzamb ukutwish kutukwash kukudish yikunku chidivu yifundinau mudi ‘dibuj dia spiritu.’ Pakwez kudi mikadil yivud tufanyidina kukudish mulong wa kukul mu spiritu ni ‘kudjal wuntu usu watangau mudi mudia rusot ra Nzamb mu kutentam ni kushinshaman kwakin.’​—Efes 4:24.