Ov, “Testament Mukur” Uchidi Ni Usey?

MU MUVU wa 1786 dokter umwing wa mu France wapalangesha buku wapilay anch Traité d’anatomie et de physiologie (Minsamb ya Dilejan dia Mujimbu ni Kusal kwa Yid). Buku winou amumen anch udi buku wa dilejan dia mijir dia pa chisu chend, ni buku umwing wa pakampwil walandishau piswimp madolar tunan 27! Chikalap nchik mwamu, ayej akemp kusu ilel akutwisha kumuchingejin dokter wengamidina pa buku winou mukur wa yikimbijol ya chimwingang. Rusangu ni usey wa buku winou yitwishinap kumukwash muyej ilel.

Mwamu mutonginingau antu avud piur pa chijimbwilingau anch Testament Mukur. Asangaredin jinsangu jidiamu ja rusangu ra in Isarel ni kusanger mutapu uwamp wamufundau. Pakwez, akat kwidjidjek anch chidi cha manangu kulondul umutakel udiamu wasadila kal mivu 2 400 ni kusut. Ronganyin ra siyans, ra winsak, ni ra mwom wa dijuku yishalijadin nakash ilel ni mutapu radinga pa chisu chafundau Bibil. Philip Yancey, mwin kufund wa pasak wa buku Christianity Today (Ukristu W’ilel), wafunda mu buku wend The Bible Jesus Read (Bibil Watangay Yesu) anch: “Yikunku yawonsu ya Testament Mukur yovikeningap nawamp kurumburik, ni yin yovikena yikat kuyijimesh antu ilel. Mulong wa mayingish minam ni makwau, Testament Mukur, udi yikunku yisatu pa yinying ya Bibil, kayitanginingap chisu chivud.” Yitongijok yiney yidiap ya katat.

Piswimp mivu 50 kwinyim kwa rufu ra kambuy Yohan mu muvu wa 100 Chirung Chetu, Marcion, nsand umwing mpich walejana patok anch in Kristu kafanyidinap kulondul Testament Mukur. Kukwatijan nend mwin kwilej jinsangu ja pakur Robin Lane Fox mwin Angleterre walonda anch “mu Testament Mukur ‘Nzamb’ wadinga ‘kabaj’ wadinga ni kuyikwash in kujiril yijil ni in kujipan mudi Mwant David mwin Isarel. Pakwez, Kristu, wadinga Nzamb musu wa piur nakash ushalijadina ni Nzamb wa mu Testament Mukur.” Fox ufundil anch yitiyij yiney “yikala ‘ya in Marcion’ ni yadandamena kupwit in kwilej, pakampwil Kwingangel kulondiningau Chisiriak, pasak mu chitot cha kanying.” Djat ni katat antu amwing achitiyijin yitiyij yiney. Mudi chibudikin, kwinyim kwa mivu 1 600 ni kusut, Philip Yancey ufundil anch, “ronganyin ridia mu Testament Mukur rishadikin swa mukach mwa in Kristu ni chakin kamu rishadikin mu chisak cha katat.”

Ov, Testament Musu wamuswinkana Testament Mukur? Ov, mutapu ik tukutwisha kutenchik chovu piur pa ‘Yehova wa yisak’ wisambidinau mu Testament Mukur ni “Nzamb wa rukat ni chisambu” wisambidinau mu Testament Musu? (Isay 13:13; 2 Korint 13:11) Ov, Testament Mukur ukwet usey kudi ey ilel?