Ov, Chitwishikin Mangand Mikala mu Uumwing?

OV, MANGAND metu mayil ku chisambu bil ap mayil ku chak chijim? Chimeken anch chitwishikin kwikalaku mayingishin ma mwikadil umwing ni umwing.

Ku mutambu ukwau, anyikel amwing a mangand alondining nich ruchingej anch chisambu cha mangand mawonsu chitwishikina kwikalaku—chidi mulong chakamishining kutong mwikadil wa chak. Chikwau kand, antu avud ovil wom ukash wa yipul ey: Ov, michid ik yikweta mat ma kusheshan nich kujim kapamp kamwing? Ov, akez kumasadil? Yik yikeza kusadik anch amasadil?

Rusangu rilejen anch ukankuny winou ni kasolikany kinak yishikijin ku kushadish ruchingej ra uumwing, ni chisu chivud relijon ukat kusalang usu wa kusonsil ni kupep kasu pa chisu cha matend pa ndond pa ku kajim. Kabamb a nsangu James A. Haught ufundin anch: “Chom chin chawonsu chikata kuyauril antu chikutwish kulet matend, ni relijon udi chom chimwing chikash cha yom yikata kuyauril antu. Chikalap nchik ritiyij ra mangand mawonsu anch relijon ukat kuyisal antu ikal ‘awamp,’ chimeken patok anch uyibachikining antu amwing asala yom yiyimp nakash.” Mwin kufund Steven Weinberg ulondil chitongijok chawiy chimwing. Ndiy ufundin anch: “Ching kusu kwiyauril kudiokilinga ku relijon kwawiy kukata kuyibachik antu awamp asala yom yiyimp.”

Ov, kudi ruchingej ap rikemp kusu anch mangand metu makez kwikal mu uumwing? Mwaning! Pakwez musul wa uumwing wa mangand udiap muntu ap marelijon ma antu, mudi mutukumana.

[Tablo wa jinsangu udia pa paj wa 3]

Ov, mangand madi mudi grenade usotina kusabuk?