Antu a Mangand Mawonsu Akat Kuyibomb mu Uumwing —Ov, Mutapu Ik?

OV, MUTAPU ik ukutwisha kudinguril “uumwing”? Kudi antu amwing, dizu dined dirumburikin kwau kuburen kwa kupwitijan ap kwa njit. Chilakej, anch michid yaad ap yivud ya fund mikand ni ovijan anch chisambu chikala pakach pau, chitwishikin kulond anch yidi mu uumwing. Ov, chakin kamu yidi mu uumwing? Bwat kwau.

Tal bil: Mu rusangu rawonsu ra muntu, asala kal yikumangan ya kovijan mulong wa kulet chisambu ayifunda ni ayijirila. Ov, mulong wak? Mulong yisu yivud antakel a mangand abangidining kwau nakash pa mwaz wau ayinau pa ndond pa kutongin pa chisambu ni uumwing. Kupwa kand, michid yimwing yiyakamishining mulong wa yikutwisha kushiken anch yakangany kurish ni amasalay a michid yikwau.

Chawiy lel, anch michid yaad yasinap njit chirumburikinap anch yidi mu uumwing wa chisambu. Ov, chakin kamu antu aad itadishina umwing ni mukwau mat adi mu chisambu mulong kisambwidilap pa tusabwil? Chidi cha usup kutong mwamu! Mwaning, wawiy mwikadil mudiau michid yivud nlel unou. Kupandakan kwa kuburen kuchingejijan kuletin wom anch dichuku dimwing mat makez kadjim. Ov, yik yasadilau kal mulong wa kwez kukangesh chak chinech?

Wom wa Kwikal Nich ni Kusadil Mat ma Nikleyer—Ubaj ku Uumwing

Antu avud achingejin Kwovijan Kulikishina Kusal Mat ma Nikleyer. Kwovijan kwinoku akwitiyija mu muvu wa 1968, kwalikisha kusal mat ma nikleyer mu jingand jakad kwikal nich kulikish kumavudish mu jingand jimakweta. Diloz dia kwovijan kwalikisha kusal mat ma nikleyer, kwitiyijinau michid 180 ni kusut, rading ra kusot kutambul mat mawonsu ma nikleyer madia ku makas.

Diloz dined diadinga dipandiken kuwap mudi ik, antu amwing in kufundol alondil anch Kwovijan Kulikishina Kusal Mat ma Nikleyer udi kwau mupit wa kusot kukangesh jingand jimwing kwikal nich “yapu ya kusal mat ma nikleyer”— kuyikangesh michid yiney chakwel kangal yasal mat minam. Chawiy lel, chakaminau michid yimwing yitiyija kwovijan kwinoku yikutwish yaswimp yitongijok yau. Chakin, michid yimwing yimen anch chidi kurumbuk kuyijidik kusal mat matongidinau makez kuyitwishish kwichidij.

Chisadila mulong winou wikala ukash—pamwing ap kulet ubaj—chidi chisal chakwel anch ayilikishinap michid kusadil yapu ya kasu ka nzembu wa nikleyer. Chinech chiyakamishin antu amwing anch michid yilondinau anch yisadidin kasu ka nzembu ka nikleyer nich jitong ja chisambu yikutwish kusal mat ma nikleyer mu ujindj.

Ap michid yikweta kal mat ma nikleyer yikutwish kulik kulondul yovijanau. Antu amwing alondin anch chidi cha usup kutongin anch michid yikweta jinkil jijim jijim ja mat ma nikleyer yikutwish kukangesh ap kukepish uvud wa mat makwetau. Kwambatan nich musul kanang, “chakwel kuyitiyijish michid yawonsu yikweta mat ma nikleyer chakwel yilika ap yikepisha uvud wa mat minam . . . chitin urund ukash ni kuchingejijan pakach pa michid yikata kupompatijan umwing ni ukwau [anch chikasiken kwitiyij anch] yiney yikutwish kushiken.”

Usu usadinau antu chakwel ikal mu uumwing—wikalap nchik wa kashinsh—udi wa chamwamu. Chom chinech chiyikashimwishinap in kwilej Bibil, mulong Dizu dia Nzamb dilondin anch: “Kwikil muntu ukutwisha kutakel mwom wend amwinend.” (Yeremiy 10:23) Bibil ulondin kand patok anch: “Kudi njil yimwing yikatay kutongay muntu anch yitentamin, pakwez kwisudiel kway yidi njil ya rufu.” (Jinswir 16:25) Anyikel a chiuntu kakutwishap kuya kulemp mu kusot kwau kulet uumwing. Chikalap nchik mwamu, tuburedinap ruchingej.

Musul wa Uumwing Wakin

Mu Bibil mudi kushilamu kwa Nzamb kulejen anch mangand akez kumanung mu uumwing pakwez chidiap ku usu wa muntu. Sakatang, watenchika anch antu ashakama mu chisambu mu mangand mawonsu, ndiy ukeza kuwanyish yikangenay muntu kusal. Kudi antu amwing chiyikasikedin kuchitiyij chom chinech. Chikalap nchik mwamu, kudiosh kwisambishil rutong ra Nzamb rading anch antu ashakama mu chisambu ni mu kwovijan.a Maverse mavud madia mu Bibil malejen patok anch ni katat rutong ra Nzamb ridi kuyinung antu mu uumwing. Shinshikin yilakej yikemp kusu:

• “Ezany utalany midimu ya [Yehova], kujiyish kujim kwatekay pansh. Ndiy ukat kukatwish njit ni kwisudiel ya mangand; Ndiy ukat kubukon mat, ukat kukatwol mirumbu yikunku yikunku, ukat kwosh matemb mu kasu.”—KUSENG 46:8, 9.

• “Kukez kikalap chom cha ubaj ap chom chiyimp ku Sion, wawiy mukandu utumbila wa Nzamb. Ngand yikez kizul nich ronganyin ra [Yehova] mudi mukata kwizul mem mu karung.”—ISAY 11:9.

• “Ndiy ukez kadiosh rufu chikupu. Nsalejetu [Yehova] ukez kakuswol mansoj ku mes ma antu awonsu, ukez kadiosh kand kapipej katambulau antwend pa mangand. [Yehova] walonda mwamu.”—ISAY 25:8.

• “Tukat kuchingej maur masu ni mangand masu mudi mwashilayimu Nzamb. Chad kwinikwa kwawiy kukeza kwikal kutentam.”—2 PITA 3:13.

• “[Nzamb] Ndiy ukez kuyikusol mansoj mawonsu ku mes mau. Kukez kwikalap kand rufu, ap madil, ap kwishikokin, ap kusansan, mulong yom yikur kiyamekanap kand.”—KUBURIK 21:4.

Yakushilamu yiney yidi ya kuchingejin. Ov, mulong wak? Mulong chidiay Sakatang, Yehova Nzamb ukwet usu ni ukaliweny wa kuyinung antu mu uumwing. (Luka 18:27) Mwamu musotilay kusal. Chakin kamu, Bibil ukutazukin anch “rusot rend [Nzamb] . . . ukez kukumangej yitang yawonsu ya mwiur ni ya pansh [mu] Kristu.”—Efes 1:8-10, Manswik Masu.

Kushilamu kwa Nzamb kwa kulet “ngand yisu . . . kukusokau in kutentam” chidiap chitongijok kwau chamwamu. (2 Pita 3:13) Piur pa yom yakanay, Yehova Nzamb ulondin anch: “Dikezap kuchirik kud am pakad yibudikin, pakwez dikez kuwanyish kamu chom chinikata kusanger, ni dikez kupandakan mu yawonsu naditumina dizu diam kusal.”—Isay 55:11.

Dizu Dia Nzamb Diyinungin

Mudi mutwamena mu mutu wasambelangaku, relijon wadi ni chisal chiyaurila antu pa ndond pa kuyinung mu uumwing. Wawiy mulong utufanyidina kushinshikin nakash, mulong anch twitiyijin anch kudi Sakatang, ov, chidiap cha manangu kuchingejin anch in kumwifukwil ikala mu chisambu ni mu uumwing umwing ni mukwau? Inge!

Relijon uyaurila antu kakatap kutongijokin padiay Yehova Nzamb ni pa Dizu diend. Pakwez, kudi kufishiu nich kwa marelijon makasikeshina yitongijok ya antu mulong wa uumwing pa ndond pa kukasikesh rutong ra Nzamb. Yesu wayitazuka anyikel a relijon wa pa chirung chend anch “in rubabek” ni wayela anch: “Isay chilondilay chidi chakin anch: antu ang akat kwinlimish ni milamu yau, pakwez michim yau yidi kulemp ni yamam. Akat kwingifukwil chamwamu, mulong malejan mau madi kwau malejan ma antu kusu.”—Mateu 15:7-9.

Chinyim ni chinech, difukwil diakin dikwet usu wa kuyinung antu. Muprofet Isay wasambela kulond anch: “Mu machuku makeza kez, mukandu wa Chikumbu cha [Yehova] ukez kalep kupandakan mikandu ni yinanginang yawonsu. Ndiy ukez kakatul milong ya antu a michid yawonsu. Antu akez kachil jimpak jinkasu, ni mirumbu yau kwikal jimpak ja kukatul nich yakwangul. Kwikil muchid ukeza kapuril mpak ya musamun kurish ni muchid ukwau. Kakez kilejap kand kurish njit.”—Isay 2:2, 4.

Mu jingand 230 ni kusut, Atuman a Yehova aziyidil ku yany ya Yehova yisambidina uumwing. Ov, wisu mufulandal wa uumwing wau? Kambuy Paul wafunda anch: “djalany kand rukat, wawiy mwoj uwanyidina ukasila yawonsu pamwing mu kwovijan.” (Kolosay 3:14) Dizu dia Grek diasadilay Paul dirumburikina “mwoj” dikutwish kwisambin mijir ya mujimbu wa muntu. Mijir yiding yikash kupandakanamu mwoj, ni yikweting midimu yaad ya usey. Yikasidining yid ya mujimbu pamwing, ni kunung mafup pamwing.

Mwamu chidinga kand nich rukat. Ngikadil yiney yisadil yivud nakash kupandakanamu kuyikangeshin antu kujipijan umwing ni mukwau. Rukat ra Kristu riyikwashin antu a yishankur kushalijan asala pamwing mu chisambu. Chilakej, rukat riyikwashining antu ashakam kwambatan nich chijikena kudi antu avud anch Chijil Chipandakena Usey. Mudi mwachifundau mu Mateu 7:12, Yesu walonda anch: “Chawiy yom yawonsu yiwovilany ing antu akusadilangany en, ni yen yisadilany kand mwamu awiy.” Kulondul chijil chinech kuyikwash avud kupandakan kasolikany.

‘Katijanany’

Atuman a Yehova akwatin kal mupak wa kwimekesh ayinau anch adi in kwilej a Kristu kusutil ku kuziyil yalonday Yesu anch: “Ku chinech kwawiy kukwijikinau antu awonsu anch en udiany in kwilej amam anch wakatijanany.” (Yohan 13:35) Rukat riner arimekeshin mu mutapu umwing ujim pa chisu cha kasolikany ka muchid ni kupwitijan kwa chipolitik. Chilakej, pikwadinga kujipijan ku Rwanda mu muvu wa 1994, Atuman a Yehova amekesha kukatijan kwau umwing ni mukwau. Atuman a Yehova a muchid wa a Hutu ateka mwom wau mu chak mulong wa kuyichidij akadivar nau a Tutsi!

Chakin kamu, chitwishikinap kuyichingejin michid ya mangand anch yikez kukudish rukat ra mutej mu chilik chakwel anch rileta uumwing wa mangand. Kwambatan nich Bibil, rusot riner Nzamb ukez kuriwanyish pa chisu chend chifanyidina. Ap anch katat, antu akutwish adjal rukat ni kwikal mu uumwing.

Mu muvu wasutina ou, Atuman a Yehova asadil piswimp asaa miliyar umwing mu mudimu wa kuyendil antu ni kuyilej Bibil ni usey wa Bibil mu mwom wa katat. Ronganyin rakin ra Dizu dia Nzamb ranungin kal mamiliyon ma antu, amwing au adinga akisijadin pasak umwing ni mukwau. Pakach pa antu inay padi mudi chilakej, in Arab ni in Yuda, in Arménie ni in Turquie, in Allemagne ni in Russie.

Ov, usotin kwilej yivud piur pa usu wa Bibil, Dizu dia Nzamb, wa kuyinung mu uumwing? Anch chidi mwamu, ambamb ni Atuman a Yehova adia pol pen, ap fund ku adres ufanyidina udia pa paj wa 2.

[Mazu madia kwishin kwa paj]

[Tablo wa jinsangu udia pa paj wa 4]

Tunan twa mikand yafundau ya kwovijan ayijirila

[Tablo wa jinsangu udia pa paj wa 7]

Kusadil yany ya Bibil kwawanyishin kal yom yakadau anyikel a chiuntu kutwish kusal

[Chipich chidia pa paj wa 5]

Dizu dia Nzamb ditulejin Musul wakin wa uumwing

[Chipich chidia pa paj wa 7]

Atuman a Yehova a Hutu ni a Tutsi atungin pamwing ndond ya kwifukwil