Shapitre Wa Kusambish
Uumwing wa Difukwil pa Chirung Chetu—Urumburikin Chom Ik?
1, 2. (a) Ov chom ik chimwing cha musangar chisadikina pa chirung chetu? (b) Ov ruchingej ik ruwamp rikwetau antu a michim yiwamp?
PA DIVU pawonsu kudi mujikit usangareshina nakash wa kulet uumwing wa difukwil. Mujikit winou udi wa kukumangej pamwing mamiliyon ma antu a michid yawonsu, a tubil twawonsu, ni a jindim jawonsu. Muvu ni muvu akat kuyikumangejang kamu avud nakash. Baibel uyijingunin antu inay mud “atuman” a Yehova ni kuyitazuk anch ‘chisak chipandikena kujimb.’ Akat kumusadin Nzamb ‘midimu yitumbila muten ni uchuku.’ (Isay 43:10-12, NW; Kujingunik 7:9-15) Ov mulong wak usadilau mwamu? Chidi mulong ashikedin kumwijik Yehova mud Nzamb umwing kusu wakin. Chinech chiyibachikin kushakam kulondulijan nich yijil yend yitentamina. Chikwau kand, ilejin kal anch tushich mu “machuku ma kwisudiel” ma mangand minam mayimp, ilejin kal anch Nzamb ukushesh mangand katat kamu ak, ni ukez kumaswinkesh nich mangand mend masu makwikala paradis. —2 Timote 3:1-5, 13; 2 Pita 3:10-13.
2 Dizu dia Nzamb dikat kushilamu anch: “Mulong kwashal kal kachisu kakemp ni antu ayimp kakwikalikup kand . . . Pakwez itudishila akez kaswan ngand, akez kusangar mu kuvul kwa chisambu.” (Kuseng 37:10, 11) ‘In kutentam akez kaswan ngand, akez kushakamamu chikupu.’ (Kuseng 37:29) “[Nzamb] ukez kuyikusol mansoj mawonsu ku mes mau. Kukez kwikalap kand rufu, ap madil, ap kwishikokin, ap kusansan, mulong yom yikur kiyamekanap kand.”—Kujingunik 21:4.
3. Ov uumwing wakin wa difukwil ukat kushiken nchik?
3 Antu akumangejinau katat pamwing mu difukwil diakin adi anangand a kusambish a mangand minima masu. Ilejin kal anch rusot ra Nzamb chom ik ni akat kurisal nich usu wau wawonsu. Yesu wamekesha usey wa kwilej ni kusal rusot ra Nzamb palonday anch: “Antu akwikal nich mwom wa chikupu anch akwijik ey Nzamb wakin, ni kumwijik Yesu Kristu watuma ey.” (Yohan 17:3) Mupostol Yohan wafunda anch: “Mangand mayil ni kujiy pamwing ni yom yawonsu yikwetau nich antu ris, pakwez muntu mwawonsu ukata kusal rusot ra Nzamb ukez kupand chikupu.”—1 Yohan 2:17.
Chirumburikina Chakin Uumwing wa Difukwil
4. (a) Ov kukumangej kwa antu avud mwamu mu uumwing wa difukwil pa chirung chetu kurumburikin ik chakin? (b) Ov mutapu ik urumburila Baibel kukumangej kwinoku?
4 Ov kukumangej kwa antu avud mwamu mu uumwing wa difukwil pa chirung chetu kurumburikin ik chakin? Udi uman wa patok anch tudi kamu piswimp nakash ni disudiel dia mangand minam mayimp, piswimp ni mangand masu ma Nzamb makusambisha kamu kupwa kwa mangand minam mayimp. Twimedinap ayinetu kushiken kwa uprofet wa Baibel watakela kwisambin kukumangej kwinoku kujim. Umwing wa uprofet winou ulondil anch: ‘Ni chikez kushiken ku chirung cha machuku ma nsudiel [machuku minam ma nsudiel] mukandu wa chikumbu cha Yehova [difukwil diend diakin dizambukina piur] akez kuwimik dang piur pa mikandu [piur pa mulad wawonsu wa difukwil], . . . ni kwawiy kukezau kuya michid yivud. Ni michid yivud yikez chakin kamu kuya ni kulond anch: Ezany, en antu, ni tukandamany ku mukandu wa Yehova ni ku chikumbu cha Nzamb wa Jakob; ndiy ukez kutufundish piur pa jinjil jend, ni yetu tukez kwendil mu jinjil jend.’—Mike 4:1, 2; Kuseng 37:34.
5, 6. (a) Ov chidi nchik chakin anch michid yikat kukarumukin kud Yehova? (b) Ov yipul ik tufanyidina kwiyipul?
5 Ap anch michid yakabuj yezinap ku chikumbu cha muspiritu cha Yehova mulong wa difukwil, mamiliyon ma antu a michid yawonsu mwamu musadilau. Chilejinau piur pa rutong ra rukat ni untu usangareshina wa Yehova Nzamb, michim yau yikat kuyibachik kamu nakash. Akat kukimb nich kwikepish yiyitinay Nzamb. Kulembil kwau kudi kamu mud kwa mwin kuseng walonda anch: “Nleja mwakusadil rusot rey, mulong ey udi Nzamb wam.”—Kuseng 143:10.
6 Ov wimen amwiney pakach pa chisak chipandakena kujimb cha antu akumangejinay Yehova katat mu uumwing wa difukwil? Ov kwitiy kwey mafundish ma Dizu diend kumekeshin anch umen chakin kamu nich usey anch Yehova ndiy Musul wa mafundish minam? Ov mu chilik ik ukwendila “mu jinjil jend”?
Mutapu Ushikedinau Uumwing wa Difukwil
7. (a) Ov mutapu ik ukeza kuwanyin uumwing winou wa difukwil? (b) Ov mulong wak chidia cha kuswakal kwikal mwin kumwifukwil Yehova katat, ni mutapu ik tukutwisha kuyikwash antu akwau kuchisal?
7 Rutong ra Yehova ridi anch yitang yawonsu yikweta manangu yikala yikumangejinau mu uumwing wa difukwil diakin. Tuchingedin kamu nich impu nakash dichuku dikezau awonsu akweta mwom kumwifukwil Nzamb umwing kusu wakin! (Kuseng 103:19-22) Pakwez kurutu kwa kusal chinech, Yehova ufanyidin bil kuyidiosh awonsu alikina kusal rusot rend ritentamina. Nich ranaken, ukat kwijikish kurutu kwa chisu yikusalay chakwel antu a ndond yawonsu atwisha kwikal ni chisu cha kukarumun mutapu wau wa kushakam. (Isay 55:6, 7, NW) Chawiy lel, pa chirung chetu, “antu a mangand mawonsu, ni a michid yawonsu, ni a jindim jawonsu” akat kuyombil rubil ra kuswakej anch: “Mwovany Nzamb wom, panany uyaj kudi ndiy! Mulong chisu chend cha kuyirumburish antu chashik kal. Mwifukwilany ndiy watanga diur, ni mangand, ni karung, ni misul ya mem!” (Kujingunik 14:6, 7) Ov witiyin kal diladikij dined? Anch witiyin kal, ukwet chisend cha kuyitazuk antu akwau chakwel amwijika ni kumwifukwil Nzamb wakin.
8. Kupwa kwa kwilej mafundish ma dishin ma Baibel, ov yom ik kand yikwau tufanyidina kwikasikesh kusal nich mushiku?
8 Rusot ra Yehova ridiap anch amwifukwila kud antu amwing afila mu kan anch itiyidin mwi ndiy pakwez adandamedina kusadil yisakin yau ayinau. Nzamb usotil anch antu ikala ni “ronganyin ra rusot rend” ni kurimekesh mu mwom wau. (Kolosay 1:9, 10) Chawiy lel, antu akweta muchim wa kujikitish ilejina mafundish ma dishin ma Baibel asotining kuya kurutu mu kukul kwa Ukristu. Rusot rau ridi ra kumwijik Yehova nawamp nakash, kujimbish ni kukudish kutesh kwau kwa Dizu diend, ni kudisadil kamu nakash mu mwom wau. Asotining kumekesh ngikadil ya Tatukwetu wa mwiur ni kuman milong mud mutapu uyimenay. Chinech chikat kuyibachik kukimb mitapu ya kusal mudimu ukata kupandish mwom uyirijekidinay Yehova in kumwifukwil end pa divu pa chirung chetu. Ov riner rawiy rusot rey? —Marko 13:10; Hebereu 5:12–6:3.
9. Ov uumwing wakin utwishikin katat mwi njil ik?
9 Baibel ulejen anch antu amusadidila Yehova afanyidin kwikal mu uumwing. (Efes 4:1-3) Uumwing winou ufanyidin kwikalaku katat, ap anch tushich mu mangand mamwing maurikina ni ap anch tuchidi kurish nich kuburen kuwanyidin kwetu ayinetu. Yesu walembila nich muchim umwing anch in kwilejend ikala awonsu muntu umwing, ikala mu uumwing wakin. Ov chinech chela kurumburik chom ik? Cha kusambish, ela kwikal ni urund uwamp nend Yehova ni Mwanend. Cha kaad, ela kwikal, mu uumwing muntu ni mukwau. (Yohan 17:20, 21) Chakwel kushiken rutong riner, chikumangen cha Ukristu chikat kusal mud dirijek muyifundishidinay Yehova antwend.
Ov Yom ik Yikata Kuwejin ku Uumwing?
10. (a) Ov chom ik tukata kukudish pitusadidila ayinetu Baibel mulong wa kutongin yakul ya yipul yikweta usu piur petu? (b) Nich kwakul ku yipul yidia mwishin mwa paragraf wa 10, shinsikin yom yikata kuwejin ku uumwing wa Ukristu.
10 Yom yijim sambwad yikata kuwejin ku uumwing wa difukwil yawiy ey. Piwakwila ku yipul yibachikijina paragraf winou, tongin mutapu ukutwisha kukukwash dinans dimwing ni dimwing mu urund wey ni Yehova ni ambayey in Kristu. Kutongin manans minam ni kukimb mifund yijimbwilau, kangal mifund yifundinau, kukez kuwejin ku kukudish kwey manangu ma winzamb, ukaliweny wey wa kutong, ni kujingunin—ngikadil tuswiridina etu awonsu. (Jinswir 5:1, 2; Filip 1:9-11) Shinshikin yom yiney chimwing ni chimwing.
(1) Twitiyijin mbil ya Yehova ya kututekin yijidik ya kuwap ni kuyip. “Mukungamena [Yehova, NW] ni muchim wey wawonsu. Kangal wachingej ronganyin rey amwiney. Mu jinjil jey jawonsu itiyij kudi Ndiy, ni Ndiy ukez katenchik jinjil jey.”—Jinswir 3:5, 6.
Ov mulong wak tufanyidina kukimb yiyul ya Yehova ni umutakel wend pa chisu tukwatina mipak? (Kuseng 146:3-5; Isay 48:17, NW)
(2) Tukwet Dizu dia Nzamb mulong wa kututakel. “Pitwakulejanya dizu dia Nzamb, en waditeshanya, chad waditambulany. Kiwadiakanyap mudi dizu dia muntu, pakwez wadiakanya mudi dizu diakin dia Nzamb ukata kusal mudimu mu en, in kwitiyij.”—1 Tesalonik 2:13.
Ov chak ik chidiaku anch tukakusal kusu ‘yitutongina’ anch yitentamin? (Jinswir 14:12; Jeremiy 10:23, 24, NW; 17:9, NW)
Anch twijap yiyul yipanina Baibel piur pa mulong kanang, ov chom ik tufanyidina kusal? (Jinswir 2:3-5; 2 Timote 3:16, 17)
(3) Twisakidin etu awonsu program wa chilik chimwing wa yakudia ya muspiritu. “Aney awonsu akez kwikal antu afundishinau kud Yehova.” (Isay 54:13, NW) “Tutalijanany muntu ni mukwau chakwel tukwashijanany kumekesh rukat ni kusal yisalijok yiwamp. Kangal twalikany chaku cha kukumangan pamwing, mudi mukat kulikau antu amwing. Pakwez chifanyidin tupandakeshany kukasikeshijan muntu ni mukwau, mulong umenany anch, dichuku [dia disheshik] dikat kusej piswimp.”—Hebereu 10:24, 25.
Ov kuwap ik kukatau kuman antu akata kwisakin sens yitenchik ya Yehova piur pa yakudia ya muspiritu? (Isay 65:13, 14, NW)
(4) Yesu Kristu, ndiy Nsalejetu, pikil muntu bwat. “Pakwez kichifanyidinap kukutazukany en anch: ‘Mulej’, mulong en awonsu udiany akadivar mu ritiy, umwing ni mukwau. En ukwetany Mulej ching kusu umwing. Kichifanyidinap en kumutazuk muntu wa pa mangand anch: ‘Tatuku,’ mulong ukwetany Tatukwen ching kusu umwing udia mwiur. Ap kichifanyidinap kukutazukany en anch: ‘Mwin Kutakel,’ mulong ukwetany Mwin Kutakel ching kusu umwing, ndiy kamu Kristu.”—Mateu 23:8-10.
Ov muntu ik wa pakach petu uwapidila kwitongin anch udi uyipandakenamu akwau kujimb? (Rom 3:23, 24; 12:3)
(5) Tumen winyikel wa Want wa Nzamb mud ruchingej rimwing kusu ra antu. “Chawiy chifanyidin kulembilany mwamu: ‘Tatukwetu udia mwiur, dijin diey aditumbish. Want wey weza. Rusot rey arusala pansh mudi mwiur.’ Pa ndond pa yom yiney, en kimbany bil Want wa Nzamb ni yom yisotilay, chad ndiy ukukuwejinanyaku yom yiney yawonsu.”—Mateu 6:9, 10, 33.
Ov ‘kukimb bil Want wa Nzamb’ kukwashin nchik kulam uumwing wetu? (Mike 4:3; 1 Yohan 3:10-12)
(6) Spiritu utumbila ukat kusongish mudi in kumwifukwil Yehova ngikadil yifanyidina ku uumwing wa Ukristu. ‘Spiritu utumbila ukat kumekesh rukat, musangar, chisambu, kushimpish kwa muchim, kudimuk, kuwap, ritiy, kwitudish, ni kwilam.’—Galatia 5:22, 23.
Ov chom ik tufanyidina kusal chakwel spiritu wa Nzamb asongisha mabuj mend mudi etu? (Midimu 5:32)
Kwikal ni spiritu wa Nzamb kukwet nchik usu mu urund wetu nau ambayetu in Kristu? (Yohan 13:35; 1 Yohan 4:8, 20, 21)
(7) In kwifukwil awonsu akin a Nzamb akat kwinungin mu kulejanang rusangu ruwamp ra Want wend. “Chifanyidin rusangu ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.”—Mateu 24:14.
Ov chom ik chifanyidina kutubachik kusot kwinungin nakash mu mudimu winou wa kulejan? (Mateu 22:37-39; Rom 10:10)
11. Anch twasadil chakin uyakin wa Baibel mu mwom wetu, ov yom ik yikubudikinaku?
11 Uumwing mu kumwifukwil Yehova ututekin piswimp ni ndiy ni kutukwash kwikal ni urund usangareshina nau ambayetu in ritiy. Kuseng 133:1 ulondil anch: “Talany kuwap ni musangar anch an a kamuntu ibomba, ashakamang pamwing!” Chikasikeshin mud ik kudiokal ku mangand nich kukishan kwau kwawonsu, masandj mau mawonsu, ubaj wau wawonsu ni kwez kukumangan pamwing ni antu amukatina chakin Yehova ni kuziyil ku yijil yend!
Ipuk Yaku Yikata Kwauril
12. Ov mulong wak tufanyidina kwipuk spiritu wa want ipau?
12 Chawiy lel, chakwel kulik kuyipish uumwing wetu upandakena kuwap wa mangand mawonsu, tufanyidin kwipuk yaku yikata kwauril. Chimwing cha mu yaku yiney udi spiritu wa want ipau pantaliken ni Nzamb ni yijil yend. Yehova utukwashin kwipuk spiritu winou nich kulejan mwin kuyisambish way, Satan Djabul. (2 Korint 4:4; Kujingunik 12:9) Satan ndiy kamu wayishikija Adam ni Ev ku kudiul yalonday Nzamb ni kukwat yiyul yadinga chinyim ni rusot ra Nzamb. Chaleta mar kud awiy ni kud etu. (Disambishil 3:1-6, 17-19) Mangand minam mizwil too nich spiritu wa want ipau pantaliken ni yijil ya Nzamb. Chawiy lel tufanyidin kwipuk ayinetu spiritu winou.
13. Ov chom ik chikumekesha anch tukat kwirijek chakin mulong wa kushakam mu mangand masu matentamina ma Nzamb?
13 Chilikej, shinshikin kushilamu kusangareshina kwa Yehova kwa kudiosh mangand minam mayimp ni kutekap maur masu ni divu disu ‘mukeza kwikal kutentam.’ (2 Pita 3:13) Ov chinech chitubachikinap kusambish kwirijek mulong wa kushakam pa chirung chinicha, chirung chikezau kuyikel nich kutentam? Chinech chirumburikin kutesh chiyul chidia kamu patok cha Baibel: “Kangal wakatany mangand ap yom yau yidiamu. Anch muntu wakat mangand, rukat ra Nzamb Tatuku kirishichap mu muchim wend.” (1 Yohan 2:15) Chawiy lel, tuwapidil kwipuk spiritu winou wa mangand—mwikadil wau wa want ipau, kwitong kupandakena, masandj mau ni ubaj wau. Tuwapidil kwikal ni chaku cha kumutesh Yehova ni kumuziyil nich muchim wetu, kwikalap nchik yipwichik ya mujimbu wetu wakad kuwanyidin. Mwom wetu wawonsu upanin uman anch yitongijok yetu ni maku metu yidi kwau ya kusal rusot ra Nzamb. —Kuseng 40:8.
14. (a) Ov mulong wak chidia cha usey kukwat kamu chisu cha kwilej jinjil ja Yehova katat ni kujilondul mu mwom wetu? (b) Ov mifund yijimbwilau mu paragraf yirumburikin ik kud etu?
14 Anch chisu chitondinay Yehova cha kushesh ditenchik diyimp dined dia yom ni awonsu asotina misangar ni mikadil ya mangand chashik, kakulabap bwat. Kakwimikap chisu chinicha ap kukarumun yijidik yend chakwel yambatana nau antu achipakijina ni katat kulamat ku mangand, oku akat kwilej ni kusadil nich michim yaad rusot ra Nzamb. Katat chawiy chisu cha kusadil! (Luka 13:23, 24; 17:32; 21:34-36) Chisangareshin mud ik, kuman chisak chipandakena kujimb chikwatin nich makas maad chisu chinech chipandakena kuwap, ni kukimb nich impu yijim mafundish maletinay Yehova kusutil Dizu diend ni dirijek diend ni kwendil mu uumwing mu jinjil jend jitwadila ku mangand masu! Anch twilej yivud piur pa Yehova, tukumukat nakash ni kusot kumusadil.
Misamb ya Kuchirikin
• Ov rutong ra Yehova pantaliken ni difukwil chom ik?
• Kupwa kwa kwilej mafundish ma dishin ma Baibel, ov yom ik yikwau tufanyidina kusot kusal nich muchim umwing?
• Ov yom ik tukutwisha kusal muntu ni muntu chakwel kwikal mu umwing ni in kwifukwil akwau a Yehova?
[Chipich chidia pa paj wa 4]
‘Itudishila akez kaswan ngand, akez kusangar mu kuvul kwa chisambu’