Chisu Chiyizikisiningau in Kristu Mudi Tidiku

CHISU chikemp kurutu kwa rufu rend, Yesu wayibabesha in kwilejend anch: “Tal kwa, Satan witang kukutambul, chakwel akuzikisany en mudi tidiku.” (Luka 22:31) Chom ik chasotay kulond pinap?

Pa dichuku dia Yesu, kwangul tidiku kwita chisu ni usu nakash. Cha kusambish, in kwangul adinga kukumangejin jintet ja tidiku pamwing mu chir. Kupwa, adinga ni kujibul nich mutond ap nich chom chadingau ni kupwit kudi annam piur pa jintet mulong wa kujikatwol yikunku-yikunku. Mudimu winou wadinga ni kubol jintet ni kudjibwil yol kwa. Cha kaad, andim adinga ni kuyal yawonsu pa mwinshash. Ntit jawonsu jikupalikin pansh pawamp, chadi anch rinkind ratut yol yawonsu yapwepuk. Kwinsudiel, ading ni kuzikis nawamp ntit mulong wa kudioshaku yishoshot yawonsu.

Mazu ma Yesu madi makin, chisu ni chisu Satan warishisha in kwilej pasak, ni uturishishin niyetu ilel. (Ef. 6:11) Chidi chakin anch, kimadiap mar mawonsu mitukweta madiokila kudi Satan. (Mul. 9:11) Chikwau, Satan usadil usu ukash wa kusadil chom ap chisu chikwetay mulong wa kubukun kushinshaman kwetu. Chilakej, ukutwish kutwoz chakwel tulondula mwom wa kusot yom ya ku mujimbu, tutonda kwipuwangesh kwakad kufanyin, ap tusala masandj. Ukutwish kand kusadil arund a ku shikol ap a ku mudimu ni anamakwetu akad kwitiyij chakwel atushindila tusota yom yawonsu yiletina mangand minam piur pa kwilej shikol ni midimu ya ku mujimbu. Chikwau kand, Satan ukutwish wasadil kuzengol chakwel ashesha kushinshaman kwetu kudi Nzamb. Inge, kudi njil jivud jisadidilay Satan mulong wa kutuziyish, mudi mwadingay ni kusal pasak.

Mutapu ik lel tukutwisha kumutaliken mukankuny winou mukash? Tukutwishap kumutaliken nich usu wetu ayinetu. Satan utupandikenamu nakash ku usu; pakwez, twij anch Yehova umupandakenamu kulemp ku usu Satan. Anch twamuchingejin sens Yehova, anch twamulembil nakash atwinkish manangu ni kukapuk chakwel tujijaman, ni kukungamen nakash pa umutakel wend, ukutukasikesh chakwel tumukagesha Satan pakatay kuturishish.—Kus. 25:4, 5.

Pitupakinau, tuswiridin kwikal nich ukaliweny wa “kujingunin kuwap ni kuyip” ni kupwa kuchin chakwel kangal twikal adimbinau nich nkeu ja Satan. (Heb. 5:13, 14) Yehova ukutwish kutukwash tukudisha ukaliweny winou. Chawiy lel tuswiridin kudandamen kusal yom yiwamp, chikalap nchik chom chikutwisha kushiken. Anch twaulondul umutakel wa Yehova, ukez pakad kwidjidjek kukasikesh mupak wa kukapuk kwetu kwa kusal yom yiwamp.—Ef. 6:10.

Satan ukupakish kutuzikis mudi tidiku. Pakwez nich usu wa Yehova, tukutwish kumukangesh, ni kwikal akash mu ritiy. (1 Pit. 5:9) Inge, Dizu dia Yehova ditushinshikidin anch: “Mulikany Satan, ni yend ukez kachin kudi en.”—Yak. 4:7.