“Nzamb, Ndiy Ukata Kukudish Mbut”!
‘Ap mwin kukun kakwetip chom, ap mwin kwichil mem, pakwez Nzamb ndiy ukata kukudish mbut.’—1 KOR. 3:7.
1. Mwi njil ik tukutwisha kwikal “in mudimu nend Nzamb”?
“IN MUDIMU nend Nzamb.” Wawiy mutapu warumburilay kambuy Paul nich musangar chisend chitukweta etu awonsu. (Tang 1 Korint 3:5-9.) Mudimu wadinga wisambidinay Paul udi mudimu wa kuyikadish in kwilej. Waufanikesha nich kukun ni kwichil mem pa mbut. Anch tusotil tusala nawamp mu mudimu winou wa usey, tuswiridin ukwash wa Yehova. Paul utuvurishin anch “Nzamb ndiy ukata kukudish mbut.”
2. Ov, mulong wak kwijik anch ‘Nzamb ndiy ukata kukudish’ kutukwashin twikala nich chitongijok chiwamp pa mudimu wetu?
2 Kwikal witudishina ku kutukwash twikala nich chitongijok chiwamp pa mujikit wetu. Tukutwish twasal nich mushiku mu kufundish ni mu kulejan, pakwez kushiman kwetu kukuya kudi Yehova anch muntu kanang wikal mwin kwilej musu. Ov, mulong wak? Mulong anch twasal mutusotila, kwikil ap umwing wetu ukutwisha kutesh kamu mutapu ik ukatay muntu kushiken ku kwikal mwin kwilej, mulong kitukwetingap ukaliweny wa kushinshikin. Mwant Salomon wakurumburila nawamp pafunday anch: “[Ukutwishap] kwijik yisalijok yawonsu ya Nzamb, Sakatang wa yom yawonsu.”—Mul. 11:5.
3. Kufanikan ik kudia pakach pa mudimu wa kukun mbut wa ku mujimbu ni wa kuyikadish in kwilej?
3 Ov, kuburen kwetu ukaliweny wa kutesh mutapu ushikiningay muntu ku kwikal mwin kwilej kusadil mudimu wetu wikal wa kutwakamish? Bwat. Pakwez, kuusadil wikal utubachikina, usangareshina. Mwant Salomon walonda anch: “Kunany jimbut jen mu chisu cha pamanch, kunany kand jikwau chisu cha urel mulong en kiwijanyap anch mbut ja pamanch ap ja urel jawiy jikusonga nawamp.” (Mul. 11:6) Chakin kamu, pa chisu chidinga cha kukun mbut jin kamu ja kashinsh kitwijingap anch jikuminy ap bwat. Kudi yom yivud yisadikininga yitwakad etu kwijik. tukutwish twalond kand chom mudi chinech piur pa mudimu wa kuyikadish in kwilej. Yesu waukasikesha uyakin winou mu yishim yaad yatufundinau mu shapitre wa 4 mu Rusangu Ruwamp ra Marko. El tuyishinshikinany chakwel tujingunina yitukutwisha kwilejin ku yishim yiney yaad.
Mavu Kushalijan
4, 5. Lond mu wiswimp chishim cha Yesu cha mwin kukus wakusa mbut.
4 Mudi mwachifundau mu Marko 4:1-9, Yesu umumburil mwin kukus jimbut umwing ukunina, ap anch ukusina, mbut jawila pa milad ya mavu kushalijan anch: “Teshany bil, mwin kukus waya ni kukus mbut. Chadingay ni kukus jimbut jimwing jawila kuns kwa njil, ni atujil ez ajiminy. Jikwau jawila pa divu dia mayal diakad mavu mavud, javabuka swa kamu, mulong kijadiap mu mavu mavud; ni muten chiwasasimuka jalipa, mulong kijakwetingap mij, jaum kwau. Ni jikwau jawila mukach mwa miy, ni miy yalepa yayisusu, kusong mbut bwat. Ni jikwau jawila pa divu diwamp, jasonga mbut, jend japam ni kuvulijan kusong; jasong ej makum masatu, ej makum musamban, ej chitot.”
5 Mu yisu ya Bibil, adinga ni kukus mbut ja kukus. Mwin kukus wadinga ni kusendil mbut mu mavav ma chidjal chend ap mu kampay mwa kusendil ni ukusambish kujikus ja kukus kulemp. Chawiy mu chishim chinech, kichadingap ku rusot mwin kukus amwinend kukus mbut pa milad ya mavu kushalijan. Pakwez, mbut jadingay ni kukus ja kukus jawila pa mavu kushalijan.
6. Mutapu ik warumburilay Yesu chishim cha mwin kukun?
6 Chidiap cha usey kudi etu tutongina cha kutongin kurumburik kwa chishim chinech. Yesu amwinend wachirumburila walond, mudi mwachifundau mu Marko 4:14-20 anch: “Mwin kukus ukat kukus dizu. Awiy adia kuns kwa njil kukusilau dizu, awiy chikupwishau kutesh, kukashimuk Satan wez wabwit dizu diayikunyinau mu michim. Ni jikusilau pa mayal chawiy chimwing, awiy chikupwishau kutesh dizu aditambul swa nich musangar; Pakwez kakwetip mij mukach mwau ayinau, akat kujijaman chisu chikemp kusu; chad anch yakamish ap kuzengol yasarumuk mulong wa dizu kukashimuk awiy awa swa. Ni jikwau, awiy akunyinau pakach pa miy, inang awiy ateshila kal dizu, Chad yisotijol ya mangand, ni rupit ra makasu, ni maku ma yom yikwau yend yandam, yasusu dizu, dikal diakad kusong mabuj. Ni awiy akunyinau pa divu diwamp, chikat kuteshau dizu adiak, asong mabuj, rubut makum masatu, rukwau makum musamban, ni rukwau chitot.”
7. Mbut ni mavu kushalijan yifanikeshin ik?
7 Talany anch Yesu kalondap anch akusa mbut kushalijan. Pakwez, ndiy wisambidin mulad umwing kusu wa mbut wawila pa milad kushalijan ya mavu, divu ni divu diasongisha mu mutapu kushalijan. Divu dia kusambish didi dikash, ap anch mudi pa kampamp, divu dia kaad didi dikemp, dia kasatu dikwet miy nakash, ni dia kanying didi diwamp, divu disongina. (Luka 8:8) Mbut yom ik? Mbut udi uruu wa Want udia mu Dizu dia Nzamb. (Mat. 13:19) Mavu kushalijan mafanikeshin ik? Mavu mafanikeshin ngikadil kushalijan ya muchim.—Tang Luka 8:12, 15.
8. (a) Mwin kukun umufanikeshin nany? (b) Ov, mulong wak wakwilau antu mu mutapu kushalijan ku mudimu wa kulejan Want?
8 Chad mwin kukus ufanikeshin nany? Mwin kukus ufanikeshin in kusal mudimu nend Nzamb, antu akata kulejan rusangu ruwamp ra Want. Mudi Paul nenday Apolos, awiy akuna ni ichilap mem. Pakwez ap mudi mwasalau mudimu ukash, yibudikin yadinga yishalijadin. Ov, mulong wak? Chadinga mulong wa kushalijan kwa mikadil ya michim ya antu atesha uruu. Mu chishim, mwin kukus kadingap ni usu pa yibudikin yiney. Chongojin mudi ik, pakampwil kudi akadivar ni anambaz etu akaritiy asadila kal mivu yivud, yisu yimwing asala kal makum ma mivu, nich yibudikin yikemp nakash!a Ov, mulong wak?
9. Uyakin ik wongojina wakasikeshinau kambuy Paul ni Yesu?
9 Kushinshaman kwa mwin kukus kukat kwilikan nich yibudikin ya mudimu wend. Paul wisambina chom chinech palonday anch: “Nzamb ukez kumufut muntu ni muntu mudi mudia mudimu wend.” (1 Kor. 3:8) Difut dilondwil mudimu usadikina, kididiap mulong wa yibudikin ya mudimu. Chawiy chimwing, Yesu niyend wakasikeshina mulong winou pa chisu chachirikau in kwilej end kudiokal mu weny wayau wa kulejan. Adinga asanger nakash mulong ayilembil adinga ayiziyidil padingau ni kusadil dizu dia Yesu. Chikalap nchik kusangar kwasangarau, Yesu wayileja anch: “Kangal wasangerany mu chinech, mudi ayilembil chaziyilau kudi en; pakwez sangarany mulong wa majin men mafundilau kal mwiur.” (Luka 10:17-20) Ap kwin kwalikay mwin kukus kuman kuvulijan kwa mudimu wend, pakwez kadingap mwin usweral ap ushinshamenaku pakemp pantaliken ni akwau. Mu yisu yivud, yibudikin yadinga kulondulijan nich mwikadil wa muchim wa mwin kutesh. Pakwez kamu, Nzamb ndiy ukata kujikudish mbut!
Chisend cha Antu Ateshina Dizu
10. Chom ik chikutwisha kujingunish anch muntu uteshina dizu ukwikal mudi divu diwamp ap bwat?
10 Ov, chidi nchik ku mutambu wa muntu ukutesha dizu? Ov, kudi mutapu ukwitiyijau watenchikau kal? Bwat. Ap anch afaniken ni divu diwamp ap bwat chiyitadil awiy. Chakin kamu, mwikadil wa muchim wa muntu ukutwish wakarumuk wikal uwamp ap wikal uyimp. (Rome 6:17) Mu chishim chend, Yesu walonda anch, “awiy chikupwishau kutesh” dizu, Satan weza wadidiosh mu michim yau. Pakwez chom chinech kichifanyidinap chisadika. Mu Yakob 4:7, ayikasikeshinamu in Kristu anch “mulikany Satan,” ni yend ukez kakuchinany. Yesu warumburila antu akwau mudi itiyijin dizu kwisambishil nich musangar pakwez awa mulong “kakwetip mij mukach mwau ayinau.” Pakwez atushalapol a Nzamb ayiyudil anch ikalany “mudi akukunany mu rukat” chakwel anch akutwish ijik “kujimb ni pa kulep ni pa kukurik, ni kwijik rukat ra Kristu rusutila ronganyin.”—Efes 3:17-19; Kol. 2:6, 7.
11. Mutapu ik ukutwishay muntu kwiyep yisotijol ya mangand ni usu wa rupit ra makasu anch kangal yimususu dizu?
11 Antu akwau atesha dizu ayilejen mudi alikidina “yisotijol ya mangand, ni [usu wa] rupit ra makasu” yayandama ni yasusu dizu. (1 Tim. 6:9, 10) Ov, mutapu ik ukutwisha kwipuk chom chinech? Kambuy Paul wakwil anch: “Lamany mwom wen wakad rukat ra nfalang; shakamany ni musangar ni yom yiukwetanya kal; mulong amwinend walonda kal anch, Am kinikez kakulikip, ap kukusha ey chamwamu.”—Heb. 13:5.
12. Ov, mulong wak antu afanikeshinau nich divu diwamp asongin uvud kushalijan?
12 Kwinsudiel, Yesu walond anch mbut jakusau pa divu diwamp “[j]asong mabuj, rubut makum masatu, rukwau makum musamban, ni rukwau chitot.” Ap anch antu amwing itiyijina dizu akwet mwikadil uwamp wa muchim ni asongin mabuj, yitwishinau kusal mu kulejan rusangu ruwamp yishalijadin kukwatijan nich mikadil yau. Chilakej, kukung ap musong ukash yikutwish yamusal muntu asala pakemp mudimu wa kulejan. (Isikej Marko 12:43, 44.) Chikwau, mwin kukus mbut ukutwish wikal nich ap waburen usu ukemp pa mulong winou, pakwez ukusangar pakumanay anch Yehova ndiy ukudishina.—Tang Kuseng 126:5, 6.
Mwin Kukus Mbut Ulela
13, 14. (a) Lond mu wiswimp chishim cha muntu wakusa mbut. (b) Mwin kukus mbut ufanikeshin nany ni mbut jifanikeshin ik?
13 Mu Marko 4:26-29, tutaninamu chishim chikwau chisambidina mwin kukus mbut chilondil anch: “Mwamu mudia want wa Nzamb, mudi muntu ukata kwel anch wadjibul mbut pansh, Anch walal kwend ap kulank, uchuku ni muten, mbut jikat kuvabok ni kulep, ndiy kijip kwend muchidia. Divu dikat kwiminyin mbut idinau; pakusambish ritit, chad divumu, chad kwasong mbut tanda. Chad pimakuswa mabuj ndiy ukuya ni kukatul, mulong chirungu cha kwangul chez kal.”
14 Mwin kukus mbut udi nany? Antu amwing adia mu Kristendom itiyijin anch winou udi Yesu amwinend. Ov, mutapu ik chikutwishika kulond anch Yesu ulel ni kijap mutapu upamina mbut? Chakin kamu Yesu wij mutapu jipamina! Pakwez, mwin kukus mbut winou, mudi wisambinangau kwiur oku, ufanikeshin mwin kulejan Want umwing ni umwing, awiy akata kukun mbut ja Want kusutil ku mudimu wau usadilau nich mushiku. Mbut jikusinau pa divu diawiy dizu dilejenau.b
15, 16. Uyakin ik walejanay Yesu mu chishim chend cha mwin kukus mbut piur pa kupam ku mujimbu ni muspiritu?
15 Yesu ulondil anch mwin kukus mbut “walal kwend ap kulank, uchuku ni muten.” Winou udiap usweral wa mwin kukus mbut. Kulejen kwau chaku chadingau nich antu avud. Mazu masadidilau mu verse winou malejen anch mudimu wa kusalang muten wawonsu ni kulalang uchuku wawonsu mu chirung kanang. Yesu wakasikeshina chasadikaku pa chisu chinicha. Ndiy walonda anch: “mbut jikat kuvabok ni kulep.” Kupwa Yesu wawejaku anch: “Ndiy kijip kwend muchidia.” Ndiy ukasikeshidin pa chom chinech chasadika “divu dikat kwiminyin mbut idinau.”c
16 Chom ik chadinga chisambidinay Yesu pinap? Shinshikinany anch akasikeshidin pa kupan ni mutapu kusadikina pakemp-pakemp. “Divu dikat kwiminyin mbut idinau; pakusambish ritit, chad divumu, chad kwasong mbut tanda.” (Marko 4:28) Kupam kwinoku kwasadika pakemp-pakemp ni mu mutapu wa kulondulijan. Kwikil wakusadisha swa-swa. Mwamu chidinga kand piur pa kupam muspiritu. Kukat kusadik pakemp-pakemp mudi musotilay Yehova anch uyakin upama mu muchim wa muntu udia mu mwikadil ufanyidina.—Mid. 13:48; Heb. 6:1.
17. Anany akata kusangar anch mbut ja uyakin jasong mabuj?
17 Mutapu ik ukushikenay mwin kukus mbut ku kwangul ‘pimakuswa mabuj’? Pakatay kusal Yehova anch uyakin wa Want upama mu michim ya in kwilej asu, akat chakin kamu kushiken pa chilik chimwing cha kwel anch rukat rau riyibachikina kud Nzamb chakwel amwinkisha mwom wau. Akat kufanikesh kwipan kwau kusutil ku kutambul dibabatish dia mu mem. Akadivar adandamedina kupam pakemp-pakemp akat kwitapil dilau dia kusend yisend yivud mu chikumangen. Dibuj dia Want akat kudangul kudi mwin kukus mujim pamwing ni kudi in kulejan akwau a Want akad pamwingap kusal mudimu wa kukus mbut jisongishina mwin kwilej winou. (Tang Yohan 4:36-38.) Chakin kamu, “mwin kukun ni mwin kwangul akusangar kwau pamwing.”
Malejan Kudi Etu Ilel
18, 19. (a) Ov, kushinshik kand yishim yiney ya Yesu kukukasikeshin mutapu ik? (b) Chom ik tukushinshikina mu mutu wambakedinap ou?
18 Chom ik twileja kal kusutil ku kushinshikin kwetu yishimu yiney yaad yifundilau mu Marko shapitre wa 4? Tukutwish twilej patok anch tukwet mudimu wa kusal—wa kukun. Kitufanyidinap kwisotil mayingishil ap milong ni yikokujol kanang yikutwisha kwikalaku yitukangesh kuusal mudimu winou. (Mul. 11:4) Pa chisu chawiy chimwing, tufanyidin kand kudimukin dilau dietu dia kutuchindin pamwing nau in mudimu nenday Nzamb. Yehova ndiy ukata kupamishan muspiritu, kuyukish usu wetu ni usu wa antu ateshina uruu. Twajingunin kal anch kitufanyidinap kumushindil muntu ap wisu apama muspiritu. Kitufanyidinap kand tuchirika kwinyim ap kuziy anch kupam muspiritu kuyil pakemp-pakemp ap anch kwikil kamu. Chitwongojin mudi anch kupandakan kwetu kwengamidin pa kushinshaman kwetu kudi Yehova ni pa chisend chatwinkishay cha kulejan “katumb kawamp ka want . . . kikal uman kudi michid yawonsu.”—Mat. 24:14.
19 Chom ik chikwau chatulejay Yesu piur pa kupam kwa in kwilej asu ni piur pa mudimu wa Want? Yakul ya yipul yiney yidi mu yishimu yafundau mu jinsangu jidia mu Rusangu Ruwamp. Tukuyishinshikin yishim mu mutu wambakedinap ou.
[Mazu madia kwishin kwa paj]
a Tushinshikinany chilakej cha mudimu wa Mukadivar Georg Fjölnir Lindal wasalay pa Islande mudi muchifundilau mu Annuaire des Témoins de Jéhovah wa 2005, pa paj wa 210-211, ni uman wa atushalapol ashinshamena adandamena mu mivu yivud mu Irlande pakad kuman yibudikin swa-swa, mudi mwisambidinau mu Annuaire des Témoins de Jéhovah wa 1988, pa paj wa 82-99.
b Pasak achirumburila mu magazin winou anch mbut jifanikeshin ngikadil ya chiuntu yifanyidina kukul, ngikadil yadinga yitakedilau nich chipwichik cha yom ya ndond yishichay muntu. Pakwez, chifanyidin kwijik anch mu chishim cha Yesu mbut kijikarumukinap jikala mbut jiyimp ap kwikal mabuj mavudila. Jipamin kwau.—Tal Chinong cha Kalam, cha Kalol 15, 1980, paj wa 17-19, (Français).
c Ndond yikwau yisadidilau dizu dined didi mu Mid. 12:10, mulondilau anch chis cha utad chiyazurikina, “ichinach.”
Ov, Uvurikin?
• Kufanikan ik kudia pakach pa kukun mbut ku mujimbu ni mudimu wa kulejan uruu wa Want?
• Mutapu ik wilikinay Yehova kushinshaman kwa mwin kulejan Want?
• Kufanikan ik kudia pakach pa kupam ku mujimbu ni kwa muspiritu kwakasikeshinay Yesu?
• “Mwin kukun ni mwin kwangul akusangar kwau pamwing” mutapu ik?
[Chipich chidia pa paj wa 13]
Ov, mulong wak Yesu wamufanikesha mwin kulejan wa Want wa Nzamb nenday mwin kukus mbut?
[Chipich chidia pa paj wa 15]
Antu afanikeshinau nich divu diwamp akusal nich muchim
umwing mudimu wa kulejan Want kulondulijan nich mikadil yau
[Chipich chidia pa paj wa 16]
Nzamb ndiy ukata kukudish mbut