Nileja Usey Wa Mwom

CHADINGA PAMANCH PA NDOL 16, 2007. Nadinga nibatamin mu dikonk dia biro udia mu etaj wa kasatu mu Norris Hall ku iniversite wa Virginia Polytechnic Institute ni Iniversite wa Ngand, ap anch Virginia Tech, anvurisha kand anch tufanyidin kujikitish mulong wa dichuku ni dichuku ditudia aom.

Nadinga mu biro wam tayad niya nikatanga mikand yam pa ordinater. Mulej umwing weza wantazuk anch niya mu biro wend chakwel nikamukwasha kupwish mulong wadingay nich ordinater wend. Patwandama mu biro wend, twatesha yidiang yabarik mu etaj wa kaad. Mudi mutwadinga kitwijap chisadikinaku, twikwelengeza mau mu biro wend, twapata chis, twiyakamisha nich kuchingel twijika chikusadikaku katat. Namana ndond ya kujingamin mu dikonk ni namulembila Yehova Nzamb, namwita antakela chakwel nitwisha kujijamen chom chin chawonsu chikwikalaku.

Pitwadinga ni kuchingel, chom chimwing chasadika kusutil kal mivu 15 changeza mu manangu. Nadinga ni kusal mudi mwin kurijek motak mu makashing. Kamulong ka kasarony kadinga mu makas ma murund nam kaka kasu. Wom wamukwata ni wandjbwila mulond wa kasu mu mes! Napwita muzu wa kazu ni natema kasu pa dibwambu. Elikopiter weza wansend ni antwala mwi ndond mwa kuyokin in kutem kasu ni nashala kwinikwa chakwel angoka angond asatu ni chikunku, narisha mulong wa mwom wam. Kupwa kwa angond atan akwingok ni kuyerik, nachirika kwol kwam, najikitisha kusu mulong nadinga mwom. Chom chinech chanleja nimana dichuku ni dichuku dia mwom mudi dia usey nakash. Kukasikeshidin kand mupak wam wa kusadil mwom wam mu mudimu wa muntu wangikisha mwom winou, Yehova Nzamb—mudi umwing wa Atuman end.—Kuseng 90:12; Isay 43:10.

Kinatwishap kand kusalang mudi mwin kurijek motak mulong yitat yam, chawiy nileja kusadil ordinater ni natana mudimu ku Virginia Tech. Chawiy chanshikija ku Norris Holl pamanch pa dichuku dined.

Mudi yidiang yadandamena kubarik, twashikena kujingunin anch antu afila ku yidiang mu rusangu ra États-Unis adinga ni kufil mu etaj umwing udia pansh kudiokal patwadinga. Kujipan kwapa chisu chijipay mwin kujipan amwinend kupwa kwa kuyijip antu 32 akad mulong. Kupwa kwa minit 20 yom yasambisha kand, twatesha ampurish end lel mu kapalikany kawonsu. Twayitazuka, ni atubudisha mu chisambu.

Chishiken chinech chikwatishena wom chanleja mutapu udia mwom wa chamwamu. (Yakob 4:14) Chidi cha usey ujim mudi ik kudi etu chakwel tumuchingejina Mwin Kupan mwom, Yehova Nzamb, ni kuman dichuku ni dichuku mudi chipan chitwinkishinay!—Kuseng 23:4; 91:2.

Dizu Dirumburila Chipich Chidia pa paj wa 26]

AP Photo/The Roanoke Times, Alan Kim