Yipul ya in Kutang

Ov, Mulong Wak Kusadil Dijin Dia Nzamb Anch Kwikil Wija Chakin Kamu Mutapu Wadingau Ni Kudijimbul?

Nlel kwikil muntu wija nawamp mutapu wadingau ni kudijimbul dijin dia Nzamb mu Hebereu wa pasak. Pakwez, chidi cha manangu anch, dijin din dia Nzamb dimeken mu Bibil tupamp 7000. Yesu walejana dijin dia Nzamb padingay pa divu, ni wayileja in kwilejend alembilang mulong wa kutumb kwa dijin dined. (Mateu 6:9; Yohan 17:6) Chawiy lel, kudi chom chimwing chidia chakin—kusadil dijin dia Nzamb kudi kujim nakash mu ritiy ra Ukristu. Ov, mulong wak lel, mutapu wadingau ni kudijimbul pasak wijikenap? Kudi mayingishin majim maad.

Dia kusambish, mivu tunan twaad ni kusut yasutila kal ey, in Yuda adinga nich chishankur chalondanga anch kujimbulang dijin dia Nzamb kudi kurumbuk. Anch mwin kutang washik pa ndond padia dijin dined mu mifund ya Bibil, ukudiswinkesh nich dijin dia mwaz “Nsalejetu.” Mwi njil yiney, kwinyim kwa yitot ya mivu kusut, kwikil kand muntu wijika kand mutapu wa kujimbul dijin dia Nzamb.

Dia kaad, Hebereu wa pasak adinga ni kumufund pakad mamuny ma dizu, mudi muchidinga kuswimpish majin mu Inglish ni mu jindim jikwau. Pa chisu chitanginay yifundinau, mwin kutang ndiy ukuwejina mamuny ma dizu maburedinap. Mu kusut kwa chisu, ditenchik adiaurila mulong wa kulam mutapu wa kujimbul mazu ma Hebereu chakwel kwipuk kumavuramen rawonsu. Awejinaku mamuny ma dizu mudi manans mu Bibil wa Hebereu. Pakwez, piur pa dijin dia Nzamb, chimeken anch awejinaku mamuny ma dizu mudi manans ku dijin “Nsalejetu” mulong wa kumuvurish mwin kutang mutapu wa kudijimbul dizu dined, ap pamwing kamawejinap kwau.

Pakwez, chom chashala kusu chadinga ching kusu Mamuny Manying, majimbwilau mwi dinguril umwing mudi anch “mamuny manying ma Hebereu makarumwiningau chisu [chawonsu] anch YHWH ap JHVH, mawiy madia kukwatijan nich Bibil dijin dia Nzamb.” Chiswapel kuman mutapu YHVH, nich mamuny ma dizu mudi manans ni mutapu uwejidinaku mamuny ma dizu, chawiy dikal “Yehova,” mutapu wijikena nakash ni witiyijinau kwawonsu kwawonsu mu Uruund.

Pakwez, in kwilej Bibil amwing, alondiling anch chifanyidin kudijimbul anch “Yahweh.” Ov, wawiy mutapu udia piswimp mudi mwadingau ni kudijimbul kwisambishil? Kwikil muntu ap umwing ukutwisha walonda anch mwawiy. Chakin kamu, in kwilej Bibil akwau ajimbwiling mayingishin ma kulikin kudijimbul mutapu winou. Chakin kamu, majin madia mu Bibil, pakatau kumajimbul mu jindim ja katat movikening kamu mudi mu Hebereu wa pasak, ni chikasikening kuman muntu watadik. Chawiy lel majin minam mikala kal mu rudim retu ni mijiken nawamp. Mwamu chidia kand piur pa dijin dia Yehova.

In Kristu a mivu chitot ya kusambish ayitazukanga anch antu a dijin dia Nzamb. Ayilejad antu akwau dijin dined ni ayikasikesha chakwel asambish kudisadil. (Midimu 2:21; 15:14; Rome 10:13-15) Choviken patok, chidi chijim kudi Nzamb anch tusadila dijin diend mu dizu ap disu ditulondina, kusanger kurumburik kwand, ni kushakam kukwatijan nich chididia.

[Tablo wa jinsangu udia pa paj wa  32]

Chidi cha manangu anch, dijin din dia Nzamb dimeken mu Bibil tupamp 7 000