Yipul ya in Kutang

Mu mukand wend wayifundinay in Hebereu, kambuy Paul wisambina piur pa “kwanzuk kwa makas pa mutu.” Ov, wading wisambidin piur pa kuyitond amakurump ap anch chom ik chadinga chisambidinay?—Heb. 6:2.

Kwikil diyingishin dia kulonda anch mwawiy kamu, pakwez, chimeken anch Paul wadinga wisambidin kwanzuk makas mulong wa kupan yipan ya muspiritu.

Bibil ulondil piur pa kuyanzuk antu makas mulong wa kuyinkish yisend kanang ya uteokras. Moses “wamwanzuka makas” Yoshua pa chisu chamutonday mudi muntu ukumuswinkana. (Kuv. 34:9) Mu ditenchik dia Ukristu, amakundj amwing adinga awanyishina yitinau ayanzuka makas pa chisu chayitondau. (Mid. 6:6; 1 Tim. 4:14) Paul ubabeshin pa mulong wa kumwanzuk muntu makas swa.—1 Tim. 5:22.

Pakwez, Paul wayikasikesha in Kristu in Hebereu aya “kurutu kutambul malejan” mulong adinga asha kal “malejan ma kusambish.” Kupwa wisambin “kukarumuk kudiokal ku yitil ya yisalijok yiyimp, ma mutapu wa kumwitiyij Nzamb. . . . Malejan ma mutapu wa dibatish, ni ma mutapu wa kuyanzuk antu makas.” (Heb. 6:1, 2, MM) Ov, kuyitond amakurump chawiy chom cha kusambish kusu chifanyidinau in Kristu kusot kurutu? Bwat. Kwikal mukurump mu chikumangen ridi rutong rifanyidinau kwasin akadivar aswila ni kurisanger.—1 Tim. 3:1.

Kwadinga rutong rikwau ra kwanzukan makas. Mu mivu chitot ya kusambish, Yehova wayilika antu end in Isarel a ku mujimbu ni wakata Isarel wa muspiritu, chikumangen cha in Kristu azizidilau many. (Mat. 21:43; Mid. 15:14; Gal. 6:16) Yilay ya yipan ya muspiritu, mudi kulond jindim jindjing, yadinga uman wa patok wa kukarumuk kwasadikaku. (1 Kor. 12:4-11) Pa chisu chitiyijay Kornelius ni in chikumbu chend, antu inay asu atambula spiritu utumbila, ni chamekana patok pa chisu chalondau “mu jindim.”—Mid. 10:44-46, MM.

Pa kusut kwa yisu, yipan ya yilay adinga ni kuyipan kusutil ku kwanzukan makas. Chisu chalejanay Filip rusangu ruwamp mu Samaria, antu avud ababatishiwa. Chisak chitakedila chamutuma kambuy Pita ni kambuy Yohan kwinikwa. Ov, mulong wak? Tutangin anch: “Chad [awiy aad] anzuka makas pa mitu yau [antu asu ababatishau], awiy amwak [spiritu utumbila].” Chom chinech chimekeshin anch atambula yipan ya spiritu, ukaliweny ukutwishau antu akwau kuman. Twij anch Simon, wadinga pasak mwin kupongishan, wamana mutapu wadinga usadila spiritu winou ni nich chibud wasota kuland ukaliweny winou wa kuyanzuk antu makas chakwel kuyinkish spiritu utumbila ukuyinkisha usu wa kusal yilay. (Mid. 8:5-20) Kwinyim, ayibabatisha antu 12 a mu Efes. Tutangin anch: “Paul chayanzukay makas mend, [spiritu utumbila] wayiwila awiy; alond nich jindim, abwak yom yisu.”—Mid. 19:1-7; isikej ni 2 Timote 1:6.

Chawiy komb, mu Hebereu 6:2, chimeken anch Paul wadinga wisambidin kwanzuk makas mulong wa kuyinkish in kwitiyij asu yipan ya spiritu.