Chisend cha Mariy mu Rutong ra Nzamb

PASALAY Yesu mudimu wend, mband umwing wazambula dizu piur mukach mwa antu avud ni walonda anch: “Diayuk divumu diakuvala ey, ni mayel miwamwa.” Anch Yesu wasota anch antu amwifukwila makwend, ing chinech chawiy chisu chadinga chiwamp cha kuyilej chakwel amwifukwila. Pakwez, ndiy wakula anch: “Ayuk kwau akata kutesh dizu dia Nzamb ni kudilam.”—Luka 11:27, 28.

Yesu kamwinkishap makwend ntumb ya pakampwil; ap kayilejap in kwilej end kusal mwamu. Chad mutapu ik chikwatijadina nich kumwifukwil kukatau kumwifukwil Mariy kudi antu avud akweta michim ya kashinsh? El tushinshikina malejan mamwing mijikena nakash mu mangand piur pa makwend a Yesu kukwatijan nich Mifund Yitumbila.

“Wakuyukish Kal,” “Ey Uyukila Pakach pa Amband”

Mwangel Gabriel wamuleja Mariy chisend chend mu rutong ra Nzamb. Pa dichuku dined, wamulangwisha wamwel anch: “Wajing, ey yey kakutapishau kal dilau dia mwiur, Mwant udi ni yeyey!” (Luka 1:28) Kulangwish kwinoku akukarumwin kand anch: “Walank! . . . Nzamb wakuyukish kal, ndiy udi ni yeyey!” Kupwa kamu, Elizabet wamulangwisha Mariy wamwel anch: “Ey uyukila pakach pa amband, diayuk kwau dibuj dia mwivumu mwey!” (Luka 1:42) Ov, mazu minam mamekeshinap anch chifanyidin kumulimish Mariy mu chilik kanang?

Chakin kamu bwat. Ap anch mazu minam madi mu malembil makatau in Katolik kumulembil Mariy, Bibil amwinend kalejenap diyingishin dia kumulembil. Gabriel ni Elizabet ading ij chisend chijim cha Mariy anch ndiy ukeza kumuval Mesia, pakwez chitongijok cha kumulembil chijikenap mu Mifund. Chinyim nich, chisu in kwilej chamwelau Yesu anch ayileja mutapu wa kulembil, ndiy wayileja anch malembil mafanyidin kuya kudi Tatukwend. Chakin kamu, malembil ma sampul mijikena ma Yesu masambishin nich mazu manam anch: “Tatukwetu udia mwiur.”—Mateu 6:9.

Umwing wa Anyikel

Malejan makwau mapalangena piur pa Mariy madi anch udi katat “Mwant mwaad mwiur.” Bibil kandikal amwinkisha mwaz winou. Pakwez, ulejen anch, ukwet ndond ya pakampwil mu ditenchik dia Nzamb dia mwiur. Ndond ik yiney?

Yesu walonda anch amwing pakach pa in kwilej end ashinshamena akez kuyikel nend mu Want wend. (Luka 22:28-30) Yesu ukez kuyinkish antu atonday usu chakwel “kuyikadish kudi Nzamb wetu kwikal ant ni in kupesh; awiy aswanyin kal pansh.” (Kuburik 5:10) Bibil utushikijin ku kulond anch Mariy udi pakach pa antu inay inkishau kal chisend chinech cha ntumb. Mulong wak tulondin mwamu?

Ukutwish wavurikany anch kupwa kwa rufu ra Yesu, Mariy wading pamwing nau in kwilej a Yesu ni anamakwend “adandamena mu kulembil.” Antu 120 adinga akumangen mulong wa kulembil, pamwing “nau amband.” (Midimu 1:12-15) Katat “chidiashika dichuku dia Pentakost,” mudi mulondinay Bibil, “awiy ading pamwing ni ndond yimwing” chisu chayizwishau nich spiritu utumbila wa Nzamb, ni asambisha kulond mu jindim jindjing.—Midimu 2:1-4.

Mariy niyend wadinga pakach pa antu ayukishau mu mutapu winou chawiy chimekeshin anch ndiy pamwing ni amband akwau atambula spiritu utumbila ayitonda chakwel eza ayikela pamwing ni Yesu mu Want wend wa mwiur. Chawiy komb, tuyingin kulond anch katat Mariy ushich nend Yesu mu uyaj mwiur. (Rome 8:14-17) Tushinshikinany yisend yimwing yikwetay ni akwau akuyikela pamwing ni Yesu mu jintong jipandakena kujimb ja Nzamb.

Kupalangesh Yiyukish Yamushena

Mukand wa Bibil wa Kuburik ulondin anch antu 144000 akez kayisangwil mu uyaj wa mwiur chakwel asala pamwing nend Yesu mudi in kupesh, ankalansambu, ni ant. (Kuburik 14:1, 4; 20:4, 6) Mudi in kupesh, akez kusadil usey wa chakupesh cha Yesu padi antu in awonsu aziyidina, akez kuyishikij ku kuwanyin muspiritu, mu mwikadil, ni ku mujimbu. (Kuburik 21:1-4) Chikez kwikal kwitapil dilau mudi ik ku mutambu wa in kwifukwil awonsu ashinshamena a Yehova kwikalaku pa chisu chinech chamushena!a

Mariy wadinga nich ni uchikwet ni katat chisend mu mudimu ujim wa jintong ja Yehova. Mulong wa kwikepish kwend, ritiy rend, kuziyin kwend, ni kwipan kwend mudi maku, pamwing ni kujijaman kwend mu yoziu, chakin kamu tufanyidin kumwimburij. Mulong wa chisend chend cha kumuval Mesia ni mulong wa kuyinkish antu yiyukish ya chikupu, tufanyidin chakin kamu kumulimish nakash.

Pakwez, dilejan dipandikena usey ditukwilejidina kudiay Mariy didi dined, ndiy pamwing nau atushalapol akwau ashinshamena a Nzamb, kakatap kumwifukwil nzamb windjing ching kusu Yehova. Mariy pamwing nau in kuyikel akwau pamwing ni Kristu mwiur, walond anch: “Kudiay ndiy ushicha mwi nkwas, ni kudi Mwan a mukoku, kwikala kuyuk ni kulim ni uyaj ni dikand chikupu ni chikupu.”—Kuburik 5:13; 19:10.

[Mazu madia kwishin kwa paj]

[Tablo wa jinsangu udia pa paj wa 4]

Kwikepish kwa Mariy, ritiy rend, ni kuziyil kwend kudi kwa usey kwa kwimburij