Winou Ndiy Kashalapol Watonday Yehova

‘Winou ndiy kashalapol wam. Ndiy umwing unatonda.’—ISAY 42:1.

1. Chom ik chiyikasikeshinau antu a Yehova asala, pakampwil mudi mushejidina Chivurikish piswimp, ni mulong wak?

MUD mushejidina piswimp chisu cha kuvurik rufu ra Kristu, antu a Nzamb akusal nawamp anch alondul chiyul chalonday kambuy Paul anch: “Tumutalany Yesu, kalal ni mwin kutenchikish wa ritiy retu.” Paul wawejaku kand anch: “Tongijokany padiay ndiy wasuta mu kutadikijan kwa yitil, chakwel en kangal uziyany ni kukangany ku mipim yen.” (Heb. 12:2, 3) Kutalang kamu nich kushinshik mwom wa kushinshaman wa Kristu, djat ni ku yakupesh yend, ku kutukwash etu awonsu twikala in Kristu azizidilau many ap ambay nau amikoku akwau chakwel adandamena kumusadil Yehova nich kushinshaman ni iyepa ‘kuziy mu mipim yau.’—Isikej ni Galatia 6:9.

2. Yom ik tukutwisha kwilejin ku uprofet wa Isay wisambidina piur Mwan a Nzamb?

² Kusutin kudiay muprofet Isay, Yehova wamupepila uprofet wadinga ulondila piur pa Mwanend. Uprofet winou ukutukwash chakwel “tumutalany Yesu, kalal ni mwin kutenchikish wa ritiy retu.”a Uletining chitokish pa untu wend, mar mend, ni kumuzambwish kwend mudi Mwant ni Mukol wetu. Ukutwovish kamu zwang chirumburikina Chivurikish, chitukeza kuvurik muvu unou Diakanying urel, pa Ndol 9.

Kumujingunin Kashalapol

3, 4. (a) Mu mukand wa Isay, dizu “kashalapol” dilejen ik? (b) Mutapu ik Bibil amwinend mu mujinguninay Kashalapol wisambidinau mu Isay shapitre wa 42, 49, 50, 52, ni wa 53?

³ Dizu “kashalapol” dimeken tupamp tuvud mu mukand wa Isay. Chisu chimwing adisadidil mulong wa muprofet amwinend. (Isay 20:3; 44:26) Yisu yikwau adisadidil mulong wa muchid win wawonsu wa Isarel, ap anch Yakob. (Isay 41:8, 9; 44:1, 2, 21) Chad mutapu ik chidia pa uprofet wa usey nakash wisambidina piur pa Kashalapol wafundau mu Isay shapitre wa 42, 49, 50, 52, ni mu wa 53? Mifund ya Ugrek ya win Kristu yitushilap mu kujilijil pa mulong wa kumujingunin Kashalapol wa Yehova wisambidinau mu mashapitre minam. Cha musangar, mwant mwin Etiop wisambidinau mu mukand wa Midimu wadinga utangin umwing wa uprofet winou chisu chamutakelau mwin kulejan Filip kudi spiritu chakwel aya asankanijana nend. Mwant, wading utangin chikunku cha Bibil chitukata ilel kutan mu Isay 53:7, 8, chad wamwela Filip anch: “Nakwilembil amboku, nany ulondilau mwamu kudi muprofet? yend amwinend bil anch, ya mukwau?” Filip wamurumburila pakad kulab anch Isay wadinga wisambidin piur pa Mesia, Yesu.—Mid. 8:26-35.

⁴ Padingay Yesu uchidi mwanikanch, muntu umwing utentamina dijin diend Simeon walonda ku usu wa spiritu utumbila anch: “Mwan Yesu” ukez kwikal ‘chimunyik chikeza kuyimunyikin antu a michid yikwau,’ mudi mwachibwakau mu Isay 42:6 ni mu 49:6. (Luka 2:25-32) Chikwau kand, mar mamumeshau Yesu pa uchuku wamwozau madinga amabwaka kal mu uprofet wa Isay 50:6-9. (Mat. 26:67; Luka 22:63) Kupwa kwa Pantekost wa mu muvu wa 33 C.C., kambuy Pita wamujingunina kamu Yesu nawamp anch udi “Kashalapol” wa Yehova. (Isay 52:13; 53:11; tang Midimu 3:13, 26.) Yom ik tukwilejina ku uprofet winou wisambidina piur pa Mesia?

Yehova Umufumbin Kashalapol Wend

5. Kufumb ik kwamufumbau Kashalapol?

⁵ Umwing wa uprofet wa Isay ulondina piur pa Kashalapol wa Nzamb uletin chitokish pa urund wa piswimp wadingay nich Yehova ni Mwanend kabuzivumu kurutu ikala muntu. (Tang Isay 50:4-9.) Kashalapol amwinend walonda anch Yehova udandamedin kumufumb, palondinay anch: “Machuku mawonsu pamanch ukat kwinginkish impu ya kutesh malejan mend.” (Isay 50:4) Pa chirungu chinicha chawonsu, Kashalapol wa Yehova wamuteshang Tatukwend ni wilejinang kudiay ndiy, ni wikala mwin kwilej uziyidina. Witapila dilau mudi ik dia kumulej kudiay Sakatang wa mangand!

6. Mutapu ik wamekeshay Kashalapol kuziyil kwend kutentamina kudiay Tatukwend?

⁶ Mu uprofet winou, Kashalapol umutazukin Tatukwend anch: ‘Nsalejam Yehova.’ Mazu minam mamekeshin anch Kashalapol wileja uyakin wa pa dishin wa ukaleng ni win mangand wa Yehova. Chakwel anch amekesha kuziyil kwend kutentamina kudiay Tatukwend, ndiy walonda anch: “[ Yehova, NW] wanginkisha ronganyin, niyam kinamubwambwilap ap kinachinap kuya kulemp nendendiy.” (Isay 50:5) Ndiy wadinga “nend [ Yehova] pamwing mudi mwant wa mudimu” pa chisu chatangay mangand ni muntu. Win “mwant wa mudimu” ou ‘wasangera chisu chawonsu kurutu kwa Yehova, mu mangand mwend mashichau antu, wasangera kand mu antu awonsu.’—Jinsw. 8:22-31.

7. Yom ik yimekeshina anch Kashalapol wadinga nich ruchingej mudiay Tatukwend anch ukumukwash mu chirung cha yoziu?

⁷ Kumufumb kwamufumbau Kashalapol winou ni rukat rend mulong wa antu yamutenchika chakwel chisu chezay pansh watwisha kura nich rupompat rikash. Wadandamena kusanger kusal rusot ra Tatukwend, ap kamu pamuzengolau nakash. (Kus. 40:8; Mat. 26:42; Yoh. 6:38) Mu yoziu yend yamushikena padingay pa divu, Yesu wadinga ni ruchingej anch Tatukwend umwitiyijin ni ukumukwash. Mudi mwachibwakau mu uprofet wa Isay, Yesu watwisha kulond anch: “Nzamb udi piswimp ni yamam. Ndiy ukez kanyingish. Ov, kwisu kudiay muntu ukutwisha kwinfund am? . . . Anch [ Yehova, NW] Nsalejam amwinend wanlondilap am.” (Isay 50:8, 9) Chakin kamu Yehova wamukwasha Kashalapol wend ushinshamena mu mudimu wend wasalay panap pansh, mudi muwalejana uprofet ukwau wa Isay.

Mudimu Wasalay Kashalapol Pansh

8. Yom ik yimekeshina anch Yesu wadinga ‘umwing watonday’ Yehova mudi mwachibwakau mu Isay 42:1?

⁸ Rusangu ra Bibil rilejen yashikena chisu chamubatishau Yesu mu muvu wa 29 C.C. anch: “Spiritu Utumbila amushirishila padiay ndiy mu chifu mudi iyemb, ni dizu diadioka mwiur anch: Yey Mwanam ukatishena, mu ey nikat kusanger.” (Luka 3:21, 22) Yehova wamujingunisha kamu patok ‘umwing wend watonday,’ wisambidinau mu uprofet wa Isay. (Tang Isay 42:1-7.) Chisu chasalay mudimu wend panap pa divu, Yesu wawanisha uprofet winou mu mutapu ushimokishina nakash. Mu Rusangu Ruwamp rafunday Mateu, ndiy wafunda mazu madia mu Isay 42:1-4 ni wamasadina padiay Yesu.—Mat. 12:15-21.

9, 10. (a) Mutapu ik wawanishay Yesu Isay 42:3 chisu chasalay mudimu wend? (b) Ov, mutapu ik waletay Kristu ‘kutentam’ padingay pa divu, ni mutapu ik watekay “dirumburish ditentamina pa mangand”?

⁹ Amakurump a chirelijon a Ayuda adinga ni kuyipipesh Ayuda avud. (Yoh. 7:47-49) Antu adinga nikuyimesh mar ni ayifanikesha nich “mushiy usotilau kukatul” ap mudi “moj wa lamp” uchibudishina mish. Pakwez, Yesu, wayanakena atuzweny ni ayimana mar. (Mat. 9:35, 36) Antu mudi inay wayitazuka nich kwishimpish, anch: “Ezany kwen kudi am en awonsu ukata kusalany mudimu ni ukwetany yisend yilimina, am nikuninkishany kwiswedish.” (Mat. 11:28) Chikwau kand, Yesu ‘waleta dirumburish ditentamina’ pafundishay yijil ya Yehova yilejena yom yiwamp ni yiyimp. (Isay 42:3) Walejana kand anch Chijil cha Nzamb chiswirikedin kuchisadin nich kwisikan ni riy. (Mat. 23:23) Yesu wamekesha kand kutentam palejanangay pakad kasolikany kudi ampich ni atuzweny.—Mat. 11:5; Luka 18:18-23.

¹⁰ Uprofet wa Isay wabwaka kand anch ‘umwing watonday’ Yehova ukutek “dirumburish ditentamina pa mangand.” (Isay 42:4) Yawiy yom yikezay kusal pakad kulab pakwikalay Mwant wa Want wa Umesia, ukushesh Mant mawonsu ma chipolitik ni ukuswinkeshap winyikel wend utentamina. Ukez kutenchik ngand yisu, “kukusokau in kutentam.”—2 Pita 3:13; Dan. 2:44.

“Kutok” ni “Manswik”

11. Mutapu ik wadingay Yesu “kutok ku michid” mu mivu chitot yakusambish, ni mutapu ik udia mwamu ni ilel unou?

¹¹ Mu kuwanish kwa Isay 42:6, Yesu wimekesha chakin kamu mudi “kutok ku michid.” Chisu chasalay mudimu wend pansh, wayiletina bil Ayuda kutok kwa muspiritu. (Mat. 15:24; Mid. 3:26) Pakwez Yesu walonda anch: “Yam kutok kwa mangand.” (Yoh. 8:12) Wikala kutok kudi Ayuda ni kudi in michid kichadingap kusu mulong wakuyiletin kutok kwa muspiritu pakwez kand mulong wapesha mwom wend wa untu uwanyidina mudi difut mulong wa kuyikwol antu awonsu. (Mat. 20:28) Kupwa kwa kusanguk kwend, wayinkisha in kwilej end mudimu wakupan uman wend “ni kwisudiel kwa mangand.” (Mid. 1:8) Chisu chasalau mudimu wau, Paul nend Barnaba ajimbula niyawiy dizu “kutok ku michid” ni akusadila mulong wa mudimu wau wa kulejan wadingau ni kusal mukach mwa Ayuda. (Mid. 13:46-48; isikej nich Isay 49:6.) Mudimu winou audandamedin kuusal ni katat kudiau akadivar azizidilau many a Yesu achidia pansh ni ambay nau apanina kutok kwa muspiritu ni kuyikwash antu chakwel amwitiyija Yesu, “kutok ku michid.”

12. Mutapu ik Yehova mwamupanay Kashalapol wend mudi “manswik pakach pa antu awonsu”?

¹² Mu uprofet wawiy umwing, Yehova wamuleja Kashalapol wend watonday anch nikez kukutek “ey kwikal manswik pakach pa antu awonsu.” (Isay 42:6) Satan wasala usu nakash chakwel amujipa Yesu ni amukangesha kand kuwanyish mudimu wend pa divu, pakwez Yehova wamukinga kushik kamu ni pa chisu chend chadinga chatekay kal mulong wa kufa. (Mat. 2:13; Yoh. 7:30) Kupwa Yehova wamusangula Yesu ni wamwikadisha “manswik,” ap kushilamu kwa kuchip, mulong wa antu adia pa divu. Kushilamu kwa kuchip kwinoku kwaleta kashinsh anch Kashalapol ushinshamena wa Nzamb ukudandamen mudi “kutok ku michid,” mulong wa kuyikol antu adia mu mididim ya muspiritu.—Tang Isay 49:8, 9.b

13. Mutapu ik Yesu wayikolay “adia mu rukan ra mididim” pasalay mudimu wend pa divu, ni mutapu ik udandamedinay kusal mwamu ilel?

¹³ Mu kukwatijan nich kushilamu kwa kuchip kwinoku, Kashalapol watonday Yehova “ukez kaburil mes ma amputames,” ni “kuyisuril adia mu rukan ra mididim.” (Isay 42:7) Pasalay mudimu wend pa divu, mwamu mwasalay Yesu nich kusaul patok mafundish ma relijon wa makasu ni walejana rusangu ruwamp ra Want. (Mat. 15:3; Luka 8:1) Chawiy chayikolay Ayuda ikala in kwilej end mu relijon wa makasu. (Yoh. 8:31, 32) Mu mutapu wawiy umwing, Yesu wayikola muspiritu mamiliyon ma antu akad kwikal Ayuda. Wayinkisha in kwilej end mudimu ni wayilej anch: “Chawiy en yangany kwen ku michid yawonsu uyikadishany in kwilej,” ni wayikana anch ukwikal pamwing nau in kwilej end “chikupu ni kwisudiel kwa mangand.” (Mat. 28:19, 20) Kristu Yesu utakedil mudimu wawonsu wakulejan, kudiokal mwiur.

“Kashalapol” Utumbila wa Yehova

14, 15. Mulong wak ni mutapu ik Yehova mwamutumbishay Kashalapol wend?

¹⁴ Mu uprofet ukwau wisambidina piur pa Kashalapol Mesia, Yehova walonda anch: “Kashalapol wam ukez kawanyish mudimu wend wawonsu nawamp. Akez kamutumbish kamu nakash.” (Isay 52:13) Pamanay kuziyil kushinshamena kwa Mwanend ku ukaleng Wend ni kujijaman kwend padingay mu choziu chikash, Yehova wamutumbisha.

¹⁵ Kambuy Pita wafunda mulong wa Yesu anch: “Wayil kal mwiur, udi ku chikas cha katatuku cha Nzamb; ni angel ni anyikel ni mant aziyila kudiay ndiy.” (1 Pita 3:22) Chilik chimwing, kambuy Paul ni ndiy wafunda anch: “Ndiy wikepisha amwinend, wikal mwin kuziyil ku rufu, inge ku rufu [pa mutond wa mar, NW]. Chawiy Nzamb wamuzambula piur, ni kumwinkish dijin didia piur pa majin mawonsu, chakwel mu dijin dia Yesu manungin mawonsu mazengaminang, ni mwiur ni pansh ni kwishin kwa divu; ni chakwel jindim jawonsu jikwitiyij anch: Yesu Kristu ndiy Mwant, ku uyaj wa Nzamb Tatuku.”—Filip. 2:8-11.

16. Yesu ‘amutumbisha kamu nakash’ mutapu ik mu muvu wa 1914, ni yom ik yiwanyishinay kudiosh kamu pinipa?

¹⁶ Mu muvu wa 1914, Yehova wamutumbisha Yesu chipandikena. ‘Amutumbisha kamu nakash’ pa chisu Yehova chamwikadishay Mwant wa Want wa Umesia. (Kus. 2:6; Dan. 7:13, 14) Kudiosh kamu pa chisu chinicha, Kristu wasambisha kuyikel “mukach mwa akankuny [nend].” (Kus. 110:2) Chakusambish wamuyikela Satan nau ayilembil end, wayidjibwila piswimp-piswimp ni divu. (Kubur. 12:7-12) Kupwa, wasala mudi Sirus Mujim, Kristu wayikola akadivar nend ashadilap azizidilau many adia pa divu mu uswik wa “Babilon mujim.” (Kubur. 18:2; Isay 44:28) Ndiy utakedila mudimu wa kulejan mu mangand mawonsu uyikumangejina “amwing a mwi mbut ya mband” a akadivar nend a muspiritu pamwing ni makum ma mamiliyon ma “amikoku akwau,” arund ashinshamena a ‘chisak chikemp cha amikoku.’—Kubur. 12:17; Yoh 10:16; Luka 12:32.

17. Yom ik twileja kal kusutil ku kwilej uprofet wa Isay wisambidina pa mulong wa “kashalapol”?

¹⁷ Kwilej uprofet winou ujim udia mu buku wa Isay kwawejin kal musangar wetu mulong wa Mwant wetu, ni Mukol wetu, Kristu Yesu. Kuziyil kwend mwan pasalay mudimu wend padingay pa divu kwamekesha kufumb kwamufumbau kudiay Tatukwend kurutu kwa kwez panap pa divu. Wimekesha amwinend anch udi “kutok ku michid” kusutil ku mudimu wend wasalay ni kusutil ku mudimu wa kulejan utakedilay kushik ni katat. Mudi mutukumana kurutu oku, uprofet ukwau wisambidina piur pa Kashalapol Mesia ulejan anch chamufanyidina amana mar ni afa mulong wetwetu, yawiy yom yitufanyidina ‘kutongijokin’ mudi muchasheja kal Chivurikish cha rufu rend.—Heb. 12:2, 3.

[Mazu madia kwishin kwa paj]

Kuchirikinamu

• Nany “kashalapol” wisambidinau mu uprofet wa Isay, ni mutapu ik twija?

• Kufumb ik kwamufumbau Kashalapol kudi Yehova?

• Mutapu ik udiay Yesu “kutok ku michid”?

• Mutapu ik wamutumbishau Kashalapol?

[Chipich chidia pa paj wa 21]

Filip wamujingunina “kashalapol” wisambidinay Isay anch Yesu, Mesia

[Chipich chidia pa paj wa 23]

Mudi Kashalapol walonday Yehova, Yesu wayanakena atuzwendj ni ayimana mar

[Chipich chidia pa paj wa 24]

Yesu amutumbisha kudi Tatukwend ni amudisha want mudi Mwant wa Want wa Umesia