3 Ileja Uyakin Piur pa Yesu

“Mulong Nzamb wakata ngand, ndiy wapana Mwanend wa kuval kwend umwing chakwel mwawonsu ukwitiya kudiay ndiy kakujiyip, pakwez ukwet kal mwom wa chikupu.” —Yohan 3:16.

OV, CHISU CHITAK? Antu amwing akusot witiyija anch Yesu kadingap muntu wakin. Akwau niyawiy itiyijin anch wadingaku pakwez alondining kand anch wadinga kwend muntu mudi antu awonsu ni wafa kal kwend.

OV, MUTAPU IK TUKUTWISHA KUCHIPANDAKAN CHITAK CHINECH? Imburij mwin kwilej Nataniel.a Murund nend Filip wamuleja anch, nitongin anch namuman kal Mesia—“Yesu wa ku nazaret, mwan wa Yosef.” Pakwez, Nataniel kitiyijap kusu ching mulong wa yamulejay Filip. Pakwez, ndiy wamwakula anch: “Ov chom chiwamp chikutwish kudiokal ku Nazaret?” Chikalap nchik kwidjidjek kwend, Filip wamwela anch: “Ez utala” amwiney. (Yohan 1:43-51) Niyey ukutwish wataninamu uman piur pa Yesu. Ov, chom ik ukutwisha wasal?

Shinshikin uman wa mu rusangu ra muntu ulejena anch chakin kamu Yesu wadingaku. Joseph nenday Tacite adinga antu aad in kwilej rusangu ra muntu alimishau nakash adingaku mu mivu chitot ya kusambish ni kadingap kwau in Kristu. Awiy amujimbwil Yesu Kristu mudi muntu wakin wadingaku. Parumburilau mutapu wayifishau nich in Kristu kudiay Mwant Nero wa in Rome anch awiy akisha kasu kosha Rome mu muvu wa 64 C.C., Tacite wafunda anch: “Nero wayifisha nich ni kuyifutish yibau yikash ni wayidimwisha nich kuyimesh mar makash chisak chadinga chikisinau, adingau ni kutazuk kudi antu anch in Kristu. Christus [Kristu], kudiokila dijin diau, amufisha nich nayimp ni kumuzengol nakash mu winyikel wenday Tibère ni amupana mu makas mwa in kumumesh mar kudi umwing wa anyikel etu, Pontius Pilatus.”

Kulondulijan nich yalondau in kwilej rusangu ra muntu a mu chitot cha mivu cha kusambish ni cha kaad piur pa Yesu ni piur pa in Kristu akusambish, buku Encyclopædia Britannica, Dichap dia mu muvu wa 2002, ulondil anch: “Jinsangu jinej jakin jilejen anch pasak ap akankuny a Ukristu adinga itiyijin anch Yesu wadingaku, ching piswimp ni kwisudiel kwa chitot cha 18, mu chitot cha 19 ni kwisambishil kwa chitot cha 20 pawiy patadikau kapamp ka kusambish piur pa kwikalaku kwa Kristu.” Mu muvu wa 2002, mutu umwing wafundau mu The Wall Street Journal walonda anch: “In kwilej nakash avud, kudioshaku antu akemp akad kwitiyij kwikalaku kwa Nzamb, amwitiyijin awonsu Yesu wa ku Nazaret anch udi muntu mujim mu rusangu ra muntu.”

Shinshikin uman ulejena anch Yesu wavumbuka. Pamukwatau Yesu kudi akankuny nend, arund nend a piswimp nakash amuchina awonsu amusha amwinend, ni mulong wa wom, murund nend Pita wamutuna anch kamwijap. (Mateu 26:55, 56, 69-75) Kupwa kwa kumukwat Yesu, in kwilejend apalangana awonsu. (Mateu 26:31) Kupwa, kukashimuk, in kwilejend wom wapwa achirik kand. Pita ni Yohan nich kukapuk atadikijana ni amakundj amufisha nich Yesu rufu. In kwilej a Yesu apalangesha malejan mend nich kukapuk mu Want wawonsu wa in Rome, itiyija kufa pa ndond pa kwitun ritiy rau.

Chom ik chayishikija ku kukapuk mwamu? Kambuy Paul warumburila anch Yesu amuvumbula kudiokal ku rufu ni “wamekana kudi Kefas [Pita]; chad wamekan lel kudi adikum ni aad.” Paul wawejinaku kand anch: “Chawiy ndiy wamekana kudi apandakena ayitot yitan ya akadivar kapamp kamwing.” Antu avud amumana adinga achidi aom pa chisu chafunday Paul mazu minam. (1 Korint 15:3-7) Uman wa kaman umwing ap aad chadinga chiswapel kuutadik kudi in kwidjidjek. (Luka 24:1-11) Pakwez uman wa antu yitot yitan ni kusut wadinga ukash ni wamekesha chakin anch Yesu amuvumbula kudiokal ku afu.

DIFUT IK DIDIAKU? Antu amwitiyijina Yesu ni amuziyidila akutwish ayilikishin yitil yau ni akutwish ikal ni kom kakad kufa nich. (Marko 2:5-12; 1 Timote 1:19; 1 Pita 3:16-22) Anch afa, Yesu washilamu kuyivumbul “dichuku dia kwisudiel.”—Yohan 6:40.

Anch usotil jinsangu jikwau jivud, tal shapitre wa 4, ulondila anch: “Yesu Kristu Udi Nany?,” ni shapitre wa 5, ulondila anch: “Difut—Chipan cha Nzamb Chipandakena Kujimb,” mu buku Chom Ik Chakin Kamu Chifundishinay Bibil?b

[Mazu madia kwishin kwa paj]

[Chipich chidia pa paj wa 7]

Kimb uman piur pa Yesu, mudi mwasalay Nataniel