2 Akany Ronganyin Rakin ra Nzamb
“Kupand kwin kwa chikupu kwawiy oku, chakwel akwijika ey Nzamb wakin, ni watuma ey, ndiy kamu Yesu Kristu.”—Yohan 17:3.
OV, CHISU CHITAK? Antu amwing alondining anch Nzamb kadingakwap. Akwau niyawiy itiyijin anch Nzamb udi mudi rinkind, uding kwawonsu kwawonsu. Antu itiyijina anch udi wakin, alejen malejan mapwitijadina piur pa mutapu udingay ni piur pa ngikadil yend.
OV, MUTAPU IK TUKUTWISHA KUCHIPANDAKAN CHITAK CHINECH? Njil yimwing ya kwakin ronganyin ra Nzamb yidi kutal yom yatangay. Kambuy Paul walonda anch: “Mulong Nzamb udia wakad kumekan ku mes kwisambishil kwa mangand ukat kumekan nawamp mu yom yatangau; wawiy usu wend wa chikupu ni wi-Nzamb wend.” (Rome 1:20) Kusutil ku kushinshikin nawamp yitang, ukutwish wilej yom yivud piur pa manangu ni usu wa Sakatang wetu.—Kuseng 104:24; Isay 40:26.
Pakwel anch twaka ronganyin ra untu wa Nzamb, muntu ni muntu ufanyidin kuburil Bibil, Dizu dia Nzamb, chakwel ilejad amwinend. Kangal wayilik antu akwau akukwatina mupak pa yom yiufanyidina kutong. Pakwez, londul chiyul cha Bibil chilondila anch: “Kangal wilikejany mu chaku cha mangand minam, pakwez karumukinany ku manangu masu, chakwel en wijikangany yiwapila ni yirijekina ni yiwanyidina ku rusot ra Nzamb.” (Rome 12:2) Chilakej, tushinshikinany uyakin ulondwilaku ou ulejena Bibil piur pa Nzamb.
Nzamb ukwet dijin diend. Kwisambishil dijin dia Nzamb diadinga mu Bibil tunan twa tupamp. Mu yikarumun yivud aditekin ching kusu mu Kuseng 83:18, Les Saintes Écritures — Traduction du monde nouveau ulondila anch: “Akijika anch, yeya kusu amwiney ukweta dijin dia Yehova, udi Piur pa pansh pawonsu.”
Yehova Nzamb ukweting yovil piur pa yom yisadilingau antu. Pa chisu chayidioshau in Isarel mu uswik mu Idjibit kudiay Yehova, chisu ni chisu adinga ni kujiril chiyul chend cha manangu. Kubwambwil kwau ‘kwamwovisha kuyip.’ Yisal yau yamunenganesha “Utumbila wa Isarel.”—Kuseng 78:40, 41.
Yehova utulamin muntu ni muntu. Payilejay in kwilejend, Yesu walonda anch: “Akat kulandish amiswesu aad ku rufalang rumwing, pakwez kwikil muswesu ukutwisha kuwa pansh wakad Tatukwen kwitiy. Chawiy niyen, Nzamb wachindil kal nswich jawonsu jidia ku mitu yen. Chad en, kangal wovany wom, mulong ukwetany usey uvud kupandakanamu amiswesu avud!”—Mateu 10:29-31, MM.
Nzamb kakatiningap nakash ulombu wa chikit ap chishankur cha muntu kanang kupandakanamu akwau. Kambuy Paul wayileja Agrek a mu Aten anch Nzamb “watanga muntu umwing, chad ku muntu umwing kwawiy kwadiokala michid yawonsu, chawiy Nzamb wayipalangesha mu mangand mawonsu.” Kupwa walonda kand anch Nzamb “kadiap kulemp ni muntu mwawonsu.” (Midimu 17:26, 27, MM) Kambuy Pita niyend walonda anch: “Nzamb kakwetingip kasolikany ka muntu; pakwez ukat kwitiyij kwend kudi wa muchid wawonsu ukata kumwov ndiy wom, ni kusal midimu ya kutentam.”—Midimu 10:34, 35.
DIFUT IK DIDIAKU? Antu amwing “akwet kal mushiku wa Nzamb, pakwez kiudip wa ronganyin.” (Rome 10:2) Ang wij yilejena chakin kamu Bibil piur pa Nzamb, kwikil ukutwisha kukudimb ni ukutwish kwikal “piswimp [ni] Nzamb.”—Yakob 4:8.
Anch usotil jinsangu jikwau jivud, tal shapitre wa 1, ulondila anch: “Wisu Uyakin Piur pa Nzamb?,” mu buku Chom Ik Chakin Kamu Chifundishinay Bibil?a
[Mazu madia kwishin kwa paj]
a Wapalangeshau Atuman a Yehova.
[Chipich chidia pa paj wa 6]
Njil yimwing ya kwakin ronganyin ra Nzamb yidi kutal yom yatangay