1 Ikalany ni Ritiy Rikash mu Bibil

“Mazu mawonsu ma mukand wa Nzamb madiokala ku [spiritu] wa Nzamb, makutwish kuyilej antu kuyibabesh ni kuyitenchik.” —2 Timote 3:16.

OV, CHISU CHITAK? Antu avud alondining kwau anch, Bibil udi kwend mukand wa manangu ma antu. Akwau ni yawiy itiyijining anch, kalondilap uyakin pa rusangu ra muntu. Ni akwau kand alondining anch chiyul cha Bibil chasika kal kwau.

OV, MUTAPU IK UKUTWISHA KUCHIPANDAKAN CHITAK CHINECH? Chisu chivud, antu atadikininga ukinakin ap usey wa Bibil, kandikal ashinshikinangap yom yiney ayinau. Alondining kwau yiteshiningau antu akwau alond lel. Pakwez, Bibil amwinend uyudil anch: “Muntu wamwamu ukat kwitiyij mazu mawonsu, pakwez muntu ubabela ukat kushinshik kuyilay.”—Jinswir 14:15.

Pa ndond pa kwitiyij cha wimputames yom yilondiningau antu akwau, ov mulong wak ulikin kulondul chilakej cha in Kristu adingaku mu mivu chitot ya kusambish mu Berey, kwindum kwa Grèce wa katat? Awiy kitiyijap ching kusu yadingau ni kulond antu akwau. Pakwez, awiy adinga ni chaku cha “kutang mukand wa Nzamb pichuku pichuku, ni kutal anch yom yiney mwamu muyidia.” (Midimu 17:11) El tushinshikinany katat mayingishin maad malejena mulong wak utufanyidina kuchingejin Bibil anch udi Dizu diapepilay Nzamb.

Jinsangu jidia mu Bibil jidi jakin. Mu kusut kwa mivu, antu in kwidjidjek adinga ni kutadik—ni achidandamedin ni kutadik—jinsangu jidia mu Bibil piur pa majin ma antu ni ma jindond jijimbwilau. Pakwez, chisu ni chisu, uman ulejen anch kwikil cha kwidjidjek ni jinsangu jidia mu Bibil jimekening ching kwikal jakin.

Chilakej, pa chisu chimwing in kwilej Bibil amwing adinga ni kutadik anch Sargon Mwant wa in Asiria wisambidinau mu Isay 20:1 anch kadingakwap. Pakwez, mu mivu ya 1840 in kupundol yom ya pansh asambisha kupund chikumbu cha mwant winou. Katat, Sargon wikadil kal umwing wa ant in Asiria ijikena nakash.

In ntad adinga ni kulond anch Pontius Pilat, nyikel wa in Rome waleta mbil ya kumujip Yesu anch, kadingakwap. (Mateu 27:1, 22-24) Pakwez mu muvu wa 1961 avumbula diyal dimwing padinga pafundinau dijin dia Pilat ni mwaz wadingay nich piswimp ni musumb wa Kaisar mu Isarel.

Piur pa uyakin wa jinsangu jidia mu Bibil, Nimero wa U.S.News & World Report wa Mwinkind 25, 1999, ulondil anch: “Mu mitapu yimwing yishimokishena, yom yipundinau katat yilejen uyakin wa jinsangu jivud jidia mu Testament Mukur ni Musu—yilejen nawamp yikunku ya usey ya ngand ya in Isarel, Kubudik, want wa in dijuku dia David, pamwing ni mutapu wadinga mwom mu machuku ma Yesu.” Ap anch kwitiyij Bibil kwengamidinap pa yom yivumbwilau pa kupundol, ukinakin mudi winou wawiy ufanyidina kuchingejin kuman mu buku wapepilay Nzamb.

Antu a mitapu yawonsu atanyidinamu mu manangu ma usey madia mu Bibil. Kurutu kamu padingau kandikal antu asala yamu ya kuman nich atupwapu akemp-akemp nakash aletininga misongu, Bibil wadinga wisambidin piur pa kwinang ku mujimbu kukatau kusadil ni katat unou. (In Levi 11:32-40; Kuvurik Yijil 23:12, 13) Yid ya dijuku yisadidila chiyul cha Bibil chilejena mutapu wa kumusadil muntu ni muntu yikwet musangar. (Efes 5:28–6:4) Muntu ushicha kukwatijan nich yijidik yidia mu Bibil ukutwish wikal mwin kusal mudimu muwamp ap kwikal mwant wa mudimu muwamp. (Efes 4:28; 6:5-9) Kusadil yijidik yidia mu Bibil kudi kwa usey mulong wa ukash wa manangu. (Jinswir 14:30; Efes 4:31, 32; Kolosay 3:8-10) Yiyul yiwamp mudi yiney yawiy tuchingejina anch Sakatang wetu atwinkishay.

IK TUKUTANINAMU? Manangu madia mu Bibil makutwish mamubabesh ap chisup. (Kuseng 19:7) Chikwau, anch twitiyij Bibil, ukutwish watukwash kupandakanamu buku ap wisu anch twasadil ruzau rilondwilaku er chakwel twikala nich ritiy rikash.

Anch usotil jinsangu jikwau jivud, tal shapitre wa 2, ulondila anch: “Bibil—Buku Udiokila kud Nzamb,” mu buku Chom Ik Chakin Kamu Chifundishinay Bibil?a

[Mazu madia kwishin kwa paj]