Kwisu ku radiokala?

“Pa afilozof awonsu in Grek akatau kwilej ku shikol, umwing wau wadinga nich usu ukash pa yitongijok ya ashankur ya Karung wa Kasu udi Platon.” — Histoire des enfers, (Rusangu ra Turung twa Kasu) Paris, Fayard, 1991, paj wa 50, wafunday Georges Minois.

“Kusambishin pakach pa chitot cha 2 C.C., in Kristu ileja filozofi wa in Grek asambisha kwov impu ya kulejan ritiy rau mu mazu mau ayinau . . . Filozofi wayifanyina nawamp wadinga win wenday Platon [malejan menday Platon].”—Encyclopædia Universalis, Volim wa 2, mu kamutu kalondila anch: “ Antiquité et christianisme.”

“Malejan ma Egliz makasikeshidin kwikalaku kwa karung wa kasu anch udi wa chikupu. Kapamp kamwing kupwa kwa rufu mipim ya antu afila mu yitil ya rufu yiyiling kamu mu karung wa kasu, mwawiy mukatau kuyipupin mu karung wa kasu, ‘mu kutem kasu ka chikupu.’ Dipup dijim dia mu karung wa kasu didi kwaurikin kulemp ni Nzamb.” — Catéchisme de l’Église catholique (1992), Chikunku cha 1 ni cha 2, article 12, IV, par. wa 1035.

Bibil ulondil ik?

“Mulong antu aom ij anch, kwisudiel tukez kafa, pakwez antu afu kijap chom, . . . mulong ku rufu Sheol, kuukuya kwikiling midimu, ap yitongijok, ap ronganyin, ap manangu.”—Mulej 9:5, 10, Bible de Jérusalem ; Darby.

Dizu dia Hebereu she’ôl, dikarumwinau anch “ndond ya afu,” adikarumwin anch “karung wa kasu” mu yikarumun yivud ya Bibil. Maverse minam malejen ik piur pa mwikadil wa afu? Ov, amen mar mu Sheol mulong wa kuchakwish kurumbok kwau? Bwat, mulong awiy “kijap chom.” Komb chawiy nshankur Yob, pamanay mar makash mulong wa mayej makash mamukwata, wamwilembila Nzamb anch: “A! Ing njindjika kwam mwi ndond ya afu [mu Hebereu, she’ôl].” (Yob 14:13, Sacy ; talany kand Traduction Œcuménique de la Bible.) Chom ik chadinga chitinay anch Sheol yidi ndond ya mar ma chikupu? Mu kulond kwa Bibil, Karung wa Kasu, udi kwend nzay muyijikiningau antu, mwakad kwikal mudimu wa kusal ap umwing.

Oku mutapu winou wa kurumburil karung wa kasu wawiy wovikena ni ukwatijadina nich yilondila Mifund? Chitil ik, chipandakena kuyip nakash, chikutwisha kumushikij Nzamb mwin rukat ku kumumesh muntu mar chikupu? (1 Yohan 4:8) Chad anch karung wa kasu udi kwend ringany, chad chidi nchik pa mulong wa kuya mwiur?

Isikesh maverse manam madia mu Bibil: Kuseng 146:3, 4; Midimu 2:25-27; Rome 6:7, 23