Ringany Ra 3: antu Awamp Awonsu Ayiling Mwiur

Kwisu ku radiokala?

Kupwa kwa rufu ra atwimbuy a Yesu, kwisambishil kwa chitot cha kaad mu C.C., Amakurump a Egliz a kusambish ikala ni ntumb. “Malejan mapalangeshau nakash madinga ma uyaj wa mwiur ukupanau ku mupim wakad mujimbu kapamp kamwing kamu kupwa kwa kwishitwish kuswiridikina kwinyim kwa rufu.” — Dictionnaire de théologie catholique, Paris, Letouzey ni Ané, 1923, Volim wa 2, Chikunku cha 2, Mulong wa 2483.

Bibil ulondil ik?

“Ayuk kwau itudishila, mulong awiy akez kuswan ngand.”—Mateu 5:5.

Ap anch Yesu wayikana in kwilejend anch ‘ukuyirijekin ndond’ mwiur, pakwez walejana kand anch kadiap antu awonsu atentamina akuya mwiur. (Yohan 3:13; 14:2, 3) Oku ndiy walembila kand anch rusot ra Nzamb eza ‘arusala pansh mudi mwiur’? (Yetu twaladikijakal mazu minam; Mateu 6:9, 10, Version synodale) Chakin kamu, antu atentamina amwing akuya mwiur ni akwau akushal pansh. Akemp akuyikel mwiur pamwing ni Kristu, pakwez avud au akez kushakam pansh chikupu.—Kuburik 5:10.

Mu kusut kwa chisu, egliz wa kusambish waswimpa yitongijok yend piur pa mudimu wend panap pansh. Kwikala chom ik? The New Encyclopædia Britannica ulondil anch: “Egliz witenchika wasambish kuswinkan Want wa Nzamb wadinga uchingejidinau.” Egliz wasambisha kukasikesh usu wend kusutil ku kwiyandjik mu milong ya chipolitik, wavuramena mazu ma patok malonday Yesu anch in kwilejend kadingap afanyidina kwikal “a mangand.” (Yohan 15:19; 17:14-16; 18:36) Mwishin mwa usu wa winyikel wa Constantin Mwant wa in Rome, egliz wasambisha kwitun yimwing ya yitiyij yend, chimwing cha yitiyij yiney chadinga piur pa mudingay Nzamb.

Isikesh maverse manam madia mu Bibil: Kuseng 37:10, 11, 29; Yohan 17:3; 2 Timote 2:11, 12