Ov, Bibil Didi Dizu dia Nzamb?

“Mazu mawonsu ma Mukand wa Nzamb madiokila ku Spiritu wa Nzamb, makutwish kuyilej antu kuyibabesh ni kuyitenchik, ni kuyilej kwirijek mu kutentam, chakwel muntu wa Nzamb ukwikal uwanyidina mu kusal mudimu wawonsu uwamp.”—2 TIMOTE 3:16, 17.

MADI mazu ma usu mudi ik mafunday Paul piur pa usey ujim wa Bibil! Ndiy wading wisambidin chakin kamu piur pa chikunku cha Bibil chadingay nich pa chisu chinicha—mikand yikatau kutazuk antu avud anch Manswik Makur. Pakwez mazu minam misambidin kand mikand yawonsu 66 yidia mu Bibil, kuwejinaku yafundau mu mivu chitot ya kusambish ya C.C. kudi in kwilej ashinshamena a Yesu.

Ov, ukwatin Bibil ni usey nakash mudi mwasalay Paul? Ov, utongin anch in kufund Bibil adinga apepidilau chakin kamu nich spiritu wa Nzamb? In Kristu akusambish atonga mwamu. In Kristu akin itiyijin mwamu yisu yawonsu. Chilakej John Wycliffe mwimpel wa mu Angleterre wa mu chitot cha mivu cha dikum ni kanying, walonda anch Bibil udi “mudimu wimena dang wa uyakin.” Ndinguril The New Bible Dictionary, pisambinay mazu ma Paul majimbwilau kwinsambishil, ulejen anch “kupepidil kudi Nzamb, kumekeshin anch yawonsu yilondinay Bibil yidi yakin.”

Kuswimp Chitongijok Piur pa Bibil

Pakwez nlel unou, antu avud ashadishin kal ruchingej rau piur pa Bibil. Kabuku The World’s Religions kalondin anch “Ku kan in Kristu awonsu amekeshin anch itiyijin Bibil mu yisal yau ni yitiyij.” Pakwez, mu yisal yidiap yakin. Antu avud amen Bibil mudi “Yaku ya antu yakad kuchingejin.” Ap anch itiyijin anch in kufund Bibil ading antu aswila nakash mu spiritu, ayimen in kufund inay mudi antu achamwamu asala usu wa kurumburil uyakin ukash wa muspiritu pakwez aburena ronganyin ni chitokish chitukweta nlel unou.

Chakin kamu, kudi antu akemp itiyijina nlel unou anch Bibil atakela manangu ni yisal yau. Chilakej, tupamp twinch ukata kuyitesh antu alondina anch yijidik ya ngikadil ya Bibil yidi kwau yom yikurukina ni yakad usey? Antu avud iyinkishin want ipau wa kulik kulondul yijil ni yijidik ya Bibil—ap want ipau wa kulik kuyijik kwau yawonsu pamenau anch chiwapidil kusal chom kanang. Antu amwing alondina anch adi in Kristu pakwez adimben anch kijap yilondinay Bibil piur pa akamakaj, kusotan, kudimban, ni kukwachik maar.—1 Korint 6:9, 10.

Ov, mulong wak chid mwamu? Kwinsambishil kwa chitot cha mivu cha makummaad, diyingishil dimwing adijingunina kudi mwin kupund yom ya pasak chakwel kwilej Charles Marston mu mukand wend The Bible Is True. Ndiy walonda anch: “itiyija swaa pakad kunyinyit yom ya makasu ya in kufund a pa chirung chetu” atadikija uyakin wa Bibil. Ov, chikutwish kwikal chakin ni nlel unou? Ov, mutapu ik ukutwisha kuman yitongijok ni mazu ma antu atadikina uyakin wa Bibil? Tang pa chinech yilondina mutu wa mulong wambakedinap ou.