Kangal Wamwovish Spiritu Utumbila Wa Yehova Ushon
“Kangal wakamwovish spiritu utumbila wa Nzamb ushon, waninkanyau.”—EF. 4:30.
1. Ov, yik yayisadilay Yehova mamiliyon ma antu, ni chom ik chifanyidinau kusal?
YEHOVA wayisadina mamiliyon ma antu ashicha mu mangand minam ma mar chom chimwing cha pakampwil. Ndiy wasala anch atwisha kumusejin piswimp kusutil mwanend wa kuval kwend umwing, Yesu Kristu. (Yoh. 6:44) Udi pakach pa antu inay anch wipan kudi Nzamb ni washakam kwambatan nich kwipan kwinoku. Mulong udi muntu wabatishau mu dijin dia spiritu utumbila, ufanyidin kushakam nich mwikadil wambatena nich spiritu winou.—Mat. 28:19.
2. Ov, pa yipul ik tukeza kushinshikin?
2 Etu ‘tukunyinany ku spiritu’ tufanyidin kudjal muntu musu. (Gal. 6:8; Efes 4:17-24) Pakwez kambuy Paul utwinkishin chiyul ni utukandin anch kangal tumwomvovishany spiritu utumbila wa Nzamb ushon. (Tang Efes 4:25-32.) Shinshikinany katat nawamp pa verse utwatangina. Yik yasotay kulond Paul pisambinay piur pa kumwovish spiritu wa Nzamb ushon? Ov, mutapu ik ukutwishay muntu wipanina kal kudi Yehova kumwovish spiritu ushon? Ni mutapu ik tukutwisha kwipuk kumwovish spiritu wa Yehova ushon?
Yasotay Paul Kulond
3. Ov, mutapu ik ukutwisha kurumbiril yisotinau kulond mu Efes 4:30?
3 Chakusambish, shinshikin mazu ma Paul mafunday mu Efes 4:30. Ndiy wafunda anch: “Kangal wakamwovish spiritu utumbila wa Nzamb ushon, waninkanyau ku dichuku diakukolanyau.” Paul kasotap anch ambay nend akatish akaritiy ayipisha mwikadil wau wa muspiritu. Awiy “aninkanyau ku dichuku dia[yi]kolangau.” Spiritu utumbila wa Nzamb wading ni uchidi chijingidij, ap “chizu cha yom yikwau yawonsu yikutwishay kurutu” yatakelau kulejan kurutu piur pa azizidilau many adandamena kushinshaman. (2 Kor. 1:22) Chijingidij chirumburikin anch adi a Nzamb ni akez kutambul mwom wa mwiur. Antu atekau yijingidij pa mpal pau adi 144000.—Kuj. 7:2-4.
4. Ov, mulong wak chidi cha usey kwipuk kumwovish spiritu wa Nzamb ushon?
4 Kumwovish spiritu ushon kukutwish kwikal rizau ra kusambish ritwadila kukushadish rawonsu chibachikin cha usu ukash wa Nzamb mu mwom wa mwin Kristu. Kutwishik kushadish chibachikin cha usu wa spiritu, kwinoku kumekedin mu yalonday David pasalay chitil nenday Batisheba. David wadila ni kumwit Yehova dilikishin anch: “Kangal wandjibul kulemp ku mes mey, kangal wandioshil spiritu utumbil.” (Kus. 51:11) Ching kusu antu azizidilau many in “kujijaman ni kushik ku rufu” awiy akeza kutambul “chibangul” cha mwom wakad kufang mwiur. (Kubur. 2:10; 1 Kor. 15:53) In Kristu akweta ruchingej ra kushakam pa divu ni awiy aswiridin spiritu utumbila anch asotin kushal ashinshamena kudi Nzamb ni kutambul chipan cha mwom kusutil ku kutek ritiy mu difut dia yakupesh ya Kristu. (Yoh. 3:36; Rom 5:8; 6:23) Chawiy lel, etu awonsu tufanyidin kwipuk kumwovish spiritu utumbila wa Yehova ushon.
Mutapu ik Ukutwishay mwin Kristu
Kumwovish Spiritu Ushon?
5, 6. Ov, mutapu ik ukutwishay mwin Kristu kumwovish spiritu wa Yehova ushon?
5 Etu in Kristu ipaninakal, tukutwish kwipuk kumwovish spiritu ushon. Chitwishikin kusal mwamu anch ‘twendil ni twashakamin mu spiritu,’ chawiy lel maku mayimp ma mujimbu kimakezap kutupandakan ni tukezap kumekesh ngikadil yiyimp. (Gal. 5:16, 25, 26) Pakwez chinech chikutwish kukarumuk. Tukutwish kumwovish spiritu wa Nzamb ushon mu chilik cha kwilikidil ayinetu kutubachik pakemp pakemp, pamwingap pakad kwijik, ku kusal yom yilikishinau mu Dizu diafundau nich spiritu wa Nzamb.
6 Anch twadandamen kusal yom yidia chinyim nich wintakel wa spiritu utumbila, tukumwovish spiritu ushon, ni Yehova udia musul wa spiritu winou. Kushinshikin kwa Efes 4:25-32 kukez katulej mutapu tufanyidina kushakam, ni kukutwish kutukwash kwipuk kumwovish spiritu wa Nzamb ushon.
Mutapu wa Kwipuk Kumwovish Spiritu Ushon
7, 8. Rumburil mulong wak tufanyidin kwikal in uyakin.
7 Tufanyidin kwikal in uyakin. Kwambatan nich Efes 4:25, Paul wafunda anch: “Chawiy djibulany makasu, londany yakin kudi muntu ni mukwau, mulong tudi yid kudi muntu ni mukwau.” Mulong tudi mu umwing mudi “yid kudi muntu ni mukwau,” tufanyidinap kuyishadish ap kupakish kuyidimb kwa kwisotil ambay netu akaritiy, mulong chidi chilik chimwing ni kuyidimb. Mwawonsu ukudandamena mwi njil yiney ukez kayipish urund wend ni Nzamb.—Tang Jinswir 3:32.
8 Mazu ni yisal ya kudimban yikutwish kushesh uumwing wa chikumangen. Chawiy lel, tufanyidin kwikal mudi Daniel muprofet mwin kashinsh Daniel, antu akwau katanap uyimp mudi ndiy. (Dan. 6:4) Ni tufanyidin kulam mu manangu chiyul cha Paul chayinkishau in Kristu akweta ruchingej ra kuya mwiur anch yid ni yid ya “mujimbu wa Kristu” yidi ya antu akwau awonsu ni aswiridin kushal mu uumwing ni ambay nend Kristu azizidilau many akin. (Efes 4:11, 12) Anch tukwet ruchingej ra kushakam mu Paradis pa divu, ni etu tufanyidin kulond uyakin, chawiy lel tukez kukasikesh uumwing wa ukadivar wa mangand mawonsu.
9. Ov, mulong wak chidi cha usey kwitiyij yilondinau mu Efes 4:26, 27?
9 Tufanyidin kumulik Djabul, kangal twamushilany ndond chakwel ayipisha mwikadil wetu wa muspiritu. (Jak. 4:7) Spiritu utumbila utukwashin kumulik Satan. Yisu yivud, tukutwish kusal mwamu kusutil ku kwipuk ujim upandakena. Paul wafunda anch: “Anch ukwov ujim kangal wasal chitil, kangal muten wandama ni ujim wey, ap kangal wamushil Satan ndond.” (Efes 4:26, 27) Anch twajiman mulong tukwet mbil ya kwov ujim, malembil ma mu muchim makutwish kutukwash twikala nich “muchim wa kwishimpish,” umekeshina kwilam pandond pa kusal yom yikutwisha kumwovish spiritu wa Nzamb ushon. (Jinswir 17:27) Chawiy lel kangal twashalany mu mwikadil wa kutusarumun ni kumushil Satan ndond ya kutubachik tusala chom chimwing chiyimp. (Kus. 37:8, 9) Mutapu umwing utukutwisha kumulik ndiy chifanyidin kupwish swaa matend kwambatan nich chiyul cha Yesu.—Mat. 5:23, 24; 18:15-17.
10, 11. Ov, mulong wak kitufanyidinap kwiy ap kuburen uyakin?
10 Tufanyidinap kuwil mu choziu chin chawonsu cha kwiy ap kuburen uyakin. Piur pa wij, Paul wafunda anch: “Ukata kwiy kangal wiy kand, pakwez lik asal mudimu, mudimu wakin nich makas mend, chakwel ukutwish kupan kudiay uburedina.” (Efes 4:28) Anch mwin Kristu wipaninakal wiy, ukez ‘kuyipish dijin dia Nzamb’ ni kudiswingishish. (Jinsw. 30:7-9) Chifanyidinap kuyingish wij mulong wa uzwendj. Antu amukatishina Nzamb ni mutej ij anch chiyifanyidinap kuyingish wij dichuku ap dimwing.—Mar. 12:28-31
11 Paul kalejanap yitufanyidina kulik kusal; pakwez watuleja yitufanyidina kusal. Anch tushich ni kwend nich spiritu utumbila, tukez kasal mudimu ukash chakwel tutwisha kulam dijuku dietu ni kwikal nich cha “kupan kudiay uburedina.” (1 Tim. 5:8)Yesu ni atwimbuy nend ading alamina nfalang mulong wa kuyikwash atuzwendj, pakwez, Yudas Isakariot wading wiyin kwend nfalang jinija. (Yoh. 12:4-6) Ndiy kadingap utakedilau chakin kamu nich spiritu utumbila. Etu tutakedilau nich spiritu wa Nzamb “tukat . . . kushakam ni kashinsh mu yom yawonsu,” mudi mwasalay Paul. (Heb. 13:18) Chawiy lel tukez kwipuk kumwovish spiritu utumbila wa Yehova ushon.
Mitapu Yikwau Yitukutwisha kwipuk Kumwovish Spirutu Ushon
12, 13. (a) Mudi mulejenau mu Efes 4:29, mazu ma mutapu ik tufanyidina kwipuk? (b) Ov, mazu metu mafanyidin kwikal ma mutupu ik?
12 Tufanyidin kulam mazu metu. Paul walonda anch: “Kangal dises diabudik mu kan mwey, pakwez mubudik dizu diwamp dikutwisha kuyukish antu mudi muchifanyidina, ni kupan ranaken kudi awiy akuditesha.” (Efes 4:29) Chikwau kand, kambuy kalondinap kusu yitufanyidina kulik kusal; pakwez utulejin yitufanyidina kudandamen kusal. Mwishin mwa usu wa spiritu wa Nzamb, akez kutubachik tulonda anch ‘lond yom yiwamp mulong wa kukasikesh chawiy lel mazu makez kulet yibudikin yiwamp kudi antu ateshina.’ Chikwau kand, tufanyidinap kulikidil “dises” dibudika mu kan ketu. Dizu dia Grek diakarumunau anch ‘divundila’ adisadila chakwel dirumburil dibuj, insh, ap mbij jivundina. Mudi mutukata kudjibwil kulemp yakudia yiney, tukisin mazu mamenay Yehova anch madi mayimp.
13 Mazu metu mafanyidin kwikal mawamp ma uyakin, mawamp, ‘matadila mudi mungu.’ (Kol. 3:8-10; 4:6) Antu afanyidin kutwish kujingunin anch tushalijadin ni antu akwau pakuteshau yitulondina. Chawiy lel, yikwashany antu akwau kusutil ku kulond “yikutwisha ku[yi]yukish.” Ni tukutwish kwiyov mudi mwovay nfund-a-kuseng wawanga anch: “Lik mazu ma mukan mwam ni manangu nitongijokila mu muchim wam amaka ku mes kwey, A Nzamb, diyal diam, mukamunin wam.”—Kus. 19:14.
14. Kwambatan ni Efes 4:30, 31, yik yitufanyidina kudiosh pakach petu?
14 Tufanyidin kudiosh pakach petu mazu maridila, kuswej, kuchirilan, ni dizaz diawonsu. Kupwa kwa kubabesh piur pa kumwovish spiritu wa Nzamb ushon, Paul wafunda anch: “Mazu mawonsu maridila ni ujim, ni kuswej, ni jinkuny, ni kuchirilan, ayidiosha kudi en, ni dizaz diawonsu.” (Efes 4:30, 31) Pitudia antu akad kuwanyin, etu awonsu tuswiridin kusal usu ukash wa kuyikel yitongijok ni yisal yetu. Anch twalikidil “mazu maridila ni ujim ni kuswej,” matuyikela, tukez kamwovish spiritu wa Nzamb ushon. Chikwikal chilik chimwing cha kashinsh anch twalam mu muchim uyimp watusalau, twamekesh mwikadil wa rukuny ni kulik kwovijan ni muntu watusala nayimp. Anch twasambish ap kulik kulondul chiyul cha Bibil, tukutwish kukudish yaku yikutwisha kututwal ku kusal chitil pantaliken nich spiritu ni kuwil mu yibudikin yiyimp.
15. Ov, yik yitufanyidina kusal anch muntu watusal nayimp?
15 Tuswiridin kwikal antu adimukina, anakenijadina, ni kulikishijanin. Paul wafunda anch: “Ikalany antu adimukina, in kwanakenijan muntu ni mukwau, in kulikishijadin muntu ni mukwau mudi mwakulikishinanyau en kudi Nzamb mu Kristu.” (Efes 4:32, MN) Ap anch atwovishin kusansan nakash mulong wa uyimp utusadinau, tufanyidin kulikishin, mudi mutulikishidinay Nzamb. (Luka 11:4) Chilakej, anch mbay netu mukaritiy walond uyimp piur petu. Chakwel tusala usu wa kupwish milong, tufanyidin kumulondul. Kupwa anch wamekesh runeng rakin ni wit dilikishin. Tukumulikishin, pakwez tufanyidin kusal chom chikwau. Mukand wa In Levi 19:18, (MN) ulondin anch: “Kangal wez wafundakesh ap kuyilamin akwen rukuny mu muchim wey. Ukumukat mukwen mudi ey amwiney. Am nidi [Yehova].”
Kudimuk Kudi kwa Usey
16. Let chilakej chimekeshina anch tukutwish kwikal nich kuswir kwa kuswimp mwikadil wetu chakwel twipuka kumwovish spiritu wa Yehova ushon.
16 Ap ku ujindj, tukutwish kwikal ni muchim wa kusal chom chakad kumusangaresh Nzamb. Chilakej, mukadivar ukutwish kusambish kutesh mizik yiyimp. Kupwa, kom kend kakusambish kunenganan mulong wa kuburen kulondul chiyul cha Bibil chilejenau mu mikand yifundinau kudi “kashalapol ushinshamena ni kubabal.” (Mat. 24:45) Ndiy ukutwish kulembil piur pa mulong winou ni kuvurik mazu ma Paul mafunday mu Efes 4:30. Mulong wakwatin kal mupak wa kulik kusal chom chikutwisha kumwovish spiritu wa Nzamb ushon, ndiy ukukwat mupak wa kwipuk kutesh kand mizik yiyimp kudiosh pinipa. Yehova ukez kuyukish muchim umekeshinay mukadivar winou. Chawiy lel, dandamenany amboku kwipuk kumwovish spiritu wa Nzamb ushon.
17. Yik yikeza kushiken anch tudimukinap ni twaburen kulembil?
17 Anch tudimukinap ap twaburen kulembil, tukutwish kuwil mu chaku chijondila ap chiyimp chikeza kumwovish spiritu ushon. Mulong spiritu utumbila umekeshin ngikadil ya untu wa tatukwetu wa mwiur, ukutwish kwov ushon, ap kwov runeng—chom chitufanyidina kulik chakin kamu kusal. (Efes 4:30.) In kufund in Yuda a mu mivu chitot ya kusambish asala chitil palondau anch yilay ya Yesu yidiokil kudi Satan. (Tang Marko 3:22-30.) Akankuny inay a Kristu ‘amusala spiritu utumbila’ chawiy lel asala chitil chakad kuyilikishin. Kangal twashiken mu mwikadil wa mutapu winou!
18. Ov, mutapu tukutwisha kwijik anch kitwasalap chitil chakad kulikishin?
18 Mulong tusotinap kushiken ku kusal chitil chakad kutulikishin, tuswiridin kuvurik yalonday Paul piur pa kumwovish spiritu ushon. Pakwez, chikwikal nchik anch twasala chitil chikash? Anch twita dilikishin, ni atukwasha kudi amakurump, tukutwish twalond anch atulikishina kudi Nzamb, ni kitwasalap chitil pantaliken ni spiritu wend utumbila. Tukutwish, nich ukwash wa Nzamb, kwipuk kumwovish kand spiritu ushon mu mutapu win wawonsu.
19, 20. (a) Ov, yisu yom yimwing yitufanyidina kwipuk? (b) Ov, yik yitufanyidina kukwatin mupak wa kusal?
19 Kusutil kuspiritu wend utumbila, Nzamb uletin rukat, musangar, ni uumwing kudi antwend. (Kus. 133:1-3) Chikwau kand, tufanyidin kwipuk kumwovish spiritu ushon mulong wa kusalan ap mazu makad kuyilimish atufung atondau kudi spiritu. (Mid. 20:28; Yud 8) Pakwez, tufanyidin kukasikesh uumwing ni kalimish kudi umwing ni mukwau mu chikumangen. Chakin kamu, tufanyidinap kukasikeshin kusal tuyisak pakach pa antu a Nzamb. Paul wafunda anch: “Katat am nakwilembilany en akadivar, ku dijin dia Nsalejetu Yesu Kristu, chakwel ulondany chom chimwing, ni chakwel kukwikalap kwaurik pakach pen, pakwez wikalany pamwing mu manangu mamwing ni mu dizu dimwing.”—1 Kor. 1:10.
20 Yehova ukatin ni ukutwish kutukwash twipuka kumwovish spiritu wend ushon. Dandamenany amboku kulembil mulong wa spiritu utumbila ni kwikasikesh kulik kumwovish ushon. Dandamenany kand “kukunyin ku spiritu,” nich kusot kukimb wintakel wend katat ni chikupu.
Ukwakul Mutapu ik?
• Ov, kumwovish spiritu wa Nzamb kurumburikin ik?
• Mutapu ik ukutwishay muntu wipanina kal kudi Yehova kumwovish spiritu wend ushon?
• Ov, mu mutapu ik tukutwisha kwipuk kumwovish spiritu utumbila ushon?
[Chipich chidia pa paj wa 30]
Pwish matend swaa
[Chipich chidia pa paj wa 31]
Mazu mey milikejin nawamp dibuj ik?