Mulong Wak Chifanyidin Kuyilimish Amapal?
KU CHIKUM cha karung ku Californie, mu États-Unis, kuding mutond umwing ukwatinau yipich nakash kupandakanamu mitond yikwau ya pa mangand. Mutond winou autazukining anch Cyprès solitaire wijiken mudi udinga Panrend. Alejen anch, mutond winou wasadin kal mivu 250. Mulong wa kujijaman kwau, mutond winou uwamp aulama mu mitapu yivud. Chawiy lel, aukasola moj ni kuunyingumosh mayal ku mufulandal wau.
Cyprès solitaire wa panrend utuvurishin amapal in Kristu adia mukach mwetu, amekeshina kujijaman kwa pakampwil. Mutapu umwing upandakena kuwap usadinau mwamu udi kusutil ku kulejan rusangu ruwamp. Muprofet Jowel watakela kulond anch “Amapal” akez kulejan uruu wa Bibil. (Jowel 2:28-32, MN; Mid. 2:16-21) Tongin bil pa uvud wakad kuchind wa ma saa ma antu ipanina nakash mulong wa kuyikwash antu akwau chakwel ileja piur pa “Rusangu Ruwamp ra Want”! (Mat. 24:14) Antu amwing pakach pa amapal inay in kulejan Want ajijamana mivu yivud ya kuzengol ap ya mar makwau. Anch mutond kwau wa chamwamu wa Cyprès auka wijiken mulong wa kujijaman ni aukasikeshin nich mayal ni moj, amapal adia pakach petu afanyidin kuyitiyij ni kuyilimish mu mutapu ujim mudi ik!
Yehova Nzamb wayileja antwend a pasak anch: “Mutumbukinany muntu ipal ukweta jinvu. Mulimishany muntu ipal.” (Lev. 19:32, MN) Nlel unou pakach pa atushalapol a Yehova, tukwet yilakej yiwamp nakash ya antu ashinshamena ‘ashakama ni Nzamb’ mivu ni mivu. (Mike 6:8) Pakatau kudandamen kusadil yany ya Mukand wa Nzamb, jinvu jau jidi kand “chibangul cha uyaj.”—Jinsw. 16:31, MN.
Kambuy Paul wamuyula nsand Timote anch: “Kangal wamukand ikundj mukurump kwa kumuswejin.” Pakwez, Timote wafanyidina ‘kumulej mudi tatuku’ ni kuyiman ‘amband amakurump mudi a maku.’ (1 Tim. 5:1, 2) Chawiy lel, Timote wafanyidina ‘kumutumbukin’ ipal ukweta jinvu. Chimeken patok anch, Yehova usotin anch mazu metu mamekesha kalimish ka mutapu winou.
Rom 12:10 ulondin anch: “Chifanyidin kukasikesh kulimishijan amwing ni akwau.” Atulam adia mu chikumangen ayilimishin chakin kamu amapal in Kristu. Pakwez etu awonsu tufanyidin kulimishijan umwing ni mukwau.
Chakin kamu, yidi ya dijuku yikwet chisend cha pakampwil piur pa anvajau ni angakau. Piur pa mutond wa Cyprès udia panrend, antu akimba mitapu yivud mulong wa kuulam, ni adandamedin kusal mwamu. Chakin kamu, tufanyidin kukimb mutapu wa kudandamen kuyilimish anvajetu amapal ni angak. Chilakej, kwikal mwin kutesh nawamp kukutwipush kukasikesh ni kudandamen kusal yom mu mutapu tusotina pakad kubangin yovil yau.—Jinsw. 23:22; 1 Tim. 5:4.
Amapal adia pakach petu akwet usey nakash kudi Yehova. Ndiy kakezap kuyilik bwat. (Kus. 71:18) Nlel unou Nzamb wakin uyikasikeshin chakwel adandamena kumusadil nich kushinshaman. Dandamenany amboku kuyikasikesh ni kuyilimish amapal.
[Yipich yidia pa paj wa 13]
Mudi muswiridina mutond wa Cyprès udia panrend ukwash, amapal aswiridin kuyilimish
[Dizu Dirumburila]
American Spirit Images/age fotostock