Uprofet wa Usey Nakash

“Chifanyidin rusangu ruwamp ra want wa Nzamb ez arulejan bil ku mangand mawonsu ni kwikal uman kudi antu a michid yawonsu chad lel disudiel dia mangand dieza.”​—MATEU 24:14.

IN KUKIMBIJOL alondining anch verse winou ukwet usey nakash. Ukwet usey mulong mudimu ulejanay ufanyidin kusadik pa mangand mawonsu. Ukwet usey mulong ulejen anch in Kristu afanyidin kusal​—mudimu wa kulejan ukeza kusadik kurutu kwa chinship chimwing chikash chatazukay Yesu anch “disudiel.”

Verse winou wa uprofet ukat kuwanyin nlel unou. Mulong winou ukutadil mulong rusangu ruwamp rikwet diladikij ni dibabesh. ukwinkishin chisu cha kutond: Kwitiyij Want wa Nzamb ap kuulik. Kutond utondina kukwet usu pa mwom wey.

Shinshikin yalonday Yesu. Machuku mavud kurutu kwa kumupampin Yesu pa mutond, in kwilej end eza kudi ndiy ni amwipula piur pa machuku ma kurutu. Awiy asangera kwijik piur pa kutenchik kwa Want wa Nzamb walejanay Yesu. Asota kwijik kand piur pa ‘disudiel dia ditenchik dia yom,’ ap mud kamu mukarumwinau dizu dined mu ma Bibil makwau anch “kwinsudiel kwa mangand.”​—Mateu 24:3, TMK.

Mu kwakul, Yesu wasambela kulejan anch mu mangand mawonsu mukez kwikal jinjit, tumungun, yipupu, ni kuzal kujim kwa divu. Ndiy walonda kand anch kukez kwikal kuvulijan nakash kwa kujiril yijil, alej a makasu a marelijon akez kuyidimb antu avud, ni akez kuyikis ni kuyimesh mar in Kristu akin. Jiney jawonsu jadinga jinsangu jiyimp.​—Mateu 24:4-13; Luka 21:11.

Pakwez kwadinga kand rusangu ruwamp. Yesu walonda kand mazu madia kwinsambishil, ni antu avud atongina nakash pa mazu minam mu yitot ya mivu. Ap anch antu itiyijin usey wa mazu ma Yesu, pakwez akat kutadik kurumburik kwa mazu minam. Ov, rusangu ruwamp riner chom ik chakin kamu? Ov, Want chom ik? Ov, uprofet winou ukez kuwanyin chisu ik, ni kusutil kudi nany? Ni “disudiel” chom ik? El tushinshikinany.

[Chipich chidia pa paj wa 2]

Facsimile of the Washington Manuscript of Four Gospels. Akasikeshidin pa Mateu 24:14

[Dizu Dirumburila 2]

Mu buku Facsimile of the Washington Manuscript of the Four Gospels in the Freer Collection 1912