Yipul Ya In Kutang . . .

Ov, Nzamb Ukwatin Chikit Chimwing Nich Usey Kupandakanamu Chikit Chikwau?

▪ Bwat, ndiy kasadiningap mwamu. Bibil ulejen patok anch: “Nzamb kakwetap kasolikany pakach pa antu, bwat. Ku michid yawonsu, muntu mwawonsu ukata kumulimish ni kusal yom yitentamina, Nzamb ukat kumwitiy.”—Midimu 10:34, 35.

Chitongijok cha Nzamb chidi piur nakash kupandakenamu cha antu akad kuwanyin. Antu avud itiyining anch chikit chimwing (ap chau) chidi piur pa yikit yikwau. Kasolikany ka mutapu winou kamekeshin chitongijok cha Charles Darwin, wafunda anch: “Mu machuku mamwing ma kurutu, . . . yikit ya antu akweta chaku chiwamp yikez kushesh chakin kamu yikit yawonsu ya winam ni kuyiswinkesh.” Cha ushon, mulong antu avud ayijipa kudi antu amenau anch adi piur pa yikit yikwau.

Ov, yovil ya kwel anch chikit chimwing chidi piur pa yikwau yidi ya usey? Chilakej, Ov, siyans walejana anch mash ma yikit yimwing madi piur ni makwau pansh? Bwat, mulong mwin kwilej milong ya mash wa ku Oxford Bryan Sykes ulejen anch: “Kwikilingap mash makata kumekesh kushalijan kwa kabil ap chikit chimwing ni chikwau. . . . Nikat kwiyipulang anch kudi ADN wa in Grek ap misul ya maselil ap ma gènes ma in Italie, pakwez kwikil. . . . Mash mamekeshina anch tudi antu a dijuku dimwing.”

Yom yiney yambaten nich yifundinau mu Mukand wa Nzamb. Bibil ulejen anch Nzamb wamutanga ikundj ni mband umwing, antu akwau awonsu adiokala kudi antu inay a kusambish. (Disambishil 3:20; Midimu 17:26) Chawiy lel, ku mes kwa Nzamb, kudi ching kusu chikit chimwing—chikit cha muntu.

Yehova kakwatiningap nich usey ulomb wa chikit ap mwikadil wa chifu. Pakwez, ndiy ukwatining nich usey chom chimwing kusu—muchim wetu wa chifanikesh, ap untu wetu wa mukach. Ndiy ulondin anch: “Muntu ukat kutal yimenay nich mes mend, pakwez [Yehova] ukat kutal ku muchim.” (1 Samwel 16:7) Kuvurik yom yiney kukutwish kutukasikesh nakash. Ov, mutapu ik?

Chikalap nchik chikit chetu, antu avud pakach petu kakatap kusanger mulong wa mwikadil wa mujimbu wetu, ni tukwetap usu wa kuswimp chom ap chimwing. Pakwez, tukutwish kuswimp chom chimwing cha usey nakash—yitongijok ni yovil ya muchim wetu. (Kolosay 3:9-11) Anch tukwet kashinsh ayinetu, tukutwish kujingunin anch tukweting chitongijok cha kwiyov anch tudi pamwing ap piur ap mwishin mwa antu a chikit chikwau. Mulong chitongijok chinech chambatenap nich chitongijok cha Nzamb, tufanyidin kusal usu wa kudiosh yitongijok yiney yawonsu mu muchim wetu.—Kuseng 139:23, 24.

Pitusadina usu wa kwiman ayinetu ni kuyiman antu akwau mudi muyimenay Yehova, tukutwish kwikal nich kashinsh anch ukez kutukwash. Dizu diend dituvurishin anch: “Mulong [Yehova] wendishil mes mend pansh pawonsu, chakwel ayimanyin apanyina michim yau yawonsu kudi ndiy.” (2 Jinsangu 16:9) Chinech chidi chakin chikalap nchik ulombu wa chikit tukweta.