Ov, Wij?

Mutapu ik Wadingau Antakel a Relijon wa in Yuda a pa Chirung cha Yesu ni Kuyiman Antu Akwau?

▪ Mu chitot cha mivu cha kusambish C.C., antu a piur a mu chisak ni mu relijon mu Isarel ading ayikisin antu ileja pakemp ap akad kwilej. Afaris ading akat kulond anch: “Chisak chinicha cha antu kijap kwau Yijil ya Moses, chawiy Nzamb ukez kayiyindamish.”—Yohan 7:49.

Mikand yikwau yakad kwikal ya mu Bibil yilejen anch yisak yiney ya antakel yading yikat kuyitazuk antu inay akad kwilej anch a ʽam-ha·ʼaʹrets, ap “antu a ngand.” Pakusambish, diading dizu dia kalimish diasadilau mulong wa kuyitazuk antu a ngand kampand. Kadisadilap mulong wa kuyitazuk ching kusu atuzwendj ap antu a mwishin bwat pakwez adisadila kand mulong wa kuyitazuk ap antu a katumb.—Disambishil 23:7; 2 Ant 23:35; Ezekiel 22:29.

Pakwez, mu chirung cha Yesu ading akat kusadil dizu dined mulong wa kuyitazuk antu akad kwijik Chijil cha Moses ap antu akanganya kulondul kachom pa kachom mu yijil ya in rabi. Mishnah (mukand ukweta mazu mamwing mikala mufulandal wa Talmud) ulejen anch chifanyidinap kushakam mu yikumbu ya in ʽam-ha·ʼaʹrets. Kwambatan nich Encyclopedia of Talmudic Sages, mwin kwilej wa mu chitot cha kaad cha mivu Rabbi Meir walejana anch: “Anch muntu watish mwanend mband kudi mwin am ha’aretz chidi mudi wamukas kal ni kumutek kurutu kwa ntambu chakwel amumatikina mulong wa kumudia.” Talmud ujimbwil kand rabi mukwau ulejena anch “antu akad kwilej kakezap kuvumbuk.”

Ov, Dijin Kaisar Disadidinau mu Bibil dirumburikin ik?

▪ Kaisar diading dijin dia mu dijuku dia in Rom diamutazukau Caius Julius Kaisar ap Jules Kaisar, watekau mudi nyikel wa in Rom mu muvu wa 46 K.C.C. Ant a pasak avud in Rom ading akat kuyitazuk anch Kaisar, kuwejinaku ni asatu atazukinau mu Bibil pa majin mau anch—Ogust, Tiber, ni Claude.—Luka 2:1; 3:1; Midimu 11:28.

Mu muvu wa 14 C.C., Tiber wikala mwant ni wayikela mu chirung chawonsu cha mujikit wa Yesu. Chawiy lel, ndiy wading Kaisar wadinga nyikel pakulay Yesu ku chipul chamwipulau piur pa kulambul chitad, ndiy walonda anch: “Lambulany yom ya want wa in Rom kudi mwant wa in Rom, lambulany kand yom ya Nzamb kudi Nzamb.” (Marko 12:17) Chakin kamu, Yesu kisambinap ching kusu piur pa Tiber mu chakul chend. Pakwez, “Kaisar” wading uyifanikeshin in kutakel, ap Mburamatad.

Mu muvu wa 58 C.C. pamurumburishau nayimp, Paul wasadina mbil yend ya win Rom mulong wa kwit dirumburish dia Kaisar. (Midimu 25:8-11) Mu kusal mwamu, Paul kitap chakwel amurumburisha ching kusu kudi Nero, mwant wa pa chisu chinicha, pakwez wita amurumburisha ku dirumburish dijim dia want.

Dijin dia dijuku dia Kaisar dikala dia ukaleng wa kuyikel ap kupwa kwa winyikel wa Kaisar, dijin dined asambisha kudisadil mulong wa kuyitazuk in kuyikel.

[Chipich chidia pa paj wa 30]

Rufalang ra argent rikweta chipich dia Tiber