Ilejina Ku Dizu Dia Nzamb

Ov, Want wa Nzamb Chom Ik?

Mutu wa mulong winou ulangwishin yipul ukutwisha kwiyipul ni ulejen ndond ukutwisha kutang yakul mu Bibil wey. Atuman a Yehova akez kusanger kwisambin ney piur pa yakul yiney.

1. Ov, Want wa Nzamb Chom ik?

Want wa Nzamb udi winyikel wa mwiur. Ukez kuswinkan winyikel ukwau wawonsu ni kusal anch rusot ra Nzamb risadika mwiur ni pa divu. Chawiy lel, Want wa Nzamb ukez kuwanyish maswir metu ma kukimb winyikel uwamp.—Tang Daniel 2:44; Mateu 6:9, 10.

Want ufanyidin kwikal ni mwant. Yehova wamutonda Mwanend, Yesu chakwel ikala Mwant wa Want wend.—Tang Luka 1:30-33.

2. Ov, mulong wak Yesu udi Ntakel muwamp?

Mwan a Nzamb udi Mwant muwamp mulong uwapin, usadin yom yitentamina, ni ukwet usu uwanyidina mulong wa kuyikwash antu. (Mateu 11:28-30) Kupwa kwa kuvumbuk kwend, Yesu waya mwiur ni wasambisha kuchingel ku chikas cha katatuku cha Yehova. (Hebereu 10:12, 13) Kupwa, Nzamb wamwinkisha usu wa kuyikel mwiur.—Tang Daniel 7:13, 14.

3. Ov, anany akwau akeza kuyikel pamwing ni Yesu?

Chisak chitazukinau anch: “antu atumbila” achitonda kudiay Nzamb mulong wa kuyikel pamwing ni Yesu mwiur. (Daniel 7:27) Antu atumbila atondau pa kusambish ading atwimbuy ashinshamena a Yesu. Yehova wadandamen kuyitond amakundj ni amband ashinshamena mudi antu atumbila djat ni nlel unou. Mudi Yesu, awiy ayivumbula nich mujimbu wa muspiritu.—Tang Yohan 14:1-3; 1 Korint 15:42-45.

Ov, antu inch akuya mwiur? Yesu wayitazuka anch “chisak chikemp.” (Luka 12:32) Awiy akez kwikal uvud wa antu 144000, ni akez kuyikel pamwing pa divu diawonsu ni Yesu.—Tang Kujingunik 5:9, 10; 14:1.

4. Ov, Want wa Nzamb ukusambish kuyikel chisu ik?

Yesu wikala Mwant mu muvu wa 1914.a Kupwa, wamudjibula Satan ni ayilembil end pa divu. (Kujingunik 12:7-10, 12) Kusambishin pinipa, mar ma antu mapadakana nakash. Njit, kunyikek kwa divu, kamungun, yipupu ni kujiril yijil chidi chijingidij anch ditenchik dia yom yiney didi mu machuku mad ma nsudiel. (2 Timote 3:1-5) Antu awonsu asotina kutambul yiyukish ya Want wa Nzamb afanyidin kwilej mutapu wa kwikal in kumulondul Mwant, Yesu.—Tang Luka 21:7, 10, 11, 31, 34, 35.

5. Ov, Want wa Nzamb usadil ik?

Kusutil ku mudimu wa kulejan mu mangand mawonsu, Want wa Nzamb udi tayad mulong wa kuyikwash mamiliyon ma antu a michid yawonsu chakwel ileja jinjil ja Nzamb. (Mateu 24:14) Ukez kuking “chisak chipandikena kujimb” cha antu ashinshamena a Yesu chisu chikezay kushesh ditenchik dined dia yom yiyimp pa divu.—Tang Kujingunik 7:9, 10, 13-17.

Mu chirung cha mivu 1000, Want ukez kusal pakemp-pakemp chakwel divu dikala paradis. Kupwa, Yesu ukez kuchirish Want kudi Tatukwend. (1 Korint 15:24-26) Ov, wij muntu kanang ukusota kwisamb nend piur pa Want wa Nzamb?—Tang Kuseng 37:10, 11, 29.

Anch usotin jinsangu jivud, tal shapitre wa 8 ni wa 9 wa buku winou, Chom Ik Chakin Kamu Chifundishinay Bibil? wapalangeshau kud Atuman a Yehova.

[Dizu didia Kwishin kwa paj]