Ov, Kudi Muntu Uletina Uyimp Wawonsu?

MUKURUMP wa chisak cha forces armées de l’ONU cha mu Rwanda, pasambishay kutong piur pa mutapu akanganya kwimik kujipijan mwi ngand yiney mu muvu wa 1994, ndiy walonda anch: “Namunyikesha Djabul ku chikas cham.” Pisambinay piur pa yisal yikash ya chisum ya chisu chinicha, muntu mukwau walonda anch: “Anch muntu usotin kumusarumun Satan, eza atanijana ni am kwi nzay mu Rwanda.” Ov, yisal yiney ya chisum yidiokil chakin kamu kudi Djabul?

Antu avud kameningap anch chisum ni kujipijan yidi yisal ya spiritu muyimp wakad kumekan. Antu avud atongin anch yom yiney yidiokil ku uyimp udi mu muntu ni chiletina uyimp udi uyimp udia mukach mwetu. Antu akwau alejen anch kudi chisak chimwing cha ampich ni antu akweta usu, akad kumekan ayisadina antu mu dikum dia mivu mulong wa kuyikel mangand. Pakwez, kudi antu alondina uyimp piur pa winyikel wa michid ni antakel mulong wa uyimp ni mar mawonsu tumena.

Ov, chom ik ukutwisha kwitiyij? Ov, mulong wak kudi uyimp, chisum, kujipijan, ni mar mu mangand nlel unou chikalap nchik usu usadinau mulong wa kuyipwish? Mulong wak antu akat kwiyandjik mwi njil ya kujipijan, ni kulik kutesh kubabesh kukatau kutambul chisu ni chisu? Ov, kudi muntu uletina yom yiney yawonsu? Ov, nany uyikedila chakin kamu mangand? Chakul chikutwish kukushimokish.