Yipul ya in Kutang . . .

Ov, anvaj afanyidin kuyilej anau piur pa milong ya kumanijan kwa ikundj ni mband?

▪ Anvaj avud asadining usu wa kuyiking anau ku mayej makash. Anvaj afanyidin kusal kand usu winou mulong wa kuyiking anau ku yaku yiyimp. Mutapu umwing ukutwishau kusal mwamu chidi kusutil ku kuyilej malejan misikena piur pa kumanijan kwa ikundj ni mband. (Jinswir 5:3-23) Malejan minam madiokila kudi anvaj ni yany yifundishina mwikadil uwamp yidi ya usey mulong yisu yivud an akat kuyilej patok yisal ya masandj ku Televizio ni ku Internet, mu mikand, ni mu jinsangu ja kusipishan.

Mulej umwing wa kuyiy ni mwin kufund wa buku Diane Levin warumburila anch: “Nlel unou mulong udiokilap ku kuyilej an piur pa kumanijan kwa ikundj ni wimband. Pakwel mulong udiokil ku yom yikatau kwilej, chimbu cha mivu chilejinau, ni nany ukata kuyilej. An akat kutambul malejan mamwing makash ni mayimp piur pa kumanijan kwa ikundj ni mband kudi in kwisak ni ku yaku ya antu avud.”

Anvaj afanyidin kuyiking anau mulong wa yitongijok yiyimp ni ya masandj yikata kuyipish chisak cha antu. (Jinswir 5:1; Efes 6:4) Ansand aswiridin kwijik mutapu usadila mijimbu yau, mutapu wa kulam mijimbu yau, ni mutapu wa kwiking mulong wa antu ayimp. Kurutu kwa kupam—pa chimbu cha mivu pakata kumekan yijingidij ya kupam—changadim uswiridin kwijik piur pa yom yikeza kushiken ku mujimbu wend ni kwijik mulong wak ni mutapu ik chaku cha kuya kuns chikutwisha kumushiken. Chilik chimwing, nsand ufanyidin kwijik kurutu kwa chisu piur pa kulat kamwad. Pachidiau an akemp, anvaj afanyidin kuyilej majin makashinsh ma yikunku ya ku mujimbu. Anvaj a rukat ayilejining an au malejan masatu ma pakampwil piur pa yikunku yiney ya kumujimbu anch: (1) Yidi ya pakampwil ni ya kujindjik. (2) Chifanyidinap kuyisambidin mu mutapu uyimp. (3) Chifanyidinap kuyikwat ap kuyimekesh kudi antu akwau. Pakatau an kupam, anvaj afanyidin kujingunin chisu chikutwishau kurumburil mutapu ukatay mband kwikal nich madikaj.a

Ov, chisu ik chifanyidinau anvaj kusambish malejan minam? Kurutu kwa chisu kupandakanamu chitonginau antu avud. Changadim ukutwish kusambish kuya kuns pa chimbu cha mivu 10 ap kupwa kwa mivu yiney. Nsand ukutwish kusambish kulat kamwad kurutu kwa chisu pakwetay chimbu cha mivu 11 ap 12. Yinship yiney yikash yikutwish kuyakamish anch an kateshinap kurumburik kwa yom yikata kushiken. An aswiridin kutambul dikasikesh kurutu kwa chisu chakwel kangal chom chiyimp chiyishikena pakezau kuman yom yiney ya chitangil mu mijimbu yau. Chidi kand chisu cha kuyikwash chakwel ijika usey wa kuziyil ku yany ya Bibil—chom chikatau kukangany kulejan kudi antu avud akata kulejan milong ya kumanijan kwa ikundj ni mband.—Jinswir 6:27-35.

[Dizu didia Kwishin kwa paj]