DILEJAN DIA 50
Mutapu ik Ukutwisha Dijuku Diey Kwikal ni Musangar?—Chikunku cha 2
An ad chipan chidiokila kud Yehova. Uchingejin anch anvaj alama nawamp chipan chinech. Yehova uletin yiyul yiwamp ya manangu yikutwisha kuyikwash anvaj kusal mwamu. Yiyul yend yilejen kand yom yifanyidinau an kusal mulong wa kuvudish musangar mu dijuku.
1. Yiyul ik yiyinkishinau anvaj kud Yehova?
Yehova uyitin anvaj kuyikat anau ni kusutish nau chisu chivud. Usotin kand anch anvaj ayichidija anau ku ubaj ni asadina mbil ja Bibil mulong wa kuyifumb. (Jinswir 1:8) Uyilejin atatuku anch: ‘Dandamenany kuyilil anen mu jinkand ja Yehova.’ (Tang Efes 6:4.) Yehova ukat kusangar anch anvaj alondul umutakel wend payilidinau anau ni anch alik kupan chisend chinech kud muntu mukwau.
2. Yiyul ik yiyinkishinau an kud Yehova?
Yehova uyilejin an anch: “Yiziyilany anvajen.” (Tang Kolosay 3:20.) Anch an ayilimish ni kuyiziyin anvajau, akat kumusangaresh Yehova ni kuyisangaresh kand anvajau. (Jinswir 23:22-25) Yesu washa chilakej chiwamp chisu chadingay mwan mukemp. Ap anch wading muntu uwanyidina, wayiziyina ni kuyilimish anvajend.—Luka 2:51, 52.
3. Mutapu ik ukutwisha dijuku dien kusej piswimp nakash ni Nzamb?
Anch ud nvaj, chakin kamu ukatin anch aney amukata Yehova mud muumukatina ey. Chad mutapu ik ukutwisha kusal mwamu? Mu kusal yom ey yilondinay Bibil: “Ukamalejanangany [mazu ma Yehova] kudi anen, ukamisambinangany piukushakamanya mu yikumbu yen, ni piukuyany mwi njil.” (Kuvurik Yijil 6:7) ‘Kulejan’ kwisambidinau mu verse winou kurumburikin kufundish mu kuchirokin chom. Pamwing ap wijing anch ufanyidin kuchirokin chom chimwing kud aney chakwel achivurik. Verse winou urumburikin anch ufanyidin kukimb yisu kushalijan mulong wa kwisamb nau aney piur pa Yehova. Chid chiwamp kwitekin chisu pa rubing mulong wa kumwifukwil Yehova mu dijuku. Anch ukwetap an, ukutaninamu nakash anch witekin chisu rubing rin rawonsu mulong wa kwilej Dizu dia Nzamb.
ILEJA CHIKURIKINA
Shinshikin yiyul kanang ya ukwash yikutwisha kukukwash kwikal ni musangar ni diking mu dijuku.
4. Yifumba aney nich rukat
Chiswapelingap kumufumb mwan. Mutapu ik ukutwishay Bibil kukukwash? Tang Jakobu 1:19, 20, kupwa isambinany yipul ey:
Mutapu ik ukutwishau anvaj kumekesh rukat chisu chisambinau ni anau?
Mulong wak nvaj kafanyidinap kuyipup anend chisu chikwetay ujim?a
5. Yichidija aney
Mulong wa kuyichidij aney, chid cha usey kwambamb nend mwan ni mwan piur pa yom ya kulalijan. Kwisambin yom yiney kukutwish kulet usany. Talany VIDEO, kupwa isambinany yipul ey:
Mulong wak chiyikasikedining anvaj amwing kwisamb ni anau piur pa yom ya kulalijan?
Yom ik yisadiningau anvaj amwing mulong wa kuyirumburil anau piur pa yid ya ruvaj?
Mud mutapu mwasambelau kulejan mu uprofet, mangand ma Satan madandamedin kuyip nakash. Tang 2 Timote 3:1, 13, kupwa isambinany chipul ech:
Antu amwing ayimp alejenau mu verse wa 13 akat kuyiyipish an kusutil yom ya masandj. Chad, mulong wak chid cha usey nakash kud anvaj kuyifundish anau piur pa yom ya kulalijan ni mutapu wa kwichidij ayinau ku antu akata kuyiyipish an?
Ov, wij?
Atuman a Yehova abudishin kal mikand yivud yikutwisha kuyikwash anvaj kuyifundish anau piur pa yom ya kulalijan ni kuyichidij chakwel kangal ayiyipish. Chilakej, tal:
Yichidija Aney (video)
“Mufundisha Mwaney Piur pa Yom ya Kulalijan” (Lankany! No. 5 2016)
6. Yilimisha anvajey
An akemp ni ansand akutwish kumekesh anch ayilimishin anvajau kusutil mutapu wambambinau nau. Talany VIDEO, kupwa isambinany yipul ey:
Mulong wak mwan ap nsand ufanyidin kwambamb ni anvajend kwa kalimish?
Mutapu ik ukutwishay nsand kwambamb ni anvajend mu mutapu umekeshina anch uyilimishin?
Tang Jinswir 1:8, kupwa isambinany chipul ech:
Mutapu ik ufanyidinay nsand kusal anch anvajend amulej yom ya kusal?
7. Mwifukwilany Yehova mu dijuku
Majuku ma Atuman a Yehova makat kwitekinang chisu rubing rawonsu mulong wa kumwifukwil Yehova pamwing. Difukwil dined dia mu dijuku disadikining mutapu ik? Talany VIDEO, kupwa isambinany yipul ey:
Mutapu ik ukutwisha dijuku kwikal ni program wa difukwil dia mu dijuku rubing rawonsu?
Mutapu ik ukutwishay nvaj kusal anch difukwil dia mu dijuku dikala dia ukwash ni disangareshina?—Tal chipich cha kwinsambishin kwa dilejan dined.
Yom ik yikutwisha kusal anch chikukasikenany kwilej pamwing mu dijuku dien?
Mu Isarel wa pasak, Yehova wita anch majuku milejang Mifund chisu ni chisu. Tang Kuvurik Yijil 6:6, 7, kupwa isambinany chipul ech:
Mutapu ik ukutwisha kusadin mbil yiney?
Yitongijok ya kusadin mu difukwil dia mu dijuku:
Rijekany yikumangan.
Tangany ni isambinany rusangu ra mu Bibil rikusangerau antu a mu dijuku.
Anch ukwet an akemp, pwit ap budish yom ya an kwiyijidish nich yidia pa jw.org.
Anch ukwet an akweta mivu 13-19, isambinany mutu wa mulong umwing piur pa ansand udia pa jw.org.
Senganany rusangu rilejenau mu Bibil nau anen.
Talany ni isambinany video udia pa jw.org.
ANCH MUNTU WAKWEL ANCH: “Bibil ukasiken nakash, an kakutwishap kwau kumutesh.”
Ukwakul nchik?
YOM TWILEJA KAL
Yehova usotin anch anvaj ayikat, ayifumb, ni ayichidij anau; an ayilimish ni ayiziyin anvajau; ni majuku mamwifukwila ndiy pamwing.
Ov, uvurikin?
Mutapu ik ukutwishau anvaj kuyifumb ni kuyichidij anau?
Mutapu ik ukutwishau an kumekesh anch ayilimishin anvajau?
Kwitekin chisu rubing rawonsu mulong wa kumwifukwil Yehova mu dijuku kukwet usey ik?
JINGUNIN KAND
Malejan ik makuyikwasha aney kwirijek chakwel ikala amakurump awamp?
“Malejan Musamban Mafanyidinau an Kwilej” (Lankany!, No. 2 2019)
Jingunin yiyul ya ukwash yipaninay Bibil kud antu ayilamina anvajau ananapina kal.
“Yom ik Yilondinay Bibil Piur pa Kuyilam Anvaj Ananapina kal?” (Mutu wa mulong udia pa jw.org)
Tal mutapu ikundj umwing wading wakad kwijik mutapu wa kuyilil an mwatwishay kwikal tatuku muwamp.
Tal mutapu ukutwishau atatuku kukasikesh urund wau ni anau amakundj.
a Mu Bibil, ‘kupup’ kurumburikin kufundish, kutakel ni kukand. Kurumburikinap kupupan mu mutapu uyimp ap wa chisum.—Jinswir 4:1.