Yilejany Anen Kumukat Yehova

“Mudi jinseu mu chikas cha muntu mukash, mwamu mudia an amakundj a mu usand wa muntu.”—KUSENG 127:4.

1, 2. An afanaken nchik ni “jinseu mu chikas cha muntu mukash”?

MWIN kwas jinseu wirijekining chakwel asa nseu mu diloz. Ukat kuyisik nawamp pa mukuj wa ut wa nseu, ni kupwa waupwit waunan ut wend wa nseu. Chikalap nchik usu ukusalay, ukwikuchik zoong wonan nseu. Kupwa wayilik yaya! Ov, nseu yikushik pa diloz? Kudi yom yivud yikutwisha kulet chakul, pamwing nich nkeu ja mwin kwas jinseu, usu wa rikind, ni mikadil ya nseu.

² Mwant Salomon wayifanikesha an nich “jinseu mu chikas cha muntu mukash.” (Kuseng 127:4) Tushinshikinany mutapu wa kusadil chilakej chinech. Mwin kwas jinseu ukweta nseu pa ut wend wa nseu mu kachisu kakemp kusu. Chakwel asa mu diloz, chimufanyidin asa swa nich usu nakash. Chawiy chimwing, anvaj niyau akweting kachisu kakemp kusu ka kukudish mu michim ya anau kumukat Yehova. Kupwa kwa yimekena mudi mivu yikemp kusu, an akupam kupwa adiokal ku chikumbu aya kwau. (Mateu 19:5) Ov, akushik mu diloz—charumburik anch, ov, an akudandamen kumukat ni kumusadil Nzamb anch adiokal ku chikumbu? Kudi yom yivud yikwatina ku chakul. Yisatu ya yom yiney yidi nkeu ja nvaj, mwi ndond mulididinau an, ni mutapu ‘nseu,’ ap anch mwan, mwitiyijinay diyiy. Tushinshikinany katat yom yiney yisatu kamwing ni kamwing. Cha kusambish, tukushinshikin yimwing ya ngikadil ya nkeu ja nvaj.

Anvaj Akweta Nkeu Ading Chilakej Chiwamp

3. Ov, mulong wak mazu ma anvaj mafanyidin kukwatijan nich yisal?

³ Yesu wayishila anvaj chilakej mu mutapu mwasadilay yom yadingay ni kulejan. (Yohan 13:15) Ku mutambu ukwau, wayifisha nich Afaris asota ching “kulond” kusu “kusal bwat.” (Mateu 23:3) Chakwel kuyikasikesh anau kumukat Yehova, mazu ma anvaj ni yisal yau yifanyidin kwikal chilik chimwing. Mazu makad yisal mading ma chamwamu mudi ut wa nseu wakad mukuj.—1 Yohan 3:18.

4. Yipul ik yifanyidinau anvaj kwiyipul, ni mulong wak?

⁴ Ov, mulong wak chilakej cha anvaj chidi cha usey nakash? Mudi mukatau antu amakurump kwilej kumukat Nzamb kusutil ku chilakej cha Yesu, an niyau akutwish kwilej kumukat Yehova kusutil ku chilakej chiwamp cha anvaj au. Arund a mwan akutwish kumukasikesh mwan ap “kuyipish yaku yiwamp.” (1 Korint 15:33) Mulong mwom wa an avud, pakampwil pa chirung cha mivu ya kumuyiy, arund a piswimp nakash, akweta usu ukash padi mwan adi anvaj end. Chawiy lel, anvaj akusal nawamp kwiyipul ayinau anch: ‘Nidi murund wa mutapu ik? Ov, chilakej cham chimukasikeshin mwanam kukudish yaku yiwamp? Nidi chilakej cha mutapu ik mu milong ya usey ya kulembil ni kwilej Bibil?’

Anvaj Akweta Nkeu

Akat Kulembil ni Anau

5. Chom ik chikutwishau kwilej an kusutil ku malembil ma anvaj?

⁵ Anen akutwish kwilej yom yivud piur pa Yehova kusutil ku kutesh malembil men. Anch akutesh mutapu umujikitishina Nzamb pa yisu ya kudia ni kulembil pa yisu ya kwilej Bibil, chom ik chikutwishau kulond? Akusot kwilej anch Yehova ukat kutuwanyishin maswir ma ku mujimbu—chawiy chifanyidina kumujikitishin—ni anch ndiy utulejina uyakin wa mu spiritu. Minam mawiy malejan ma usey.—Yakob 1:17.

6. Ov, mutapu ik ukutwishau anvaj kuyikwash an kwiyov anch Yehova uyibangidin umwing ni umwing?

⁶ Pakwez, anch ukat kulembil pamwing ni dijuku diey pa yisu yikwau yakad kwikal ya kudia ni ya malejan ma Bibil ma dijuku ni anch ukat kwisambin milong yijikena yikukwatina ey ni aney, ukutwish kusal yom yivud. Ukez kuyikwashany anen kwiyov anch Yehova udi chid cha dijuku dien, ni anch ukat kukubanginany nakash en muntu ni muntu panrend. (Efes 6:18; 1 Pita 5:6, 7) Tatuku umwing ulondil anch: “Kudiosh pavadikinay mwanetu mband, twalembilanga nend pamwing. Mudi mwadingay ni kukul, twalembila piur pa milong ya urund ni milong yikwau yadinga yimukwatina. Djat ni pamwatinau, kitwasutishap dichuku ap dimwing pakad kulembil nend pamwing.” Ov, ukutwish niyey kulembil pamwing ni aney dichuku ni dichuku? Ov, ukutwish kuyikwash amumana Yehova mudi Murund ukata kulet kichidiap ching kusu maswir ma ku mujimbu ni ma mu spiritu pakwez kand ukata kuyiwanyishin maswir mau ma yovil?—Filip 4:6, 7.

7. Chom ik chiswiridinau anvaj kwijik, chakwel malembil mau mikala makin?

⁷ Inge, chakwel anch malembil mey mikal makin, uswiridin kwijik yimushikedina mwaney. Tesh yalonday tatuku umwing wadinga ni an aad: “Kwisudiel kwa rubing ni rubing, niyipulanga amwinam yipul yaad: ‘Chom ik chadia chiyikwatina anam mu rubing riner? Ni chom ik chiwamp chayishikedina mu mwom wau?’” Anvaj, ov, ukutwishany kwiyipul ayinen yipul yiney ni kupwa kutek yakul yimwing mu malembil ukata kulembilany pamwing ni anen? Anch wasalany mwamu, ukuyilejany kichidiap kusu kumulembil Yehova—mwin kutesh malembil—ni ukuyilejany kand kumukat.—Kuseng 65:2.

Anvaj Akweta Nkeu Akasikeshidin Yaku Yiwamp ya Kwilej

8. Ov, mulong wak ufanyidinau anvaj kuyikwash anau akudisha chaku cha kwilej Dizu dia Nzamb?

⁸ Ov, ngikadil ya manangu ya nvaj piur pa kwilej Bibil yikwet usu ik pa urund wa mwan ni Nzamb? Chakwel anch urund win wawonsu upama ni kushal chikupu, antu atila urund kafanyidinap ching kusu kwambamb umwing ni mukwau pakwez afanyidin kand kuteshijan. Njil yimwing kutukata kumuteshin Yehova yidi kusutil ku kwilej Bibil nich ukwash wa mikand ya “kashalapol ushinshamena.” (Mateu 24:45-47; Jinswir 4:1, 2) Chawiy lel, chakwel kuyikwash anau akudisha urund wa rukat ra chikupu ni Yehova, anvaj afanyidin kuyikasikesh kukudish chaku cha kwilej Dizu dia Nzamb.

9. Ov, mutapu ik ukutwishau kuyikwash an akudish yaku yiwamp ya kwilej?

⁹ Mutapu ik ukutwishau kuyiy an chakwel kukudish yaku yiwamp ya kwilej? Kakwau kand, chilakej cha nvaj chilejen nakash. Ov, aney akat kukuman chisu chawonsu mutapu usangaredina amwiney kutang ni kwilej Bibil? Chakin, ukwatikenany nakash mulong wa kuyibangin anen, ni ukutwish kwiyipulany mutapu ik ukutwishanya kutan chisu cha kutang ni kwilej. Pakwez iyipula bil anch, ‘Ov, an am amening nikat kutal televizion chisu ni chisu?’ Anch mwawiy, ov, ukutwish kusadil chikunku cha chisu chinech mulong wa kuyishil chilakej chiwamp pa mulong wa kwilej kwey amwiney?

10, 11. Ov, mulong wak ufanyidinau anvaj kwikal nich dilejan dia Bibil diakad kujing?

¹⁰ Njil yikwau yiwamp yikutwishau anvaj kuyilej an kumutesh Yehova yidi kusutil ku kwisambin Bibil mu dijuku chisu ni chisu. (Isay 30:21) Antu amwing akutwish iyipul anch, ‘Ov, mulong wak an aswiridin dilejan dia dijuku anch anvaj au ayiling nau chisu ni chisu ku yikumangan ya chikumangen?’ Kudi mayingishin mavud. Yehova wayinkisha anvaj chisend cha kusambish cha kuyilej anau. (Jinswir 1:8; Efes 6:4) Dilejan dia Bibil dia dijuku dikat kuyilej an anch kwifukwil kudiap chaku chamwamu cha kusadil mu antu avud, pakwez chidi chikunku cha mwom wa dijuku.—Kuvurik Yijil 6:6-9.

¹¹ Chikwau, kutakel nawamp dilejan dia dijuku kukutwish kuyinkish anvaj ndond ya kwijik yidia mu manangu ma an au pantaliken nich milong ya mu spiritu ni ya ngikadil. Chilakej, pachidiau an anikanch, anvaj akutwish kusadil mikand mudi Ilejina Kudiay Mulej Mujim.a Piswimp mu paragraf ni paragraf wa mukand winou wa kwilejin Bibil, ayitin an kubudish yitongijok yau pa jinsangu jisambidinau. Kusutil ku kutongijokin pa maverse majimbwilau mu buku winou, anvaj akutwish kuyikwash an akudisha manangu mau ma “kwauril kuwap ni kuyip.”—Hebreu 5:14, Manswik Masu.

12. Ov, mutapu ik ukutwishau anvaj kwambatanish dilejan dia dijuku nich maswir ma mwan, ni chom ik wamena kal kwikal cha usey pa mulong winou?

¹² Pachipaminau aney, ambatanish dilejan nich maswir mau. Tal mutapu wasalau ambay a uruw pa kuyikwash an a dikum dia mivu kutongijok pa mutapu wayitau kuya kukumangan ku shikol mulong wa kubech mu kupangan maj. Tatuku ulondil anch: “Twayileja anetu anch pa chikunku chimwing cha dilejan dietu dia dijuku dikwambakenap, am ni mukajam tukwikal an, ni ayangadim etu akwikal anvaj. Mwan mukwau ukwikal Tatuku ap Maku, pakwez an afanyidin awonsu pamwing kukimb mutu wa mulong ni kupan yiyul piur pa kupangan maj ku shikol.” Kwadinga chibudikin ik? “Twashimoka pa kuyiman ayangadim etu atwish kujingunin pakach pa kuwap ni kuyip (pasenganau mudi anvaj) parumburilau (etu mudi an) mayingishin mau mimedina pa Bibil anch mulong wak kichidiap cha manangu kuya kupangan,” ni tatuku udandamedin anch. “Chom chatushimokisha kand yidi yitongijok ya kuswinkesh yitiyikina yaletau kand mudi pa mulong winou. Yom yiney yatwinkisha njingunin ya usey ya yitongijok ni maswir mau.” Chakin kamu, anch chitin kudandamen ni kutongijok chakwel kudandamen nich dilejan dia dijuku diakad kujing ni diambatena nich maswir ma dijuku, pakwez yibudikin yidi ya usey nakash.—Jinswir 23:15.

Salany Mashakamin Mikala ma Chisambu

13, 14. (a) Mutapu ik ukusalau anvaj chakwel dijuku diau dikala dia chisambu? (b) Kukutwish kwikal chiyukish ik anch nvaj witiyijin kurumbuk kwend?

¹³ Nseu yikat kushik pa diloz anch mwin kuyas wayonan wapim ni wikuchik zong was. Chawiy chimwing, an akukat nakash kwilej kumukat Yehova ching anch anvaj alet mwikadil wa chisambu mu chikumbu. Yakob wafunda anch: “mabuj ma kutentam amakunyidin mu chisambu kudi awiy akata kutek chisambu.” (Yakob 3:18) Mutapu ik ukutwishau anvaj kulet mwikadil wa chisambu mu chikumbu? Ambay a uruw aswiridin kwikal ni uruw ukash wa chisambu. Ikundj ni mband akatijadina ni kulimishijan atwishining kuyilej anau kuyikat ni kuyilimish antu akwau, pamwing ni Yehova. (Galatia 6:7; Efes 5:33) Rukat ni kalimish yiletining chisambu. Ambay a uruw adia mu chisambu umwing ni mukwau atwishining kupwish nawamp milong yikata kulank mu dijuku.

¹⁴ Chakin kamu, kwikiling mauruw mawanyidina, kwikiling majuku mawanyidina katat mu mangand. Anvaj akutwish pa yisu yimwing kukangany kusongish dibuj dia spiritu pakwatikenau ni anau. (Galatia 5:22, 23) Anch yom yiney yashiken, chom ik chifanyidinau anvaj kusal? Ang itiyij anch akat kurumbuk niyau, ov, an kakuyilimishap? Tushinshikinany chilakej cha kambuy Paul. Wadinga mudi tatuku wa mu spiritu wa avud. (1 Korint 4:15) Pakwez, witiyija patok anch urumbukin. (Rom 7:21-25) Ap mwamu, kwitudish kwend ni ukinakin wend utubachikin tumulimisha pa ndond pa kumupipesh. Chikalap nchik kurumbuk kwend, Paul watwisha kufundin in chikumangen cha mu Korint anch: “Ikalany in kwinlondul am mudi ni yam chinikata kumulondul kand Kristu.” (1 Korint 11:1) Anch niyen ukat kwitiyijany kurumbuk kwen, anen akez chilik chimwing kuvuramen kurumbuk kwen.

15, 16. Ov, mulong wak ufanyidinau anvaj kuyilej anau kuyikat akadivar ni anambaz in Kristu, ni mutapu ik ukutwishau kuchisal?

¹⁵ Chom ik chifanyidinau kusal anvaj chakwel kulet mwikadil ukutwisha kusal anch an akudisha kumukat Yehova? Kambuy Yohan wafunda anch: “Anch muntu walond anch, Am nimukatil Nzamb, umukisil mwanamakwend, ndiy udi mukamakasu; mulong ndiy wakad kumukat mwanamakwend umenayiku ni mes, kakutwiship kumukat Nzamb wakad kumanay ku mes.” (1 Yohan 4:20, 21) Chawiy lel, piuyilejinanya anen kuyikat akadivar ni anambaz au in Kristu, uyilejinany kand kumukat Nzamb. Anvaj akusal nawamp kwiyipul anch, ‘Ov, kwisambin kwam piur pa chikumangen kuding kukasikeshina ap kwa runyinyit?’ Mutapu ik ukutwisha kwijik? Yitesha nawamp an ey yilondilau piur pa yikumangan ni piur pa yid ya chikumangen. Ukutwish watesh yitongijok yau mutapu yibudikina mu mazu mau.

¹⁶ Chom ik chikutwishau kusal anvaj mulong wa kuyikwash anau kuyikat akadivar nau a mu spiritu? Peter, tatuku ukweta an amakundj aad a dikum dia mivu, ulondil anch: “Mulong an adinga anikanch, twadinga ni kuyiladikij akadivar akudila mu spiritu kudia netu ni kushakam kwambamb kwol kwetu, ni twasangara nakash kusal mwamu. Ansangarum etu apama ni adinga nich urund ni antu amukatila Yehova, ni katat amen anch kumusadil Nzamb yawiy njil ya mwom yisangareshina.” Dennis, tatuku ukweta ayangadim atan, ulondil anch, “Twayikasikesha ayangadim etu akwata urund ni ayibol amakurump adia mu chikumangen, ni pachadinga chitwishikina twadinga ni kuyak atulam in kwendangan ni akajau kwol kwetu.” Ov, ukutwish kwikal wa kusambish kuyikwash aney amana chikumangen mudi kujimb kwa dijuku dien?—Marko 10:29, 30.

Chisend cha Mwan

17. Chiyul ik chikutwishau an kwez kukwat kwinyim?

¹⁷ Tushinshikinany kand chilakej cha mwin kwas nseu. Anch ukwetap nkeu, ukutwish kukangany kwas mu diloz anch nseu yasinay yipengamin. Chakin kamu, anvaj akutwish kusal usu ukash mulong wa kwonan nseu yipengamina, mu kulond kwa chifanikesh, kusutil ku kupakish kwonan yitongijok yiyimp ya mwan. Pakwez, an akutwish chakin kamu kwikwatin mupak wau ayinau chakwel kangal alikina mangand minam mayipisha rusot rau ap kulik Yehova chakwel atenchika “jinjil” jau.—Jinswir 3:5, 6; Rom 12:2.

18. Kutond kwa an kukwet chibudikin ik padi antu akwau?

¹⁸ Ap anch anvaj akwet chisend chijim cha kuyilil an mu ‘malejan ma Yehova,’ chiyul cha nsudiel pakezay mwan kukul chikwikal chisend cha mwan amwinend. (Efes 6:4) Chawiy, an, iyipulany ayinen, ‘Ov, nikez kwitiyij diyiy dia anvaj am?’ Anch wasal mwamu, ukez kwitondinany ayinen njil yipandikena kuwap ya mwom. Ukez kuyisangaresh anvaj ey. Cha usey, ukez kusangaresh muchim wa Yehova.—Jinswir 27:11.

[Mazu madia kwishin kwa paj]

Ov, Uvurikin?

• Mutapu ik ukutwishau anvaj kwikal chilakej chiwamp pa kulembil ni kwilej Bibil?

• Mutapu ik ukutwishau anvaj kulet chisambu mudijuku?

• Kutond ik kuyichingedina an, ni kukwet usu ik padi antu akwau?

[Chipich chidia pa paj wa 30]

Ov, umushidil mwaney chilakej chiwamp pa mulong wa kwilej kwey amwiney?

[Chipich chidia pa paj wa 31]

Dijuku dia chisambu diletining musangar