Anvaj Yililany Anen Nich Rukat
“Yawonsu ukusalany, sadilany mu rukat.”—1 KORINT 16:14.
1. Mutapu ik wiyovilingau anvaj pavadikiningay mwan?
ANTU avud akwitiyij anch kuvadik kwa mwan kukutwish kwikal chimwing cha yishiken ya musangar mu mwom. Maku umwing utazukinau anch Aleah ulondil anch: “Panadinga ni kumutal neeng mwanam mband unavala kal, nova musangar nakash. Natonga anch kandikal nimanangap chiliz a mwan mudi winou.” Pakwez, chishiken chinech cha musangar, chikutwish kand kuyiletin anvaj ushom. Nfumwend a Aleah ulondil anch: “Niyakamisha anch nikutwish kumutenchik nawamp changadim wam pantaliken nich yoziu ya mwom.” Yawiy yibangidinau anvaj avud ni ij maswir ma kuyilil anau nich rukat. Pakwez, anvaj in Kristu asotila kuyilil nich rukat riner arishining nich yikokujol. Yisu yimwing ya yikokujol yiney?
2. Yikokujol ik yirishinau nich anvaj?
2 Tudi katat kwinsudiel kwin kamu kwa machuku ma nsudiel ya ditenchik dined. Mudi mwasambelau kulond, tushich mu mangand mizwila sens nich antu akuburedina rukat. Ap mukach mwa yid ya dijuku dimwing, antu ‘kakwetap rukat ra chivadik,’ ni ikadil kal “akad kujikitish, akad kutumb; akwikal in chisum . . . akad kwikand.” (2 Timote 3:1-5) Kwikal pichuku-pichuku ni antu akweta yaku yiney kukutwish kwikal nich usu pa mutapu wa kusalijan wa chid chimwing ni chikwau cha majuku ma in Kristu. Chikwau, anvaj aril tutaku nich ngikadil yau ya chivadik yaswanau ya kuburen kwilam, kulond yom yakadiau kusot, ni kuburen njingunin mu jinjil jikwau.—Rom 3:23; Yakob 3:2, 8, 9.
3. Mutapu ik ukutwishau anvaj kuyilil an akweta musangar?
3 Chikalap nchik yikokujol yiney, anvaj akutwish kuyilil an in musangar, ni akash mu spiritu. Mutapu ik? Kusutil ku kulondul chiyul chinech cha Bibil: “Yawonsu ukusalany, sadilany mu rukat.” (1 Korint 16:14) Inge, rukat “wawiy mwoj uwanyidina ukasila yawonsu pamwing mu kwovijan.” (Kolosay 3:14) Tushinshikinany katat yom yisatu ya rukat yirumburilay Paul mu mukand wend wa kusambish wayifundilay in Korint ni tukwisambin jinjil jimwing jijikena mukutwishau anvaj kusadil ngikadil yiney payilidilinau anau.—1 Korint 13:4-8.
Kuswir kwa Kwikal in Kushimpish Muchim
4. Ov, mulong wak uswiridinau anvaj kushimpish michim?
4 Paul wafunda anch: “Rukat rikat kushimpish muchim.” (1 Korint 13:4) Dizu dia Grek diakarumunau anch “kushimpish muchim” disambidin kushimpish ni wakad kujimanang swa. Ov, mulong wak ufanyidinau anvaj kushimpish michim? Anvaj avud kakutwishap chakin kutongijokin pa mayingishin mavud. Tushinshikinany mayingishin mamwing. An ipwiling yisu yivud mulong wa chom chikatinau. Ap anch nvaj walonda anch bwat, mwan ukutwish wipul kand kakwau, uchingejin anch akumwakul mutapu windjing. An a dikum dia mivu akutwish kusot kutadikijan nakash anch chifanyidin kuyilikin asala yom yimwing mudi mukatinau pakwez yimenau anvaj anch yidi ya usup. (Jinswir 22:15) Ni mudi etu awonsu, an akwet chaku cha chivadik cha kusot kuchirikin kurumbuk kwawiy kumwing.—Kuseng 130:3.
5. Chom ik chikutwisha kuyikwash anvaj kushimpish muchim?
5 Chom ik chikutwisha kuyikwash anvaj ikal ashimpishina michim ni itudishina piur pa anau? Salomon wafunda anch: “Manangu makat kukepish ujim wa muntu.” (Jinswir 19:11) Anvaj akutwish kujingunin yisal ya anau kusutil ku kuvurik anch pa chimwing niyau adinga ‘nikulond mudi mwanikanch, atongijoka mudi mwanikanch, kutong mudi mwanikanch.’ (1 Korint 13:11) Anvaj, ov, uvurikinany mutapu wamumeshanya mar makwen ap tatukwen mulong akula ku yipul ya usup? Pawikala ni dikum dia mivu, ov, utongin anvaj en kadingap kwau ni kutesh yovil ni milong yen? Anch mwawiy, wovil kurumburik mulong wak anen asadil yom mudi musadilau ni mulong wak chifanyidin chisu chawonsu kuyivurish mipak yen. (Kolosay 4:6) Chidi cha usey nakash kwijik anch Yehova wayileja anvaj in Isarel ‘kwandjik’ yijil yend mudi anau anikanch. (Kuvurik Yijil 6:6, 7) Dizu dia Hebreu dikarumwinau anch ‘kwandjik’ dirumburikin anch “kuchirikin,” “kulond kakwau ni kakwau,” “kukasikeshin.” Chom chinech chiyitin anvaj anch akutwish kuchirikin ayinau tupamp ni tupamp kurutu kwa mwan ileja kusadil yijil ya Nzamb. Kuchirikin kwinoku akuswiridin chisu chivud mulong wa kulejan malejan ma mwom.
6. Ov, mulong wak nvaj mwin kushimpish muchim kadiap mwin kwitiyij uyimp?
6 Pakwez, nvaj ushimpishina muchim, kadingap nvaj mwin kulikin uyimp. Dizu dia Nzamb dibabeshin anch: “Anch amulik mwan mwamu ndiy ukez kamukwatish makwend usany.” Chakwel kukangesh chom chinech, jinswir jawiy jimwing jilondil anch: “Diland ni jinkand yikat kuletang manangu.” (Jinswir 29:15) Pa yisu yimwing, an akutwish kwiyov anch anvajau kakwetap ulabu wa kuyipup. Pakwez majuku ma in Kristu kakatap kumayikel mudi demokrasi, mudi kulond anch mbil ya anvaj piur pa mutapu ufanyidina kwikal anau yimedin pa kwitiyik kway kudi an. Pakwez, Yehova chidiay Mwant wa dijuku, uyinkishin anvaj ulabu wa kuyiyiy ni kuyipup an nich rukat. (1 Korint 11:3; Efes 3:15; 6:1-4) Chakin, dipup didi piswimp nich mulad wambakedinap wa rukat risambidinay Paul.
Mutapu wa Kupup Nich Rukat
7. Ov, mulong wak anvaj adimukina afanyidin kuyipup anau, ni chom ik chidia mu dipup dined?
7 Paul wafunda anch “Rukat . . . ridimukin.” (1 Korint 13:4) Anvaj adimukina chakin kamu akat kuyipup anau mutapu umwing. Ku kusal mwamu, amwimburijin Yehova. Paul wafunda anch: “Wawonsu ukatilay Mwant ndiy ukumupup.” Shinshikinany amboku anch muladi wa dipup disambidinau mu Bibil dirumburikinap ching kusu kupup. Ukwet chitongijok cha kuyiy ni kuyifumb. Dipup dined dikwet rutong ik? Paul ulondil anch, “kukat kusongish mabuj ma chisambu kudi awiy akata kwifumbiliku, mawiy kamu mabuj ma kutentam.” (Hebreu 12:6, 11) Pakatau anvaj kuyifumb anau kwambatan nich rusot ra Nzamb, ayinkishining ndond ya kupam kwikal amakurump in chisambu ni atentamina. Anch an itiyij “kubabesh kwa” Yehova, akwikal ni manangu, ronganyin, ni njingunin—yom ya usey ujim kupandakanamu utad ujal ni or.—Jinswir 3:11-18.
8. Kuding chibudikin ik anch anvaj akangany kuyipup anau?
8 Ku mutambu ukwau, kudiap kudimuk anch anvaj akangany kuyipup anau. Yehova wamwinkisha Salomon mwiku wend utumbila ni wafunda anch: “Muntu ulikina kumubul mwanend umukisil, pakwez umukatila mwanend ukat kumubabesh nich mushiku.” (Jinswir 13:24) An alilau pakad kuyipup muchifanyidina chisu chivud ading in choy ni akad musangar. Chinyim ni chinech, an akwet anvaj adimukina pakwez alamina mipak akweting manangu ku shikol, akweting nkeu mu kushakam ni antu akwau, nich musangar akweting muchim wa kupan. Chakin kamu, anvaj akata kuyipup anau ading ayidimukidina.
9. Chom ik chikatau anvaj in Kristu kuyilej anau, ni mutapu ik ufanyidinau kuyiman yom yiney?
9 Ov, chitin ik mu kuyipup an mu kudimuk ni rukat? Anvaj aswiridin kwisamb ni anau piur pa chiyichingejidinau. Chilakej, anvaj in Kristu akat kuyilej anau kudiosh mu wanikanch yijil ya pa dishin ya Bibil pamwing ni maswir ma kusadil mu milad kushalijan ya difukwil diakin. (Kubudik 20:12-17; Mateu 22:37-40; 28:19; Hebreu 10:24, 25) An afanyidin kwijik anch kwikil cha kutadik pa milong yiney.
10, 11. Ov, mulong wak ufanyidinau anvaj kushinshikin yibangidinau an pa chisu cha kutenchik yijil ya chikumbu?
10 Pakwez, pa yisu yimwing, anvaj akusot kwisamb ni anau pa chisu cha kutenchik yany ya chikumbu chau. Anch chitwishikin kwisamb pamwing ni ansand piur pa yany ya chikumbu, akwikal tayad kuyiziyil nakash. Chilakej, anch anvaj akwat mupak wa chisu chifanyidinau an awonsu kwikal ku chikumbu, afanyidin kutond chisu chiwamp chifanyidinau an kwikal ku chikumbu. Ap, mudi mutapu ukwau wa kusadil, akutwish kuyit anau kutond chisu ni kulet mayingishin ma kutond kwau. Kwisudiel, anvaj niyau akutwish kulond chisu chisotilau ni kurumburil mulong wak utonginau anch chawiy chisu chifanyidina. Anch kwikal kupwitijan kwa yitongijok, mudi muchitwishikina kwikal, chom ik chifanyidina kusal? Yisu yimwing, anvaj akutwish kukwat mupak utwishikina kwambatan nich yisotinau anau anch kwikil kujiril yijil ya Bibil. Ov, kusal mwamu kurumburikin anch anvaj apim kal, ap anch alik kal kusadil ulabu wau?
11 Chakwel kwakul ku chipul chinech, tushinshikinany njil yikatay nich rukat Yehova kusadil ulabu wend pamusadilay Lot ni dijuku diend. Kwinyim kwa angel kumubudish Lot, mukajend, ni ayangadim end mu Sodom, ayileja anch: “chinyinany ku mukandu wa, chakwel ukutwishap kusheshik.” Pakwez, Lot wakula anch: “A! bwat mwan” Yehova! Kupwa Lot waleta chitongijok chikwau: “Talany bil kwa, kudi musumb wa kuchinyin, ngitiyany amboku nikapandila kwinikwa ku musumb ukemp.” Yehova wasala nchik? Ndiy wamwakula anch: “Tal bil, nakutapish kal kand dilau dikwau.” (Disambishil 19:17-22) Ov, Yehova washadisha ulabu wend? Bwat! Pakwez, ndiy washinshikina chom chitay Lot ni watonda kumumekeshin kand raniken pa mulong winou. Anch udi nvaj, ov, kudi yisu ukutwishany kushinshikin yibangidinau anen pa chisu cha kutenchik yijil ya dijuku?
12. Chom ik chikutwisha kumukwash mwan kwiyov anch udi mu diking?
12 Chakin kamu, an kaswiridinap ching kusu kwijik yijil pakwez kand dipup anch ajiril yijil yiney. Anch wisambinany dipup ni diovakan, chifanyidin kukasikeshin yijil. Anvaj kafanyidinap kusadil rukat anch chisu ni chisu akat kuyibabesh anau piur pa dipup didiaku pakwez alik kuyipup. Bibil ulondil anch: “Antu akwet michim ya kusal kuyip mulong kakat kuyirumburishap ni kuyilej kadimu swa.” (Mulej 8:11) Chakin, nvaj ukutwish kwipuk kumupup mwan ku mes kwa antu awonsu ap ku mes kwa an a rad rend, chidi mulong wa kulik kumukwatish usany. Pakwez an iyoviling mu diking nakash ni kukul nich kalimish kajim ni kuyikat anvaj au anch ijik anch “Inge” wa anvaj au udi ching kamu inge ni “Bwat” wau bwat—ap anch chitin dipup.—Mateu 5:37.
13, 14. Mutapu ik ukutwishau anvaj kumwimburil Yehova pa mulong wa kuyifumb anau?
13 Anch difanyidin kwikal dia rukat, dipup ni mutapu wa kupup chifanyidin kwikal wambatena nich mwan. Pam uvurikin anch: “Anetu aad adinga nich maswir mashalijadina padingau ni kuyipup. Chom chadinga chimukwashina umwing kichadingap chimukwashina mukwau.” Nfumwend Larry, urumburil anch: “Changadim wetu wa kusambish wadinga uchinchikin muchim ni chading chimufanyidin dipup dikash. Pakwez, changadim wetu wa kaad wadinga ni kutesh anch wamuswejin nakash ni ap anch wamuchirimwin dis kusu.” Chakin kamu, anvaj in rukat asadil usu wa kushinshikin dipup ik difanyidina mulong wa mwan ni mwan.
14 Yehova udi chilakej kudi anvaj mulong ndiy wij usu ni kuziy kwa kashalapol wend umwing ni umwing. (Hebreu 4:13) Chikwau, pa chisu cha kupup, Yehova kakatap kupandikesh ap kulikin uyimp. Pakwez, ndiy uyipupining antu end “mudi mudia yisalijok” yau. (Yeremiy 30:11) Anvaj, ov, wijany usu ni kuziy kwa anen? Ov, ukutwishany kusadil ronganyin mu mutapu uwamp, mulong wa kuyifumb? Anch mwawiy, ulejenany anch uyikatilany anen.
Kasikeshinany Kwisamb Patok
15, 16. Mutapu ik ukutwishau anvaj kuyikasikesh anau kulond patok, ni mutapu ik umenau anvaj in Kristu anch ukwet yibudikin yiwamp pa mulong winou?
15 Mutapu ukwau wa rukat udi anch “kirukusangerangap mu kuyip, pakwez rikat kusanger mu uyakin.” (1 Korint 13:6) Mutapu ik ukutwishau anvaj kuyifumb anau akata yom yitentamina ni uyakin? Ruzau rijim ridi ra kuyikasikesh anau alonda patok yovil yau, ap anch yilondilau an yiyikasikedin anvaj kuyitesh. Choviken patok anch, anvaj asangering pakatau an kubudish patok yitongijon ni yovil yambatena nich yijil yitentamina. Pakwez, pa yisu yimwing, yirumburil yidiokila mu muchim wa mwan yikutwish kujingunish chibachikin cha kuyip. (Disambishil 8:21) Ov, mutapu ik ufanyidinau anvaj kusal? Chom cha kusambish chikusotau kusal chikutwish kwikal kuyikabwokin anau pa chisu chinicha kamu mulong abudish kal yitongijok yiney. Anch anvaj asal mwamu, an akwilej kusambish kulond ching kusu yom yitonginau anch yawiy yikatiningau anvaj kutesh. Chakin, chifanyidin kwonan kapamp kamwing mazu mayimp, pakwez kudi kushalijan pakach pa kuyilej an mutapu wa kwambamb ni kalimish ni kujingunin yom yilondilau.
16 Mutapu ik ukutwishau anvaj kukasikeshin mambamb ma patok? Aleah, utwisambina kwiur oku ulondil anch: “Twasala anch muntu ni muntu iyova ni want ipend wa kulond patok kusutil ku kulik kujiman pa chisu chitulejinau anetu yom yikutwisha kutwovish ujim.” Tatuku utazukinau anch Tom ulondil anch: “Twamukasikesha mwanetu mband atuleja yawonsu yikwetay, ap anch ulikin yitongijok yetu. Twiyova anch, anch twadinga ni kumukaturij chisu chawonsu ni kusot kumushindil yitusotila, wela kwiyov nayimp ni wela kusambish kulik kutulej yidia mu muchim wend. Twiyovil anch kumutesh kwamukasikesha niyend kututeshang.” Chakin kamu, an afanyidin kuyiziyil anvaj au. (Jinswir 6:20) Pakwez kwisambang patok kuyinkishining anvaj ndond ya kuyikwash anau akula nich ukaliweny wa kutong. Vincent, tatuku wa an amband anying, ulondil anch: “Chisu chivud, twisambina yibudikin yiwamp ni yiyimp ya mwikadil chakwel anch anetu atwisha kwimen ayinau chibudikin chiwamp. Chom chinech chayikwasha kwikal nich manangu.”—Jinswir 1:1-4.
17. Anvaj akutwish kwikal nich kashinsh ka chom ik?
17 Chakin, kwikil nvaj ukutwisha kusadil chiyul cha Bibil muchifanyidina pa mulong wa kumulil mwan. Ap mwamu, ukutwish kwikal nich kashinsh anch aney akez kusanger nakash kusot kuyifumb nich kushimpish muchim, kudimuk ni rukat. Chakin kamu Yehova ukuyukish usu wey usadila. (Jinswir 3:33) Cha usey, anvaj awonsu in Kristu asotil anch anau ileja kumukat Yehova mudi mumukatinau ayinau. Mutapu ik ukutwishau anvaj kushiken ku diloz dined diwamp? Mutu wa mulong wambakedinap ukwisambin mitapu yimwing ya pakampwil.
Ov, Uvurikin?
• Ov, mutapu ik njingunin yimukwashining nvaj kushimpish muchim?
• Rukat ni dipup yikwatijadin nchik?
• Ov, mulong wak kwambamb patok pakach pa anvaj ni an kudi kwa usey?
[Chipich chidia pa paj wa 25]
Anvaj, ov, ukutwish kuvurikany chiwadingany pa wanikanch?
[Chipich chidia pa paj wa 26]
Ov, ukat kukasikeshin kwambamb patok ni aney?