Tukutwish Kutaninamu Ku Kujikish Mu mar

“Tukat kuyitazuk antu ajikisha anch ayukil.”—YAKOB 5:11.

1, 2. Chom ik chimekeshina anch Yehova kamutangap muntu chakwel amana mar?

KWIKIL muntu udia zwaang usotininga kuman mar; ap Sakatang wetu, Yehova Nzamb, kasotinap antu amana mar. Tukutwish kuchiman pitushinshikidina Dizu diend diapepilay ni kujingunin yasadika papwishay kumutang ikundj ni mband. Cha kusambish, Nzamb wamutanga ikundj. “[Yehova] Nzamb wamuumba muntu nich rufunfut ra divu, wamupimina mwiku wa mwom mu mazur mend, chad muntu wikala mwom.” (Disambishil 2:7) Adam wadinga uwanyidin ku mujimbu ni mu manangu, ni kelap kuyel ap kufa.

² Chad mikadil ya mwom wa Adam yadinga nchik? “[Yehova] zamb wadima chir kwingangel mu Eden. Wamutekamu muntu watangay. [Yehova] Nzamb waminyisha mitond ya pansh ya mitapu yawonsu yiwapila kutal ku mes, ni yiwapila kand kudia.” (Disambishil 2:8, 9) Inge, Adam wadinga nich mashakamin mapandikena kuwap. Kwadingap mar mu Eden.

3. Ruchingej ik radingau nich ambay a uruw aad a kusambish?

³ Disambishil 2:18 utulejin anch: “Chawiy [Yehova] Nzamb walonda kand anch: ‘Kichiwapidilap kudi ikundj kushakam amwinend. Chifanyidin nimutangila mwin kumukwash ukutwishay kushakam nend.’” Yehova wamutangila Adam mband uwanyidina, chawiy chatenchikay nsambishil ya mwom wa dijuku dia musangar. (Disambishil 2:21-23) Bibil utulejin kand anch: “Nzamb wayiyukisha, ndiy wayela anch: ‘Valijanany, vulijanany, shakamany, izwishany ngand ni kuyiziyish.’” (Disambishil 1:28) Antu aad a kusambish ela kwitapil dilau dia pakampwil dia kutanduril Paradis wa Eden djat, mu kusut kwa chisu, pakezay kubwik divu diawonsu, ni kwikadish mangand mawonsu paradis. Ni ela kuval an in musangar, akad kwez kuman mar. Nsambishil yipandikena kuwap mudi ik!—Disambishil 1:31.

Mar Masambish

4. Chom ik chimekena patok piur pa antu, mu rusangu rawonsu ra muntu?

⁴ Pakwez, anch twatal mwikadil wa dijuku dia muntu mu rusangu rawonsu ra muntu, chimeken patok anch kudi chom chayipa nakash. Kwikadil kal yom yiyimp, ni dijuku dia muntu dimen mar makash. Mu kusut kwa yitot ya mivu, an awonsu a Adam ni Eve akat kuyel, kunanap, ni kufa. Chakin kamu, divu kididiap paradis mushicha antu in musangar. Mwikadil winou aurumburil nawamp win kamu mu Rom 8:22 anch: “Yawonsu yatangau yikat kukimuk ni kwakam mu kusansan pamwing ni katat ou.”

5. Mutapu ik washikenau anvaj etu a kusambish ku kulet mar mu dijuku dia muntu?

⁵ Chifanyidinap kumufish nich Yehova mulong wa mar makash madiaku mu mivu yiney yawonsu. (2 Samwel 22:31, NW) Antu niyau ayinau akwet chisend cha mar minam. ‘Asadil kal yitil yiyimp yitakanena; kwikiling, ap kusu umwing, ukata kusal yitentamina.’ (Kuseng 14:1) Anvaj etu a kusambish ayinkisha kwisambishil yom yawonsu yiwamp. Yom yawonsu yadinga mulong wa kwel anch adandamena kumuziyil Nzamb, pakwez Adam ni Eve atonda want ipau kurutu kwa Yehova. Kudiosh pamudjibwilau Yehova kwa kudi anvaj etu a kusambish, kelap kand kuyikwash mudi awanyidina kudi ndiy. Asambisha kunanap djat ni ku rufu. Kuburen kuwanyin kwatusamburikina niyetu.—Disambishil 3:17-19; Rom 5:12.

6. Chisend ik chikwetay Satan mu kusarumun mar?

⁶ Chitang cha mu spiritu chitazukinau anch Satan Djabul ni chawiy achifish nich mulong wa nsambishil ya mar mawonsu. Amutanga nich katok ka kwitondil. Pakwez, ndiy wasadila nayimp ukaliweny winou wa kwitondil chakwel kusot kutambul difukwil dia Yehova. Pakwez, ching Yehova kusu ndiy tufanyidina kwifukwil, kangal yitang yend. Satan ndiy wayisendula Adam ni Eve akimba want ipau adiokala kudi Yehova, mudi anch chawiy chikutwishau kwikal “mudi Nzamb, in kwijik kuwap ni kuyip.”—Disambishil 3:5.

Ching Kusu Yehova Ndiy Ukweta Mbil ya Kuyikel

7. Yibudikin ya kumubwambwil Yehova yilejen ik?

⁷ Yibudikin yiyimp ya kubwambwil yimekeshin anch mudi Mukaleng wa Mangand, ching Yehova kusu ndiy ukweta mbil ya kuyikel ni anch ching kusu winyikel wend wawiy utentamina. Tunan twa mivu yasutina kal yimekeshin anch Satan, wikala “mwin kutakel wa mangand minam,” wakudishin kal winyikel uyimp, wakad kutentam, ni wa chisum wakad kulet musangar ap pakemp. (Yohan 12:31) Winyikel wa chisu chilemp wa mar wa antu adia mwishin mwa usu wa Satan, umekeshin niwawiy anch kakwetap ukaliweny wa kuyikel mu kutentam. (Yeremiy 10:23) Chawiy, mulad win wawonsu wa winyikel waurikina kulemp nich wa Yehova, ufanyidin ching kukangany. Rusangu ra muntu ralejen kal uman winou.

8. Risu rutong ra Yehova pantaliken nich milad yawonsu ya winyikel, ni mutapu ik ukezay kuwanyish rutong riner?

⁸ Katat Yehova wayinkisha antu tunan twa mivu chakwel apakisha amana mulad ik wa winyikel wa kumubwambwil ndiy, uyingin kwez kudiosh pa divu milad yiney yawonsu ya winyikel ni kuyiswinkesh nich winyikel wend amwinend. Uprofet umwing ulondil pa chineh anch: “Pa chisu cha in kutakel inay [in kutakel a chiuntu], Nzamb wa mwiur ukez kukasikesh want ukwau [want wend wa mwiur udia mu makas ma Kristu] wakad kwez kwikal nich disudiel chikupu. . . . Ukez kushesh mant makwau mawonsu, chad wawiy ukez kushakam chikupu.” (Daniel 2:44) Winyikel wa ayilembil ni antu ukupwa, ni ching kusu Want wa mwiur wa Nzamb ukeza kwikalaku ni kuyikel divu. Kristu ukez kwikal Mwant, ni ukez ni answan pamwing nend antu 144 000 ashinshamena atondau pa divu.—Kuburik 14:1.

Kutaninamu mu Mar

9, 10. Mutapu ik watanidinayimu Yesu mu mar mamanay?

⁹ Chisangareshin kushinshikin ngikadil ya antu akeza kuyikel mu Want wa mwiur. Cha kusambish, Yesu Kristu wamekesha mutapu ufanyidinay mulong wa ndond yend mudi Mwant. Wasutisha mivu yivud yakad kutwish kuchind pamwing ni Yehova mu kusal rusot ra Tatukwend, Wikala “mwant wa mudimu.” (Jinswir 8:22-31) Chisu chatenchikay Yehova anch Yesu eza pa divu, witiyija cha kwikatin. Pashikay pa divu wasina pa kuyilej antu akwau piur pa ukaleng ni Want wa Yehova. Yesu watushila etu awonsu chilakej chiwamp cha kuziyil muchifanyidina ku ukaleng.—Mateu 4:17; 6:9.

¹⁰ Yesu amuzengola, ni kwisik amujipa. Pasalay mudimu wend wa kulejan, watwisha kuman mwikadil wa riy wadingau nich antu adinga amwombilamu. Ov, kudi ukwash wataninayimu pa kuman ni kwikal nich mar amwinend? Inge. Hebreu 5:8 ulondil anch: ap “Anch wadip nchik Mwan ndiy wileja kuziyil ku yom yikonkilay.” Yamanay Yesu padingay pa divu yamwikadisha nakash kamu mwin chovu ni riy. Cha kusambish wamana mwikadil wa antu. Ukutwish kuyovil antu amena mar riy ni ukutwish kusanger nakash chisend chend cha kuyikol. Tal mutapu mwakasikeshinay kambuy Paul chom chinech mu buku wa in Hebreu: “Chamufanikesha ndiy mu yom yawonsu kwikal mudi anamakwend, chakwel ukutwish kwikal mwin kupesh wa pa mutu wa riy ni kushishaman mu mudimu wa Nzamb, ni kujimangesh yitil ya antu. Mulong amwinend wamana mar mu yoziu, ndiy ukutwish kuyikwash ozilau.” “Tumukwet mwin kupesh wa pa muntu upandikena kujimb, wasutila kal mu maur, ndiy kamu Yesu, Mwan a Nzamb, tulamany ba, tudandamen mu ritiy retu. Mulong kitukwetip mwin kupesh wa pa mutu wakad kutwish kutwovil riy mu kuziy kwa michim yetu; mulong ndiy watondilau kumwoz mu yawonsu mudi mutudia etu, pakwez ndiy kakwetip chitil.”—Hebreu 2:17, 18; 4:14, 16; Mateu 9:36; 11:28-30.

11. Mutapu ik ukeza kuyikwash yom yamanau pa divu antu akeza kwikal ant ni in kupesh?

¹¹ Chawiy chimwing kand chitwishikina kulond piur pa antu 144 000 “adioshauku” kal kudiokal pa divu chakwel ikal answan a Want wa mwiur pamwing ni Kristu Yesu. (Kuburik 14:4) Avadika mudi antu pa divu, apamina mu mangand ma mar, ni imena ayinau mar. Avud mukach mwau ayizengola, ni akwau ayijipa mulong wa kulam kushinshaman kwau kudi Yehova ni kumulondul Yesu. Pakwez ‘kovap usany wa kupan uman wa Nsalejau, pakwez amana mar ni mulong wa katumb kawamp.’ (2 Timote 1:8) Yamanau pa divu yayikadisha pakampwil afanyidina kudirumburish dijuku dia muntu pakwikalau mwiur. Ileja kwikal in riy nakash, in ranaken, ni tayad kuyikwash antu.—Kuburik 5:10; 14:2-5; 20:6.

Musangar wa Antu Akweta

Ruchingej ra Kushakam pa Divu

12, 13. Mutapu ik wisakidinau antu akweta ruchingej ra kushakam pa divu ku mar minam?

¹² Ov, mar ma katat makutwish kusongish dibuj diwamp mu antu achingejina kushakam chikupu mu paradis pa divu mwakad mayej, runeng, ni rufu? Kusansan ni runeng yiletininga mar yidiap yom yitukata kusanger. Pakwez pitukata kujamish mu mar, chitwishikin kuwapish ngikadil yiwamp ni musangar.

¹³ Tushinshikinany yilondila Dizu dia Nzamb pa mulong winou: “Anch wamananyip nchik mar mulong wa kutentam, wayukany kwen.” “Anch akusalany mulong wa dijin dia Kristu, wayukany kwen.” (1 Pita 3:14; 4:14) ‘Wayukany kwen pakunisalolau kudi antu, ni pakunizengolau, ni pakunitwambilanyau kuyip kwawonsu mulong wa kwingambat am. Zangamany kwen ni musangar ujim, mulong difut dien [didi] mwiur.’ (Mateu 5:11, 12) “Wayuk muntu ukat kujamish mu yoziu; mulong pakupandakan ndiy ukez katambul chibangul cha kupand.”—Yakob 1:12.

14. Mu mutapu ik mukutwishau in kumwifukwil Yehova kusanger mar?

¹⁴ Chakin, kimadiap mar mitujamishina katat matuletidina musangar. Musangar, mazang, yidiokil ku kwijik anch tumen mar mulong tusadil rusot ra Yehova ni tulondwil chilakej cha Yesu. Chilakej, mu mivu chitot ya kusambish, atwimbuy amwing ayiteka mu rukan ni kupwa ayitwala kurutu kwa dirumburish dijim dia in Yuda ni ayisala mulong wa kulejan piur pa Yesu Kristu. Ayibula misel ni kupwa ayilikishaku. Adinga ni ngikadil ik? Rusangu ra Bibil rilondil anch “awiy adiokala kurutu kwa chiyul, end asangara ni kulond anch: Atulimish kamu, ni kutukwatish usany mulong wa dijin dia Yesu.” (Midimu 5:17-41) Kasangerap mulong wa yibul yayibulau ni kuswan kwovau ku mujimbu, pakwez asangara, mulong ova kurumburik anch chom chinech chashikenang mulong adinga ajijamen kudi Yehova ni alondwil mu jinzau ja Yesu.—Midimu 16:25; 2 Korint 12:10; 1 Pita 4:13.

15. Ov, mutapu ik kujamish kwetu mu mar ma katat kutukwashin mulong wa machuku makurutu?

¹⁵ Anch twajamish mu rupompat ni kuzengol nich manangu mawamp, tukutwish twakudish kujamish. Chinech chikez kutukwash kujamish ku mar ma kurutu. Tutangin anch: “Anamakwam, chindany yawonsu musangar piukumanany kupak kwa yoziu; ijikany anch kupak kwa ritiy ren kukutwalany mu kukasikan.” (Yakob 1:2, 3) Chawiy chimwing, Rom 5:3-5 utulejin anch: “Tukwet musangar mu yakamish yetu; twij anch yakamish yikat kwendish kutujikish; ni kujikish kukat kwendish kashinsh, ni kashinsh kakat kwendish ruchingej; ni ruchingej kirukutwoviship usany.” Chawiy anch twajamish nakash katat mu yoziu mulong wa mwikadil wetu wa Ukristu, tukez kwikal awanyishinau nawamp kujamish nakash mu yoziu mu ditenchik dined dia yom.

Yehova Ukez Kuyifut Amena Mar

16. Chom ik chikezay kusal Yehova mulong wa ant ni in kupesh akezay kufut kurutu oku mulong wa mar mau?

¹⁶ Ap pituburedina yom ya ku mujimbu mulong wa rupompat ap kutuzengol tumen mar mulong wa kumwambat Kristu, tukutwish kwikal asanger pa kwijik anch Yehova ukez kutufut sens. Chilakej, kudi antu amwing adinga nich ruchingej ra kuya mwiur, kambuy Paul wayifundina anch: “En . . . [wasangeranya] kusheshik kwa yom ya uswan wen, mulong wijikany anch en ayinen ukwetan uswan upandikena kuwap ukushakam chikupu” mudi anyikel mu Want wa Nzamb. (Hebreu 10:34) Ni tongin musangar ukezau kwikal nich mwishin mwa umutakel wa Yehova ni Kristu pa kuyinkish antu akeza kushakam pa divu yiyukish yamushena mu magand masu. Mazu manam ma kambuy Paul madi makin mudi ku mutambu wa in Kristu ajamishina: “Am nitongin anch mar ma pa muten winou kimilikenip nich uyaj ukeza kamekan kudi etu kurutu.”—Rom 8:18.

17. Chom ik chikezay kusal Yehova mulong wa antu amusadidila nich kushinshaman akweta katat ruchingej ra kushakam pa divu?

¹⁷ Chawiy chimwing, chikalap nchik chikutwishau kushadish katat antu akweta ruchingej ra kushakam pa divu ap kuyilik mulong wa kumusadil kwau Yehova, ukez kuyifut nich yom yivud nakash ku yikezay kusal ku machuku ma kurutu. Ukez kuyinkish mwom uwanyidina, wa chikupu mu paradis pa divu. Mu mangand minam masu, Yehova “ukez kayikuswol mansoj mawonsu ku mes kwau; kukez kikalip kand rufu; ap kukez kikalip kand madil, ap kushikok kudil, ap kusansan, kwamwamu kand.” (Kuburik 21:4) Kushilamu kwamushena mudi ik! Kwikil chom tukutwisha kulik kwa kwikatin ap bwat mu mangand ma katat mulong wa Yehova chikutwisha kwilikan nich mwom wamushena wezinaku, ukezay kuyinkish atushalapol end ashinshamena akujamisha mu mar.

18. Kushilamu ik kwongojina kutwinkishinay Yehova mu Dizu diend?

¹⁸ Mar minam mitukutwisha kujamishin makezap ap pakemp kwilikan nich musangar wa mwom wa chikupu mu mangand masu ma Nzamb. Yom yiney yawonsu akez kuyibwik kudi mikadil yiwamp ya musangar mu mangand masu. Isay 65:17, 18 utulejin anch: “Yom yawonsu ya pakur akez kayivuramen. Sangarany ni kuzangijal chikupu mulong wa yitang yisu.” Chawiy kand, chalondinay Yakob mwanamakwend a Yesu anch: “Antu akata kwiman dang, tuyij akwet musangar.” (Yakob 5:11) Inge, anch twajamish nich kushinshaman mu mar ma katat, tukwisakin katat ni mu machuku ma kurutu.

Ov, Mutapu ik Ukwakula?

• Mutapu ik wasambishau antu kuman mar?

• Ov, mar makutwish kuyiletin antu akeza kuyikel divu yom ik?

• Ov, mulong wak tufanyidina kusangar katat chikalap nchik mar?

[Chipich chidia pa paj wa 18]

Anvaj etu a kusambish adinga nich dikez diamushena kurutu kwau

[Chipich chidia pa paj wa 20]

Kujamish mu mar kwakwasha kumutenchik Yesu ikal Mwant muwamp ni Mwin Kupesh wa pa Mutu

[Chipich chidia pa paj wa 22]

Atwimbuy ‘asangara kuyovish usany mulong wa ritiy rau’