Mar Mawonsu Makupwa Katat Kamu Ak!

Pa chisu chimwing mu mwom wey, washikenap kal ku kwiyipul anch, ‘Ov, mulong wak kudia mar mavud mwamu?’ Mu kusut kwa tunan twa mivu, dijuku dia muntu diashikedin kal ku kuman mar majim nakash mulong wa njit, wa uzwendj, wa yinship ya mar, wa chisum, wa kasolikany, wa mayej ni rufu. Mivu chitot yasutina ey yameken kwikal ya mar nakash kupandakanamu yikwau. Ov, mar minam mawonsu makez kupwa?

Chakul cha rongoj chidi anch inge, ni makupwa katat kamu ak! Dizu dia Nzamb, Bibil, dilondil anch: “Antu ayimp kakwikalikup kand . . . Pakwez itudishila akez kaswan ngand, akez kusangar mu kuvul kwa chisambu.” Mu chirung cha mivu yinch? “Mwin kutentam ukez kaswan ngand, ukez kashakamamu chikupu.”—Kuseng 37:​10, 11, 29.

Kupwa kwa Nzamb kudiosh uyimp ni mar, divu akez kudikarumun dikala paradis. Chawiy lel antu akez kutwish kushakam chikupu nich ukash wa mujimbu uwanyidina ni mu mazang. Dizu dia Nzamb diasambela kulond anch: “[Nzamb] ukez kuyikusol mansoj mawonsu ku mes mau. Kukez kwikalap kand rufu, ap madil, ap kwishikokin, ap kusansan.”—Kujingunik 21:4.

Mu mangand minam masu, ap afu akez kuyisangul chakwel asangera yiyukish yiney: “kukez kikal disanguk ni kudi ayingila ni kudi afila nich.” (Midimu 24:15) Chawiy chatwishay Yesu kumwel mwin kusal uyimp wakarumuka ni wamekesha ritiy mudiay ndiy anch: “Ey ukwikal ni yamam mu Paradis.”—Luka 23:43.

Ov, Mulong wak Mar Masambisha?

Mulong Nzamb wayitenchikina antu kwikal nich dikez dined dipandakena kuwap, ov, mulong wak walikay mar masambisha? Ov, mulong wak umalikidinay chisu chilemp mwamu?

Payitangay Adam ni Eve, Nzamb wayisala awanyidina ku mujimbu ni mu manangu. Ndiy wayiteka mu chir, mu paradis ni wayinkisha mudimu wa kusal usangareshina. Bibil ulondil anch: “Nzamb wamana yom yawonsu yatangay, ni kuyital yading yiwamp kamu.” (Disambishil 1:31) Ang amuziyila Nzamb, ela kuval an awanyidina, ni divu diela kwikal diawonsu paradis, pelau antu kushakam chikupu mu chisambu ni musangar.

Nzamb wateka mudiay Adam ni Eve katok kapandakena kuwap ka want ipau wa kwitondil mud chikunku cha chitangil cha muntu. Kelap kwikal mud arobo bwat. Pakwez, kudandamen kwa musangar wau kwadinga kwengamidin pa kusadil want ipau wau wa kwitondil mwi njil yitentamina—kusutil ku kuziyil ku yijil ya Nzamb. Nzamb ulondil anch: ‘Yam Yehova Nzamb wen, Yam nikata kukufundish mulong wa kuwap kwey, Yam nikata kukulej njil yiufanyidina kuya.’ (Isay 48:17) Kusadil kuyimp kwa want ipau wa kwitondil kwaleta mar, mulong antu kayitangap chakwel ikala atwishina yawonsu pakad kwengamin kudiay Nzamb. Bibil ulondil anch: ‘Chitwishikinap kud muntu wadiokal ku divu kutakel njil yend. Chitwishikinap kud muntu ukata kwend kutakel rizau rend.’—Jeremiy 10:23.

Cha ushon, anvajetu a kusambish atonga anch akutwish kwikal akad kwengamin padiay Nzamb ni kutwish mu yawonsu. Pakwez, pa chisu chadjibwilau kwa winyikel wa Nzamb, ndiy walika kuyikwash ni ashadisha kuwanyin kwau. Chawiy chasambishau kusheshik pakemp-pakemp ni chakin ashikena ku kunanap ni kufa. Chitudia anau, chawiy twaswana kuburen kuwanyin kwinoku ni rufu.—Rom 5:12.

Mulong Ujim—Nany Ukweta Mbil ya Kuyikel

Ov, mulong wak Nzamb walika kuyijip Adam ni Eve chakwel atangirila kand ikundj ni mband indjing? Mulong ukaleng wa Nzamb autadika, chirumburikin anch, mbil yend ya kuyikel. Chipul chadinga anch, Nany ukweta mbil ya kuyikel, ni winyikel wa nany ufanyidina? Mu kujimb kwach, Ov, antu akutwish kusal nawamp anch Nzamb kayikedilap? Mu kuyishil chisu chifanyidina chakwel kusadil want ipau wau, Nzamb ukutwish kumekesh kapamp kamwing ni chikupu anch antu akutwish kwikal nawamp mwishin mwa umutakel wend ap mwishin mwa umutakel wau ayinau. Chisu chashau chikadil kal chilemp chifanyidina chakwel antu apakisha milad ni milad ya chipolitik, ya mwikadil wa chisak, ya ekonomi, ni yitenchik ya chirelijon yakad kwengamin padiay Nzamb.

Chisu chibudikin? Tunan twa mivu twa rusangu ra muntu tutulejin anch kwiwejidin kal mar ma mitapu kushalijan. Mu mivu chitot yasutila ey, chisak cha muntu chamen mar mapandakena nakash. Antu mamiliyon ayijipa pa chirung cha Njit ja Mangand ja Kaad. Mamiliyon 100 ni kusut ayijipa kwi njit. Chisum ni kujipan yipalangen. Kusadil kwa mon ya kulewish kupalangen mu mangand mawonsu. Mayej makata kusamburikin kwi njil ya masandj madandamedin kupalangan. Antu makum ma mamiliyon afil pa muvu ni muvu nich nzal ni misong. Mwom wa dijuku ni usey wa mwikadil yawil kal pansh kwawonsu. Kwikil winyikel wa muntu ap umwing ukutwisha kupwish milong yiney. Kwikil winyikel ap umwing watwishina kal kupandakan upal, mayej, ni rufu.

Mwikadil wa antu udi mud kamu mwasambelay Bibil kulond piur pa yisu yetu. Dizu dia Nzamb dijimbwil yisu yetu mud “machuku ma kwisudiel” ma ditenchik dined dia yom pakwikal “yom yikash.” Ni mud mwalonday kamu Bibil, “antu ayimp ni in makasu akukudil mu kuyip ni mu kuyip nakash.”—2 Timote 3:1-5, 13.

Nsudiel ya Mar Yashejin Kal Piswimp

Uman winou wawonsu ulejen anch tudi piswimp ni nsudiel ya kupakish kuyimp kwa antu kwa kwishakamin pakad kwengamin padiay Nzamb. Chameken kal patok anch umutakel wa antu wakad kwengamin padiay Nzamb ukangeny. Ching kusu winyikel wa Nzamb wawiy ukutwisha kulet chisambu, mazang, ukash wa mujimbu uwanyidina, ni mwom wa chikupu. Chawiy kulikidil kwa Yehova kwa uyimp ni mar kwashejin kal piswimp nich nsudiel. Piswimp ap Nzamb ukez kwandam mu milong ya antu kusutil ku kushesh ditenchik dined diawonsu diyimp dia yom.

Uprofet wa Bibil ulondil anch: “Pa chisu cha in kutakel inay [wintakel wa antu udiaku nlel unou], Nzamb wa mwiur ukez kukasikesh want ukwau [mwiur] wakad kwez kwikal nich disudiel chikupu. . . . Ukez kushesh mant makwau mawonsu [wintakel udiaku ou], chad wawiy ukez kushakam chikupu.” (Daniel 2:44) Kuchidij ukaleng wa Yehova, mbil yend ya kuyikel, kusutil ku Want wend wa mwiur mawiy malejan majim ma Bibil. Pisambinay chikunku cha usey cha chijingidij cha “machuku ma kwisudiel,” Yesu walonda anch: “Ni katumb kawamp ka want akez kukalejan ku mangand mawonsu, kakez kikal uman kudi michid yawonsu; chawiy lel disudiel chidikweza.”—Mateu 24:14.

Piyikweza nsudiel, ov, nany ukeza kupand? Bibil wakwil anch: “Antu atentamina akez kaswan ngand, ni antu akashinsh akez kashakamamu, pakwez antu ayimp akez kayidiosh mwi ngand.” (Jinswir 2:​21, 22) Antu atentamina adi in akata kwilej rusot ra Yehova ni akat kurisal. Yesu Kristu walonda anch: “Kupand kwin kwa chikupu kwawiy oku, chakwel akwijika ey Nzamb wakin, ni watuma ey, ndiy kamu Yesu Kristu.” (Yohan 17:⁠3) Inge, “Mangand mayil ni kujiy . . . , pakwez muntu mwawonsu ukata kusal rusot ra Nzamb ukez kupand chikupu.”—1 Yohan 2:17, Manswik Masu.

Ching anch ayilejen, mifund yawonsu ya Baibel yidiamu yidiokil mu Mukand wa Nzamb wa Uruund.