Ov, Mulong Wak Mwin Kutesh Malembil Ulikidil Mar?

AP ANCH antu avud akutwish kulembil, antu amwing akat kwidjidjek anch Nzamb udiaku. Ov, mulong wak idjidjekin mwamu? Pamwing ap chidi mulong amen mutapu udia mar mavud pa mangand. Ov wiyipulap kal mulong wak Nzamb ulikidil mar?

Ov, chakin kamu Nzamb wayitanga antu chakwel mutapu udiau katat—akad kuwanyin ni amena mar? Chikutukasiken nakash kumulimish nzamb ukweta rutong ra kuyimeshish antu mar. Pakwez shinshikin chinech: anch ukat kwendin nawamp mu motak wey musu kupwa watan anch chitokish chimwing cha kasu ka nzembu chayip kal, ov, ukulond anch mwotak winou ausala mwamu? Bwat kwau! Ukulond anch chapu chinech chasala motak winou “pakad chilim” ni anch chom kanang ap muntu kanang mukwau ndiy washesha chitokish chinech cha kasu ka nzembu.

Chilik chimwing, anch twasanger kuburen kanvundangesh mu yom yatangau ni kushinshikin kanvundangesh ni kwijond kudia mu majuku ma antu, ov, tukushiken ku kulond nchik? Bibil ulejen anch Nzamb wayitanga antu aad akusambish awanyidina pakwez kwinyim kwa machuku iletina ayinau uyimp. (Kuvurik Yijil 32:4, 5) Rusangu ruwamp ridi anch Nzamb wakana kupwish uyimp—kuyichirish antu in kuziyil ku kuwanyin. Pakwez, mulong wak wachingela chisu chilemp mwamu?

Mulong Wak Wachingela Chisu Chilemp Mwamu?

Diyingish diading disadil pamwing nich chipul chamuntu ufanyidina kuyikel antu. Yehova katenchikap anch antu akez kwiyikel ayinau. Ndiy wadinga Nyikel wau. Bibil amwinend ulondin anch: “Kwikil muntu ukutwisha kutakel mwom wend amwinend.” (Jeremiy 10:23) Chaushon, kutond kwa kusambish kwa muntu watonda kubwambwil pantaliken ni winyikel wa Nzamb. Chisal chau chakad kufanyin chayishikija ku chitil. (1 Yohan 3:4) Mudi chibudikin, awiy ashadisha kuwanyin kwau ni iletina uyimp ayinau ni anau.

Mu tunan twa mivu, Yehova walikidila antu chakwel iyikela ayinau, ni rusangu ramekesha anch antu kakwetap ukaliweny wa kwiyikel ayinau. Chimeken kamu patok anch, wintakel wawonsu wa antu uletining mar. Kwikil utwishina kunongish njit, chisum, kasolikany, ap mayej.

Ov, Mutapu ik Ukeza Nzamb Kupwish Uyimp?

Bibil wakana anch Nzamb ukez piswimp ap kulet mangand masu matentamina. (2 Pita 3:13) Ching kusu antu atondina nich want ipau wau kumekesh rukat kudi umwing ni mukwau ni kudi Nzamb awiy akezau kutwishish kushakamamu.—Kuvurik Yijil 30:15, 16, 19, 20.

Bibil ulondin kand anch “dichuku dikurumburishay Nzamb” dishejidin piswimp swa, Nzamb ukez kunongish mar ni awiy amaletina. (2 Pita 3:7) Kupwa, Nyikel watekay Nzamb, Yesu Kristu, ukuyitakel antu in kuziyil. (Daniel 7:13, 14) Ov, winyikel wa Yesu ukuwanyish yom ik? Bibil ulondin anch: “Pakwez itudishila akez kaswan ngand, akez kusangar mu kuvul kwa chisambu.”— Kuseng 37:11.

Mudi Mwant wa mwiur, Yesu ukez kudiosh uyimp—kuwejinaku mayej, upal, ni rufu—yadiokala ku kubwambwil kwa antu pantaliken ni Yehova, “musul wa [mwom] kupand.” (Kuseng 36:9) Yesu ukez kuyeril antu awonsu itiyina winyikel wa rukat. Mwishin mwa umutakel wend, kushilamu kwinoku kwa Bibil kukwikal kwakin:

◼ “Kwikil muntu ap kusu umwing ushicha mwi ngand yetu ukeza kinan kand mulong wa kuyel, chad yitil yawonsu akez kayilikishin.”—Isay 33:24.

◼ “Ndiy [Nzamb] ukez kuyikusol mansoj mawonsu ku mes mau. Kukez kwikalap kand rufu, ap madil, ap kwishikokin, ap kusansan, mulong yom yikur kiyamekanap kand.”—Kujingunik 21:4.

Ov, chikasikeshinap kwijik anch kurutu oku Nzamb ukez kuwanyish kushilamu kwend kwa kupwish mar mawonsu? Katat, tukutwishap kushadish ruchingej anch uteshin malembil metu mulong ulikidil mar nlel unou.

Nzamb udiaku. Ukutwish kukutesh, ap mazu mey ma mar ni runeng. Ni usangaredin kukuman ushakama pa chisu kwidjidjek ni mar mey yikeza kupwa.