Ikalany Piswimp ni Mwin Kutesh Malembil

ANTU avud alondina anch itiyijin mudiay Nzamb kakutwishap kulejan patok ritiy rau. Ni kakutwishap kurumburil mulong wak relijon uding uyimp yisu yivud ap mulong wak Nzamb ulikidil mar. Pa chinech, chawonsu chikutwishau kusal chidi kulembil kusu Nzamb wakadau kutesh.

Pakwez, ukutwish kumushejin Yehova piswimp. Ukutwish kukasikesh ritiy rey pa chovu cha Nzamb chikusadila umukata ni kumusend nich usey. Ritiy rakin rimedin pa uman. (Hebereu 11:1) Anch wilej uyakin piur pa Nzamb, ukutwish kumwijik ni kwambamb nend mudi murund. Shinshikin yamanau antu amwing alembila ap anch ading nich kwidjidjek piur pa kwikalaku kwa Nzamb.

◼ Patricia, walejanangau mu mutu wa mulong wa kusambish. “Dichuku dimwing nadinga mu chisak cha arund dikum asambisha kwisambin piur pa relijon. Nading nayilejin kal anch nadiokil ku chikumbu mulong wa kwipuk mambamb pakach pa tatukwam, wading wakad kwitiyij kwikalaku kwa Nzamb, ni mband umwing udia Kaman wa Yehova, weza kwol kwetu. Murund nam umwing walonda anch ‘Atuman a Yehova alonda pamwing ap chom chakin.’

“Mukwau walonda anch ‘ov, mulong wak tuyilap ku yikumangan yau chakwel tujingunina yom?’ Twasal mwamu. Ap anch twading akad kwitiyij, pakwez amwing pakach petu adandamena kukumangan mulong wa urund wadingau nich Atuman.

“Pakwez, Diarubing dimwing natesha chom chimwing chaswimpa chitongijok cham. Mwin kulond warumburila piur pa mulong wak antu amena mar. Nading kandikal niteshap anch muntu wading kwinsambishil uwanyidina ni anch chitil ni rufu yasambisha ni muntu umwing ni kupwa yapalangana kudi antu awonsu. Mwin kulond warumburila kand mulong wak rufu ra Yesu rading rifanyidina chakwel kuyichirish antu ku yom yashadishay muntu wakusambish.a (Rom 5:12, 18, 19) Kapamp kamwing, natesha yom yawonsu. Natonga anch, ‘kudi chakin kamu Nzamb utubangidina.’ Nadandamena kwilej Bibil ni mu kusut kwa machuku, kapamp ka kusambish mu mwom wam, najingunina anch nifanyidin kulembil kudi muntu wakin kamu.”

◼ Allan, ulejenau kand kwinsambishil kwa nimero winou. “Dichuku dimwing Atuman a Yehova eza kwol kwetu, ni mukajam wayandjika mu chikumbu mulong wading usangaredin yom yalondau piur pa kushakam chikupu pa divu. Nova kuyip. Chawiy lel, angendj ashala bil mu kapalikany ka mambamb, namutazuka mukajam mwimpish ni namuleja anch, ‘Kangal kwikal chisup. Ukutwishap kwitiyij yom mudi yiney!’

“Wangakula anch ’ ‘Chiwamp, chawiy lel, andam kusu mwinomu ni yinkisha uman umekeshina anch yilondinau yidi ya makasu.’

“Chakin, kinatwishap kulet mayingish ap mamwing. Pakwez ading in rukat nakash ni anshila mukand umwing ulejena anch mwom autanga ap wikalaku kusutil ku dikarumun. Wading woviken nawamp ni uswapela kwitiyij chawiy nakwata mupak anch nifanyidin kwijik yivud piur pa Nzamb. Nasambisha kwilej Bibil ni Atuman, ni kupwa najingunina anch yadingay ni kulond yading yishalijadin nakash ni yom yawonsu nadinga nitiyijina pakusambish piur pa relijon. Mudi kamu nileja piur pa Yehova, nasambisha kumulembil mu mutapu wa kashinsh. Nading ni yaku yiyimp, chawiy lel nalembila chakwel kutambul ukwash. Niyovil chakin anch Yehova wakula ku malembil mam.”

◼ Andrew, ushicha mu Angleterre. “Ap anch nading ni yitongijok yikash ni kusanger nakash siyans, nitiyija malejan ma dikarumun mulong kusu antu akwau ashikena ku kulejan anch madi makin. Nalika kwitiyij mudiay Nzamb mulong wa yom yawonsu yiyimp yisadikina.

“Pakwez, yisu yimwing natonga anch: ‘Anch kudi Nzamb utadila pinap, chawiy lel nisotil kwijik kurumburik kwa yom yiney yawonsu. Mulong wak kudi chisum ni njit?’ Chisu cha mar, nalembila yisu yimwing mulong wa ukwash, pakwez nadingap nija nany nadinga ni kulej.

“Kupwa muntu umwing wamwinkisha mukajam trakt wapalangeshau kudi Atuman a Yehova ukweta mutu wa mulong ulondina anch: Le monde actuel survivra-t-il ? Yisu yivud nading ni kutongijokin nakash pa chipul chinech. Trakt wansala nitongina piur pa Bibil, ‘Ov, yakul yend yikutwish kwikal yifanyidina kushinshikin?’ Kupwa, panadinga mu konje, muntu umwing wangikisha buku La Bible : Parole de Dieu ou des hommes ?b Pinajingunina anch Bibil wovijadin nich siyans wakin, niyova anch nifanyidin kwilej yivud piur pa Bibil. Chawiy lel panlejay umwing wa Atuman a Yehova kwilej nend Bibil, nitiya. Pinashikena ku kutesh rutong ra Yehova, niyova anch namwijik kal mudi muntu wakin, muntu nikutwisha kwambamb nend nich want ipau mu malembil.”

◼ Jan, mwan mband wapamina mu Mishon mu Londres. “Rubabek ra relijon ni mwikadil wa mar yamubachika kudiokal mu relijon. Nalika kand kuya ku shikol ya piur ni nasambisha kubul kidar mulong wa nfalang. Chading mwamu chisu twasankanijana nenday Pat. Wapamina mu Katolik ni wading wikadil kal wakad ritiy mudi am.

“Twashakama mu chikumbu cha kad antu pamwing ni antu akwau avud adinga alikin kal shikol adinga asangaredina mu marelijon ma Mwimputu wa kwingangel. Kupwa, uchuku twasala saa umwing mu mambamb makash piur pa kurumburik kwa mwom. Ap anch am ni Pat twadingap twitiyijina mudiay Nzamb, twova anch kufanyidin kwikal ‘usu kanang watanga mwom.’

“Kupwa kwa kuya kwindum kwa Angleterre mu kukimb kwa mudimu wa kuwang mizik, mwanetu wavadika. Wayela uchuku umwing, ni nalembila amwinam kudi Nzamb wakad am kwitiyij. Machuku ma kurutu kupwa kwa chinech, urund wam nenday Pat washeshika, ni nasenda mwanam ni nadiokala naya. Nalembila kakwau mulong wa kwit ukwash, mudi kamu kwading muntu wadinga uteshina. Nadingap nija chinech, pakwez Pat wasala chilik chimwing.

“Kupwa kwa dichuku dined, Atuman a Yehova aad akokala ku chis cha Pat ni kumulej yiyul yimwing ya Bibil ya kusadil. Pat wantazuka ni wangita anch nikutwish kwitiy kwilej nend pamwing Bibil ni Atuman. Kupwa twileja anch chakwel tumusangaresha Nzamb afanyidin kufund uruu wetu kudi mburmatad. Chamekana mudi chom chimwing chikash nakash pa kuman mwikadil uyimp wa urund wetu.

“Twasota kwijik yivud piur pa kuwanyin kwa uprofet wa Bibil, chisadila anch kwikala mar, ni kurumburik kwa Want wa Nzamb. Pakemp pakemp, twajingunina anch Nzamb ukat kubangin, ni twasota kusal mudi mutapu ulondilay. Twatijana. Manangu ma Dizu dia Nzamb matukwasha kuyilil anetu asatu. Tukwet kashinsh anch Yehova watesha malembil metu.”

Shinshikin Amwiney Uman

Mudi mamiliyon ma antu akwau, antu ajimbwilau mu mutu wa mulong winou anch in relijon wa makasu kayilejap yom yivud ni kajinguninap mulong wak Nzamb ukat kulikidil mar. Ov, wamanang anch kutesh uyakin wa Bibil kwawiy kwayitiyisha antu inay umwing ni umwing anch Yehova chakin kamu ukat kutesh malembil?

Ov, ukusot kushinshikin uman ulejena anch Nzamb udiaku? Atuman a Yehova akez kusanger kukukwash kwilej uyakin piur pa Yehova ni pa mutapu ukutwishakwikal piswimp ni mwin ‘Kutesh malembil.’—Kuseng 65:2.

[Mazu madia kwishin kwa paj]

[Tablo wa jinsangu udia pa paj wa 10]

“Pinashikena ku kutesh rutong ra Yehova, niyova anch namwijik kal mudi muntu wakin, muntu nikutwisha kwambamb nend nich want ipau mu malembil”

[Chipich chidia pa paj wa 9]

Ritiy rakin rimedin pa uman ni pa kuswir kwa kwijik uyakin piur pa Nzamb