Chipul cha 3: Ov, Mulong wak Nzamb Ulikidil Chakwel Nimana Mar?

TATUKWEND a Ian wading chinamar mukash. Ap anch Ian wapama nich yom ya ku mujimbu yading yiswiridinay, ndiy waburena ukwash wa yovil yasotay kutambul kudi tatukwend. Ian ulejen anch: “Kinadingap ap pakemp nich rukat mulong wendend, nakash mulong wa kuna kwend ni mutapu wadingay ni kumumesh makwam mar.” Pikalay Ian mukurump, ndiy wasambisha kwiyipul piur pa kwikalaku kwa Nzamb. Niyipula anch “‘anch Nzamb udiaku chakin kamu, ov, mulong wak uyilikidil antu chakwel amana mar?’”

Ov, mulong wak kwipul? Ap anch ukwetap milong mu mwom wey, rusot rey ra kutentam rikutwish kunenganen piumena antu akad mulong amena mar. Pakwez, chipul piur pa mar chidi kamu cha usey kud ey, mudi Ian, yikokujol yikutwish kutushiken ap mukatish netu ukutwish kuyel ap kufa.

Mutapu ik wakwilau antu amwing? Antu amwing itiyijin anch Nzamb ulikidil mar mulong wa kutulej chakwel twikala in kwitudish ni twikal ni riy. Antu akwau amening anch antu amen mar mu mwom mulong wa yitil yasalau pasak mu mwom wau.

Ov, yakul yiney yilejen ik? Nzamb kakatap kubangin piur pa mar ma antu, chinech chawiy chiyikangeshininga antu kumukat. Nzamb udi mwin chisum.

Ov, chom ik chifundishinay Bibil? Bibil ulejen patok anch Nzamb kakatap kulet mar ma antu. “Kangal walond anch: ‘Nzamb wangoza.’ Mulong Nzamb kakumwozangap nich kuyip, niyend Nzamb kakumwozangap muntu.” (Jakobu 1:13) Chawiy lel, chitongijok cha kwel anch Nzamb uletin mar chambatenap nich mutapu ulejenay Bibil piur pa untu wa Nzamb. Ov, mutapu ik chidia mwamu?

Yimwing ya ngikadil ya kusambish ya Nzamb yidi rukat. (1 Yohan 4:8) Mulong wa kukasikesh chitongijok chinech, Bibil ulejen anch Nzamb ukwet yovil mudi ya maku ukata kuyilil an. Nzamb wipwil anch: “Ov, komb mband ukutwish kumuvuramen mwanend, ni kulik kumukat mwan uvadilay? Ap anch mband wamuvuramena mwanend, am kinikutwishap kukuvuramenany en.” (Isay 49:15) Ov, ukutwish kutong anch maku ukutwish kumumesh mar mwanend? Pakwez, nvaj wa rukat, ukusot kukepish mar ma mwanend. Chilik chimwing, Nzamb kakatap kuyimeshang mar antu akad mulong.—Disambishil 18:25.

Ap mwamu, antu akad mulong amen mar. Ukutwisha kwiyipul anch, ‘anch Nzamb utubangidin ni udi wa dikand diawonsu, mulong wak kakutwishap kudiosh yom yawonsu yiletina mar?’

Nzamb ulikidil chakwel mar madandamena kwikalaku ni nlel unou mulong wa mayingish mawamp. Shinshikin diyingish dined dimwing: Yisu yivud adi antu akata kuyimeshang mar antu akwau. Antu avud akata kuyizengol akwau ni kuyimesh mar kasotiningap kukarumun yaku yau. Chawiy lel, pakwel anch Nzamb adiosha yom yiletina mar, ndiy ukez kuyishesh antu inay ayimp.

Palejanay mulong wak Nzamb kayisheshinap ni katat antu ayimp, kambuy Pita wafunda anch: “Nsalejetu kalabilap mulong wa kuwanyish kushilamu kwend mudi mukat kutongau antu amwing. Ndiy ukat kukushimpishinany muchim, mulong kasotilap muntu ap umwing kusheshik, pakwez usotil antu awonsu kukarumuk kudiokal ku yitil yau.” (2 Pita 3:9) Kushimpish muchim kwa Nzamb kumekeshin untu wend wa rukat ni wa riy.

Piswimp ap, Yehova Nzamb ukez kusal. Ndiy ukez ‘kuyimesh mar awiy ayimeshina mar antu akad mulong.’ Antu ayimeshina antu akwau mar pakad mulong “kadimu kakez kuyilejau kakez kwikal kusheshik kwa chikupu.”—2 Tesalonik 1:6-9.

Ian, twisambinang kwinsambishil, watana yakul yisangareshina ku yipul yend piur pa mar. Yilejay yakarumuna mutapu wend wa kuman mwom. Tang rusangu rend pa paj wa 13 wa Chinong cha Kalam cha Kalang 1, 2012 mu Français.

Chakwel wijika yom yivud piur pa mulong wak ulikidilay Nzamb mar ni chom ik chikezay kusal, tal shapitre wa 11 wa buku Chom ik Chakin Kamu Chifundishinay Bibil? Buku winou udia pa kapend ka Web www.jw.org

[Kamushet kadia pa paj wa 9]

Ov, Yesu Walonda Yom ik Piur pa Mar?

Yesu kalondap anch Nzamb ndiy musul wa mar madinga ndond yadingay. Chinyim nich chinech, walonda yom yilondwila ey.

Yesu wamekesha anch Nzamb kakatap kuyipup antu akad mulong kusutil ku kuyiletin mar. Yesu wayoka ayej, ayishet, ni amputames. (Mateu 15:30) Yilay yasalay yitufundishin yom yaad ya usey: chakusambish, Yesu wasadila usu wa Nzamb chakwel kukepish mar, pikil mulong wa kumalet. Cha kaad, Yesu kayokap antu pakad chibachikin kanang. Payimanay antu amena mar, “wayovila riy.” (Mateu 20:29-34) Yesu wamekesha mu mutapu uwanyidina yovil ya Tatukwend piur pa mar. Chawiy lel, kusutil ku mazu ni yisal ya Yesu, twilejin anch Nzamb unenganen mulong pamenay kwikalaku kwa mar ni usotil kumadiosh.—Yohan 14:7, 9.

Yesu walejana musul wakin wa mar mavud mamenau antu​—Satan Djabul. Yesu walonda anch: “Ndiy kamu, . . . Kudiokal ku disambishil kamu ndiy wading mwin kujipan.” (Yohan 8:44) Yesu walejana kand piur pa Satan Djabul anch: “mwin kutakel wa mangand minam” ni mwin “kuyipumbol antu a mangand mawonsu.”—Yohan 12:31; Kujingunik 12:9.

Yesu utwinkishin ruchingej ra chisu chikeza kupwa mar mawonsu. Wayileja in kwilejend kulembil anch: “Tatukwetu udia mwiur, . . . Want wey weza. Rusot rey arusala pansh mudi mwiur.” (Mateu 6:9, 10) Anch Want wa Nzamb wez, kukezap kwikal mar ap mamwing pa divu, mudi kamu mudia mwakad mar ap mamwing mwiur.

Mu kujingunin kwa mwinkishau kambuy Yohan, Yesu urumburil chikeza kwikal mwom kudi awiy akushakama mwinshin mwa Want wa Nzamb. Pa chisu chinicha, Nzamb “ukez kuyikusol mansoj mawonsu ku mes mau. Kukez kwikalap kand rufu, ap madil, ap kwishikokin, ap kusansan, mulong yom yikur kiyamekanap kand.”—Kujingunik 1:1; 21:3, 4.