Ilejina ku Dizu dia Nzamb

Ov, Nzamb Ukez Kulet Winyikel wa Mangand?

Mutu wa mulong winou wisambidin pa yipul yiukutwisha kutongijokin ni umekeshin kwisu ukutwisha kutan yakul mu Bibil wey. Atuman a Yehova akez kusanger kwisambin pa yakul yiney pamwing ney.

1. Ov, mulong wak antu aswiridin winyikel wa mangand?

Nlel unou, milong ya antu yidi pa mangand mawonsu. Mu michid yimwing, antu avud adi atuzwendj, ni ayimeshin mar. Mu michid yikwau, antu avud ameken anch akwet kuswir kwa yom yivud. Ching kusu winyikel ukeza kuyikel pa mangand mawonsu wawiy ukutwisha kupan yom pa divud pakad kutond.—Tang Mulej 4:1; 8:9.

2. Ov, anany akezau kwinkish winyikel wa mangand?

Chitongijok cha mwin kuyikel mangand kakatap kuchitiyang kudi antu avud mulong kwikil ikundj ap mband ukutwisha kusal mudimu winou nawamp. Kwikil muntu ukutwisha kusal anch antu awonsu amwitiya. Chikwau kand, nany ukutwisha kwipuk kumukatul milamu? Chitongijok cha kwel anch muntu umwing uyimeshina antu akwau mar ukutwish kuyikel pa mangand mawonsu chiletin wom.​—Tang Jinswir 29:2; Jeremiy 10:23.

Yehova Nzamb wamutonda Mwanend, Yesu, chakwel ayikela pa mangand chikupu. (Luka 1:32, 33) Yesu wasala yom padingay pa divu. Padingay pinap, ndiy wayoka ayej, wayileja in kwitudish, ni washakama ni an. (Marko 1:40-42; 6:34; 10:13-16) Chawiy chimekeshina anch Yesu udi mwing Kutakel wa kashinsh.—Tang Yohan 1:14.

3. Ov, winyikel wa mangand ukutwish kwikalaku?

Nzamb wamuteka Mwanend chakwel ayikela pa divu kudiosh mwiur. (Daniel 7:13, 14) Antu akata kuyikel kakwetingap kuswir kwa kwikal mu mal mawonsu makatau kuyikel, Yesu niyend kakwetap kuswir kwa kwikal pa divu mulong wa kuyikel padi antu.—Tang Mateu 8:5-9, 13.

Ov, antu awonsu amwitiyin Yesu mudi Ntakel? Bwat. Ching kusu antu akatina uwamp awiy akeza kumwitiy. Yehova ukez kuyidiosh pa divu antu amulikina Ntakel wa rukat ni utentamina watekay.—Tang Mateu 25:31-33, 46.

4. Ov, chom ik chikezau kusal kudi mwin Kutakel mangand?

Mudi mukatay kafung kuyikumangej amikoku end, Yesu ukat kuyikumangej antu itudishina adiokila ku mangand mawonsu ni kuyilej jinjil ja Nzamb ja rukat. (Yohan 10:16; 13:34) Antu inay akatin nakash kumukwash Yesu ni want wend. (Kuseng 72:8; Mateu 4:19, 20) Antu ashinshamena kudi Yesu pa mangand mawonsu akat kulejan mu uumwing anch Yesu wikadin kal Mwant.—Tang Mateu 24:14.

Piswimp ap Yesu ukez kusadil dikand chakwel kuyikol antu ku winyikel uyimp. Ndiy wayitonda in kumulondul end ashinshamena chakwel ayikela pa divu mudi ant pamwing nend mwiur. (Daniel 2:44; 7:27) Want wa Yesu ukez kwizwish divu nich ronganyin ra Yehova ni ukez kutek paradis mudi washadishau kwinsambishil kwa rusangu ra antu.—Tang Isay 11:3, 9; Mateu 19:28.

Chakwel wileja yom yivud, tang shapitre 8 wa buku winou, Chom ik Chakin Kamu Chifundishinay Bibil?, wapalangeshau kudi Atulam a Yehova.