Nany Udia Mwant wa Want wa Nzamb?

• Afanyina kumutond kudi Nzamb. “[Namuswanishin kal] mwant wam, . . . nikukwinkish michid yawonsu kwikal uswan wey, ni ngand yawonsu yikwikal yeyey.”—Kuseng 2:6, 8.

• Wafanyina kwikal nswan wa Mwant David. “Mwan wavadika mulong wa kutukwash etu! Atwinkish kal mwan ikundj! . . . Kuyikel kwend kukez kadandamen kujimb, ni want wend ukez kadandamen mu chisambu. Ndiy ukez kaswan pa ditand dia Mwant David.”—Isay 9:5, 6.

• Wafanyina kuvadikin mu Betlehem. “Ey, ul wa Betlehem . . . , mukach mwa antwey nikez kamubudish mwin kutakel . . . antu awonsu adia pa mangand akez kitiy anch, ndiy udi mwant mujim.”—Mike 5:1, 3.

• Afanyina kumudiwul kudi antu ni kumujip. “Kwikil muntu ap umwing wamubangaku, ap kumutalaku. . . . Mulong wa yitil yetu yawiy yamutapodilau yitat. Amubula mulong wa kuyip kwetu.”—Isay 53:3, 5.

• Afanyina kumuvumbul ni kumwinkish ndond ya uyaj. “Kiukutwishap kwitiy mupim wam kufa, kiukutwishap kumulik mukarukat ney kuya mwi ndond ya afu . . . , ku chikas chey cha katatuku kudi misangar ya mivu ni minang.”—Kuseng 16:10, 11, TMK.

Yesu Kristu Ndiy Kamu Uwanyidina Kuyiyikel Antu

Mu rusangu rawonsu ra antu, kudi kwau ching muntu umwing ndiy uwanyishina yom yawonsu mulong wa kwikal Mwant muwamp, ni muntu winou udi Yesu Kristu. Mwangel umwing wasambela kumulej Mariy, makwend a Yesu anch: “Nzamb ukez kumuswanish pa ditand dia want diading dia ngakiril wend David, . . . Want wend kiukez kupwap!”—Luka 1:31-33.

Yesu kikalap mwant pa divu. Pakwez ukuyiyikel antu kudiokal mwiur mudi Mwant wa Want wa Nzamb. Yom ik yikumwikadisha Yesu Mwant upandakena kuwap? Shinshikin yom yasalay chisu chadingay pa divu.

• Yesu wading uyibangidin antu. Yesu wayikwashang amakundj nau amband, ansand nau amapal chikalap nchik ndond yishichau ap mashakamin mau. (Mateu 9:36; Marko 10:16) Chisu chamwilembilau kudi muntu wading uyedina musong wa mak anch: “Anch ey ukatil, ukutwish kwingok,” Yesu wamwovila riy nakash ni wamwoka.—Marko 1:40-42.

• Yesu watufundisha mutapu wa kumusangaresh Nzamb. Walonda anch: “Kiukutwishanyap kusadil kapamp kamwing Nzamb ni mapit ma pa mangand.” Walonda kand anch tufanyidin kuyisadin antu akwau mutapu tukatina anch atusadin etu. Kupwa, walejana anch Nzamb kakatap ching kusu kushinshikin yom tusadina, pakwez ukat kushinshikinang kand yitongijok ni yovil yetu. Chawiy, mulong wa kumusangaresh Nzamb, tufanyidin kushinshikin yovil yidia mu muchim wetu. (Mateu 5:28; 6:24; 7:12) Yesu wateka kashony pa kulond anch mulong wa kwikal ni musangar wakin, tufanyidin kwilej yom yikatinay Nzamb anch etu tusal ni kuyisal.—Luka 11:28.

• Yesu wafundisha mutapu wa kuyikat antu akwau. Mazu ni yisal ya Yesu yading yikwet usu nakash, chawiy yapukuna michim ya antu ading amuteshina. “Chisak chijim cha antu ashimwoka nakash mulong wa malejan mend. Mulong ndiy kalejanap mudi alej a Yijil, pakwez walejana mudi muntu ukweta ulabu.” (Mateu 7:28, 29) Wayileja anch: “Yikatany akankuny nen.” Wayilembila kand ap antu amwing amujipa anch: “Tatuku, yilikishina! Mulong awiy kijap yom yisadilau.”—Mateu 5:44; Luka 23:34.

Mulong udi mwin kuyikwash antu ni udimukina, Yesu uwanyidin nakash kuyikel mangand. Pakwez chisu ik chikusambishay kuyikel?